Wan Gudfala Taem Blong Ol Sid Oli Gru Long Ekwetorial Gini

FASWAN samting we wan man i luk taem hem i kamdaon wetem plen long intenasnal epot blong Ekwetorial Gini, hemia ol grin bus we i grugud. I gat plante bigbigfala tri oli stap raonabaot long ples ya we plen i kamdaon long hem, mo oli mekem ol haos blong epot ya oli luk smol nomo. Ol grin gras mo tri oli stap grugud, stat long solwora i go kasem antap long ol hil. Hemia from bigfala ren we i stap foldaon, mo from we ples i hot olsem 85 digri long ful yia.

Be, i gat wan narafala fasin blong grugud i stap kamaot naoia long Ekwetorial Gini, hemia fasin blong ‘grugud we God i stap givim.’ (Kolosi 2:​19) Plante man long kantri ya oli olsem haeman Itiopia ya we i askem Filip blong halpem hem. Oli wantem tumas blong kasem save long Baebol. (Ol Wok 8:​26-​39) Ol Wetnes blong Jeova oli no sapraes taem wan man i blokem olgeta long rod blong askem olgeta blong stadi Baebol wetem hem. I gat raonabaot 325 Wetnes long Ekwetorial Gini, we oli stap mekem bitim wan taosen Baebol stadi wetem ol man.

Sakem Sid Longtaem Bifo

Ekwetorial Gini, hem i wan kantri we i smol moa i bitim ol narafala kantri long Afrika. Hem i stap long saot blong Naejeria mo Kamerun. (Lukluk map.) Faswan taem we gud nyus i kasem ples ya, hemia taem sam Wetnes blong Naejeria oli kam blong faenem wok long ol plantesin blong kakao. Long taem ya, oli bin statem sam kongregesena long lanwis blong Engglis, be biaen oli no moa gohed from we ol brata ya oli mas gobak long Naejeria. Ale, kantri ya i kasem independens long 1968, mo smoltaem biaen, tri misinari blong Watchtower oli kam wetem ol woman blong olgeta, blong wok long ples ya. Ol misinari ya oli no save stap longtaem from we i gat trabol i kamaot long saed blong politik long kantri ya. Be smol wok blong prij we oli bin mekem, i karem gudfala frut.

Santiago, wan long ol misinari ya, i mitim Buenaventura. Hem i wan longfala man, we i bigfala tu, mo ol manples oli singaotem hem se supaman. Hem i wan man we i strong long skul blong hem mo i gat respek long Baebol, be hem i gat fasin blong kam kros tumas. Wan smol tok nomo we narafala i sakem long hem, i save mekem hem i kros we hem i kilim man ya. Sipos hem i stap long wan ba, nao wantaem nomo hem i kam kros, olgeta man insaed long ba oli ronwe kwiktaem. Sam long olgeta oli jyamaot long ol windo, blong hem i no kilim olgeta. Yes, taem hem i stap lesin long Santiago, hem i gat tingting se bambae hem i kilim brata ya sipos hem i no save pruvum olgeta tok blong hem long Baebol. Hem i stap tingting se: ‘I no gat wan man we i save gyaman long supaman.’ Hem i intres tumas long ol samting we hem i harem. Hem i intres moa long hop ya blong laef we i no save finis long paradaes long wol ya. Ale, hem i agri blong stadi Baebol.

Taem stadi i stap gohed, tingting ya blong Buenaventura blong wantem laef blong olwe long Paradaes, i kam strong moa. Mo hem i lanem se sipos hem i wantem kasem praes ya, hem i mas mekem laef blong hem i laenap wetem ol rul blong God. Hem i luksave se trufala Kristin i no mas ‘givimbak long man we i mekem nogud long hem,’ ale, hem i stat traehad bigwan blong jenisim fasin blong hem blong kam kros tumas.​—Rom 12:17.

