Kakae Blong Ol Sipsip Blong God Long Ples Blong Ol Navajo

HÓZHÓNÍ, wan tok long lanwis blong ol Navajo Indian, i minim “naes tumas.” Hemia nao tok we oli yusum blong tokbaot ples blong olgeta. Stat long 1868, gavman blong Yunaeted Stet i makemaot 62,000 skwea kilomita blong graon we ol Navajo oli save laef long hem. Graon ya i stap long not-is Arisona, long fo kona, hemia ples we fofala stet ya Arisona, Kolorado, Nyu Meksiko, mo Uta, oli joen. Monumen Vali we plante man oli savegud long hem from ol kaoboe sinema, naoia i stap olsem wan graon blong Laen blong ol Navajo. Plante turis oli aot long olgeta ples blong wol blong kam luk ples ya. Long vali ya, i gat ol bigbigfala klif blong red ston we i olsem sanbij, oli go kasem 300 mita antap long drae flatples ya. Ol Navajo oli putum wan nem long vali ya we i stret nomo, se “ples long medel blong ol ston.”

Ol man oli save se ol Navajo oli gat gudfala fasin, oli no gat flas tingting, oli glad blong tekem ol narafala oli kam long haos blong olgeta, mo ol famle blong olgeta oli joengud. Ol 170,000 man long ples ya oli stap long ol smosmol velej longwe long ol narafala, olsem ol olfala blong olgeta bifo oli bin mekem. Samfala oli gohed yet blong lukaot long ol sipsip, mo stap long ol haos we oli wokem long plang mo we oli kavremap long sofmad. Oli kolem ol haos ya se ol ‘ogan.’ Ol man long plante ples oli laekem ol naesfala samting we ol Navajo oli wokem wetem han blong olgeta. Samting we oli laekem moa, hemia ol mat mo blangket we ol Navajo oli wokem long hea blong sipsip, mo we oli pentem long ol naesfala kala. Oli wokem olgeta wetem ol naesfala mak long olgeta, no wan pija we i soemaot kastom blong olgeta. Mo tu, plante man oli save long ol jen mo ring we ol Navajo oli wokem long selva mo tekois, mo sam narafala ston we oli faenem long ples blong olgeta nomo.

Karem Gud Nyus i Kam Long Ples Blong Ol Navajo

Blong bitim 30 yia, ol Wetnes blong Jeova oli bin stap kam long ples ya blong ol Navajo, i no jes blong lukluk naesfala ples ya, be blong karem gud nyus blong Kingdom blong God i kam tu long ol man ya we oli stap farawe long ol narafala man. (Matyu 24:14) Ol fultaem mo spesel paenia blong ol Wetnes blong Jeova, oli bin lidim wok ya blong prij. Plante blong olgeta oli kam from we sam elda we oli goraon blong visitim ol kongregesena mo sam lokol Wetnes, oli singaot olgeta blong givhan long ples ya we i nidim moa man blong prij. Samfala oli aot long ol kongregesen kolosap, be sam narafala, olsem sam man blong ol narafala laen blong ol faswan manples blong Amerika, oli aot long ol defren ples long Yunaeted Stet oli kam.

Ol man mo woman ya we oli rere blong lego sam samting we olgeta oli laekem blong mekem wok blong prij ya, oli talem se ples ya i sem mak olsem wan ples we ol misinari oli save go wok long hem. ?From wanem? Faswan samting se, i had blong lanem lanwis blong ol man Navajo, from we fasin blong talem mo joenem ol tok, mo ol spesel tok blong olgeta, oli strong tumas. Antap long hemia, bighaf blong ol Navajo oli holemtaet fasin blong ol olfala blong olgeta long saed blong skul, famle, mo fasin blong dipen long graon blong olgeta blong givim ol samting blong laef. Antap bakegen, i hadwok blong faenem wan haos mo wok long ples ya sipos yu no wan Navajo. Taswe, plante man we oli kam laef long ples ya oli no save stap longtaem. Laswan samting se, long olgeta yia we oli pas finis, ol waetman oli bin mekem nogud long ol Indian ya, mo from samting ya oli no trastem ol narafala man.b

Long faswan taem we ol Wetnes oli kam kilim doa blong ol haos wanwan, we oli jenisgud mo putum nektae, ol man Navajo oli ting se oli ol Momon, mo plante oli no wantem openem doa blong toktok wetem olgeta. Biaen, ol Wetnes oli putum ol klos we oli no gudwan tumas, nao ol man ya oli welkamem olgeta, mo plante taem oli storeyan bitim wan haoa wetem wan man. Naoia, ol man oli luksave ol Wetnes blong Jeova, nating se ol Wetnes oli werem ol gudfala klos bakegen taem oli kam prij.

I hadwok blong kam kasem haos blong ol man we oli stap long ples ya blong ol Navajo. Ol Wetnes oli mas draevem trak plante kilomita long ol rod we oli ston, sanbij, no sofmad, mo i no gat saen blong soem weswan smol rod blong folem. Samting ya i spolem ol trak mo i mekem ol man we oli ron long ol trak ya oli taed. Samtaem, ol trak oli save fas long sofmad, be i gud se ol narafala man we oli pas oli rere blong givhan long olgeta we oli kasem trabol. Blong mekem trep blong go visitim wan man we i intres, mekem wan Baebol stadi, no karem wan man i go long Kristin miting, plante taem i tekem sam haoa. Be ol Wetnes oli glad blong mekem samting ya we i soemaot bigfala lav long ol Navajo.​—Skelem wetem 1 Tesalonaeka 2:8.

