!Tekem Spesel Jans Ya!

PETER i bin stadi longtaem finis blong kam wan dokta, nao hem i stat blong intres long mesej blong Baebol we i sevem laef blong man. Taem hem i kasem stefeket blong hem mo i stat mekem wok blong dokta long wan hospital, ol man we oli hae moa long hem oli pusum hem blong traem kam wan spesel dokta, hemia we i savegud mo i katem ol man from trabol long saed blong ol neva long bodi. Hemia wan nambawan jans we ol nyufala dokta oli stap tekem kwiktaem nomo.

Be, Peterb i mekem disisen blong lego jans ya. ?From wanem? ?From we hem i no gat strong tingting we i pusum hem blong wantem kam wan impoten dokta olsem? No gat. Pita i bin tingtinggud long saed ya finis. Afta we hem i givim laef blong hem long Jeova, mo tekem baptaes blong kam wan Wetnes blong Jeova, hem i wantem spenem moa taem blong mekem Kristin wok blong prij. Hem i tingting se, sipos hem i kam wan dokta blong nev olsem, bambae hem i spenem moa taem mo paoa blong hem long wok ya. ?Hem i krangke from we hem i lego nambawan jans ya, no hem i waes?

Long tingting blong samfala, ating disisen blong Peter i krangke nomo. Be, hem i tingtinggud long sam vas blong Baebol, olsem Efesas 5:​15, 16. Long vas ya, aposol Pol i pulum ol Kristin man blong mekem olsem: “Yufala i mas lukaotgud long ol fasin we yufala i stap mekem. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri jans we yufala i kasem blong wokem i gud, from we long taem ya nao, ol fasin nogud oli gat paoa.”

Plis makem tok ya se “evri jans.” Hem i kamaot long wan Grik tok, we plante taem Baebol i yusum blong tokbaot wan taem we i gat sam spesel samting blong makem hem, no wan taem we i stret blong mekem wan spesel wok. Long ples ya, Pol i soemaot klia se ol Kristin oli mas putum taem i stap blong mekem ol impoten wok. Yes, oli nidim blong ‘jusumaot ol samting we oli impoten moa.’ (Filipae 1:​10) Hemia i min se man i mas luksave ol samting we oli impoten moa long laef blong hem.

Oraet, ?wanem stampa tingting we God i gat long saed blong taem blong yumi naoia? ?God i wantem se olgeta we oli laekem hem oli mas mekem wanem? Ol profet tok blong Baebol oli soemaot klia se yumi stap long “taem blong en,” no ‘ol lasdei.’ (Daniel 12:4; 2 Timote 3:1) Jisas Kraes i talemaot klia wanem samting i impoten moa i bitim ol narafala samting long taem blong yumi. Hem i talem stret se bifo we rabis fasin blong wol ya i lus, yumi mas ‘talemaot gud nyus blong kingdom long olgeta ples long wol, blong wetnes long fes blong olgeta nesen.’ Afta long samting ya nomo, en i save kam.​—Matyu 24:3, 14.

Taswe, yumi mas tekem evri jans blong talemaot gud nyus blong Kingdom mo pulum ol man oli kam disaepol blong Kraes. (Matyu 28:19, 20) Bambae i no moa gat wan taem bakegen we yumi save mekem wok olsem. Hemia laswan jans we yumi gat blong yusum fulwan paoa blong yumi long wok ya we i save sevem laef blong ol man. ‘Naoia i taem we i stretgud olgeta.’ Yes, ‘tede i dei blong God i sevem man.’​—2 Korin 6:2.