Bigfala traem i kasem hem wan dei taem hem i mestem nao i kafsaedem dring blong wan man long ba. Man ya i kam kros mo i kilim hem. Wantaem nomo, ol narafala man long ba oli ronwe, from we oli ting se wan bigfala faet bambae i kamaot. Be long kwaet fasin, Buenaventura i pem praes blong kap ya we hem i brekem, i pem wan narafala dring blong man ya, mo i talem sore long hem from we hem i no bin lukaotgud. Taem ol man raonabaot oli luk se stadi blong Baebol i jenisim hem olsem, sam long olgeta oli wantem we hem i stadi Baebol wetem olgeta. Ale, taem Buenaventura i tekem baptaes, hem i stap mekem faef Baebol stadi wetem ol narafala man. Long ol faef yia we oli jes pas, hem i wok olsem wan elda. Ol man oli gohed yet blong singaotem hem se supaman, be naoia oli mekem olsem blong tok plei nomo.

‘Oli Luksave Se Oli Nidim Ol Samting Long Saed Blong Speret’

Long ol yia biaen long 1970, smol grup blong ol Wetnes we oli stap long kantri ya, oli traehad blong gohed long wok blong prij mo blong mekem miting tugeta. Biaen, sam misinari blong Spen wetem ol woman blong olgeta, oli kam blong givhan. Andrés Botella, we i wok blong 12 yia finis long Ekwetorial Gini, i rimemba se taem hem i jes kam nomo, hem i sapraes bigwan blong luk olsem wanem ol man oli rili ‘luksave se oli nidim ol samting long saed blong speret.’ (Matyu 5:3) Hem i se: “I rili givim bigfala glad long mi taem mi stadi Baebol wetem ol man we oli gat tangkyu olsem.”

Mary, wan sista blong Spen, i stap stadi Baebol wetem wan yangfala woman we nem blong hem María. Yangfala woman ya i talem se papa mama blong hem, Francisco mo Fausta, oli wantem stadi tu. Mary i stap mekem 15 stadi finis, mo papa mama blong María oli stap longwe tumas, taswe plante wik i pas bifo we hem i gat jans blong visitim tufala.

Taem Mary mo man blong hem, Serafín, oli faenem papa mama blong woman ya, oli luk se tufala ya i gat buk ya Yu Save Laef Foreva Long Paradaes Long Wolb finis wetem wan Baebol, mo tufala i wantem tumas blong statem stadi blong tufala. Taswe oli stat wantaem nomo. Serafín i luksave se papa mama blong María tufala i savegud ol samting we tufala i stap stadi long hem long buk ya. Sem samting i hapen taem oli kambak blong storeyan wetem tufala long japta tu. Serafín i tingtingbak se: “I olsem we mifala i stap mekem stadi wetem tu Wetnes we oli baptaes finis.” Long namba tri taem we oli stadi, Serafín i talem se bambae hem i askem kwestin long tufala blong luk hamas samting tufala ya i kasem save finis long hem, from we i luk olsem se tufala i savegud olgeta tok blong buk ya finis. !Hem i faenemaot se Francisco mo Fausta tufala i bin stadi finis long fulwan buk ya, tufala nomo!

?Nyufala save ya we tufala i faenem, i mekem wanem long tufala ya? Folem samting we tufala i lanem, tufala i no moa go long ol miting blong toktok wetem ol rabis speret, mo tufala i no moa go long Katolik Jyos. Mo tu, Francisco i no moa smok, mo tufala i no moa kakae mit we blad i stap yet long hem. From we i klia se tufala i folem finis kolosap evri samting we tufala i bin lanem, oli leftemap tingting blong tufala blong serem save blong tufala wetem ol narafala man. Wantaem nomo, tufala i stat blong prij long ol man raonabaot. Long tri manis nomo, tufala i naf blong tekem baptaes. Naoia Francisco i wan man blong givhan long kongregesen. Mo from gudfala eksampel blong tufala, mo fasin blong tufala blong wok had long wok blong prij, tri long ol pikinini gel blong tufala oli Wetnes naoia. Tu pikinini boe blong tufala oli stap kam long ol miting, mo sikis narafala famle blong tufala oli stap stadi.

