Karem Fasin Fri Long Saed Blong Speret Long Ol Man We Oli Stap Kalabus

“MIFALA i bin wet long yufala.” “Evri naet, mi mi stap tingting se bambae yufala i kam.” “Tangkyu blong sanem wan man blong visitim mifala oltaem.” “Mifala i wantem talem tangkyu tumas long evri blesing we mifala i kasem long Jeova mo ogenaesesen blong hem, mo from kakae long saed blong speret we mifala i kasem long stret taem.”

?Wanem risen long ol tok ya blong talem tangkyu? Ol tok ya oli kamaot long sam man we oli stap long ol defdefren kalabus long Meksiko. Oli gat tangkyu from help we ol Wetnes blong Jeova oli bin givim long olgeta, blong mekem olgeta oli fri long saed blong speret, nating se oli stap long kalabus. Long Meksiko, i gat 42 kalabus we ol Wetnes blong Jeova oli stap go long olgeta, blong givim kakae long saed blong speret we ol man long kalabus oli nidim. Ol kalabus ya, nem blong olgeta hemia Centro Readaptación Social (Senta Blong Givhan Long Ol Man Blong Jenisim Fasin Blong Olgeta). Long sam long ol kalabus ya, oli stap mekem ol Kristin miting oltaem, mo i gat sam gudfala risal i kamaot. Eksampel, i no longtaem i pas, i gat 380 man oli stap kam long ol miting ya. Long taem ya, ol brata oli stap mekem samwe long 350 Baebol stadi. Tate seven man oli kam naf blong stat long wok blong prij, mo 32 man oli givim laef blong olgeta long Jeova, mo tekem baptaes.

Olsem Wanem Oli Mekem Wok Ya

?Olsem wanem ol Wetnes blong Jeova oli mekem wok blong prij long ol ples ya? Fastaem, oli askem ol man we oli lukaot long kalabus blong givim wan leta long olgeta, blong givim raet long olgeta blong go insaed long kalabus. Oli eksplenem from wanem oli wantem go insaed, hemia blong tijim ol man long kalabus olsem wanem blong mekem fasin blong olgeta i kamgud moa, mo olsem wanem oli save wosipim God long fasin we Hem i glad long olgeta.

Evri taem, ol man we oli lukaot long kalabus oli letem ol brata oli go insaed. Oli laekem ol tijing blong Baebol we ol brata oli givim long ol man long kalabus. Oli luk se ol Wetnes blong Jeova oli obeigud long ol rul insaed long kalabus. Oli letem ol brata ya oli yusum ol ofis, ol rum blong kakae mo ol woksap, olsem ol ples blong mekem miting. Long wan kalabus, oli letem ol Wetnes oli bildim wan smol Haos Kingdom, olsem store ya blong wan seket elda long Saot Is blong Meksiko i soemaot.

“Long stat blong 1991, mifala i stat visitim kalabus long Tehuantepek Oaksaka. Long ples ya, mifala i faenem plante man we oli hanggri long saed blong speret. I no longtaem, mifala i statem 27 Baebol stadi. From we ol man long kalabus oli intres tumas, mifala i mekem plan blong gat faef miting evri wik. Wan man long kalabus i laekem Jeova bigwan, ale hem i mekem disisen blong bildim wan smol Haos Kingdom insaed long kalabus, blong mekem ol miting long hem. Hem i askem long bos blong kalabus sipos hem i save mekem olsem, mo ol man we oli lukaot long kalabus oli agri. Long stat blong Desemba 1992, sikis man long kalabus oli kam pablisa, hemia ol man blong talemaot gud nyus. From we oli gohedgud, mifala i wantem mekem Memoriol insaed long kalabus. Mifala i askem long bos blong kalabus sipos mifala i save karem bred mo waen i go insaed. Afta we mifala i storeyan fo haoa wetem bos, hem i letem mifala i mekem Memoriol.

“Long Epril 3, 1993 (tri dei bifo long Memoriol), sam man long kalabus oli gofri. Wan we hem i wan pablisa finis, i kasem ol pepa blong hem blong gofri. Be hem i askem long bos blong kalabus sipos hem i save gofri afta lafet blong Memoriol nomo. Bos i sapraes tumas from we i no gat plante man we oli askem samting ya. Be hem i agri from we presina ya i wantem tumas blong mekem Memoriol long kalabus. I gat 53 man we oli kam long Memoriol ya, mo oli krae from glad long en blong miting ya. Mifala i kolem grup ya ‘Fri Long Sereso,’ from we oli fri long saed blong speret.”

