Oli Mekem Samting We Jeova i Wantem

!Oli Presem Jisas Olsem Mesaea Mo King!

LONG Naesan 9, 33 K.T.,a wan bigfala grup blong man we oli stap singaot bigwan, oli stap go insaed long Jerusalem. Samting ya i mekem plante man Judia oli sapraes. Oli no sapraes blong luk we fulap man oli stap go insaed long taon ya bifo long lafet blong Pasova. Be ol man ya oli defren. Impoten man long medel blong olgeta, i stap sidaon long wan pikinini dongki. Man ya hem i Jisas Kraes, mo ol man oli sakem kot blong olgeta mo ol han blong pamtri, oli godaon long rod long fored blong hem. Oli stap singaot se: “!Hosana long Laen blong Deved ya! Hae God, yu blesem man ya we i kam long nem blong yu. Olgeta long heven oli presem nem blong yu.” Plante man we oli stap finis long Jerusalem oli luk samting ya, nao olgeta tu oli joen wetem bigfala grup blong man ya we oli wokbaot fastaem long Jisas.​—Matyu 21:​7-9; Jon 12:12, 13.

Nating se naoia oli presem Jisas, be hem i save se bambae hem i kasem hadtaem. !Tingbaot, faef dei nomo biaen, ol man blong sem taon ya oli kilim hem i ded! Yes, Jisas i save se Jerusalem i wan ples we ol man oli agensem hem, mo hem i stap tingbaot samting ya, taem hem i mekem plan blong go insaed long taon ya long fasin we bambae i pulum ol man blong luk hem.

Wan Profet Tok Blong Bifo i Kamtru

Long 518 B.K.T.,b Sekaraea i talemaot se bambae Jisas i go insaed long Jerusalem long bigfala fasin olsem. Hem i raetem se: “Singaot wetem glad, dota blong Jerusalem. !Yufala i luk! King blong yufala, hem i stap kam long yufala. Hem i gat stret fasin, yes, God i sevem hem finis. Tingting blong hem i stap daon, mo hem i stap sidaon long wan dongki, long wan bigfala anamol, wan pikinini boe blong wan mama dongki. . . . Mo bambae hem i talemaot pis long ol nesen. Mo rul blong hem bambae i stat long solwora long saed ya i go kasem solwora narasaed, i stat long Reva i go kasem ol laswan ples blong wol.”​—Sekaraea 9:​9, 10.

Taswe, taem Jisas i go insaed long Jerusalem long Naesan 9, hem i fulumap wan profet tok blong Baebol. Samting ya i no kamaot olsem nomo. Hem i plan blong mekem olsem. Jes bifo long taem ya, taem Jisas i stap afsaed long Jerusalem yet, hem i talem long tufala disaepol blong hem se: “Yutufala i go long velej ya we yumi stap lukluk i go long hem. Nao taem yutufala i go insaed, wantaem nomo bambae yutufala i save luk wan dongki we olgeta oli fasem finis, wetem pikinini blong hem. Bambae yutufala i tekemaot rop blong tufala, yutufala i tekem tufala i kam. Mo sipos wan man i tok long yutufala from, yutufala i save talem se ‘Masta blong yumi i gat wok blong tufala ya’ nao wantaem nomo bambae hem i letem tufala i kam.” (Matyu 21:​1-3) ?Be from wanem Jisas i wantem sidaon long wan dongki, blong go insaed long Jerusalem? ?Mo wanem mining blong samting we bigfala grup blong man ya i mekem long Jisas?

Wan Mesej Long Saed Blong Fasin Blong Rul

Plante taem, wan pija i gat moa paoa long tingting blong man i bitim tok we hem i harem. Taswe, blong givim moa paoa long mesej we ol profet blong Jeova oli talemaot, sam samtaem Hem i talem long olgeta blong mekem samting we i stap long profet tok blong olgeta. (1 King 11:29-​32; Jeremaea 27:​1-6; Esikel 4:​1-​17) Rod ya blong toktok wetem ol man, i gat bigfala paoa long tingting blong ol stronghed man tu. Long sem fasin, taem Jisas i sidaon long wan dongki blong go insaed long Jerusalem, hem i stap talemaot wan strongfala mesej. ?Olsem wanem?

Long taem we oli raetem Baebol, ol man oli yusum dongki blong mekem ol impoten wok. Eksampel, taem Solomon i go blong oli putumap hem olsem king, hem i sidaon long wan “woman dongki” blong papa blong hem. Hem i pikinini blong wan man dongki, mo hem i no save karem pikinini. (1 King 1:​33-​40) Taswe, fasin ya we Jisas i raed i go insaed long Jerusalem long wan dongki, i minim se hem i givim hem olsem wan king.c Fasin blong bigfala hif man we oli go fastaem long Jisas, i givim moa paoa long mesej ya. Grup blong ol man ya, we i klia se bighaf blong olgeta oli blong Galili, oli sakem kot blong olgeta long rod long fored blong Jisas. Hemia wan fasin we i sem mak long taem ya we ol man oli talemaot se Jehu i king. (2 King 9:​13) Taem oli kolem Jisas se “Pikinini blong Deved,” oli makem se Jisas i gat raet blong rul. (Luk 1:​31-​33) Mo taem oli sakem ol han blong pamtri, oli soem se oli obei long rul blong hem.​—Skelem wetem Revelesen 7:​9, 10.

Taswe, grup blong man we i kam insaed long Jerusalem long Naesan 9, i givim wan klia mesej se Jisas nao i Mesaea mo King we God i makemaot. I tru, sam man oli no glad blong luk we Jisas i kam long fasin ya, antap moa ol Farisi. Oli ting se i no stret nating we ol man oli soem ona long Jisas olsem king. Oli kros, oli tok strong long Jisas se: “Tija. I gud yu blokem ol man ya blong yu oli stap kwaet.” Jisas i ansa, i se: “Mi mi talem long yufala, sipos olgeta ya oli stap kwaet, bambae ol ston ya nomo oli save singaot.” (Luk 19:39, 40) Yes, Kingdom blong God i stampa tok blong Jisas taem hem i stap prij. Hem i no fraet blong talemaot mesej ya, nating se ol man oli akseptem no no gat.

Samting We Yumi Lanem

Blong go insaed long Jerusalem long fasin we profet Sekaraea i tokbaot, Jisas i mas gat fasin blong no fraet. Hem i save se samting ya bambae i mekem ol enemi blong hem oli kros. Bifo we Jisas i go antap long heven, hem i givim oda long ol man blong hem se oli mas talemaot gud nyus blong Kingdom blong God, mo oli mas ‘go long ol man long olgeta ples long wol, blong pulum olgeta oli kam man blong hem.’ (Matyu 24:14; 28:19, 20) I nidim fasin no fraet blong mekem wok ya. I no evriwan we oli glad blong harem mesej ya. Samfala oli no intres long hem, mo samfala oli agensem hem stret. Sam gavman oli blokem sam fasin blong prij no oli putum tabu long hem olgeta.

Nating se i olsem, ol Wetnes blong Jeova oli luksave se oli mas talemaot gud nyus blong Kingdom blong God we i stanap finis, nating se ol man oli wantem lesin no oli no wantem. (Esikel 2:7) Taem oli stap gohed long wok ya we i save sevem laef blong man, promes blong Jisas i mekem tingting blong olgeta i strong. Hem i se: “Yufala i mas save, bambae mi mi stap wetem yufala oltaem, gogo wol ya i finis.”​—Matyu 28:20.

[Ol futnot]