I no longtaem afta we Francisco i baptaes, hem i mitim Pablo, wan Katolik we i strong long bilif blong hem, mo we i stap mekem wan spesel wok blong lukaot long ol tabu samting insaed long jyos. Taem pris i no stap, Pablo nao i mekem toktok insaed long jyos. Sipos wan memba blong jyos i sik, hem i go visitim sikman ya. Sipos wan man i mestem blong kam long jyos, Pablo i go luk hem blong leftemap tingting blong hem. Mo sipos wan man i ded, hem i traem bes blong hem blong mekem famle blong man ya i haremgud bakegen. I klia from wanem ol memba blong jyos oli laekem Pablo tumas.

From we Pablo i gat bigfala respek long Baebol, hem i glad tumas taem Francisco i wantem mekem stadi wetem hem. Kwiktaem nomo, Pablo i luk se mesej blong Baebol i tru tumas. Afta we hem i stadi blong smoltaem, hem i gat tingting blong yusum sam vas we hem i bin lanem, taem hem i mekem “visit blong leftemap tingting” blong ol memba blong jyos we oli sik. Smoltaem biaen long samting ya, long wan tok blong Pablo long Sande, hem i eksplenem from wanem i impoten tumas blong yusum nem blong God, Jeova, mo from wanem yumi no mas yusum ol aedol.

From we hem i bilif long trutok kwiktaem nomo, hem i ting se ol narafala memba blong jyos blong hem bambae oli mekem olsem tu. Be afta we Pablo i bin mekem tri no fo tok we oli stanap long Baebol, hem i luksave se ol man oli no glad tumas long save we hem i stap givim long olgeta. Taswe, hem i mekem disisen blong lego jyos mo blong joen wetem ol Wetnes blong Jeova. Sam manis nomo biaen, hem i naf blong tekem baptaes, mo naoia hem i wan man we i wok strong blong talemaot gud nyus. Nating se hem i no save prij fultaem, hem i stap mekem ten Baebol stadi.

Ol Miting Oli Givhan Blong Mekem Ol Sid Oli Gru

Ol Wetnes long Ekwetorial Gini oli tinghevi long oda blong Baebol blong no lego ol miting. (Hibrus 10:25) Stat long 1994, taem gavman i agri long wok blong ol Wetnes blong Jeova, ol brata oli wantem tumas blong wokem ol gudfala Haos Kingdom. Yes, bighaf blong ol kongregesen oli bildim finis prapa Haos Kingdom blong olgeta, mo samfala oli stap bildim naoia.

Long Mongomo, samtaem namba blong ol man we oli kam long miting long Sande, i tu mo haf taem antap long namba blong ol pablisa blong Kingdom. Long ples ya, kongregesen i stap wok strong blong bildim wan bigfala haos blong mekem miting long hem. Kolosap oltaem, ol narafala skul long Mongomo oli pem sam wokman blong bildim ol jyos haos blong olgeta. Taswe, ol man ples oli luksave se wok blong ol Wetnes blong Jeova long ples ya i defren. Wan dei, pasta blong Iglesia Nueva Apostólica (Nyu Apostolik Jyos) i kam long ples we ol brata oli stap bildim haos ya long hem, blong askem long wan elda se hamas mane hem i stap pem ol man ya we oli stap wok strong. Pasta ya i talem se, nating we hem i bin pem sam memba blong jyos blong hem blong oli kam putum brikis, wok ya i stap gohed slou tumas. Hem i wantem save sipos hem i save pem ol wokman we oli stap bildim Haos Kingdom ya, blong oli kam wok blong hem. Taem hem i harem se ol Wetnes ya oli no kasem pei blong wok ya, hem i tanraon mo i goaot we hem i sapraes bigwan.