Long ol ples olsem, ol man oli laekem tumas wok blong ol Wetnes blong Jeova. Long wan kalabus, bos blong kalabus i talemaot klia se ol miting blong ol Wetnes blong Jeova oli olsem gudfala “meresin” blong stretem fasin blong ol presina kwiktaem.

Wan Gudfala Program Blong Stretem Ol Presina

Wok blong ol Wetnes blong Jeova i halpem plante man long kalabus blong stretem fasin blong olgeta fulwan. I tru se, plante taem ol man we oli bin stap long kalabus oli gobak long wan rabis laef bakegen, taem oli gofri. Be olgeta we oli rili bilif long mesej long Tok blong God, oli jenis fulwan. Jenis we oli mekem i pulum yumi blong tingbaot tok blong aposol Pol se: ‘Man we i stap ronem woman . . . , man we i stap stil, mo man we i wantem plante samting tumas, mo man we i stap dring we i lusum hed, mo man we i stap spolem nem blong narafala man, mo man we i stap mekem ol bisnes blong stilim mane, bambae oli no save go insaed long nyufala wol we God i king long hem. Bifo, sam long yufala oli olsem nomo. Be nao, God i wasemaot ol sin blong yufala blong mekem yufala i klin. Hem i mekem yufala i tabu, yufala i man blong hem. Mo hem i mekem yufala i stret man long fes blong hem, from nem blong Jisas Kraes, Masta blong yumi, mo from speret blong God blong yumi.’​—1 Korin 6:​9-​11.

Bigfala jenis long fasin blong olgeta i kam klia, taem oli talemaot ol filing blong olgeta. Miguel, we i stap long Kampes kalabus long Kampes Siti, i talem se: “Tede, mi save talem wetem glad se, mi mi wan long ol narafala sipsip, we oli gat hop ya we 2 Pita 3:​13 mo Matyu 5:5 i tokbaot.” José, we i stap long Koben kalabus long Kampes, i talem se: “Nating se mi mi stap long kalabus mo mi bin mekem wan samting we i nogud tumas bifo, mi kasem save se Jeova i gat bigfala sore long ol man, mo se hem i lesin long ol prea blong mi mo ol samting we mi askem long hem. Hem i save fogivim ol sin blong mi, mo givim jans long mi blong yusum ol yia blong laef blong mi we oli stap yet, blong serem gud nyus blong Kingdom blong Hem wetem ol narafala. Mifala i talem tangkyu long ol elda we oli tekem taem blong visitim mifala long kalabus. From samting ya, mifala i save kasem ol blesing we oli kamaot from ol promes blong Kingdom blong God. !Hemia ol gudfala blesing! ?Mi save talem se mi mi wan presina? No gat, Jeova i givim fasin fri long saed blong speret we mi mi nidim.”

?Olsem wanem ol man we oli kilim narafala i ded, ol man we oli repem woman, ol man we oli bonem haos mo olting blong narafala, ol man blong stil, mo plante narafala man olsem, oli save jenis mo kam ol Kristin we oli mekem stret fasin? Ol man ya oli talem se, paoa blong Tok blong God mo fasin blong joen oltaem wetem ol trufala man blong God, i mekem olgeta oli jenisim fasin blong olgeta. Store blong Tiburcio, we i stap long kalabus long Masatlan, Sinaloa, i soem se program ya blong stretem fasin blong ol presina, i wokgud. Hem i bin stap long kalabus long Konkodia, Sinaloa. Long ples ya, hem i kasem problem from we hem i stap faerap nogud long kros. Waef blong hem i wan Wetnes blong Jeova, mo Tiburcio i stap mekem i nogud tumas long hem. Hem i mekem sem fasin ya taem waef blong hem i kam luk hem long kalabus. Waef blong hem i gat longfala tingting, mo hem i gohed blong visitim hem. Ale, Tiburcio i askem waef blong hem blong karem buk ya Yu Save Laef Foreva Long Paradaes Long Wol i kam long hem. Nao hem i stat stadi long buk ya hem wan.a Biaen, hem i askem sipos wan man i save kam long kalabus blong stadi wetem hem. Hem i gohedgud long saed blong speret, mo fasin we hem i mekem long ol narafala i kamgud moa. Biaen, oli tekem hem i go long kalabus long Masatlan. Long ples ya, i gat wan grup we oli stap stadi Baebol. Naoia, Tiburcio i wan pablisa. Hem i talem se: “Naoia, mi, waef blong mi, ol pikinini blong mi, mo ol man we oli stap long kalabus wetem mi, mifala i rili glad se mifala i save lesin long ol trutok blong Baebol long ples ya. Mi hop se i no longtaem, bambae mi gofri, nao mi save go long ol asembli mo miting blong kongregesen.”b

