Trenem Olgeta Taem Oli Smol Yet
OL STADI we ol man oli mekem tede, oli soem se “bebi we i stap yet insaed long bel blong mama, i muvmuf taem hem i harem voes blong ol man.” Winnipeg Free Press i tokbaot ol man we oli stadi long saed ya long Yunivesiti blong Not Karolaena, se oli “faenem we sipos mama i ridim wan buk long pikinini we i stap yet insaed long bel blong hem, afta we pikinini ya i bon, hem i haremsave taem mama i ridim semfala buk ya bakegen long hem.” Taem ol woman we oli gat bel oli ridim wan buk wetem bigfala voes, maet samting ya i save givhan blong makem ol gudfala fasin long tingting blong pikinini ya. Baebol i talem se Timote i ‘savegud ol tok blong Baebol taem hem i pikinini yet.’ (2 Timote 3:14, 15) I klia se mama blong hem mo bubu woman blong hem, oli luksave se i impoten tumas blong trenem hem taem hem i smol yet. Mo yumi sua se long trening ya, oli bin ridim buk long hem wetem bigfala voes.
Wan man blong raetem buk, nem blong hem Jim Trelease, i talem se fasin blong rid i “wan samting we i gat moa paoa long laef blong man bitim ol narafala samting tede.” Lanwis mo fasin blong toktok i save kamgud moa sipos wan man i rid wetem bigfala voes.
I waes blong rid wetem bigfala voes long pikinini blong yu, stat long taem we yu jes stat toktok wetem hem. Nating se bebi blong yu we i no bon yet, no i jes bon nomo, i no kasem save long samting we yu stap talem, be ol gudfala samting we oli save kamaot biaen, oli soem se i impoten blong mekem olsem. Proveb 22:6 i talem se: “Tijim pikinini boe blong yu long rod ya we i stret blong hem. Taem bambae hem i kam olfala, be hem i no save lego rod ya samtaem.”
?Wanem sam samting we yu save ridim we oli gud mo we bambae oli givhan long pikinini? Ridim Baebol wetem bigfala voes long pikinini blong yu evri dei. Mo tu, ridim sam narafala gudfala buk, olsem buk ya Listening to the Great Teacher, My Book of Bible Stories, Man We i Hae Moa Long Ol Narafala Man, mo sam haf blong Wajtaoa mo Wekap!
I tru se, blong mekem olsem i nidim taem, be taem ya we yu givim i no blong nating nomo. Hem i wan nambawan rod blong soem se yu kea mo yu laekem tumas pikinini blong yu.