Samfala man we haos blong olgeta i stap longwe long Haos Kingdom, oli mas traehad bigwan blong kam long olgeta miting. Juan, wan yangfala man we i tekem baptaes long 1994, i fesem traem olsem. Hem i harem trutok long Gabon, mo long ples ya hem i bin stadi long faswan haf blong buk ya Laef Foreva. Nao hem i gobak long velej blong hem long Ekwetorial Gini, we i stap raonabaot 100 kilomita longwe long Mongomo. Samting ya i mekem i hadwok long hem blong gohed blong stadi. Be hem i no lego. Evri manis, hem i mekem longfala trep blong eit haoa long baskel blong hem, i go kasem Mongomo. Long ples ya, wan elda we nem blong hem Santiago, i mekem stadi wetem hem. Hem i stap sam dei long Mongomo, mo i stadi tri no fo taem long olgeta dei ya. Long rod ya, hem i kam naf blong finisim stadi blong hem mo blong tekem baptaes.

?Olsem wanem Juan i save stap strong long saed blong speret, taem hem i no joen plante wetem ol narafala Kristin? Bigfala samting se, hem i gohed strong long wok blong talemaot gud nyus. Hem i prij finis long olgeta man long velej blong hem, mo long taem we hem i tekem baptaes, hem i stap mekem 13 Baebol stadi. Sikis long ol studen ya oli kam wetem hem long spesel dei asembli long Mongomo, blong luk hem i tekem baptaes. Naoia, hem i stap mekem Wajtaoa Stadi evri wik wetem olgeta man long ples blong hem we oli intres, mo long evri miting i gat samwe long 20 man oli kam lesin.

Givim Wora Long Ol Sid Wetem Longfala Tingting

I no olgeta man evriwan we oli save gru kwiktaem long saed blong speret. Samtaem i nidim longfala tingting blong longtaem, bifo we sid i karem frut. Samting ya i tru long saed blong Paca. Faswan taem we hem i harem gud nyus, hemia long 1984. Long taem ya, Edita, wan paenia sista, i prij long hem long maket. Wan wik biaen, Edita i visitim Paca long haos blong hem. Paca i agri blong stadi Baebol. Nating se Paca i no stap gru kwik long saed blong speret, Edita i gohed blong mekem stadi wetem hem, from we hem i luksave se Paca i gat sam gudfala fasin. Edita i eksplenem se: “I luk olsem se hem i wan sipsip, mo mi prea long Jeova blong i mekem ol tok we hem i lanem oli kasem hat blong hem.”

Paca i gohed blong stadi long fo mo haf yia, we i stap mekem stadi sam samtaem nomo. Be hem i no stap grugud long saed blong speret. Taswe, taem oli finisim Laef Foreva buk, Edita i toktok stret wetem Paca blong soemaot klia long hem se i impoten we hem i tinghevi long trutok. Taem Edita i stap traehad olsem blong kasem hat blong Paca, hem i krae tu.

Paca i tingbaot se: “Advaes ya we hem i givim long mi wetem fulhat blong hem, i rili gat paoa long mi. Long taem ya nao, mi stat jenisim laef blong mi. Mi joen long Tiokratik Skul, mo long sem yia ya, mi kam wan pablisa we i no baptaes yet. !Dei we mi tekem baptaes, hem i dei we mi glad bitim olgeta narafala dei long laef blong mi!” Strong tingting mo glad we Paca i soem tede, i defren olgeta long fasin blong hem bifo we hem i slak mo i no kea nating. Hem i stap mekem 13 Baebol stadi, mo yes, hem i gat longfala tingting wetem olgeta we oli no gru kwik long saed blong speret.