Mo tu, i gat Conrado, we i glad tumas se hem i kam naf blong mekem plante jenis long laef blong hem. Hem i gat bigfala problem long mared blong hem, mekem se waef blong hem i seraot long hem. Ale, hem i tekem drag blong traem haremgud bakegen. Biaen, hem i kam wan man blong salem drag. Polis i holem hem mo oli sanem hem i go long kalabus from we hem i stap karem ol drag ya mariuana mo koken, oli go long ol defren ples. Long kalabus, i gat wan grup we oli stap stadi Baebol wetem ol Wetnes blong Jeova, mo oli singaot hem blong joen long stadi ya. Hem i talemaot ol filing blong hem se: “Mi mi sapraes we i gat oda long ol miting ya, mi sapraes long program blong stadi long Baebol wetem help blong ol buk, mo mi sapraes long olgeta toktok we oli stanap long Baebol nomo. Wantaem nomo, mi askem sipos wan i save mekem Baebol stadi wetem mi, mo mi stat blong kam long ol miting.” Samting ya i hapen long Janewari 1993. Naoia, Conrado i fri long kalabus, mo hem i stap gohedgud long Kristin kongregesen.

Islas Marías

Long Meksiko, i gat wan rabis kalabus we ol man oli fraet long hem. Hem i fo smol aelan we nem blong olgeta Islas Marías. Ol man long kalabus ya oli save wokbaot long ol aelan ya wanwan. Sam long olgeta oli stap wetem waef mo ol pikinini blong olgeta long ples ya.

I gat wan smol kongregesen i stanap long ples ya. Tri brata blong Masatlan oli kam evri manis blong halpem olgeta blong mekem ol miting, givim ol buk long olgeta, mo leftemap tingting blong olgeta. Sam samtaem, seket elda i visitim olgeta. Samwe long 20 kasem 25 oli kam long miting oltaem. I gat fo brata we oli baptaes finis, mo tu pablisa we oli no tekem baptaes yet. Seket elda ya i talem se “samfala oli wokbaot 17 kilomita blong kam long miting long Sande, mo oli mas aot kwiktaem afta long miting blong kasem kalabus bakegen bifo we ol man blong lukaot long kalabus oli ridimaot nem blong olgeta presina. Nating se oli wokbaot spid, i tekem bitim tu haoa blong gobak.” Wan long ol brata we i lanem trutok long kalabus ya, i bin talem i no longtaem se: “Bifo, mi wantem tumas blong gofri long kalabus kwik, be naoia, mi glad blong gofri enitaem we Jeova i wantem, from we mi gat plante wok blong mekem long ples ya.”

Yumi glad blong luk se trutok i gat paoa blong mekem ol man we oli rili wantem mekem Jeova i glad, oli fri. Bitim twelef long ol man ya we oli faenem trutok long kalabus, oli gofri finis, oli tekem baptaes, mo naoia oli mekem ol gudfala fasin long laef blong olgeta olsem ol man blong God. Samfala oli kam elda long kongregesen tu. Yumi luk klia pruf blong paoa we Baebol i gat blong mekem hat blong man i kamgud, mo blong jenisim fasin blong man. Taem ol man ya we oli bin stap long kalabus from we oli mekem sam nogud samting, oli stat wokbaot long rod we Tok blong God i soemaot klia, oli kasem trufala fasin fri we Jisas i promes. Hem i talem se: “Nao bambae yufala i save ol trutok, mo trutok ya bambae i mekem yufala i friman.”​—Jon 8:​32; Ol Sam 119:105.

[Ol futnot]

[Tok blong pija long pej 23]

Plante oli kasem blesing from ol Kristin trutok we oli lanem long kalabus