Mekem Disisen We i Waes

Peter​—yangfala man we yumi bin tokbaot fastaem​—i tingtinggud long disisen we hem i mas mekem, mo i skelemgud ol defren rod we hem i save jusum. Hem i luksave se i no rong blong stadi blong kam wan dokta blong ol nev blong bodi. Be, ?wanem samting we i impoten moa long hem? Hemia Kristin wok blong prij, from we hem i luksave se smoltaem nomo i stap blong mekem impoten wok ya. Long semtaem, hem i gat sam narafala wok we hem i mas mekem. Hem i mared mo i mas lukaot long woman blong hem, we i stap mekem wok blong prij fultaem. (1 Timote 5:8) Mo tu, Peter i gat sam kaon blong pembak from edukesen we hem i bin kasem. Taswe, ?hem i mekem wanem disisen?

Peter i mekem disisen blong wok olsem wan dokta we i tekem pija mo i yusum sam narafala spesel mesin tu, blong lukluk wanem samting i rong insaed long bodi blong man. Sipos hem i mekem wok ya, bambae ol haoa blong wok blong hem oli no plante tumas. Mo tu, bambae hem i kasem trening blong hem long ol haoa blong wok nomo. Yes, maet samfala oli ting se wok ya i no hae olsem narafala wok we hem i save mekem, be wok ya i givim moa taem long hem blong mekem ol wok long saed blong speret.

Wan narafala samting i pulum Peter blong mekem disisen ya. Hem i no jajem ol narafala we maet oli mekem wan disisen we i defren, be hem i save se sipos hem i joen tumas long ol wok blong wol, samting ya i save kam olsem wan denja long ol Kristin. Samting ya i save mekem se oli no moa lukaotgud long wok blong olgeta long saed blong speret. Yumi luksave samting ya from wan narafala eksampel long saed blong wok.

Wan man we i prij fultaem long saed blong Kingdom, i gat gudhan blong mekem ol naesfala pija. Taem hem i salem ol pija ya, hem i stap kasem naf mane blong pem ol samting we hem i nidim blong laef. Taswe, hem i save spenem bighaf blong taem blong hem long impoten Kristin wok blong prij, mo long semtaem, wok blong hem blong mekem ol pija i sapotem hem long saed blong mane. Be, wan tingting i stat wok insaed long hem se hem i wantem mekem bisnes blong hem long saed blong ol pija i kam bigwan moa. Ale, hem i stat blong wok moa blong mekem ol pija mo joen long ol narafala samting long saed blong wok ya. Nao, hem i lego wok blong prij fultaem, mo sloslou hem i kam slak olgeta long saed blong wok blong talemaot Kingdom. Samtaem biaen, hem i mekem sam fasin we oli agensem Baebol, mo naoia hem i stap afsaed long Kristin kongregesen.c​—1 Korin 5:​11-​13.

Taem Blong Yumi Hem i Spesel

Yumi we yumi stap mekem wok blong Jeova naoia, yumi wantem stap strong long bilif blong yumi. Yumi save se yumi stap laef long wan taem we i spesel, i bitim ol narafala taem bifo. Sipos yumi wantem gohed oltaem blong mekem wok blong God mo blong winim ol trabol we yumi stap kasem tede, maet yumi mas jenisim sam samting long tingting mo laef blong yumi. Yumi save skelem taem ya wetem taem blong tekem kakae long garen. Hemia wan spesel taem blong wok, hem i wan taem we ol man blong wokem garen oli mas yusum moa paoa, mo oli mas wok plante haoa moa evri dei. ?From wanem i olsem? From we taem blong hivimap kakae long garen i gat wan stret taem blong hem i finis.

I gat smoltaem nomo i stap yet bifo we rabis fasin blong wol ya bambae i lus. Naoia wan trufala Kristin i mas wok strong moa i bitim olgeta taem bifo, blong folem eksampel blong Jisas mo wokbaot long rod we hem i bin soemaot. Laef blong hem long wol ya i soemaot klia wanem samting i impoten moa long tingting blong hem. Hem i talem se: “Taem delaet i stap yet, yumi mas mekem ol wok blong hemia we i sanem mi. Bambae tudak i kam, we man i no save wok.” (Jon 9:4) Taem Jisas i talem se naet i stap kam, hem i stap tokbaot taem we bambae hem i pas long kot, oli nilim hem long pos, mo hem i ded. Long taem ya, wok blong hem long wol ya bambae i finis, mo bambae hem i no moa save mekem ol wok blong Papa blong hem we i stap long heven.

