Misinari Wok Long Ples Blong Mitufala Nomo

MI STAP visitim ol Kristin kongregesen stat long Potugal go kasem Jaena​—mi no rili mekem olsem be mi harem se mi stap mekem olsem. Yes, mi wetem waef blong mi, Olive, mitufala i neva aot long kantri blong Briten.

Mitufala i stap visitim ol kongregesena blong ol Wetnes blong Jeova we oli toktok narafala lanwis. Namba blong ol kongregesen ya i stap kam antap, mo oli stap wanwan olbaot long kantri ya. Wok ya blong prij long ol man we oli toktok ol narafala lanwis we mitufala i joen long hem, hem i stap gohed kwik, mo i karem plante frut long saed blong speret. Eria we mitufala i wok long hem, i stat long aelan blong Jesi we hem i stap long solwora 20 kilomita aot long Nomandi, Franis. Long ples ya, i gat wan grup we oli toktok lanwis blong Potugal. Mo mitufala i go antap kasem not blong Engglan, long taon blong Sandalan. Long ples ya, mitufala i visitim ol man we oli toktok lanwis blong Jaena mo we oli soem intres long trutok. ?Olsem wanem mitufala i kasem wok ya we i defren? ?Mo wanem i stap kamaot long ples ya we mitufala i stap mekem misinari wok long hem? Bambae mi eksplenem samting ya.

Blong 20 yia, mi mo Olive i bin mekem wok blong visitim ol defren kongregesen evri wik. Ol trep ya oli tekem mitufala i go long not, long saot, long is mo long wes blong Briten. I no longtaem i pas, mitufala i go long Malta, wan aelan long solwora blong Mediterenia, blong visitim ol Kristin brata we oli soemaot kaen fasin bitim mak long mitufala. (Lukluk Ol Wok 28:1, 2.) Afta long tri yia long Malta, mitufala i stat tingbaot se weples nao bambae oli sanem mitufala i go wok long hem. Mitufala i gat tingting se maet oli sanem mitufala i go long wan ples long bus long Engglan. Ale mitufala i stat blong tingrere long wan ples olsem. !Mitufala i sapraes tumas taem mitufala i kasem wok ya blong go visitim ol grup mo kongregesen we oli toktok 23 defren lanwis!

Mitufala i stap tingbaot olsem wanem bambae mitufala i mekem wok ya. Mitufala i no bin joen plante wetem ol man blong ol narafala kantri mo kastom. Long Malta nomo mitufala i bin mekem olsem. ?Bambae mitufala i naf blong leftemap tingting blong olgeta ya we oli kasem save smol nomo long Engglis? ?Olsem wanem mitufala i save toktok wetem olgeta taem mitufala i no save lanwis blong olgeta? ?Olsem wanem long saed blong kakae mo ol defren kastom blong olgeta ya? ?Bambae mitufala i save jenisim tingting mo fasin blong mitufala blong laenap wetem ol samting ya? Ol kwestin olsem oli stanap long tingting blong mitufala, taem mitufala i prea mo tingting dip, blong givim ansa long tok ya we i olsem se i singaot mitufala blong kamkros long Masedonia.​—Ol Wok 16:​9, 10; 1 Korin 9:​19-22.

Winim Problem Blong Lanwis

Olive i eksplenem se: “Fastaem, mi harem se mi no naf, from we mi no save ol narafala lanwis ya nating. Mi no save wanem rod blong yusum blong givhan long ol sista. Biaen, mi tingbaot brata mo sista we oli mekem Baebol stadi wetem mitufala fastaem. Oli pulum mitufala blong neva talem ‘no’ long wan wok. Oli tijim long mitufala se Jeova i no save askem long yumi blong mekem samting we yumi no naf blong mekem.” Ale, mitufala tugeta i agri blong mekem wok ya.

Naoia, taem mitufala i tingtingbak, mitufala i luksave se maet i moagud we mitufala i no save toktok ol narafala lanwis ya. Samting ya i bin halpem mitufala blong mekem i sem mak nomo long olgeta man. Olsem nao, taem mitufala i go long miting long ol defren lanwis evri wik, samting ya i mekem se mitufala i kasem save long filing blong ol brata blong ol narafala kantri taem oli mas lesin long ol miting long Engglis, be oli kasem save smol nomo long olgeta. Mitufala i mas rili mekem reregud ol miting blong kasem mining blong ol tok we i kamaot. Long evri miting, Olive i givim ansa long wan kwestin. Hem i rerem ansa ya long Engglis, nao hem i askem wan sista blong tanem ansa ya i go long lanwis, mo raetemdaon long pepa folem saon blong ol wod. Olive i talem se hem i stap fraet lelebet taem hem i putum han blong hem i go antap, blong givim ansa. Sam samtaem, ol narafala oli laf. Be samting ya i no blokem hem. Hem i talem se: “Mi save se ol brata oli glad long ol traehad blong mi. Antap moa, ol ansa blong mi oli leftemap tingting blong olgeta ya we oli toktok lanwis ya, blong oli ansa long miting.”

