Ripot Long Wok Blong Kingdom

Kam Fri Long Paoa Blong Ol Rabis Speret

LONGTAEM finis i kam, wok blong ol rabis speret i stap bos long laef blong plante milyan man. !Be i gat rod blong kam fri! Hemia samting we i hapen long plante man long taon blong Efesas bifo. Baebol i talem se, “plante man lelebet we oli stap mekem bisnes blong posen, mo kleva, mo majik, oli karem ol buk blong olgeta oli kam, oli mekem hif long hem, nao oli bonem olgeta . . . Nao, long wan bigfala fasin, tok blong Jeova i stap goaot moa long evri ples, i stap kam strong moa oltaem.”​—Ol Wok 19:19, 20, NW.

Long sem fasin, Kristin kongregesena tede tu i stap kam antap kwiktaem. Olsem long Efesas bifo, sam we oli kam ol man blong bilif tede, oli stap mekem wok blong ol rabis speret bifo. Store ya we i kamaot long Simbabwe i soemaot samting ya.

Plante man oli savegud se Gogo (we i minim Bubu woman) Mthupha i gat spesel paoa we i kamaot long ol rabis speret. Sam man oli aot long ol ples farawe olsem Sambia, Botswana, mo Saot Afrika, oli kam luk hem. Hem i stap givim lif meresin long olgeta. Mo tu, Gogo Mthupha i tijim long ol narafala, olsem wanem blong kam wan n’anga, no kleva. !Mo samtaem, hem i wokem nakaemas long narafala man!

Wan wik, long Sande moning, sam Wetnes blong Jeova oli stap prij long ol haos wanwan, ale oli visitim Gogo Mthupha. Hem i haremgud tumas blong storeyan wetem olgeta long promes blong Baebol long saed blong wan nyufala wol we stret fasin nomo i stap long hem, wan wol we i no moa gat ol rabis fasin blong pulum yumi. Hem i karem buk ya Yu Save Laef Foreva Long Paradaes Long Wol,b mo hem i agri blong stadi Baebol wetem ol Wetnes long haos blong hem. Afta we hem i mekem stadi tri taem nomo, hem i stat blong kam long ol miting.

Tru long stadi blong Baebol we Gogo Mthupha i mekem, hem i kasem save se ol spesel paoa blong hem oli kamaot long ol rabis speret we oli rebel agensem hae rul blong Jeova. (2 Pita 2:4; Jud 6) Hem i kasem save tu se ol rabis speret ya oli gat strong tingting blong pulum olgeta man we oli save pulum, blong oli agensem Jeova mo agensem klin wosip. Be, Gogo Mthupha i dipen long fasin ya blong singaot ol rabis speret blong kasem mane. Taswe, ?bambae hem i mekem wanem naoia?

Gogo Mthupha i talem se hem i wantem sakemaot olgeta samting blong givim laki mo olkaen samting we hem i yusum blong wok wetem ol rabis speret. Hemia i minim tu spesel hat we hem i werem blong kavremap hed blong hem, mo “ol hon blong buluk we oli toktok.” Hem i yusum ol samting ya blong mekem wok blong n’anga, blong mekem ol sikman oli kamgud bakegen. Gogo Mthupha i wantem sakemaot olgeta samting olsemia, nao biaen, hem i save mekem wok blong Jeova, God ya we i laef, mo we hem nomo i trufala God.

Be, sam famle blong hem oli no glad from we hem i no moa sapotem olgeta long saed blong mane. Oli wantem gohed blong kasem mane long wok ya, taswe oli askem hem blong givim long olgeta, ol samting we hem i yusum blong mekem majik, wetem spesel paoa blong hem blong wok wetem ol rabis speret. Be Gogo Mthupha i no wantem.

Wetem help blong kongregesen blong ol Wetnes blong Jeova long ples blong hem, hem i fulumap ol samting we hem i yusum blong mekem wok blong ol rabis speret, oli go long tri bigfala bag, mo hem i bonem olgeta. Taem faea i stap bonem ol samting ya we oli joen wetem wosip blong ol rabis speret, Gogo Mthupha i talem se: “!Yufala i luk! Hon ya i no save sevem hem wan.”

Afta we sam taem i pas, Gogo Mthupha i glad blong tekem baptaes long wora blong soem se hem i givim laef blong hem long Jeova. ?Naoia, hem i stap mekem wanem wok blong kasem ol samting we hem i nidim blong laef? Hem i salem ol ligim. Yes, paoa blong Tok blong God i save mekem man i kam fri long wosip blong ol rabis speret. Olsem Gogo Mthupha i talem: “I no gat wan narafala taem long laef blong mi we mi harem se mi fri olsem naoia.”

[Ol Futnot]