Wan Laef We Mi Neva Sore From

PAUL OBRIST I TALEM STORE YA

Long 1912, mi mi gat sikis yia, nao Mama blong mi i ded taem hem i bonem namba faef pikinini blong hem. Tu yia biaen, wan yangfala haosgel, Berta Weibel, i stat lukaot long famle blong mifala. Long yia we i kam biaen, Papa i maredem hem, ale mifala ol pikinini i glad blong gat wan mama bakegen.

MIFALA i stap long Brug, wan smol taon blong Swiselan we ol man blong hem oli toktok lanwis blong Jemani. Berta i wan trufala Kristin, mo mi laekem hem tumas. Long 1908, hem i bin stat blong stadi long ol buk blong ol Baebol Studen (Ol Wetnes blong Jeova), mo hem i stap talemaot long ol narafala ol samting we hem i lanem.

Long 1915, smoltaem afta we Berta mo Papa tufala i mared, mi go wetem Berta blong lukluk “Sinema Blong Ol Samting We God i Wokem” (“Photo-Drama of Creation”). Sinema ya blong Grup Blong Ol Intenasnal Baebol Studen i gat bigfala paoa long tingting mo hat blong mi, mo long plante narafala man tu. Haos blong sinema long Brug i fulap tumas long man, mekem se ol polis oli satem doa mo oli no moa letem ol narafala man oli go insaed. Plante oli klaemap wan lada blong traem kam insaed tru long wan windo we i open, mo sam long olgeta oli winim.

Gudfala Eksampel Blong Mama

Faswan Bigfala Faet Blong Wol i stap gohed strong long Yurop, mo ol man oli fraet long saed blong fyuja. Taswe, wok we Mama i mekem blong go long ol haos wanwan blong leftemap tingting blong ol man wetem mesej blong Kingdom blong God, i wan nambawan wok. Sam samtaem, hem i letem mi mi go wetem hem, mo mi mi haremgud tumas long ol taem olsem. Long 1918, Mama i tekem baptaes long wora blong soemaot se hem i givim laef blong hem long Jeova God.

Papa i no blokem wosip blong Mama go kasem taem we hem i tekem baptaes. Nao biaen, hem i stat blong agensem Mama. Wan dei, hem i tekem ol buk blong Mama we oli tokbaot Baebol mo i sakem olgeta long faea. Mama i jes gat naf taem blong karemaot Baebol blong hem nomo long faea. Biaen, Mama i mekem wan samting we mifala i sapraes long hem. Hem i go long Papa mo i holem hem. Hem i no kros nating long Papa.

Papa i sapraes tumas, ale kros blong hem i godaon. Be sam samtaem, fasin agens blong hem i kamaot bakegen. Mifala i jes stap kwaet nomo taem hem i faerap long kros.

Mi Faenem Wok Mo Mi Gohed Long Saed Blong Speret

Long 1924, afta we mi finisim wan kos blong tri yia blong kam wan man blong katem hea, mi aot long famle blong mi, mo mi faenem wok long wan eria blong Swiselan we ol man blong hem oli toktok lanwis Franis. Hemia i mekem se mi gat jans blong toktok moagud long lanwis ya. Taem mi muf i go long ples ya, samting ya i spolem mi lelebet long saed blong speret. Be, mi neva lusum lav we mi gat long trutok blong Baebol. Taswe, sikis yia biaen, taem mi gobak long ples blong mi, mi stat blong go long ol miting blong Kristin kongregesena long Brug.

Smoltaem biaen, mi muf i go long Raenfelden, wan smol taon we i stap samwe 40 kilomita longwe long ples blong mi. Mi wok long ples blong katem hea we i blong sista blong mi. Mi joen long wan smol grup blong Baebol Studen long ples ya, mo mi stap gohedgud long saed blong speret. Wan dei, long en blong Baebol stadi we mifala i stap mekem long medel blong evri wik, Brata Soder, elda we i lidim grup ya, i askem se: “?Hu bambae i go prij long Sande?” Mi talem se bambae mi mi go prij. Mi ting se bambae wan man i kam wetem mi, mo i soem long mi olsem wanem blong prij.

Taem Sande i kam mo mifala i go long ples we bambae mifala i prij long hem, Brata Soder i talem se: “Masta Obrist bambae i wok long ples ya.” Hat blong mi i pam long fasin we i neva pam bifo. Nating se i olsem, mi stat go long haos blong ol man blong storeyan wetem olgeta long Kingdom blong God. (Ol Wok 20:20) Stat long taem ya, mi neva kam slak long wok blong prij we Jisas i talem se i mas kamtru fulwan bifo we wol ya i kasem en blong hem. (Matyu 24:14) Long Maj 4, 1934, taem mi gat 28 yia, mi baptaes long wora blong soemaot se mi givim laef blong mi long Jeova God.