Halpem Ol Man Blong Mekem Laef Blong Olgeta i Kamgud Moa

Ol Wetnes blong Jeova long Ekwetorial Gini oli mekem laef blong olgeta i laenap wetem ol rul blong Baebol. From samting ya, oli kasem gudnem olsem ol man we oli no gyaman, mekem stret fasin mo soem respek. Wan man, we i laekem tumas gudfala fasin blong olgeta, i kam luk wan elda long kongregesen blong Bata, mo i askem se: “?Yu yu gat buk ya Reasoning?c Mi mi taed finis blong folem ol fasin blong wol ya. !Mi wantem kam wan Wetnes blong Jeova!”

Antonio, wan man blong givhan long kongregesen blong Malabo, i wan gudfala eksampel blong soemaot olsem wanem wan man we i folem ol fasin blong wol i save jenisim fasin blong hem mo kam wan Wetnes. Bifo we hem i stadi long Baebol, hem i folem ol rabis fasin nomo long laef blong hem. Bighaf blong ol mane we hem i kasem long wok blong hem blong fiksimap ol hanwaj, hem i westem long ol strong dring, mo hem i stap slip olbaot tu. ?Wanem samting i halpem hem blong jenisim fasin blong laef blong hem? Strong tok blong 1 Korin 6:​9, 10 i rili gat paoa long hem, i se: “Yufala i no mastik long samting ya. Man we i stap ronem woman, . . . mo man we i stap dring we i lusum hed, . . . bambae oli no save go insaed samtaem long nyufala wol ya we God i king long hem.” Hem i luksave se sipos hem i wantem we God i glad long hem, hem i mas jenisim fasin blong laef blong hem. Blong mekem olsem, hem i stat lukaot se hem i jusumgud ol fren blong hem. (Proveb 13:20) Taem sam fren blong hem blong bifo oli singaotem hem blong go dring wetem olgeta, hem i no go. Long defren fasin, hem i prij long olgeta. I no longtaem biaen, oli no moa askem hem blong go wetem olgeta.

?Ol traehad ya oli blong nating nomo? Antonio i eksplenem se: “Mi mi glad tumas se mi jenisim laef blong mi. Helt blong mi i moagud, nating se mi kasem 60 yia finis. Be ol fren blong mi blong bifo, sam long olgeta oli ded finis mo sam narafala oli sik. Naoia mi gat ol trufala fren, i no olgeta we oli wantem wan fren nomo blong pem wan narafala dring blong olgeta. Samting we i moa impoten, se mi stap frengud wetem God. Mi stap wok naoia olsem wan fultaem paenia, mo mi gat wan Baebol stadi wetem wan man we i gat problem wetem alkol. Taswe, mi save yusum ol samting we i givhan long laef blong mi blong halpem hem.”

Kam Olsem Ol Slef Blong God

Samwe long 200 yia bifo, ol waetman oli karem ol man we oli stap laef kolosap long solwora long Ekwetorial Gini, oli go long Amerika blong wok olsem slef. Tede, plante man long ples ya oli mekem prapa disisen blong olgeta blong kam slef​—ol slef blong God. Fasin slef ya i mekem olgeta oli fri long trufala fasin. Oli kam fri long ol tijing blong Babilon mo long wok blong ol rabis speret. Mo tu, hem i tijim olgeta olsem wanem blong gat wan laef we i glad mo we i gat mining. Olgeta ya oli luk promes blong Jisas i kamtru long olgeta, taem hem i se: “Bambae yufala i save ol trutok, mo trutok ya bambae i mekem yufala i friman.”​—Jon 8:​32.

Long 1995, i gat 1,937 man we oli kam long lafet blong Memoriol long kantri ya​—kolosap sikis taem antap long namba blong ol pablisa long kantri ya. Samting ya i soem se wok long ples ya i save gru bigwan moa yet long saed blong speret. Taem ol Wetnes long Ekwetorial Gini oli gohed strong long wok blong planem mo givim wora long ol sid blong trutok, oli save sua se ‘God bambae i mekem ol sid ya oli gru gud.’ (1 Korin 3:6) !I sua se, naoia i rili gudfala taem blong wok long saed blong speret i gru moa long Ekwetorial Gini!

[Ol futnot]