?Yu Yu Rimemba?

?Yu yu glad blong ridim ol Wajtaoa we oli jes kamaot? Sipos yes, traem ansarem ol kwestin ya:

◻ Jisas i talem se, “Sipos yufala i fogivim man from sin blong hem, hemia God i fogivim hem, i tekemaot sin blong hem.” ?Hemia i minim se ol Kristin oli save fogivim sin? (Jon 20:23)

I no gat wan tok long Baebol blong soem se God i givim paoa long ol Kristin, mo long ol elda blong kongregesen tu, blong oli save fogivim sin. Ol vas raonabaot long tok blong Jisas oli soem se tru long tabu speret, ol aposol oli kasem spesel paoa ya blong fogivim sin no blong no fogivim sin blong man. (Lukluk Ol Wok 5:​1-​11; 2 Korin 12:12.)​—4/15, pej 28.

◻ ?Wanem wan nambawan samting long saed blong buk blong Ol Sam we J. J. Stewart Perowne i transletem, mo we oli prentem fastaem long 1864?

Taem Perowne i tanem buk blong Ol Sam, hem i traehad blong “folemgud fasin blong lanwis Hibru, long saed blong fasin blong toktok, mo long fasin blong joenem ol wod.” Taswe, hem i agri blong putum nem blong God “Jeova” i gobak long Baebol.​—4/15, pej 31.

◻ ?Jisas i givim wanem advaes long ol man blong hem long fasin blong olgeta blong obei long ol gavman blong wol?

Jisas i talem se: “Samting we i blong Sisa, yufala i givimbak long Sisa. Samting we i blong God, yufala i givimbak long God.” (Matyu 22:21) Hem i talem tu se: “Sipos wan soldia blong ol man Rom i fosem yu blong yu karem basket blong hem wan kilomita, olsem we hem i gat raet blong mekem, be yu mas karem i go wan kilomita moa bakegen.” (Matyu 5:​41) Long vas ya, Jisas i stap eksplenem rul ya se i stret blong mekem samting we narafala i askem yu blong mekem sipos i no bitim mak. Nating se wan man nomo i askem yu, no gavman i askem yu, yu save obei sipos i no agensem loa blong God. (Luk 6:​27-​31; Jon 17:14, 15)​—5/1, pej 12.

◻ ?Blong ‘wokbaot long trutok’ i minim wanem? (Ol Sam 86:11)

I minim se yumi mas obei long ol rul blong God mo mekem wok blong hem wetem strong bilif mo fulhat blong yumi. (Ol Sam 25:​4, 5; Jon 4:​23, 24)​—5/15, pej 18.

◻ ?Taem Jeova i sanem Jona i go long Nineve, samting ya i soemaot wanem?

Samting we i kamaot se, wok blong prij blong Jona long Nineve i soem se ol man Nineve we oli tanem tingting blong olgeta from sin oli no olsem ol stronghed man Isrel, we oli no gat bilif mo tingting daon nating. (Skelem wetem Dutronome 9:​6, 13; Jona 3:​4-​10.)​—5/15, pej 28.

◻ ?Hu ya Snek mo hu ya “woman” we Jenesis 3:​15 i tokbaot?

Snek i no minim wan prapa snek, be hem i man ya we i yusum snek, Devel Setan. (Revelesen 12:9) “Woman” i no Iv, be hem i ogenaesesen blong Jeova long heven, mama blong ol tabu Kristin we oli stap long wol ya. (Galesia 4:​26)​—6/1, pej 9.

◻ ?Olsem wanem wan man i save kamaot long Bigfala Babilon mo faenem wan sefples? (Revelesen 18:4)

Hem i mas seraot fulwan long olgeta gyaman skul mo long ol kastom mo tingting blong ol skul ya. Mo biaen, hem i mas joen long tiokratik ogenaesesen blong Jeova blong faenem sefples. (Efesas 5:​7-​11)​—6/1, pej 18.

◻ ?From wanem Baebol i tokbaot igel plante taem?

Ol man blong raetem Baebol oli tokbaot ol fasin blong igel olsem pijatok blong eksplenem waes, fasin blong God blong protektem man, mo fasin blong mufmuv kwik.​—6/15, pej 8.

◻ ?Ol man blong God tede we oli gat hop blong laef long wol ya, oli save kasem plante tabu speret olsem ol tabu Kristin no no gat?

Ansa hem i yes. Tabu speret blong God i stap rere blong tufala grup ya evriwan oli kasem sem mak nomo, mo tufala i save kasem waes mo save we i sem mak tu.​—6/15, pej 31.

◻ ?From wanem i gud long yumi tede blong stadi long tabu wok we ol pris blong Isrel oli mekem long haos prea long Jerusalem?

Taem yumi luklukgud long wok we oli mekem, bambae yumi gat moa tangkyu from rod we God i mekem wetem fasin sore, blong ol sinman tede oli save gat pis bakegen wetem Hem. (Hibrus 10:​1-7)​—7/1, pej 8.

◻ ?Olsem wanem seken haos prea we oli bildim long Jerusalem, i moa naes bitim hemia we Solomon i bildim?

Seken haos prea i stap 164 yia moa bitim haos prea blong Solomon. Plante moa man blong wosip oli aot long plante moa kantri, oli kam long yad blong hem. Samting we i moa impoten se, seken haos prea ya i kasem wan spesel blesing, hemia se Pikinini blong God, Jisas Kraes, i tij insaed long yad blong hem.​—7/1, pej 12, 13.

◻ ?Wetaem God i stanemap haos prea blong hem long saed blong speret?

Hemia long yia 29 K.T. taem God i soem se hem i agri long prea we Jisas i mekem long baptaes blong hem. (Matyu 3:​16, 17) Fasin ya we God i agri taem Jisas i givim bodi blong hem i minim se, i gat wan olta i stat wok long saed blong speret, we i hae moa long hemia long haos prea long Jerusalem.​—7/1, pej 14, 15.

◻ ?From wanem yumi mas fogivim narafala?

Blong holem Kristin fasin joengud, yumi mas fogivim hemia we i mekem i no stret long yumi mo i kam talem sore. Fasin agens mo fasin blong stap kros longtaem bambae i tekemaot pis long tingting blong yumi. Sipos yumi no save fogivim narafala, maet wan dei, Jeova i no moa save fogivim sin blong yumi. (Matyu 6:​14, 15)​—7/15, pej 18.

◻ ?Olsem wanem ol man Isrel oli save kam tabu?

Oli save kam tabu long wan rod nomo: Oli mas frengud wetem Jeova we i tabu God, mo oli mas mekem wosip we i tru mo klin. Oli nidim stret save long saed blong “Hemia we i Tabu Olgeta” blong wosip long hem long tabu fasin, mo long fasin we oli klin long saed blong bodi mo long saed blong speret. (Proveb 2:​1-6; 9:​10)​—8/1, pej 11.