Tu yia biaen, mi faenem wok olsem man blong katem hea long Lugano, wan taon long Swiselan we ol man blong hem oli toktok lanwis blong Itali. Kwiktaem nomo, mi stat talemaot gud nyus long ples ya. Nating se mi no save toktokgud long lanwis blong Itali, long faswan Sande we mi prij, mi seremaot 20 smol buk we mi karem wetem mi. Afta we sam taem i pas, mi pulum sam man we oli intres oli kam wanples blong mekem wan grup blong stadi Wajtaoa. Sloslou, sam long olgeta ya oli tekem baptaes, mo long Febuwari 1937, mifala i stanemap wan kongregesen blong ol Wetnes blong Jeova long Lugano.

Tu manis biaen, long Epril 1937, mi kasem wan leta we i jenisim laef blong mi bigwan. Leta ya, i singaotem mi blong wok long Betel, hemia hedkwota blong ol Wetnes blong Jeova long ol kantri. Wantaem nomo, mi agri blong mekem wok ya. Hemia wan disisen we mi neva sore from. Olsem nao, mi stat mekem wok blong God fultaem, we mi bin gohed long hem blong 60 yia nao.

Wok Long Betel Long Trabol Taem

Long taem ya, Betel i stap long taon blong Ben, bigfala taon blong Swiselan. Long ples ya, mifala i prentem ol buk, buklet mo magasin long 14 lanwis, mo sanem olgeta oli go long olgeta ples long Yurop. Sam samtaem, mi yusum wilbara blong karem ol buk oli go long ples blong tren, from we plante taem mifala i no gat trak. Faswan wok blong mi long Betel, hemia long ples we oli mekemrere ol buk blong prentem. Long ples ya, mifala i joenem ol smosmol leta we oli wokem long aean blong yusum olgeta long mesin blong prentem ol buk. I no longtaem, mi stat wok long ofis blong welkamem ol man, mo tu, mi katem hea blong olgeta long Betel.

Long Septemba 1939, Namba Tu Bigfala Faet Blong Wol i faerap, mo raf fasin blong ol Nasi i mekem ol man long Yurop oli fraet tumas. Ol kantri raonabaot long Swiselan oli mekem faet, be Swiselan i no joen long faet. Fastaem, faet i no spolem Kristin wok blong mifala. Be biaen, long Julae 5, 1940, long tu klok long aftenun, mi stap long ofis blong welkamem ol man, nao wan man i kamtru wetem wan soldia we i holem masket blong hem long fasin we i rere blong sutum man.

Man ya i tok strong i se: “?Wehem Zürcher?” Long taem ya, Franz Zürcher i stap lukaot long hedkwota blong wok blong prij long Swiselan.

Mi askem se: “?Wanem nem blong yu blong mi save talem long hem se yu wantem luk hem?” Wantaem nomo, tufala i holem mi mo dragem mi mi go antap long ol step. Tufala i stap talem strong long mi blong tekem tufala i go long ofis blong Zürcher.

Tufala i givim oda long ful famle blong Betel​—samwe long 40 man long taem ya​—blong hivap long rum blong kakae. Oli stanemap fo bigbigfala masket afsaed long haos blong blokem eniman we i wantem ronwe. Insaed, samwe long 50 soldia oli stat lukluk olbaot blong traem faenem ol pruf we oli wantem. Oli no faenem ol pruf olsem oli bin ting se bambae oli faenem, blong soem se ol Wetnes blong Jeova oli stap pulum ol man blong no joen long ami. Nating se i olsem, oli fulumap ol buk long faef trak blong ami mo oli karem olgeta oli go blong sakem olgeta.

From we mifala i no wantem se gavman i jekem ol tok long Wajtaoa, oli no moa letem mifala i prentem buk ya long Swiselan. Samting ya i minim se i no moa nidim plante man blong wok long Betel. Ale, oli leftemap tingting blong ol yangfala blong lego Betel mo kam ol paenia, hemia ol Wetnes blong Jeova we oli mekem wok blong prij fultaem.

Paenia Long Taem Blong Faet

Long Julae 1940, mi gobak kolosap long Lugano, long eria blong Swiselan we ol man oli toktok lanwis blong Itali. Mi bin stap long ples ya bifo we mi kam long Betel. Mi mekem wok blong paenia long ples ya. Ol man oli strong long skul Katolik, mo long taem ya oli stap aninit long strong rul blong ol Fasis.

Kolosap evri dei, polis i blokem mi mo talem long mi se mi mas lego wok ya blong prij. Wan dei, taem mi stap storeyan wetem wan woman long get blong haos blong hem, wan man we i putum klos olsem ol man olbaot nomo i kam long bak blong mi mo i holemtaet mi, i pulum mi mi go long wan trak blong polis, nao i tekem mi mi go long Lugano. Long ples ya, hem i putum mi long han blong polis. Taem oli askem kwestin long mi, mi eksplenem se Jeova God i givim oda long mifala blong go prij.

Long flas fasin, polis ya i ansa se: “Long wol ya, mifala nao i givim oda. !God i save givim oda long heven!”