Taem mi givim ol tok, hemia i defren tu, from we mi mas wet afta we mi toktok smol, blong brata i tanem ol tok blong mi i go long lanwis. I isi nomo blong mi fogetem samting we mi stap tokbaot. Mi faenem se mi mas putum tingting blong mi i stap strong moa long ol tok blong mi, mo sotem olgeta bigwan. Be mi laekem blong mekem ol tok ya.

Wok Blong Prij Long Ol Defren Ples

Long plante taon long Briten, ol man we oli toktok ol narafala lanwis oli stap wanwan olbaot, maet tu long wan rod, mo biaen, yu mas go longwe blong faenem sam narafala. Be taem yu talem halo long prapa lanwis blong olgeta mo yu luk se oli glad tumas, yu harem se i no blong nating nomo we yu traehad. Sipos brata ya we mi stap prij wetem hem i tokbaot mesej blong Kingdom long prapa lanwis blong ol man blong haos, plante taem ol man ya oli glad tumas blong storeyan.

Yes, wok blong prij long ol man blong ol narafala kantri, i givim moa glad long mitufala i bitim plante narafala wok we mitufala i bin mekem long ol 40 yia we mitufala i bin talemaot Kingdom. Namba blong olgeta we oli save kam long trutok yet i bigwan tumas. I tru tumas se plante man oli kasem save long trutok kwik moa mo oli laekem trutok moa, taem oli kasem tijing long prapa lanwis blong olgeta. (Ol Wok 2:8, 14, 41) Long en blong miting, taem mitufala i luk sam brata mo sista we oli krae from glad taem oli harem miting blong faswan taem long prapa lanwis blong olgeta mo kasem save long hem fulwan, hemia i pulum filing blong mitufala bigwan.

Taem mitufala i go prij long ol haos wanwan, mitufala i traehad blong talem fastok long lanwis blong man long haos, nating se sam samtaem i no isi nating blong mekem olsem. Eksampel, blong talem “halo” long wan man Gujarati, yu talem Kemcho. Be wan taem mi mestem, nao mi talem wod ya long fasin we ol man oli ting se mi stap mekem pablisiti blong wan kaen kofe. Nating se i olsem, long wan haos, hasban mo waef blong hem, tufala i smael taem mi talem halo long lanwis Gujarati. Wantaem nomo, tufala i singaotem mitufala long kaen fasin blong kam insaed, mo tufala i givim kofe long mitufala​—be i no from we mi talem halo long rong fasin. Mitufala i faenemaot se tufala i famle wetem sam Wetnes blong Jeova long grup we mitufala i stap visitim, mo tufala i soem trufala intres long trutok.

Blong plante yia, wan sista we i toktok Engglis i stap givim ol Wajtaoa mo Wekap! long wan woman we i toktok lanwis Jaena. Sam samtaem, hem i askem woman ya blong mekem wan Baebol stadi we hem i no pem, be woman ya i no wantem. Wan dei, wan sista we i stap lanem lanwis blong Jaena i go wetem sista ya, mo i givim buk ya Yu Save Laef Foreva Long Paradaes Long Wol long woman blong haos long lanwis Jaena. Woman ya i glad blong kasem buk ya.b Nao hem i agri blong mekem wan Baebol stadi from we hem i gat buk ya long prapa lanwis blong hem. Smol tok ya we hem i harem long prapa lanwis blong hem i gat paoa long hem.

Ol Defren Kastom

Bifo, mitufala i no save se long sam kastom, ol man oli no wantem se waef blong olgeta i goaot long naet, olgeta nomo. Samting ya i mekem se i hadwok long plante sista blong kam long miting long naet. Sam man Esia oli bilif se ol yangfala woman we oli jusum blong no mared be blong gohed blong stap laef wetem papa mama blong olgeta, oli daonem famle blong olgeta. Papa blong wan yangfala sista i wantem kakae posen taem sista ya i no wantem mared wetem man ya we famle i jusum blong hem. !Yes, ol problem we ol sista olsem oli mas fesem oli bigwan! Nating se i olsem, taem yu luk paoa we trutok i gat long laef blong famle, mo olsem wanem fasin blong ol sista ya blong holemstrong long Jeova i gat paoa long ol papa mama blong olgeta, hemia i rili nambawan.

