?Wanem Samting i Impoten Moa Long Laef Blong Yu?

“Plis yu soemaot rod long mi, we mi mas folem.”​—OL SAM 143:8.

1. ?King Solomon i talem wanem long saed blong ol samting we man i ronem mo ol wok we man i mekem?

ATING yu yu luksave finis se laef i fulap long ol wok mo ol samting we yumi save intres long olgeta. Taem yu tingtinggud long ol samting ya, yu save makemaot sam samting we oli impoten. Sam narafala wok no intres oli no impoten tumas, no maet oli blong nating nomo. Sipos yu luksave samting ya, yu yu gat semfala tingting olsem wan man we i waes tumas, hemia King Solomon. Afta we hem i skelemgud olgeta wok mo pleplei blong laef, hem i luksave se: “Yu mas fraetgud long trufala God mo yu mas folem ol loa blong hem. From we hemia nao bigfala wok we man i mas mekem.” (Eklesiastis 2:​4-9, 11; 12:13) ?Samting ya i minim wanem long yumi tede?

2. ?Wanem bigfala kwestin we ol man we oli fraetgud long God oli mas askem, mo samting ya i save lidim olgeta blong askem wanem narafala kwestin bakegen?

² Sipos yu wantem ‘fraetgud long trufala God mo folem ol loa blong hem,’ ale, traem tingbaot kwestin ya: ‘?Wanem samting i impoten moa long laef blong mi?’ I tru se, maet yu no tingbaot kwestin ya evri dei, be i gud blong tingbaot naoia. Yes, hem i mekem yumi tingbaot sam narafala kwestin tu we oli kolosap sem mak, olsem se, ‘?Mi mi stap putum tingting blong mi i strong moa long prapa wok blong mi mo long ol sas samting? ?Haos, famle, mo olgeta we mi laekem olgeta tumas, oli impoten olsem wanem long laef blong mi?’ Maet wan yangfala i save askem se, ‘?Mi mi stap putum hamas taem mo mi stap putum tingting blong mi i strong olsem wanem long skul wok blong mi? ?I gat wan pleplei, spot, wan samting we mi mekem blong spel, no wan nyufala teknik we i pulum intres blong mi moa i bitim ol narafala samting?’ Mo tu, nomata hamas yia yumi gat no laef blong yumi i olsem wanem, i stret nomo we yumi askem se, ‘?Wok blong God i impoten olsem wanem long laef blong mi?’ Ating bambae yu agri se yumi mas jusumaot ol samting we oli impoten moa. Be, ?olsem wanem yumi save faenem help, mo wanem samting i save givhan long yumi, blong jusumaot ol impoten samting ya long waes fasin?

3. ?Ol Kristin oli mas mekem wanem blong jusumaot ol samting we oli impoten moa?

³ Stampa mining blong tok ya “impoten moa,” hemia wan samting we i kam fastaem long olgeta narafala samting, no wan samting we yumi mas putum long fasples. Sipos yu yu wan Wetnes blong Jeova no yu yu wan long olgeta milyan studen blong Tok blong God we oli stap joen wetem ol Wetnes, tingbaot tok ya we i tru tumas: “Blong evri samting i gat wan taem we i stret long hem. Yes, i gat wan taem blong evri samting aninit long heven.” (Eklesiastis 3:1) Blong folem tok ya, i stret we yu soemaot lav mo keagud long olgeta famle blong yu. (Kolosi 3:​18-​21) Hemia i minim se yu mas wok blong winim mane, mo pem olgeta samting we famle blong yu i nidim blong stap laef. (2 Tesalonaeka 3:​10-​12; 1 Timote 5:8) Mo blong jenisim smol sam samtaem, maet yu save tekem taem blong pleplei, spel, no mekem samting we yu haremgud blong mekem. (Skelem wetem Mak 6:31.) Be, taem yu tingtinggud, ?yu yu luksave se i no olgeta samting ya we oli impoten moa long laef? I gat wan narafala samting we i moa impoten.

4. ?Olsem wanem Filipae 1:​9, 10 i joen wetem fasin ya blong jusumaot ol samting we oli impoten moa?

