‘God i Wan Strong Sefples Blong Mi’
LONG taem ya we ‘laef i strong tumas,’ ol traem mo hadtaem oli stap kam antap bigwan. Eksampel, stret fasin blong yumi i save kasem traem long ples blong wok. Maet ol fren long skul oli traem mekem yumi foldaon long rabis fasin long saed blong seks. Mo tu, plante taem, wol ya we i fulap long ol doti mo kruked fasin, i save traem fasin blong yumi blong holemstrong long God.—2 Timote 3:1-5.
Asaf, man we i raetem wan haf blong Baebol, i laef long wan taem we i fulap long rabis fasin tu. Sam man we oli laef long taem blong hem, oli tokflas from fasin blong olgeta blong no obei long God. Asaf i raetem se: “Oli stap praod tumas from, nao fasin ya blong praod blong olgeta i olsem bidbid we oli stap hangem long nek blong olgeta, mo fasin blong faet blong olgeta i olsem klos blong olgeta. Oli stap laf long ol narafala man mo oli stap tokbaot ol samting nogud. Oli praod tumas, mo oli stap mekem plan blong mekem ol narafala man oli stap aninit long han blong olgeta.” (Ol Sam 73:6, 8) ?Yu tu yu luk fasin ya plante taem finis?
Fasin olsem i mekem olgeta we oli traehad blong mekem i stret oli harem nogud, mo tingting blong olgeta i foldaon. Asaf i talem wetem sore se: “Oltaem yu yu stap mekem mi mi harem nogud, i stat long moning, gogo i kasem long sapa. Mi traem tingting long ol samting ya be i had tumas long mi.” (Ol Sam 73:14, 16) !Maet filing blong yu i sem mak, be yu no mas letem tingting blong yu i foldaon! Asaf i naf blong stanap strong agensem ol rabis fasin long taem blong hem, mo yu save mekem olsem tu. ?Olsem wanem?
Asaf i luksave se aninit long rul blong ol sinman, trufala stret fasin i no save stap. (Ol Sam 146:3, 4; Proveb 17:23) Taswe, hem i no westem taem, paoa mo olting blong hem blong traem finisim ol rabis fasin raon long hem. Be hem i tingbaot blong frengud wetem Jeova nomo. Asaf i talem se: “Taem we mi mi kam, mi stap kolosap long yu, hemia i gud tumas long mi. Yu yu sefples blong mi, yu yu stap blokem mi.”—Ol Sam 73:28.
Naoia, olgeta we oli mekem kruked fasin long bisnes, plante taem oli kasem moa mane mo sas samting. Plante man oli tokflas tu from fasin blong olgeta blong sakemaot ol loa blong God long saed blong stret fasin. Be oli no save gohed olsem blong olwe. Asaf i luksave se: “Bambae yu yu putum olgeta long ol ples we i glis, bambae yu mekem olgeta oli foldaon, oli kam nogud olgeta.”—Ol Sam 73:18.
Yes, long taem we i stret long tingting blong God, bambae hem i spolem fasin blong trikim narafala, raf fasin, mo kruked fasin. Mo tu, bambae hem i spolem ol narafala fasin blong ol man we oli no obei long hem, we ol trufala Kristin oli mas ronwe long olgeta. Baebol i mekem promes ya se: “Olgeta we oli trastem Hae God bambae oli tekem graon ya i blong olgeta, be ol man nogud, Hae God bambae i ronemaot olgeta.” (Ol Sam 37:9) Go kasem taem ya, i gud sipos yumi save talem ol semfala tok we man blong raetem Sam i talem, i se: ‘Jeova i stap lukaotgud long mi oltaem, hem i wan gudfala ples blong haed blong mi. God blong mi, hem i stap blokemgud mi, hem i wan strong sefples blong mi.’—Ol Sam 18:2.