Tosias Gudfala Sekretari Blong Pol

TOSIAS i gat wan strong wok blong mekem. Aposol Pol i wantem yusum hem olsem sekretari blong hem, blong raetem wan longfala leta i go long ol Kristin brata long Rom. Hemia wan bigfala wok ya.

?From wanem wok blong sekretari long faswan handred yia K.T. i wan strongfala wok? ?Olsem wanem oli mekem wok ya? ?Wanem ol tul we oli gat blong raetem leta long taem ya?

Ol Sekretari Long Taem Bifo

Long taem bifo, we kastom blong ol man Gris mo Rom i meks, i gat ol defren kaen sekretari. Sam man oli wok olsem ol sekretari blong gavman​—hemia ol man we oli wok long pablik ofis blong gavman. Mo tu, i gat ol pablik sekretari, hemia ol man we oli stap long maket ples mo oli mekem wok blong sekretari long ol manples. I gat ol sekretari we oli wok blong wanwan rijman nomo (plante taem olgeta ya oli ol slef). Mo tu, i gat samfala we oli glad nomo blong givhan long ol fren blong olgeta blong raetem leta. Folem toktok blong wan man blong stadi, E. Randolph Richards, sam long ol sekretari ya we oli no mekem wok ya blong winim mane, “oli gat smol save nomo long saed blong lanwis mo fasin blong raetem leta, mo sam narafala oli gat gudhan blong raetem leta kwiktaem taswe oli save raetem wan leta we i stret, i klia, mo i naes.”

?Hu i stap yusum ol sekretari? Fastaem, olgeta we oli no save rid mo raet. Plante taem, long en blong ol kontrak mo bisnes leta blong bifo, sekretari i raetem wan smol tok blong talem se hem nao i fulumap pepa ya from we man ya we i mas mekem i no naf. Wan leta blong bifo, we oli raetem long Tebes, Ijip, i soem wan narafala risen from wanem ol man oli yusum ol sekretari. Wan sekretari i raetem leta blong wan man we nem blong hem Asklepiades, ale long en blong leta ya hem i raetem se: “Eumelus, pikinini blong Herma, i raetem leta ya blong hem . . . from we hem i raet long fasin we i slou tumas.”

Be, fasin blong no save rid mo raet i no stampa risen blong man i yusum wan sekretari long taem bifo. John L. McKenzie, wan man blong eksplenem Baebol, i talem se “ating ol man oli no wari tumas long ol tok long leta se i klia blong narafala man i ridim, be oli wari moa long ol raeting long hem, se hem i naes mo i stretgud.” Samting ya nao i pulum ol man blong askem wan sekretari blong mekem wok ya blong olgeta. Ol man we oli skulgud tu, oli luk wok ya blong raet olsem wan samting we oli les blong mekem, antap moa, sipos ol leta oli longfala mo oli nidim blong eksplenem plante bigfala samting. Wan man blong stadi, J. A. Eschlimann, i talem se eni man we i gat jans blong gat wan sekretari, bambae “i glad blong ronwe long wok ya blong raetem ol leta, hem i givim wok ya long ol slef, no ol man we oli kasem mane from wok ya blong raetem ol leta.” Mo tu, i isi blong kasem save from wanem ol man oli no laekem blong raetem prapa leta blong olgeta, taem yumi tingbaot ol tul we oli yusum mo olsem wanem oli mekem wok ya.

Samting we oli yusum long faswan handred yia K.T. blong raet long hem, hemia waelken. Oli katemaot ol longlongfala pis insaed long ol stampa blong gras ya. Ale, oli putum ol longlongfala gras ya oli slip we wan i fas long narawan. Nao, oli putum sam moa longlongfala gras oli gokros antap long olgeta ya. Oli prestem tufala ya i fasgud tugeta, mo long rod ya oli gat wan “pepa.”

I no isi blong raet long pepa ya. Hem i no flat mo i gat ol smosmol string olbaot long hem. Angelo Penna, wan man blong stadi, i talem se “ol smosmol string blong waelken oli sofsof, mekem se ing i ron olbaot, antap moa, ing i ron long ol smosmol hol we oli stap bitwin ol longlongfala gras ya we oli joen tugeta.” Blong mekem wok ya, maet sekretari ya i sidaon long graon mo krosem leg blong hem, mo i yusum wan han blong hem blong holem pepa ya long wan flat wud. Sipos hem i no gat gudhan long wok ya no sipos olting we hem i yusum oli no beswan, maet pen blong hem we oli wokem long wud i stikim waelken ya, mo i terem pepa ya, mo tu maet raeting ya i no klia nating we ol man oli no save ridim.