Long taem blong faet, i impoten tumas we mifala i folemgud advaes blong Jisas se, “yufala i mas waes long ol trik, olsem snek. Mo yufala i mas kwaet man, olsem sotleg.” (Matyu 10:16) Taswe, mi haedem bighaf blong ol buk blong mi long ol poket insaed long sot blong mi. Mo, blong mekem sua se mi no save lusum wan buk, mi werem ol traoses we oli kamdaon kasem ni mo mi taetem olgeta long ples ya.

Biaen, mi kasem nyus se mi mas muf i go long vali blong Engadin. Long ples ya, mi gohed blong haed long ol polis. Vali ya we i naes tumas, i stap long ol bigfala hil blong Swiselan long saed i go long is. Long taem blong kolkol, bigfala sno i foldaon i berem vali ya. Taswe mi askem blong oli sanem sus blong mi we oli glis long sno blong givhan long mi blong wokbaot long ples ya.

Long taem we i kolkol, i impoten tumas blong werem ol hanglaf taem yu wokbaot long ol sus we oli glis long sno. From we mi werem ol hanglaf blong mi oltaem, kwiktaem nomo i gat hol long olgeta. Wan dei, mi sek long wan paket long postofis. Insaed long hem i gat wan kol sot mo sam hanglaf. !Mi glad tumas! Wan Kristin sista long kongregesen we mi bin stap long hem long Ben, i mekem ol samting ya blong mi. Taem mi tingtingbak long kaen fasin blong hem, hat blong mi i fulap yet long tangkyu.

Plante Blesing We Oli Karem Glad

Long 1943, ol samting oli kam moa gud long Swiselan. Ale oli singaotem mi blong wok bakegen long Betel. I gat wan kongregesen i stap 100 kilomita longwe long Betel, hemia long Losan. Ol man blong hem oli toktok Franis. Ale, oli sanem mi blong visitim kongregesen ya plante taem, from we i gat sam problem long hem. Wok blong mi, hemia blong givhan long ol man blong talemaot Kingdom long kongregesen ya, blong oli gat stret tingting long saed blong ogenaesesen blong God.

Biaen, mi wok smoltaem olsem seket elda blong olgeta kongregesen blong Swiselan we oli toktok Franis. Long ol faswan dei blong wik, mi wok long Betel. Long Fraede, Sarede, mo Sande blong evri wik, mi visitim ol kongregesen blong traem givhan long olgeta long saed blong speret. Mo tu, long 1960, taem oli stanemap wan kongregesen long Ben we ol man blong hem oli toktok Franis, mi kam presiden elda blong kongregesen ya. Mi wok olsemia go kasem 1970. Long yia ya, oli muvum Betel i aot long Ben i go long naesfala taon ya Tan, mo i stap long ples ya yet.

Long Tan, mi mi glad blong faenem wan smol grup blong Wetnes we oli toktok lanwis blong Itali, mo mi stat wok wetem olgeta. Biaen, oli stanemap wan kongregesen, mo mi wok olsem presiden elda blong plante yia, go kasem taem we ol brata we oli moa yang long mi oli naf blong mekem wok ya.

Mi tingbaot wan blesing we i karem bigfala glad long mi, hemia taem mi bin go long ol intenasnal asembli blong ol Wetnes blong Jeova. Eksampel, long 1950, i gat wan bigfala asembli we mi no save fogetem, long Yanki Stadium, Nyu Yok, nem blong hem “Tiokratik Fasin i Stap Kam Antap.” Mi visitim hedkwota blong ol Wetnes blong Jeova long fulwol, long Bruklin, Nyu Yok, mo samting ya i gat bigfala paoa long mi. Mo tu, mi no save fogetem tok we Brata Milton G. Henschel i givim long yia we i kam biaen, long asembli ya “Klin Wosip” long London, Engglan. Hem i eksplenemgud ol tok blong Jisas se: “Mi mi talem long yufala, sipos olgeta ya oli stap kwaet, bambae ol ston ya nomo oli save singaot.” (Luk 19:40) Brata Henschel i askem se, “?Yufala i ting se ol ston oli nidim blong singaot?” Mi save harem yet bigfala noes blong ten taosen voes we oli singaot strong se “!No gat!”

Taem mi go long Betel fastaem long 1937, papa blong mi we i save se mifala i kasem smol mane nomo, i askem wetem voes we i wari se, “?Boe, taem yu kam olfala, bambae yu kasem mane wea blong stap laef?” Mi ansa long ol tok blong Deved, man we i raetem ol Sam, se: “Neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” (Ol Sam 37:25) I tru, ol tok ya oli kamtru long mi.

Mi glad tumas se bitim 80 yia bifo, Berta Weibel i maredem papa blong mi. !Eksampel blong hem mo ol advaes blong hem oli bin givhan long mi blong save Jeova mo ol fasin blong Hem! Nating se ol narafala memba blong famle oli jikim Berta, hem i stanap strong long wok blong Jeova go kasem we hem i ded long 1983. Hem i neva sore se hem i mekem wok blong God blong hem, Jeova. Mi tu, mi neva sore se mi no mared mo mi givim fulwan laef blong mi long wok blong Jeova.

[Futnot]

[Tok blong pija long pej 25]

Wok long Betel