Wan Kwestin

?Baebol i talem wanem long saed blong fasin blong kilim man i ded blong panisim hem, taem hem i brekem loa?

I tru se yumi evriwan i gat ol prapa filing long saed ya, we oli stanap long save blong yumi no long ol samting long laef blong yumi. Be, yumi ol Wetnes blong Jeova, yumi mas traem tingting olsem God long saed blong fasin ya blong kilim man i ded blong panisim hem. Mo yumi no mas joen long ol tingting blong politik we plante man oli gat long bisnes ya.

Blong talem stret, God i no soem long Tok blong hem se fasin blong kilim man i ded blong panisim hem, i rong.

Long taem blong ol faswan man, Jeova i talem ol tingting blong hem long saed ya, olsem yumi ridim long Jenesis japta 9. Japta ya i tokbaot Noa wetem famle blong hem, we oli kam ol bubu blong olgeta man blong wol. Afta we oli kamaot long bigfala sip, God i talem se oli save kakae ol anamol​—i min se oli save kilim ol anamol i ded, mekem blad blong olgeta i ronaot mo kakae olgeta. Biaen, long Jenesis 9:​5, 6 (NW), God i talem se: “Mo antap long samting ya, bambae mi mi askembak blad blong sol blong yufala. Bambae mi mi askembak long han blong olgeta laef samting. Mo bambae mi mi askembak sol blong man long han blong narafala man, yes, long han blong evri man we i brata blong hem nomo. Man we i mekem blad blong narafala man i ron, bambae ol man oli mekem blad blong hem tu i ron, from we God i wokem man i olsem pija blong hem nomo.” Taswe, Jeova i soem se fasin blong kilim man i ded blong panisim hem i stret, sipos man ya i bin kilim narafala i ded.

Long taem we God i luk ol man Isrel olsem ol man blong hem, i gat plante narafala bigfala sin agens long Loa blong hem, we hem i givim panis blong ded from. Long Namba 15:30, yumi ridim tok ya we i save tokbaot plante fasin, se: ‘Man we i minim blong mekem wan samting nogud, olsem tok nogud long Jeova, yufala i mas kilim hem i ded, nating se hem i wan manples no wan strenja.’

?Be olsem wanem afta we oli stanemap Kristin kongregesen?a Yumi save se Jeova i letem ol gavman blong man oli stap, mo i kolem olgeta ol paoa we oli rul. Baebol i givim advaes long ol Kristin blong oli obei long ol gavman ya, mo i talem se ol gavman ya oli “mekem wok blong God blong mekem i gud long yu. Be sipos yu stap mekem i no stret, yu yu mas fraet long hem. From we i no blong nating we hem i stap karem naef blong faet. Tru ya, hem i mekem wok blong God, mo hem i save soemaot kros blong givimbak long man we i stap mekem nogud.”​—Rom 13:​1-4, NW.

?I min se ol gavman oli gat raet blong tekemaot laef blong olgeta we oli mekem ol bigfala nogud fasin blong brekem loa? Folem ol tok blong 1 Pita 4:​15, yumi mas ansa yes. Long vas ya, aposol ya i talem long ol brata blong hem se: “Man we i kilim man, no i stil no i brekem loa, no i stap go insaed long ol bisnes blong narafala man, hem bambae i panis. Be i no stret sipos wan long yufala i panis from ol fasin olsem.” ?Yu makem tok ya, ‘i no stret sipos wan long yufala i panis from fasin blong kilim man’? Pita i no talem se ol gavman oli no gat raet blong panisim wan man we i kilim narafala i ded. No gat, hem i soemaot se maet man we i kilim narafala man i ded i kasem panis we i stret long samting we hem i bin mekem. ?Samting ya i minim panis blong ded?

Yes, maet man ya i mas ded, samting ya i kamaot klia long tok blong Pol long Ol Wok japta 25. Ol man Jyu oli talem se Pol i brekem Loa blong olgeta. Taem komanda blong ol soldia i sanem Pol, presina blong hem, i go luk hed gavman blong Rom, hem i talem tok we i stap long Ol Wok 23:29 se: “Mi faenemaot we hem i no mekem wan samting nating we i stret blong hem i ded, no i go stap long kalabus from. Ol poen we olgeta oli faenem long hem, oli blong bisnes blong loa blong olgeta nomo.” Afta we tu yia i pas, Pol i talemaot store blong hem long fes blong hed gavman ya Festas. Yumi ridim long Ol Wok 25:8 se: “Pol i givim ansa blong hem long olgeta, i se ‘Mi mi no mekem wan samting nating we i nogud long Loa blong ol man Isrel, no long haos blong God, no long hed gavman blong ol man Rom.’” Be naoia, traem lukluk ol tok blong hem long saed blong panis, mo fasin blong kilim man i ded blong panisim hem tu. Yumi ridim long Ol Wok 25:10, 11 se:

“Pol i talem se ‘Mi mi stanap long wan kot we Sisa ya, hed gavman long Rom, hem i stanemap. Mo i stret nomo blong kot olsem i traem mi. Yu yu savegud finis, we mi mi no mekem sam samting nogud long ol man Isrel ya. Sipos mi brekem loa, mi mekem sam samting we i stret blong mi ded from, oraet. Mi no save askem long yu blong yu tekemaot mi long panis olsem blong mi, se bambae mi no ded. Be sipos tok ya blong olgeta blong talemaot ol poen ya long mi i no tru, bambae i no gat man we i gat raet blong putum mi long han blong olgeta. Mi mi wantem go talemaot bisnes ya blong mi long fes blong Sisa, long Rom.’”

Pol, we i stap stanap long fes blong wan hed gavman we oli stanemap long stret rod, i agri se Sisa i gat raet blong panisim ol man we oli mekem i nogud, mo blong kilim olgeta oli ded tu. Hem i agri se hem i mas kasem panis sipos hem i gat fol. Mo tu, hem i no talem se Sisa i save givim panis ya blong ded long ol man we oli kilim narafala i ded nomo.

I tru se, fasin we ol man Rom oli folem blong jajem ol man i no stretgud olgeta. Be i sem mak long saed blong ol kot blong man tede. Long taem bifo mo naoia tu, samfala oli pas long kot mo kasem panis, nating se oli no gat poen. Paelet tu i talem long saed blong Jisas, se: “Mi mi no faenem wan samting we hem i mekem, we i stret blong hem i ded from. Bambae ol man blong mi oli wipim hem, mo biaen bambae oli letem i gofri.” Yes, nating se gavman i agri se Jisas i no gat poen, be oli kilim hem i ded.​—Luk 23:22-25.

Fasin blong olgeta blong mekem i no stret long Pol mo Pita i no pusum tufala blong talem se fasin blong kilim man i ded blong panisim hem, i nogud. Defren olgeta, tingting blong God long bisnes ya hemia se, go kasem taem we ol gavman blong Sisa oli no moa stap, bambae oli ‘karem naef blong faet blong soemaot kros long ol man we oli stap mekem i nogud.’ Samting ya i minim se oli save yusum naef blong faet blong kilim man i ded blong panisim hem. Be long saed blong bigfala kwestin ya se gavman i mas yusum raet blong hem blong kilim i ded ol man we oli kilim narafala man i ded, no nogat, ol trufala Kristin oli lukaotgud blong no tekem wan saed no narafala saed long bisnes ya. Oli no olsem ol lida blong Krisendom we oli joen long ol rao long kwestin ya.

[Futnot]