⁴ Ating yu luksave se ol rul we Baebol i givim blong lidim yumi, oli save givhan bigwan long yu blong jusumaot ol samting we oli impoten moa mo blong mekem ol disisen we oli waes. Eksampel, tok blong Filipae 1:​9, 10 i talem long ol Kristin se, ‘oltaem oli mas gohed blong kasem moa stret save mo kam bigman long fasin luksave.’ ?Blong wanem? Aposol Pol i gohed se: ‘Nao bambae yufala i save jusumaot ol samting we oli impoten moa.’ ?Samting ya i tru tumas, no? Wetem stret save, wan Kristin we i gat fasin luksave hem i naf blong makemaot wanem samting we hem i mas intres long hem fastaem​—samting we i impoten moa​—long laef blong hem.

Eksampel Blong Samting We i Impoten Moa

5. Taem Baebol i tokbaot eksampel we Jisas i givim long ol Kristin, ?olsem wanem hem i soemaot samting we i impoten moa long laef blong Jisas?

⁵ Yumi faenem wan nambawan save long ol tok blong aposol Pita. Hem i se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:​21) Yes, blong faenemaot wanem samting i mas impoten moa long laef blong yumi, yumi save luklukgud long tingting we Jisas Kraes i gat long saed ya. Ol Sam 40:8 i talemaot wan profet tok long saed blong hem, i se: “God blong mi, mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.” Jisas i talemaot sem tingting ya bakegen, i se: “Kakae ya blong mi hemia, we bambae mi mekem ol samting we hemia we i sanem mi i wantem, mo mi finisim ol wok we hem i givim.”​—Jon 4:​34; Hibrus 12:2.

6. ?Olsem wanem yumi save karem semfala risal olsem Jisas taem yumi putum samting we God i wantem i stap fasples long laef?

⁶ Makemgud stampa poen ya​—hemia blong mekem samting we God i wantem. Jisas i talem se ‘man we tija blong hem i tijim hem long fasin we i stretgud olgeta, bambae hem i kam olsem tija blong hem nomo.’ Taswe, laef blong Jisas i soemaot klia wanem samting i mas impoten moa long laef blong ol disaepol blong hem. (Luk 6:​40) Mo taem Jisas i wokbaot long rod we Papa blong hem i wantem, hem i soemaot klia se ‘man i save fulap long glad oltaem mo haremgud tumas,’ sipos hem i putum wok blong God i stap olsem samting we i impoten moa long laef blong hem. (Ol Sam 16:11; Ol Wok 2:​28) ?Yu yu luksave mining blong samting ya? Taem ol man blong Jisas oli jusum blong putum samting we God i wantem i stap olsem samting we i impoten moa long laef blong olgeta, oli ‘fulap long glad oltaem mo haremgud tumas,’ mo oli gat laef ya we i prapa wan. (1 Timote 6:19) Taswe, i gat plante risen blong putum samting we God i wantem, i stap olsem faswan samting long laef blong yumi.

7, 8. ?Wanem sam traem we Jisas i kasem, mo yumi save lanem wanem samting from?

⁷ Smoltaem nomo afta we Jisas i baptaes blong soem se hem i givim laef blong hem blong mekem samting we God i wantem, Setan i traem blong mekem hem i lego rod blong hem. ?Olsem wanem? Hem i traem hem long tri defren fasin. Long ol tri taem ya, Jisas i yusum tok blong Baebol blong ansa long hem long klia fasin. (Matyu 4:​1-​10) Be i gat sam moa traem tu we oli kasem hem. Ol man oli agensem hem, oli jikim hem, Judas i lego hem i go long han blong ol enemi, i gat ol gyaman tok agensem hem, mo hem i ded long wan pos. Be, i no gat wan long olgeta traem ya we oli naf blong mekem Pikinini ya blong God i lego rod ya we hem i stap tru long God oltaem. Long wan taem we Jisas i trabol bigwan, hem i prea se: “Yu no mekem olsem we mi mi wantem, yu mekem olsem we yu nomo yu wantem . . . bambae i olsem we yu yu wantem.” (Matyu 26:39, 42) Gudfala eksampel ya blong Jisas i mas gat bigfala paoa long laef blong yumi, mo i mas mekem se yumi “stap prea oltaem.”​—Rom 12:12.

