Wol i Save Kasem Naf Kakae Blong Olwe—?Long Wanem Rod?

LESTER BROWN, presiden blong Wolwaj Institut long Wasington D.C., i talem se: “Nating se yumi traehad fulwan, maet yumi no moa naf blong kasem kakae olsem yumi bin kasem blong kolosap wan handred yia.” Folem buk ya New Scientist, long stat blong 1995, namba blong ol sid long wol we oli wokem bred long hem, oli godaon kasem wan mak we oli neva kasem bifo, hemia, 255 milyan tan​—naf sid blong fidim wol ya blong 48 dei nomo. Long ol yia bifo, taem namba i godaon aninit long mak blong 60 dei, saplae i save kam antap bakegen. Be naoia, Wolwaj i no sua sipos wol i naf blong mekem ol kakae i kam antap bakegen.

Long tri yia we i jes pas, oli tekem smol kakae nomo long ol garen, mo tu, naoia, plante pua kantri oli stap yusum moa sid blong fidim ol anamol blong olgeta. From samting ya, ol puaman oli no gat naf sid blong wokem kakae long hem. New Scientist i givim woning se, sipos yumi no stretem samting ya naoia, wan bilyan man we oli spenem 70 pesen blong ol mane blong olgeta long kakae, bambae oli no moa gat kakae nating.

Baebol i talemaot se ol man blong wol long taem blong yumi, bambae “oli gat hadtaem blong kasem kakae.” (Luk 21:11) Be God i lukluk ol trabol ya. Yes, hem i tingbaot ol trabol we man i kasem. Bambae hem i soemaot samting ya taem Kingdom blong hem i kam bos fulwan long wol. Long taem ya, bambae “graon ya blong yumi i givim plante kakae long yumi.” “Bambae i gat plante kakae long ples ya, we ol hil oli fulapgud long ol kakae.” (Ol Sam 67:6; 72:16) Long taem ya, ol profet tok blong Man we i Wokem yumi, bambae oli kamtru, se: “Yu soemaot we yu stap lukaotgud long wol ya taem yu stap sanem ren i kam nao yu mekem graon blong hem i kam gudfala . . . Ol flat ples long medel blong ol hil oli fulapgud long wit.”​—Ol Sam 65:​9, 13.

?Yu yu haremgud long nambawan promes ya? ?Yu yu wantem save olsem wanem blong kasem blesing from promes ya? Ale, nekis taem we ol Wetnes blong Jeova oli kam luk yu, askem long olgeta blong talem moa long yu long saed blong Paradaes ya we Baebol i promes long hem.

Sipos yu wantem wan man i kam luk yu blong mekem Baebol stadi wetem yu we yu no pem, plis raet long Association “Les Témoins de Jéhovah,” B.P. 787, Nouméa, Nouvelle-Calédonie.

[Foto Credit Line long pej 32]

Inset: Pictorial Archive (Near Eastern History) Est.