“Ol Sas Ston Blong Trutok”

“Ol sas ston blong trutok.” Wan yangfala man i raetem toktok ya long wan leta we i go long hedkwota blong ol Wetnes blong Jeova long Naejeria. Hem i stap tokbaot tu spesel buk, i se:

“Mi mi raet i kam blong talem bigfala tangkyu from ol Wajtaoa mo Wekap! we yufala i prentem blong traehad blong givim save long mifala long saed blong ol defren problem blong laef.

“Mi mi gat 17 yia. Las yia, wan radyo stesen long ples blong mifala, i mekem plan se ol man oli mas raetem wan store long saed blong ‘Lav i No Minim Seks Nomo​—AIDS i Wan Trufala Samting.’ Store ya we wanwan man oli raetem, i mas gat bitim fo handred wod. Man we i raetem beswan store bambae i winim wan praes blong 1,000 naira [1,250 VT]. Ol man blong radyo oli talem se impoten samting hemia i no blong winim mane, be blong tijim ol man long wan samting. . . .

“Mi faenem sam gudfala save long saed blong AIDS long ol Wajtaoa mo Wekap! Ol advaes long saed blong lav oli plante tumas. Mi yusum sam poen we oli stap long Wekap! blong Ogis 8, 1978 (Engglis).

“I no tu manis afta we mi sanem store blong mi i go, be radyo ya i talem finis risal blong hem. !Mi sapraes bigwan blong harem se mi mi kasem fasples long medel blong olgeta man we oli joen blong raetem ol store ya long eria blong Kros Reva mo Akwa Ibom!

“Olgeta poen we mi yusum oli kamaot long Wajtaoa mo Wekap! I gud tumas se Jeova i stap givim olgeta save ya we yumi nidim long taem ya, from we wol ya i fulap tumas long ol trabol mo sik. Yumi ol trufala Kristin, yumi save se mining blong lav i bigwan moa i bitim seks. Mo, tru tumas, taem yumi gat wan laef we i klin mo i stretgud, samting ya i lukaotgud long yumi blong yumi no kasem ol rabis sik olsem AIDS.

“Mi wantem tumas blong talem tangkyu long yufala from ol sas ston ya blong trutok we yufala i neva les blong givimaot long mifala. Bambae Jeova i blesem ol traehad blong yufala taem yufala i gohed oltaem blong wokem ol buk ya we oli sas tumas.”