⁸ Yes, taem yumi jusum ol samting we oli impoten moa long laef blong yumi, yumi nidim tumas we God i lidim yumi, antap moa sipos yumi fesem ol man we oli enemi blong trutok mo oli agensem samting we God i wantem. Tingbaot prea blong King Deved blong askem God blong lidim hem taem ol enemi oli agensem hem. Bambae yumi ridim prea ya taem yumi stadi long wan haf blong Ol Sam 143. Samting ya i mas halpem yumi blong luksave olsem wanem blong mekem fasin fren blong yumi wetem Jeova i kam strong moa, mo olsem wanem blong holem strong tingting, blong putum samting we God i wantem i stap long fasples long laef blong yumi oltaem.

Jeova i Harem mo i Ansarem Ol Prea Blong Yumi

9. (a) Nating se Deved i wan sinman, ?ol tok mo wok blong hem oli soemaot wanem? (b) ?From wanem yumi no mas lego fasin blong mekem samting we i stret?

⁹ Nating se Deved i wan sinman, hem i bilif strong se Jeova bambae i harem prea blong hem. Wetem tingting daon, hem i krae se: “Hae God, plis yu harem prea blong mi. Fasin blong yu i stret, mo oltaem yu stap holem promes blong yu long man. Plis yu lesin long tok blong mi, yu ansa long mi. Mi mi man blong wok blong yu. Plis yu no jajem mi, from we i no gat wan man nating we i no mekem samting nogud long fes blong yu.” (Ol Sam 143:​1, 2) Deved i save se hem i no stretgud olgeta, be wetem fulhat blong hem, hem i stap ona long God. Taswe, hem i sua se bambae hem i kasem wan ansa we i stret. ?Samting ya i leftemap tingting blong yumi, no? Nating se yumi no kasem mak blong stret fasin blong God, yumi save sua se hem i stap lesin long yumi sipos yumi stap ona long hem wetem fulhat blong yumi. (Eklesiastis 7:​20; 1 Jon 5:​14) Yumi mas gohed oltaem blong prea, mo yumi mas strong blong ‘holem ol stret fasin blong winim ol fasin nogud,’ long taem ya we rabis fasin i fulap long wol.​—Rom 12:20, 21; Jemes 4:7.

10. ?From wanem i gat sam taem we Deved i wari?

¹⁰ Deved i gat plante enemi, olsem yumi tede. Deved i gat ol wari blong hem tu, olsem taem hem i stap ronwe long Sol, we hem i mas haed long ol ples we oli longwe long ol narafala ples mo i hadwok blong faenem olgeta, no olsem taem hem i king mo ol enemi oli agensem hem. Hem i eksplenem wanem samting we trabol ya i mekem long hem, i se: “Enemi ya blong mi i stap ronem mi . . . Hem i putum mi long kalabus ya we i tudak olgeta . . . Nao mi mi harem nogud, mi wantem livim evri samting, from we tingting blong mi i foldaon we i foldaon olgeta.” (Ol Sam 143:​3, 4) ?I gat sam trabol we i bin mekem yu yu harem olsem ya?

11. ?Wanem sam traem we ol man blong God tede oli bin fesem we i mekem olgeta oli wari?

¹¹ Trabol we ol enemi oli mekem, ol traem from hadtaem blong kasem mane, bigfala sik, mo sam narafala problem we oli mekem man i wari, oli bin mekem sam man blong God oli harem nogud olsem we oli no moa gat paoa. Sam samtaem, oli harem olsem se hat blong olgeta i no moa gat filing nating. I olsem we olgeta wanwan oli bin kraeaot se: “Yu yu sanem trabol i kam long mi mo yu mekem mi mi harem nogud, be mi mi save we bambae yu mekem mi mi strong bakegen . . . Bambae yu toktok long mi bakegen blong mekem tingting blong mi i kam gud.” (Ol Sam 71:20, 21) ?Wanem samting i bin givhan long olgeta ya?

Olsem Wanem Blong Winim Ol Traehad Blong Ol Enemi

12. ?Olsem wanem King Deved i winim ol denja mo ol traem?

