Saprim Kot Blong Konetikat i Agri Long Raet Blong Sikman
LONG Epril 16, 1996, Saprim Kot blong Konetikat, Yunaeted Stet, i agri long raet blong ol Wetnes blong Jeova blong no tekem blad. Disisen ya i jenisim disisen we wan narafala kot i bin mekem fastaem.
Long Ogis 1994, Nelly Vega, wan Wetnes blong Jeova, i stat lusum plante tumas blad afta we hem i karem faswan pikinini blong hem. Ol dokta oli no save faenem wan rod blong blokem blad we i stap lus. Misis Vega i stap harem nogud moa gogo hospital i askem kot blong givim oda se hem i mas tekem blad. Misis Vega i saenem finis wan pepa blong talem se oli no mas givim blad long hem, no enikaen meresin we i gat blad long hem. Long rod ya, hem i talem se hospital i no gat fol from eni samting we i save kamaot from disisen ya blong hem. Nating se i olsem, hospital i talem se oli mas fosem hem blong tekem blad from we oli stap tingbaot smol bebi blong hem, se bambae hem i nidim mama blong hem. Kot i wari tu from we Misis Vega i wan yangfala woman, we bodi blong hem i strong bifo we hem i lusum blad. Taswe, nating se Misis Vega mo hasban blong hem tufala tugeta oli no wantem blad, kot i givim oda se ol dokta oli save givim blad long hem. Ale, oli mekem olsem ya.
Biaen, oli karem bisnes ya i go long Saprim Kot blong Konetikat. Kot ya i mekem disisen fulwan se hospital i bin go agensem raet blong Misis Vega. Disisen blong kot i talem se: “Faswan kot i sidaon long medel naet, taem i gat bigfala trabol mo denja i stap. From samting ya, tufala saed evriwan oli no gat jans blong talemaot fulwan ol tingting blong olgeta.”
Disisen ya blong Saprim Kot blong Konetikat i impoten long olgeta man, i no long ol Wetnes blong Jeova nomo. Loea blong Misis Vega, Donald T. Ridley, i talem se: “Disisen ya i impoten long olgeta sikman we maet oli no agri wetem disisen blong dokta. Bambae hem i mekem se ol hospital oli no moa save fosem ol sikman blong agri long samting we oli wantem mekem, mo bambae oli respektem ol rul we sikman ya i tinghae long olgeta, nating se oli rul blong skul no narafala samting.”