Wan Kwestin

Ol Wetnes blong Jeova oli traehad blong mekem i stret long olgeta samting mo trastem ol narafala Wetnes. Taswe, ?from wanem oli ting se i impoten blong raetem wan kontrak taem oli mekem bisnes tugeta?

From we samting ya i laenap wetem Baebol, i wan rod we i wokgud, mo i soem lav. ?Olsem wanem? Bambae yumi tokbaot olsem wanem ol kontrak blong bisnes oli joen wetem trifala samting ya.

Long Baebol, oli raetemdaon store blong ol samting we God i mekem long ol man Isrel, we hem i mekem kontrak wetem olgeta. Mo tu, Baebol i tokbaot bisnes we sam trufala man blong wosip long God oli bin mekem tugeta. Jenesis japta 23 i tokbaot wan store olsem. Taem Sera i ded, Ebraham i wantem pem wan graon blong berem woman blong hem we hem i laekem tumas. Ale, hem i go luk ol man Kenan we oli stap kolosap long Hebron. Vas 7-9 i soem se hem i talemaot wan stret praes we hem i save pem blong graon ya. Vas 10 i soem se hem i talemaot praes ya long fored blong ol man long get blong taon. Vas 13 i soem se man we graon ya i blong hem, i wantem givim graon ya long Ebraham nomo, be Ebraham i talem se hem i save karem graon ya sipos hem i pem nomo. Vas 17, 18, mo 20, oli eksplenem se hemia nao samting we i hapen, mo oli mekem bisnes ya ‘long fored blong ol pikinini blong Het we oli stap long get blong taon.’

Be, ?samting ya i defren taem tufala evriwan we oli mekem bisnes oli wosip long God long trufala fasin? Japta 32 blong Jeremaea i givim ansa. Stat long vas 6 i go, yumi ridim we Jeremaea i gat plan blong pem wan graon long kasen blong hem. Vas 9 i soem se tufala i agri long wan stret praes. Nao ridim vas 10-12: “Nao mi [Jeremaea] mi raetem wan pepa mo mi fasemgud. Mo mi tekem sam man olsem ol wetnes taem mi stap skelem mane blong graon ya. Biaen, mi karem pepa ya we mi fasemgud folem loa mo ol rul, mo hemia we mi livim i stap open. Mo mi givim pepa ya long Baruk, pikinini blong Neraea, pikinini blong Maseia, long fored blong Hanamel, pikinini blong brata blong papa blong mi, mo long fored blong ol wetnes we oli bin raetem nem blong olgeta long pepa ya, long fored blong ol man Jyu we oli stap sidaon long Yad blong Gad.”

Yes, nating se Jeremaea i mekem bisnes ya wetem wan we i wosip long sem fasin olsem hem, wan famle blong hem nomo, be hem i mekem i stret folem loa. Hem i raetem tu pepa​—i livim wan i stap open blong oli save ridim sipos oli nidim, mo narawan we i fasem oli save yusum olsem pruf blong soem se hemia we i open i stret. Olsem vas 13 i talem, oli mekem samting ya “long fored” blong ol narafala. Taswe, hem i wan bisnes kontrak we oli mekem long fored blong ol narafala man, i gat ol wetnes blong hem, mo i stret folem loa. Ale, i klia se Baebol i agri we ol trufala man blong wosip long God oli folem rod ya we i klia mo we oli raetemdaon.

Rod ya i wokgud tu. Yumi save se i tru nomo we, “taem mo ol samting we yumi no tingbaot oli kasem yumi evriwan.” (Eklesiastis 9:​11) Samting ya i save hapen long ol gudfala Kristin we oli holemstrong long God tu. Jemes 4:​13, 14 i talem olsem: “Sam long yufala oli save talem se ‘Tede no tumora bambae mifala i go long wan narafala taon. Nao long ples ya, bambae mifala i stap wan fulyia, bambae mifala i mekem wok blong kasem plante mane.’ Yufala i lesin long mi. Yufala i no save nating wanem bambae i save kamtru long laef blong yufala tumora.” Taswe, maet yumi stat blong mekem wan samting, olsem pem wan samting, mekem wan wok we yumi bin agri blong mekem, no mekem wan samting blong narafala. ?Be wanem bambae i kamtru tumora​—nekis manis no nekis yia? ?Olsem wanem sipos yumi no narafala ya i gat wan akseden? Maet i luk olsem se i no moa gat rod blong finisim samting ya we yumi bin agri blong mekem. ?Olsem wanem sipos yumi no moa naf blong mekem wok ya, no sipos hem i no moa save pem yumi smosmol no mekem samting we hem i bin agri blong mekem? Sipos yumi no bin raetem wan kontrak, bigfala trabol i save kamaot, ol trabol we maet yumi save stretem no yumi save blokem sipos yumi bin raetem wan kontrak we i isi nomo blong mekem.

Mo tu, from we laef blong yumi i no sua, yumi no mas fogetem se maet wan narafala i mas tekem ples blong yumi (no hemia we yumi mekem bisnes wetem) no stretem ol bisnes blong yumi. Long vas 14, Jemes i talem se: “Yufala i olsem smok blong hil nomo. Smok ya i save kamtru we i stap smoltaem nomo, nao biaen i lus bakegen.” Yumi save ded kwiktaem. Sipos yumi bin raetem wan pepa no wan kontrak, ol narafala oli save stretem bisnes blong yumi, sipos wan samting we yumi no bin tingbaot i hapen long yumi no long hemia we yumi mekem bisnes wetem.

Samting ya i save lidim yumi long namba tri poen​—yumi soem lav taem yumi raetem wan kontrak. Tru ya, sipos wan long tufala we oli insaed long kontrak ya i ded, no i gat wan akseden we wan long tufala i kam handikap from, wan kontrak we i soem wanem we man ya i mas mekem no mane we hem i mas pem, i rili soemaot lav. Mo taem brata we yumi mekem bisnes wetem hem i raetem wan kontrak blong talem klia mo stret wanem we hem i mas mekem mo kasem, samting ya i soem lav tu. Hem i no mekem samting ya from we hem i no trastem yumi. Fasin ya we i soem lav bambae i mekem se tufala i no save fogetem sam smosmol samting no wok we oli mas mekem, ale long rod ya, i no save gat kros i kamaot. Yumi evriwan i no stret olgeta, taswe i isi nomo blong fogetem wan smol samting, no blong no kasem savegud long sam smosmol samting no long tingting blong narafala.​—Matyu 16:5.

Raetem wan kontrak blong bisnes i soem lav long ol brata, famle, mo kongregesena blong yumi, long sam narafala rod tu. Be yumi mas kasem save klia se antap long lav ya, bisnes kontrak we yumi raetem ol impoten samting long hem, i wokgud mo i laenap wetem Baebol.

[Futnot]