¹² Ol Sam 143:5 i soemaot samting we Deved i mekem, taem denja mo bigfala traem i kasem hem: “Mi stap tingtingbak long ol dei ya we i pas finis, mi stap tingbaot olgeta samting ya we yu yu mekem, mi stap tingting long olgeta wok ya we yu bin mekem long mi.” Deved i tingtingbak long ol samting we God i bin mekem long ol man blong Hem mo olsem wanem God i bin sevem Deved hem wan. Hem i tingting dip long ol samting we Jeova i mekem blong leftemap bigfala nem blong Hem. Yes, Deved i stap tingting oltaem long ol wok blong God.

13. Taem yumi kasem ol traem, ?olsem wanem fasin blong tingtingbak long eksampel blong ol gudfala man blong God bifo mo tede, i save halpem yumi blong stanap strong?

¹³ ?Yumi tingting plante long ol samting we God i mekem long ol man blong hem, no? !Si, yumi tingbaot! Yumi tingting tu long wok blong ‘bigfala kampani ya blong ol wetnes blong God’ we oli laef bifo long Kraes. (Hibrus 11:32-​38; 12:1) Ol Kristin blong faswan handred yia we tabu speret i makemaot olgeta, olgeta tu oli kasem tok blong pulum olgeta blong ‘tingbaot ol dei we oli pas finis’ mo ol traem we oli bin winim. (Hibrus 10:32-​34) ?Olsem wanem long ol store long saed blong ol man blong God long taem blong yumi, olsem buk ya Jehovah’s Witnesses​—Proclaimers of God’s Kingdom i tokbaot?a Ol store long buk ya mo long sam narafala buk bakegen, oli save halpem yumi blong tingbaot olsem wanem Jeova i givhan long ol man blong hem blong oli stanap strong, taem gavman i putum tabu long wok blong olgeta, sakem olgeta long kalabus, taem ol hif blong man oli agensem olgeta, mo taem oli stap long ol rabis kalabus mo ol kamp we oli mas wok olsem slef. I gat ol traem oli kamaot long ol kantri we i gat faet, olsem Burundi, Laeberia, Ruwanda, mo kantri we bifo oli kolem Yugoslavia. Taem ol man blong God oli kasem fasin agens, oli stanap strong from we oli gat wan gudfala fasin fren wetem Jeova. Han blong hem i givim paoa long olgeta we oli putum wok blong hem i stap olsem samting we i impoten moa long laef blong olgeta.

14. (a) ?Talem store blong wan we maet i sem mak olsem yumi, we God i halpem hem blong winim hadtaem? (b) ?Yu yu lanem wanem long store ya?

¹⁴ Be, maet yu yu ansa se yu no bin kasem ol nogud trabol olsemia, mo maet yu ting se bambae yu no save kasem trabol olsem samtaem. Be God i stap halpem ol man blong hem long ol narafala taem tu, i no long taem blong bigfala trabol nomo. Hem i givhan long plante man we oli olsem yumi nomo, mo we laef blong olgeta i sem mak olsem ol narafala, blong oli winim ol smosmol traem evri dei. I gat plante eksampel, hemia wan nomo: ?Yu yu luksave pija we i stap antap? ?Hem i pulum yu blong tingbaot samting we God i stap mekem long ol man blong hem? Pija ya i stap long Wajtaoa blong Desemba 1, 1996. ?Yu ridim finis store blong Penelope Makris? !Hem i soem wan nambawan eksampel blong holemstrong long Kristin bilif! ?Yu yu rimemba trabol we ol man raonabaot long hem oli mekem long hem, olsem wanem hem i stanap strong tru long ol strong sik, mo olsem wanem hem i traehad blong gohed long fultaem wok blong prij? ?Olsem wanem long nambawan samting we i hapen long hem long Mitilin? Bigfala samting se, ?Yu yu luk ol eksampel ya olsem samting blong givhan long yu blong jusumaot ol samting we oli impoten moa, mo blong putum samting we God i wantem i stap long fasples long laef blong yu?

15. ?Wanem sam wok blong Jeova we yumi mas tingting dip long olgeta?