Ing we oli yusum hem i wan kaen paoda blong jakol we oli meksem wetem wan samting olsem glu. Oli salem ol smol skwea pis blong ing ya. Bifo we oli save yusum ing ya, oli mas putum long wan botel mo kafsaedem wora long hem blong mekem i kam sofsof. Sam narafala tul we maet wan sekretari olsem Tosias i yusum, hemia wan smol naef blong sapenem pen blong hem we oli wokem long wud, mo wan kaliko we i wetwet blong ravemaot ol mastik. Man ya i mas lukaotgud taem hem i raetem olgeta wanwan tok long pepa ya. Taswe, wok ya blong raetem leta i tektaem mo hem i no isi tu.

‘Mi Tosias, Mi Talem Halo Long Yufala’

Wan long olgeta we oli talem halo long en blong leta we i go long ol man Rom, hemia sekretari blong Pol, we i raetem se: “Mi Tosias, we mi raetemdaon ol tok blong Pol long leta ya, mi talem halo long yufala, we yumi joen long Masta blong yumi.” (Rom 16:22) Long olgeta hanraet blong Pol, vas ya nomo i talem nem blong wan sekretari blong hem.

Yumi no save fulap samting long saed blong Tosias ya. Be, from we hem i talem tok ya se “yumi joen long Masta blong yumi,” yumi luksave se hem i wan Kristin we i gat strong bilif. Maet hem i wan memba blong kongregesen blong Korin mo maet hem i save plante Kristin long Rom. Wan man blong stadi long Baebol, Guiseppe Barbaglio, i talem se ating Tosias i wan slef, no wan slef we masta blong hem i letem hem i gofri finis. ?From wanem? Hemia from we “plante taem ol man blong raet oli ol slef no man we oli gofri finis long wok blong slef. Mo tu, hem i gat wan Latin nem . . . we plante slef mo man we oli kam fri long wok blong slef, oli karem.” Barbaglio i talem se: “Taswe, hem i no raetem leta olsem wok blong hem blong winim mane, be hem i wan fren we i wok wetem Pol, mo i wantem halpem hem blong raetem leta ya we i longfala moa long ol narafala leta we hem i bin raetem bifo, mo we ol tok blong hem oli klia moa. Wok we hem i mekem i sas tumas, from we i mekem se Pol i no westem taem mo i no kam taed tumas.”

Tru ya, wok ya blong Tosias i sas tumas. Baruk i bin mekem semkaen wok olsemia blong Jeremaea, mo Silvanas i mekem sem mak blong Pita. (Jeremaea 36:4; 1 Pita 5:​12) !Olgeta we oli raetem ol leta ya oli rili bin kasem wan nambawan blesing!

Raet i Go Long Ol Man Rom

Oli raetem leta ya i go long ol man Rom taem Pol i stap long haos blong Gaeas. Ating hemia long Korin, samwe long 56 K.T., long namba tri misinari trep blong Pol. (Rom 16:23) Yumi sua se Pol i yusum Tosias olsem sekretari blong hem blong raetem leta ya, be yumi no save stret olsem wanem hem i yusum man ya. Nomata wanem rod oli yusum, ating i no isi blong mekem wok ya. Be yumi save sua long wan samting: Leta blong Pol we i go long ol man Rom, hem i “kamaot long God,” sem mak olsem ol narafala haf blong Baebol.​—2 Timote 3:​16, 17.

Taem leta ya i finis, Tosias mo Pol tufala i bin raetem plante taosen wod, mo tufala i yusum plante pepa blong waelken. Afta we tufala i joenem en blong ol wanwan pepa ya wetem glu, tufala i mekem wan longfala leta we ating hem i kasem 3 no 4 mita. Ale, tufala i rolem leta ya mo fasem. I luk olsem we Pol i givim leta ya long Fibi, wan sista blong Kengkria, we hem i rere blong go long Rom.​—Rom 16:​1, 2.

Stat long faswan handred yia i kam, ol fasin we man i yusum blong raetem leta oli jenis bigwan. Be long olgeta handred yia we oli pas, God i lukaotgud long leta ya we i go long ol Kristin blong Rom, blong hem i stapgud. !Yumi talem tangkyu tumas from buk ya we i stap insaed long Tok blong Jeova, we Pol i raetem wetem help blong Tosias, gudfala sekretari blong hem we i wokhad!