Ripot Long Wok Blong Kingdom

Oli Ronwe i Go Long Tiokratik Ogenaesesen Blong Jeova

LONGTAEM bifo, tabu speret i pusum profet Aesea blong talemaot se: ‘Oli mas leftemap nem blong Jeova long ol aelan blong solwora.’ (Aesea 24:15) Ol Wetnes blong Jeova oli tingbaot ol aelan olsem haf blong “olgeta ples long wol” we Jisas i talem se oli mas “talemaot gud nyus” long hem.​—Matyu 24:14; Mak 13:10.

Ol aelan blong Makesas, oli stap 1,400 kilomita longwe long Tahiti, long saed i go long not is. Oli haf blong wan grup blong aelan long Saot Pasifik we oli kolem Franis Polinesia. I gat plante gras mo tri long ol aelan ya from we graon blong volkeno i rij, mo ples i hot mo i hevi. Be, ol Makesas oli karem wan narafala frut tu. Tingbaot eksampel blong wan famle we i lesin long mesej blong Kingdom long aelan blong Hiva Oa.

Jean mo waef blong hem, Nadine, tufala i no glad long fasin blong laef we ol man oli folem long ples we tufala i stap long hem, long Wes Yurop. Taswe tufala wetem pikinini blong tufala, i mekem disisen blong lego fasin blong laef ya we tufala i bisi tumas long hem, mo muf i go long ol aelan blong Makesas. Nyufala haos blong olgeta, we oli wokem long bambu, i stap long wan vali we i farawe long ol narafala haos. Blong luk famle we i stap kolosap moa long olgeta, oli mas wokbaot tu haoa antap long ol hil, long wan smosmol rod we i nogud. I tekem tri haoa long fowil trak blong go long velej we i kolosap moa, we i gat wan dokta, wan skul blong pikinini, mo wan stoa.

Jean mo Nadine, tufala i no intres long jyos. Be, tufala i storeyan plante long saed blong stampa blong laef. Plante taem, tufala i tokbaot ol defren tingting long saed blong evolusen.a Be i no gat wan long ol tingting ya we i mekem tufala ya i haremgud.

Afta long sikis yia we oli laef longwe long ol narafala man, oli sapraes blong luk tu Wetnes blong Jeova oli kamtru long haos blong olgeta. Ol man we oli stap long ol velej i no longwe long haos blong Jean mo Nadine, oli bin talemaot tufala long ol Wetnes ya. Oli storeyan, ale storeyan blong olgeta i go long saed blong evolusen. Jean mo Nadine tufala i glad tumas we tufala Wetnes ya i karem buk ya we ol Wetnes blong Jeova oli wokem, Life​—How Did It Get Here? By Evolution or by Creation? Jean mo Nadine i glad blong kasem wan buk we i skelemgud kwestin ya, se laef i kamaot olsem wanem.

Smoltaem biaen, Jean mo Nadine i stat blong stadi Baebol wetem ol Wetnes. Blong tri yia, tufala i gohedgud long stadi blong tufala. Tufala i kasem strong bilif se i no longtaem, bambae ful wol i kam wan paradaes. Afta we tufala i gat tri pikinini, i hadwok long olgeta blong mekem trep blong fo haoa blong go long ol Kristin miting long Haos Kingdom. Be, samting ya i no blokem olgeta blong kam long ol miting. Biaen, Jean mo Nadine i tekem baptaes blong soemaot se tufala i givim laef blong tufala long Jeova. Tufala i mekem samting ya long wan asembli long big velej. !I gat 38 man we oli kam long asembli ya!

Famle ya i mekem disisen blong livim haos blong olgeta we i stap farawe long ol narafala man, blong oli save givhan long smol grup blong man we oli stap talemaot Kingdom long ples ya. Oli muf i go long wan velej we i gat wan taosen man long hem. Naoia, Jean i wan man blong givhan long kongregesenb blong ol Wetnes blong Jeova long ples ya. Famle ya we i bin ronwe long ol man bifo blong stap olgeta nomo, oli glad tumas long blesing we oli kasem. Oli faenem ples ya we hem nomo i trufala sefples blong haed, hemia tiokratik ogenaesesen blong Jeova.

[Ol futnot]