Epafras “Wan Man Blong Wok Blong Kraes We i Stap Stanap Strong”

HU I stanemap Kristin kongregesena long Korin, Efesas, mo Filipae? Maet yu ansa wantaem nomo se: “Pol, ‘aposol blong ol hiten man.’” (Rom 11:13) Yes, yu talem stret.

Be, ?hu i stanemap ol kongregesen long Kolosi, Hierapolis, mo Laodisia? Yumi no sua, be maet wan man we nem blong hem Epafras, i bin mekem samting ya. Nating sipos hem i bin mekem no nogat, ating yu glad blong kasem moa save long saed blong man ya blong prij, from we Baebol i tokbaot hem olsem “wan man blong wok blong Kraes we i stanap strong.”​—Kolosi 1:7.

Hem i Prij Long Vali Blong Lykus

Epafras, hem i nem ya Epafrodaetas we oli sotem. Be yumi no mas ting se Epafras ya hem i Epafrodaetas blong Filipae. Epafras i blong Kolosi, wan long tri Kristin kongregesen long vali blong Lykus Reva, long Esia Maena. Kolosi i stap 18 kilomita longwe long Laodisia, mo 19 kilomita longwe long Hierapolis, long ples we bifo oli kolem Frijia.

Baebol i no talem klia olsem wanem gud nyus blong Kingdom blong God i kasem Frijia. Be, ol man Frijia oli stap long Jerusalem long dei blong Pentekos long yia 33 K.T.b Maet sam long olgeta oli bin kam long Kolosi. (Ol Wok 2:​1, 5, 10) Long taem we Pol i prij long Efesas (long 52-​55 K.T.), hem i givim wan gudfala mo bigfala wetnes long ples ya, mekem se i no ol man Efesas nomo, be “olgeta man we oli stap long Esia, ol man Isrel wetem ol hiten man, olgeta evriwan oli harem tok blong Masta blong yumi.” (Ol Wok 19:10) I luk olsem se Pol i no talemaot gud nyus long Lykus Vali, from we plante we oli kam Kristin long ples ya, oli neva luk hem.​—Kolosi 2:1.

Folem tok blong Pol, man we i tijim ol man Kolosi long saed blong ‘gladhat blong God,’ hemia Epafras. Pol i kolem man ya we i wok wetem hem, “wan man blong wok blong Kraes we i stap stanap strong.” Samting ya i soemaot se Epafras i joen fulwan long wok blong talemaot gud nyus long ples ya.​—Kolosi 1:6, 7.

Aposol Pol mo Epafras tugeta i tingbaot bigwan, ol nid long saed blong speret blong olgeta long Lykus Vali we oli gat sem bilif olsem tufala. Pol, olsem ‘aposol blong ol hiten man,’ ating hem i glad tumas blong harem nyus ya se oli stap gohedgud. Epafras nao i talem nyus ya long Pol se ol man Kolosi oli gohedgud long saed blong speret.​—Kolosi 1:​4, 8.

Ripot Blong Epafras

Ol man Kolosi oli fesem sam bigfala problem. Samting ya nao i pusum Epafras blong mekem wan longfala trep long Rom, jes blong tokbaot ol problem ya wetem Pol. I klia se ripot we Epafras i mekem, i pusum Pol blong raetem tufala leta long ol brata ya we hem i no save olgeta. Wan, hemia leta long Baebol we hem i raetem i go long ol man Kolosi. Narafala leta, we i lus naoia, hem i raetem i go long ol man Laodisia. (Kolosi 4:​16) I stret blong ting se ol leta ya oli blong givhan long ol Kristin ya, folem samting we Epafras i luk se oli nidim. ?Wanem ol nid we hem i luk? ?Mo samting ya i soemaot wanem long saed blong fasin blong hem?