I tru se, long tri yia haf we Jisas i prij, hem i spenem sam taem blong wokem ol merikel mo blong mekem ol sikman oli kamgud bakegen. Nating se i olsem, hem i yusum bighaf blong taem blong hem blong talemaot mesej blong Kingdom, mo blong ‘talemaot long ol man we oli stap kalabus’ long gyaman skul se oli save kam fri. (Luk 4:​18; Matyu 4:​17) Jisas i wok wetem ful paoa blong hem long wok blong prij, mo tu, hem i tektaem blong trenem ol disaepol blong hem blong bambae oli save gohed moa long faondesen we hem i bin putum, mo karem frut long wok blong prij we bambae oli gohed long hem. Jisas i tekem evri jans blong mekem wok blong Kingdom i go moa, mo hem i wantem se ol disaepol blong hem oli mekem sem mak.​—Matyu 5:​14-​16; Jon 8:​12.

Olsem Jisas, yumi ol man blong hem tede, yumi mas tingbaot laef blong ol man raonabaot long yumi long sem fasin we Jeova God i tingbaot olgeta. Taem we i stap yet, bifo we rabis fasin blong wol ya i finis, i stap kam sot moa. Mo God we i gat sore, i wantem se olgeta man oli gat jans blong kasem laef. (2 Pita 3:9) Taswe, ?yu ting se i moa waes blong putum wok blong Jeova i kam fastaem long ol narafala wok blong yumi? (Matyu 6:​25-​33) Long spesel taem olsem naoia, ol samting we maet oli impoten long tingting blong yumi, oli save kam olsem we oli no impoten tumas long laef blong yumi ol Kristin.

?Bambae yumi sore from we yumi putum wok blong God i stap fasples long laef blong yumi? No gat, from we fasin blong ol Kristin blong lego sam samting we olgeta nomo oli wantem, hem i karem ol nambawan blesing long olgeta. Eksampel, Jisas i talem long ol disaepol blong hem se: “Man we i livim haos blong hem, no brata no sista blong hem, no papa no mama blong hem, no pikinini blong hem, no graon blong hem, from we i man blong mi, no from we i man blong gud nyus blong mi, hem bambae i no save sot long ol samting ya. Tru mi talem long yufala, long wol ya bambae hem i save kasem wan handred taem antap bakegen, wanem samting we hem i livim, olsem haos, no brata no sista no mama no papa no pikinini no graon blong hem. Be ol man bambae oli mekem trabol long hem tu. Be long nyufala wol ya we bambae i kam, hem bambae i gat laef we i no save finis.”​—Mak 10:29, 30.

Yumi no save putum wan praes long ol blesing we ol man blong Jeova oli kasem, sipos oli yusum taem blong olgeta blong presem hem mo blong talemaot mesej blong Kingdom. !Oli haremgud long plante tumas blesing! Oli kasem ol trufala fren, oli haremgud from we oli stap mekem samting we God i wantem, God i glad long olgeta, mo tu, oli gat hop blong kasem laef we i no save finis. (Revelesen 21:​3, 4) !Mo hem i wan bigfala blesing tu blong halpem ol man long saed blong speret, mo stap olsem ol Wetnes blong Jeova we oli karem ona i go long tabu nem blong Hem! I sua se, yumi waes tumas mo bambae yumi kasem blesing, sipos yumi ‘yusum evri jans we yumi kasem.’ Naoia i taem blong joen moa long wok blong talemaot gud nyus blong Kingdom blong God, i bitim olgeta taem bifo. ?Bambae yu yu tekem spesel jans ya?

[Ol futnot]