Blong mekem wok ya, mitufala i mas jenisim sam samting. Bifo we mitufala i stat long wok blong visitim ol kongregesen, mi kakae Engglis kakae nomo. Be naoia, mi laekem moa ol kakae we i gat plante pima long hem. Mitufala i sore we plante yia oli pas bifo we mitufala i stat blong kakae ol defren kakae, olsem fis we oli no kukum mo kari.

Gudfala Fyuja

Long plante ples, i klia se hemia nao stret taem blong wok blong prij long ol man blong ol narafala lanwis i karem plante frut. Naoia, i gat moa buk long ol defren lanwis. Yumi luksave se Jeova i stap blesem wok ya taem ol nyufala kongregesen oli stanap. Ol brata we oli save ol narafala lanwis oli stap kam long ol kongregesen farawe blong givhan.

Wan nambawan eksampel, hemia ol refujic blong Sair mo sam narafala kantri blong Afrika we oli toktok Franis, mo oli glad blong lesin long gud nyus blong Kingdom. Plante long olgeta oli kam long Briten long ol yia we oli jes pas. Taem oli stanemap faswan kongregesen long lanwis Franis long London, i gat 65 man blong talemaot Kingdom long hem. Wan yia biaen, namba ya i kam antap bigwan go kasem 117. Long olgeta ya, 48 oli mekem wok blong fultaem paenia. Smoltaem biaen, oli stanemap namba tu kongregesen from we i gat plante man we oli soem bigfala intres. Long rod ya, oli save keagud long olgeta ya we oli soem intres. I gat 345 blong olgeta ya we oli kam long lafet blong Memoriol long 1995. Ol misinari we oli kamaot long Gilead Skul bifo mo we oli bin wok long Benin, Côte d’Ivoire, Moroko, mo Sair, naoia oli yusum save blong olgeta long wok blong misinari, blong lukaot long ol man ya we namba blong olgeta i stap kam antap kwiktaem nomo, mo oli sapraes long bigfala frut we wok ya i stap karem.

Wan taem mi visitim kongregesen we ol man long hem oli toktok Franis, ale mi go long wan Baebol stadi, hemia wan yangfala woman Afrika. Taem mifala i mas aot long en blong stadi, yangfala woman ya i askem strong long mifala se: “Plis, yufala i no go yet. Yufala i mas stap smoltaem moa.” Hem i wantem save moa. Hem i mekem mi mi tingbaot woman ya Lidia long faswan handred yia.​—Ol Wok 16:​14, 15.

Faswan wok blong mifala, hemia blong givhan long ol smol grup we oli toktok narafala lanwis, blong oli kam ol kongregesen. Long ol grup we ol brata oli mekem wan Buk Stadi evri wik, mifala i mekem se i gat wan sot Tiokratik Skul tu, long wan taem evri manis. Samting ya i givhan long olgeta blong toktokgud long wok blong prij. Biaen, sloslou, oli traem kasem mak we oli mekem olgeta faef miting blong kongregesen evri wik. Naoia, i gat ol nyufala kongregesen long lanwis blong Jaena (Kanton), Franis, Gujarati, Japan, Potugal, Punjabi, Tamil, mo Wels.

Mo tu, mitufala i gat jans blong go long miting blong ol brata we sora blong olgeta i fas. Wan samting we i pulum filing blong mitufala, hemia taem mifala i luk ol brata oli yusum han blong olgeta blong singsing. Mi tinghae tumas long ol bigfala traehad blong olgeta ya we oli mekem saen long han blong olgeta blong talemaot Kingdom long ol man. Mo tu, i gat ol man we oli save tanem ol tok blong ol man we oli blaen mo sora blong olgeta i fas tu. I luk olsem se Jeova i stap mekemsua se yumi no mestem wan man.

Wan samting nomo we mitufala i save askem long yufala, hemia sem samting we Jisas i talem se: “Yufala i mas askem strong long masta blong garen ya, blong hem i sanem sam moa man oli kam blong karem ol kakae ya blong hem.” (Matyu 9:38) Plante brata oli rere blong mekem hadwok ya blong lanem lanwis blong ol man we oli stap long ol ples we kongregesen blong olgeta i prij long hem. Nating se i no gat wan merikel we i save mekem se yumi toktok narafala lanwis kwiktaem nomo, be i sua se Jeova i stap mekem rod blong wok blong prij i gohedgud long ples ya we i olsem wan teritori blong ol misinari, wan garen we kakae blong hem i reregud blong karem. (Jon 4:35, 36)​—Colin Seymour i talem store ya.

[Ol futnot]