Leta we i go long ol Kristin long Kolosi i soemaot se, Epafras i wari we waes blong ol hiten man bambae i gat paoa long ol Kristin ya. Waes ya i sapotem strong fasin ya blong blokem ol samting we man i wantem mo blong laef olsem ol puaman, i sapotem wok blong ol rabis speret, mo tu, ol gyaman bilif blong mekem man i fraet we oli joen wetem wosip blong ol aedol. Mo tu, maet tijing blong ol man Jyu long saed blong fasin blong livim sam kaen kakae, mo fasin blong mekem lafet blong makem sam spesel dei, i gat paoa long sam memba blong kongregesen.​—Kolosi 2:​4, 8, 16, 20-​23.

From we Pol i raet blong tokbaot ol poen ya, samting ya i soemaot se Epafras i luksave mo i intres long ol nid blong ol Kristin brata mo sista blong hem. Epafras i soemaot se hem i tingbaot ol nid blong olgeta long saed blong speret wetem lav. Hem i save ol trabol we oli save kasem from ol samting raonabaot long olgeta. Epafras i lukaot advaes blong Pol, mo samting ya i soemaot se hem i gat tingtingdaon. Maet hem i harem se hem i nidim advaes blong wan man we i gat moa save. Nating se samting ya i tru no nogat, Epafras i mekem waes fasin.​—Proveb 15:22.

Wan Man We i Tinghae Long Prea

Long en blong leta we Pol i sanem i go long ol Kristin blong Kolosi, hem i talem se: “Epafras ya we hem tu i wan man blong kampani blong yufala, hem tu i talem halo long yufala. Hem i wan man blong wok blong Jisas Kraes, we oltaem hem i stap prea strong from yufala. Hem i stap askem long God blong bambae yufala i stanap strong, olsem we yufala i bigman finis, we tingting blong yufala i olsem natora finis, mo yufala i strong blong mekem olgeta samting we God i wantem. Mi mi save wetnes long hem, we hem i stap hadwok tumas blong yufala, mo blong ol man Laodisia mo ol man Hierapolis.”​—Kolosi 4:​12, 13.

Yes, taem Epafras “i stap kalabus” wetem Pol long Rom tu, hem i stap tingbaot ol brata we hem i laekem olgeta tumas, long Kolosi, Laodisia, mo Hierapolis, mo hem i stap prea from olgeta. (Faelimon 23) Prapa mining blong tok ya ‘prea strong,’ se ‘hem i faet’ from olgeta. D. Edmond Hiebert, wan man blong hae save, i talem se Grik tok we oli yusum long vas ya, i minim “wan wok we i strong, mo we man i mas lego plante samting blong mekem.” Samting ya i kolosap sem mak long ‘tingting blong Jisas Kraes we i trabol tumas,’ taem hem i prea long garen blong Getsemane. (Luk 22:44) Epafras i wantem tumas se ol brata mo sista blong hem long saed blong speret, oli kam strong gud mo oli kam bigman long ol Kristin fasin. !Tru ya, wan brata olsem we i tingting strong oltaem long saed blong speret, i rili wan bigfala blesing long ol kongregesen long taem ya!

From we oli kolem Epafras ‘wan man we i wok wetem mifala, we mifala i laekem hem tumas,’ i klia se fasin blong hem i pulum ol Kristin brata mo sista blong laekem hem. (Kolosi 1:7) Olgeta memba blong kongregesen oli mas givgivhan long olgeta wetem kaen fasin mo lav, taem oli gat rod blong mekem olsem. Eksampel, oli save halpem ol sikman, ol olfala, mo ol narafala we oli nidim spesel help. Mo tu, maet oli gat ol defren wok insaed long kongregesen, no maet oli save givhan long tiokratik wok blong bildim ol haos wosip.

Prea from ol narafala, olsem Epafras i mekem, hemia wan tabu wok we yumi evriwan i save mekem. Long ol prea olsem, yumi save talem ol tok we i soem se yumi wari long ol man blong wosip long Jeova we oli fesem plante defren denja mo trabol long saed blong speret, no long saed blong bodi. Sipos yumi traehad long rod ya, yumi save kam olsem Epafras. Yumi evriwan i save kasem blesing mo glad blong stap olsem ‘wan man blong wok, we narafala i laekem yumi tumas,’ long medel blong ol man we oli holemstrong long Jeova.

[Ol futnot]