?From Wanem Taem Blong Yumi i Nogud Tumas?

TAEM yu sidaon blong ridim wan nyuspepa, no yu lukluk ol nyus long televisin no lesin long radyo, yu sua se bambae yu harem sam nyus we i nogud. Ating yu no sapraes taem yu harem se wan faet we i stat longtaem finis i stap gohed strong yet, raf fasin i stap go antap yet, mo hadtaem blong kasem kakae i stap tekemaot paoa blong wan pua kantri yet.

Sipos yu laef longwe long ol samting ya, ating yu no stap harem nogud tumas long ol nyus ya. Sipos yumi sore long bigfala namba blong man ya we oli stap safa, bambae yumi harem nogud oltaem nomo. Nating se i olsem, i hadwok blong no harem nogud taem yumi luk olsem wanem trabol olsem i save spolem laef blong ol man wanwan. Hemia i minim se, i isi blong ridim nyus blong wan faet mo tingbaot bigfala namba blong man we oli ded from, be i nogud olgeta blong ridim nyus long saed blong Adnan, wan smol boe long Bosnia we i gat naen yia. Mama blong hem i ded taem wan bom i spolem haos blong olgeta. Sam manis biaen nomo, Adnan mo papa blong hem tufala i stap wokbaot long rod, ale wan man i sutum papa blong Adnan i ded. Sam wik nomo biaen, wan bom i bosta long yad blong skul blong tufala, ale Adnan i luk we blad i ronaot long bodi blong sista blong hem gogo hem i ded. Afta long ol samting ya, ol dokta oli traem givhan long Adnan, from we hem i harem nogud tumas long tingting blong hem. Be oli faenem se pikinini ya i no moa gat filing nating​—mo hem i no moa wantem save long wan samting. Long dei, hem i fraet, mo hem i stap tingtingbak long ol trabol we i bin kamaot. Long naet, hem i no save spel mo slipgud, from we hem i stap luk ol rabis drim. Be Adnan i no jes wan namba nomo long nyuspepa. Hem i wan pikinini we i stap safa. Yumi no save blokem filing blong sore we i kasem yumi taem yumi ridim store blong hem.

I sem mak long saed blong ol narafala trabol long wol. Yumi save ridim wan samting long nyus long saed blong ol man we oli sot long kakae. Be i defren olgeta taem yumi luk wan pija blong wan smol gel blong faef yia, we bel blong hem i solap mo ol leg mo han blong hem oli bun nomo. Kolosap hem i ded from hanggri. Yumi save ridim wan nyus long saed blong bigfala namba blong man we oli safa from raf fasin. Be i defren olgeta taem yumi harem se wan man i kilim nogud, i rabem no i repem wan widowoman we i olfala finis. Yumi save ridim nyus long saed blong ol famle we oli seraot. Be i defren olgeta taem yumi harem se wan mama i no givim kakae long pikinini blong hem no i kilim hem nogud.

Yumi harem nogud taem yumi ridim ol nyus olsem. !Be i nogud olgeta taem wan long ol trabol ya we oli fulap long olgeta ples blong wol, oli kasem yumi stret! Taem yu wan yu stap safa, i olsem we ol nyus blong olgeta ples blong wol we yu harem, oli hevi tumas long tingting blong yu. Yumi fraet long trutok ya se, ol trabol we oli stap kamaot from raf fasin, faet, kakae i sot, mo sik, naoia oli stap kam antap kwik moa i bitim olgeta taem bifo. Ol filing we plante man oli kasem taem oli fesem ol trabol long taem blong yumi, oli dip tumas—tingting i fasfas, oli fraet, mo tingting i foldaon olgeta.

Plante man long ol defren kaen skul oli stap lukaotem ansa long ol kwestin we oli mekem tingting blong olgeta i trabol, olsem: ?From wanem ol samting oli nogud tumas? ?Olsem wanem long fyuja blong ol man?

Sore tumas, ol skul tede oli no givim ol gudfala ansa long ol kwestin ya. Fastaem we yu ridim kwestin long fored blong buk ya, maet yu bin ansa ‘no’ long hem​—ating plante man oli tingting olsem. Plante skul we oli folem tingting blong fandamentalism,a oli traem faenem wan samting long Baebol we i no stap insaed long Baebol​—hemia stret dei mo haoa we wol ya bambae i lus. (Lukluk Matyu 24:36.) Ol man we oli prentem buk ya, oli letem Baebol hem wan i eksplenem ol tok we i stap insaed long hem. Maet yu sapraes blong luk se ol tok blong Baebol long saed blong ol las dei i tru mo i stret. Mo tu, Baebol i go moa i bitim we hem i jes eksplenem from wanem wol ya i nogud tumas. Hem i givim wan hop long fyuja we i rili mekem man i haremgud. I gud yu ridim ol haf we oli kam biaen, blong faenemaot olsem wanem hem i mekem olsem.

[Futnot]

[Foto Credit Line long pej 3]

Jobard/Sipa Press