¹⁵ Sipos yumi olsem Deved we yumi tingting dip long ol wok blong Jeova, samting ya bambae i mekem yumi strong moa. Blong mekem stampa tingting blong hem i kamtru, Jeova i mekem rod blong sevem laef blong ol man, taem Pikinini blong hem i ded, i laef bakegen, mo i go antap long heven. (1 Timote 3:​16) Hem i putumap Kingdom blong hem long heven, i sakem Setan mo ol rabis enjel oli aot long heven, mo hem i stanemap trufala wosip bakegen long wol ya. (Revelesen 12:​7-​12) Hem i mekem wan paradaes long saed blong speret, mo i blesem ol man blong hem taem hem i mekem namba blong olgeta i kam antap moa. (Aesea 35:​1-​10; 60:22) Naoia, ol man blong hem oli stap givim laswan wetnes bifo we bigfala trabol i kamaot. (Revelesen 14:​6, 7) Yes, yumi gat plante samting blong tingting dip long olgeta.

16. ?Yumi kasem tok blong pulum yumi blong tingting long wanem samting, mo samting ya bambae i mekem yumi sua long wanem samting?

¹⁶ Sipos yumi stap tingting oltaem long ol wok we God i stap mekem, i bitim we yumi tingting tumas long ol traehad blong man, bambae yumi luksave se i no gat wan samting we i save blokem paoa blong God we i stap wok. Be, ol wok blong God i no minim nomo ol nambawan samting we hem i wokem long heven mo long wol. (Job 37:14; Ol Sam 19:1; 104:24) Ol bigfala wok blong hem i minim tu ol wok we hem i mekem blong sevem ol man blong hem long ol enemi we oli stap mekem trabol long olgeta. Ol store long saed blong ol man blong hem long taem bifo, oli soemaot samting ya long yumi.​—Eksodas 14:31; 15:6.

Luksave Rod We Yumi Mas Wokbaot Long Hem

17. ?Olsem wanem Jeova i olsem wan trufala man long tingting blong Deved, mo olsem wanem samting ya i mekem tingting blong yumi i strong moa?

¹⁷ Deved i prea long God blong givhan long hem, from we laef blong hem i stap kam olsem wan drae ples we i no gat wora nating. Hem i se: “Laef blong mi i olsem graon we i drae we i drae. Mi mi wantem yu tumas, olsem we man we i tosta i wantem tumas blong dring wora, nao mi stap leftemap han blong mi blong prea long yu. !Hae God, plis yu kwik! !Plis yu ansa long mi! Tingting blong mi i foldaon olgeta. !Plis yu no haedem fes blong yu long mi! I nogud mi go wetem olgeta we oli godaon long ples blong ol dedman.” (Ol Sam 143:​6, 7) Deved i wan sinman, mo hem i save se God i luksave ol trabol we hem i stap kasem. (Ol Sam 31:7) Samtaem, ating yumi save harem tu se yumi kam slak long saed blong speret. Be, i no minim se i no moa gat rod nao. Jeova, we i stap harem ol prea blong yumi, i save mekem yumi kamgud kwiktaem, from ol gudfala tok blong ol elda we oli gat lav, sam haf blong Wajtaoa, mo sam tok long miting we oli stretgud long yumi.​—Aesea 32:​1, 2.

18, 19. (a) ?Wanem samting yumi save askem strong long Jeova long prea? (b) ?Yumi save sua long wanem samting?

¹⁸ Fasin blong yumi blong trastem Jeova, bambae i pusum yumi blong askem long hem se: “Mi mi putum tingting blong mi i stap finis long yu. . . . Plis yu soemaot long mi bakegen we oltaem yu stap laekem man tumas. Oltaem prea blong mi i stap go antap long yu. Plis yu soemaot rod long mi, we mi mas folem.” (Ol Sam 143:8) ?Olsem wanem? ?Jeova i fogetem Sista Makris, taem i stap hem wan nomo long wan aelan blong Gris? Taswe, ?bambae Hem i fogetem yu taem yu putum wok blong Hem i stap olsem samting we i impoten moa long laef blong yu? Setan mo ol man blong hem oli wantem mekem yumi kam slak no blokem yumi fulwan blong no talemaot Kingdom blong God. Nating se yumi stap long ol kantri we gavman i letem trufala wosip i gohed, no long ol kantri we oli putum tabu long wok ya, ol prea blong yumi oli sem mak olsem prea ya blong Deved, se: “Hae God, mi mi stap kam long yu blong yu blokem mi, yu lukaotgud long mi. Plis yu tekemaot mi long han blong ol enemi blong mi.” (Ol Sam 143:9) Blong stap sef we ol trabol i no save spolem yumi long saed blong speret, yumi mas stap oltaem long sefples blong God ya we i Hae Tumas.​—Ol Sam 91:1.

