?Yu Yu Rimemba?

?Yu bin haremgud long save we yu ridim long ol Wajtaoa we oli jes kamaot i no longtaem? Sipos yes, maet yu glad blong tingbaot ol poen ya bakegen:

◻ ?Wanem mining blong Grik wod ya pa·rou·si’a long Matyu 24:​3, 27, 37, 39?

Expository Dictionary of New Testament Words we Vine i raetem, i talem se: “PAROUSIA . . . i minim tufala samting ya, se wan man i kamtru samples, mo i stap long ples ya.” Taswe, wod ya i no jes tokbaot taem we man ya i kamtru, be taem we hem i gohed blong stap afta we hem i kamtru tu.​—8/15, pej 11.

◻ ?Olsem wanem God i “katem taem blong trabol,” blong sevem ‘sam man’ long faswan handred yia? ?Mo olsem wanem samting ya bambae i kamtru bakegen long fasin we i bigwan moa? (Matyu 24:22)

Wantaem nomo, long 66 K.T., ol ami blong Rom oli katem taem blong trabol we oli mekem long Jerusalem taem oli raonem hem, nao samting ya i givim jans long ol Kristin “man” blong ronwe. Long sem fasin, yumi save bilif se, bambae wan samting i hapen blong katem taem blong trabol we bambae i spolem Bigfala Babilon. Taswe, ol Kristin we tabu speret i makemaot olgeta mo ol fren blong olgeta bambae oli sef long bigfala trabol we i save tekemaot laef blong olgeta.​—8/15, pej 18-​20.

◻ ?Yumi mas tingting olsem wanem sipos wan man i stat tekem bred mo waen blong Memoriol no i no moa tekem?

Ol narafala Kristin oli no nid blong wari. Jisas i talem se: “Gudfala man ya blong lukaot long sipsip, mi ya . . . mi mi save ol sipsip blong mi.” Long sem fasin, Jeova i savegud hu olgeta we hem i jusumaot olgeta olsem ol speret pikinini blong hem. (Jon 10:14; Rom 8:​16, 17)​—8/15, pej 31.

◻ ?Wanem bigfala risen blong Loa blong Moses?

Faswan samting, hem i blong tijim ol man Isrel se oli nidim Mesaea, we bambae i tekemaot sin blong olgeta. (Galesia 3:​24) Loa i tijim olgeta tu se oli mas fraetgud long God mo obei long hem, mo i halpem ol man Isrel blong stap longwe long ol rabis fasin blong ol nesen raonabaot. (Levitikas 18:24, 25)​—9/1, pej 9.

◻ ?Wanem risen blong nyufala kontrak? (Jeremaea 31:31-​34)

Hem i blong stanemap wan grup blong ol king mo pris, we bambae oli givim blesing long olgeta man. (Eksodas 19:6; 1 Pita 2:9; Revelesen 5:​10)​—9/1, pej 14, 15.

◻ ?From wanem yumi mas lanem gudfala fasin blong talem sore long narafala?

Fasin blong talem sore i save daonem soa we yumi mekem long narafala from we yumi sinman, mo hem i save mekem olgeta we oli seraot oli frengud bakegen. Evri taem we yumi talem sore, yumi stap lanem tingting daon, mo yumi stap trenem yumi blong tingting moa long filing blong narafala.​—9/15, pej 24.

◻ ?Bigfala Wora we i ron long taem blong Noa, i wan trufala samting we i hapen long taem bifo?

Yes. Long plante ples long wol, stat long Amerika kasem Ostrelya, i gat ol store blong bifo, long saed blong bigfala wora we i kavremap wol. From we ol store ya oli stap long plante ples, samting ya i sapotem trutok blong Baebol se Bigfala Wora ya i bin kavremap wol. (Jenesis 7:​11-​20)​—9/15, pej 25.

◻ ?Fasin blong tekem narafala i kam long haos i minim wanem? (Rom 12:13)

“Fasin ya blong tekem ol narafala oli kam long haos,” i kamaot long wan Grik tok we i gat tu wod long hem. Mining blong tufala wod ya se, “lav” mo “strenja.” Taswe, fasin blong tekem narafala i kam long haos blong yumi, i rili minim “laekem ol strenja.” Be i no minim nomo lav we i stanap long stretfasin, olsem we yumi soem lav from we i stret blong mekem olsem. No gat. Fasin ya i joen wetem trufala filing, fasin blong laekem narafala, mo fasin fren.​—10/1, pej 9.

◻ ?Long Fas Korin japta 7, Pol i talem wanem long saed blong fasin blong mared mo fasin blong livim mared?

I no rong blong mared, mo long samfala, i moa gud we oli mared. Be, sipos wan Kristin man no woman i wantem mekem wok blong Jeova we i no gat ol narafala tingting oli pulum hem, i moagud we hem i livim mared.​—10/15, pej 13.

◻ ?Olsem wanem wan elda i mas “lukaot long olgeta famle blong hem”? (1 Timote 5:8)

Wan elda i mas “lukaot long olgeta famle blong hem”​—waef mo ol pikinini blong hem​—long saed blong bodi, speret mo filing.​—10/15, pej 22.

◻ ?Olsem wanem Jeova i stap mekem ol man blong hem oli haremgud?

God i yusum tabu speret blong hem blong mekem man i “haremgud.” (Jon 14:16, futnot, NW) Wan narafala rod we God i stap yusum blong mekem man i haremgud, hemia Baebol. (Rom 15:4) God i savegud olgeta samting we yumi wanwan i nidim, mo hem i save yusum yumi wanwan blong mekem narafala i haremgud. Samting ya i sem mak olsem we Pol i haremgud bakegen from ripot we Taetas i karem i kam, long saed blong ol Kristin long Korin. (2 Korin 7:​11-​13)​—11/1, pej 10, 12.

◻ ?Pol i minim wanem taem hem i tokbaot Jeova long 2 Korin 1:3 se hem i ‘Papa blong kaengud filing’?

Grik tok we oli tanem i kam ‘kaengud filing,’ i kamaot long wan wod we i blong talemaot sore long narafala we i stap safa. Taswe, Pol i tokbaot filing blong sore we God i gat long olgeta man blong Hem we oli stap harem nogud long trabol.​—11/1, pej 13.

◻ ?Wanem samting ol man Isrel oli mekem wan taem evri yia long Dei blong Stretem Sin? (Levitikas 16:29-​31; 23:27)

Fasin blong livim kakae i mekem ol man Isrel oli tingbaot moa se, oli sinman we oli nidim wan man blong sevem olgeta. Taem oli livim kakae blong olgeta, oli soemaot long God se, oli sore tumas from ol sin we oli bin mekem, mo oli tanem tingting blong olgeta from ol sin ya.​—11/15, pej 5.

◻ ?Wanem mining blong oda ya we i go long ol yangfala se: “Yu mas tingbaot Bigfala Man we i wokem yu”? (Eklesiastis 12:1)

Wan buk i talem se Hibru tok we oli tanem i kam “tingbaot,” plante taem hem i minim “wan filing insaed long tingting we i tinghae long narafala, mo aksin we i go wetem fasin ya blong tingbaot.” Taswe, blong obei long oda ya, i no minim nomo se yumi tingbaot Jeova. I mas gat aksin i go wetem, blong mekem ol samting we hem i glad long olgeta.​—12/1, pej 16.