¹⁹ Strong bilif blong yumi long saed blong ol samting we oli impoten moa, i stanap long wan strong faondesen. (Rom 12:​1, 2) Ale, yumi mas agensem wol ya, we i stap traehad blong pulum yumi blong tingbaot ol wok blong man olsem samting we i impoten moa. Gohed blong soemaot long evri haf blong laef blong yu, samting we yu yu save se i impoten moa​—hemia blong mekem samting we God i wantem.​—Matyu 6:​10; 7:​21.

20. (a) ?Yumi lanem wanem samting long saed blong Deved long Ol Sam 143:​1-9? (b) ?Olsem wanem ol Kristin tede oli soemaot semkaen tingting olsem Deved?

²⁰ Vas 1 kasem 9 blong Ol Sam 143 oli soemaot klia, gudfala fasin fren we Deved i gat wetem Jeova. Taem ol enemi oli raonem hem long evri saed, hem i prea long God blong i lidim hem. Hem i talemaot olgeta samting we i stap long hat blong hem, mo i askem God blong halpem hem blong wokbaot long stret rod. Samting ya i sem mak tede, long saed blong smol kampani blong ol tabu Kristin we oli stap yet long wol ya, mo ol fren blong olgeta. Oli tingbaot fasin fren blong olgeta wetem Jeova olsem wan sas samting, taem oli gohed blong askem hem blong lidim olgeta. Nating se Setan mo wol blong hem oli traem olgeta, oli putum wok blong God i stap fasples oltaem.

21. ?From wanem i impoten we yumi soemaot wan gudfala eksampel taem yumi tijim ol narafala long saed blong samting we i mas impoten moa long laef blong olgeta?

²¹ Plante milyan man we oli stap stadi Baebol wetem ol Wetnes blong Jeova, oli mas luksave se samting we God i wantem i impoten moa i bitim ol narafala samting. Yumi save halpem olgeta blong kasem save long samting ya, taem yumi stadi japta 13 blong buk ya, Save Blong Lidim Yu Long Laef We i No Save Finis. Japta ya i soemaot ol rul we yumi mas folem blong obei long Baebol long laef blong yumi.b Yes, oli mas luk se yumi stap soemaot long laef blong yumi olgeta samting we yumi stap tijim olgeta long hem. Afta long smoltaem nomo, olgeta ya tu bambae oli kasem save long rod ya we oli mas wokbaot long hem. Taem wanwan blong ol milyan man ya oli luksave wanem samting i mas impoten moa long laef blong olgeta, samting ya bambae i pusum plante blong givim laef blong olgeta i go long God mo tekem baptaes. Afta long samting ya, kongregesenc i save halpem olgeta blong gohed blong wokbaot long rod blong laef.

22. ?Long nekiswan haf, wanem ol kwestin we bambae yumi tokbaot?

²² Plante man oli agri fulwan se samting we God i wantem i mas stap olsem samting we i impoten moa long laef blong olgeta. Be, ?olsem wanem Jeova i gohed sloslou blong tijim ol man blong hem blong mekem samting we hem i wantem? ?Mo oli kasem wanem blesing from? Long nekiswan haf, bambae yumi tokbaot ol kwestin ya, mo tokbaot stampa vas ya Ol Sam 143:10.

[Ol futnot]

?Wanem Ansa Blong Yu?

◻ Folem Filipae 1:​9, 10, ?olsem wanem yumi save jusumaot ol samting we oli impoten moa?

◻ ?Olsem wanem Jisas i soem samting we i impoten moa long laef blong hem?

◻ ?Ol samting we Deved i mekem taem hem i kasem traem, oli save tijim yumi long wanem samting?

◻ ?Ol Sam 143:​1-9 i halpem yumi long wanem rod tede?

◻ ?Wanem samting i mas impoten moa long laef blong yumi?

[Tok blong pija long pej 10]

Ol wok blong Deved oli pruvum se hem i dipen long Jeova oltaem

[Credit Line]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s