Ol Navajo oli laekem blong storeyan long Baebol. Oli hivimap ful famle​—ol pikinini, papa mama, mo ol olfala bubu tu​—blong lesin long storeyan long saed blong hop ya blong laef long paradaes long wol ya long fyuja. Oli bin askem long wan man Navajo se long tingting blong hem paradaes ya bambae i olsem wanem, nao hem i talem se, “Bambae gras i gringud, mo i gat plante sipsip.” Hemia i soemaot olsem wanem oli laekem graon mo ol sipsip blong olgeta. Oli laekem ol buk we oli tokbaot Baebol tu. Oli soemaot samting ya taem oli givim ol bidbid, sop, tin melek, mo ol narafala samting olsemia, blong sapotem wok blong talemaot Kingdom. Wan spesel paenia i kasem 200 sabskripsen blong Wajtaoa mo Wekap! long wan yia, hem i mekem 2 wetem wan man we i stap sidaon long hos.

Oli Mekem Wan “Kamp Blong Ol Sipsip”

Long hot taem, ol Navajo oli muvum ol sipsip blong olgeta oli go long wan kamp blong ol sipsip. Oli jusum wan ples kolosap long gras we i gringud mo i no longwe long wora. Ples ya we ol sipsip oli kakae long hem long hot taem, i mekem olgeta oli kam fatfatgud. Yumi save talem se wan Haos Kingdom i olsem wan kamp blong ol sipsip, from we hem i ples blong karem gudfala kakae long saed blong speret, mo wora blong trutok. Ol man we oli kam long Haos Kingdom oli kakaegud long saed blong speret, mo from samting ya, oli kam strong mo fatfatgud long saed blong speret.

Blong longtaem, oli mekem ol miting long wan klasrum blong skul long Kayenta, Arisona. Long Ogis 1992, plante handred Wetnes long plante defren ples long Yunaeted Stet we oli rere blong wok fri, oli kam bildim wan Haos Kingdom long Kayenta. Haos Kingdom ya mo plante narafala Haos Kingdom long eria ya, oli soem long ol man se ol Wetnes oli kam blong stap long ples ya mo mekem wok blong prij, oli no jes kam blong smoltaem nomo. Sam narafala ples we oli gat Haos Kingdom long bigfala graon ya blong ol Navajo, hemia Tuba Siti mo Jinle, mo Kims Kanyon long graon blong laen ya Hopi, mo sam narafala taon we oli stap long en blong graon blong ol Navajo. ?Wanem risal blong samting ya?

Plante Man Oli Intres Long Mesej Blong Kingdom

Bitim 12 man blong Kayenta oli bin tekem baptaes afta long taem ya we oli bildim Haos Kingdom long ples ya. Samting ya i soem se Jeova i stap putum blesing blong hem long haos wosip ya. Haos ya i soem se ol Wetnes blong Jeova bambae oli stap oltaem long ples ya, mo i mekem se ol man oli trastem gud nyus blong Kingdom we oli talemaot. I no longtaem i pas, oli givim wan pablik tok long ples ya, we i faswan long lanwis Navajo. Ol 40 memba blong kongregesen ya oli glad blong welkamem 245 man blong lesin long tok ya long saed blong wok blong ol papa mama. Wan famle we i gat 8 memba blong hem, oli mekem trep blong 3 haoa blong kam mo 3 haoa blong gobak, from we oli wantem tumas blong harem pablik tok ya. Hemia faswan taem we oli bin kam long Haos Kingdom.

Wan narafala gudfala tul we Jeova i givim, hemia buklet ya !Yu Yu Save Harem Gud Blong Olwe Long Wol! long lanwis Navajo. I no isi nating blong tanem buklet ya i go long lanwis blong ol Navajo we i strong tumas. Ol man we oli mekem wok ya oli spenem bitim 1,000 haoa blong meksua se buklet ya i eksplenem gud mesej blong Kingdom. Stat long taem we oli wokem buklet ya long en blong 1995, ol Wetnes long ples ya oli seremaot plante taosen kopi blong hem, mo oli statem plante Baebol stadi wetem ol man we oli stap lukaot trutok.

Naoia, oli yusum lanwis blong ol Navajo moa long wok blong prij, from we, sloslou ol man blong talemaot Kingdom, oli stap lanem lanwis ya. Ol kongregesen oli stat finis blong yusum lanwis Navajo long Tiokratik Skul, mo oli mekem ol kos blong tijim ol pablisa long lanwis ya. Antap long hemia, oli tanem ol tok long ol asembli tu oli go long lanwis. I sua se ol hadwok ya bambae i mekem se wok blong prij i karem plante moa frut long ples ya blong ol Navajo.

Wan frut blong Kingdom we yumi no mas fogetem long ples ya blong ol Indian, hemia ol nambawan fasin long saed blong speret we ol Navajo brata oli soemaot. Blong 7 yia, Jimmy mo Sandra i bin karem ol faef pikinini blong tufala evri wik, oli kam 120 kilomita mo oli gobak 120 kilomita, long ol miting. Famle ya i toktok wetem glad long saed blong taem ya we oli bin singim ol singsing blong Kingdom mo stadi Baebol tugeta long ol longfala trep ya. Fasin blong papa mama ya blong laekem mo wok strong from trutok, i pusum ol pikinini blong folem eksampel blong tufala, mo blong givim laef blong olgeta long Jeova blong presem hem. Naoia, fo blong olgeta oli wok olsem ol fultaem paenia, mo Jimmy i wan elda. Famle ya i kasem moa glad taem sista blong Jimmy, Elsie, i kam faswan blong tekem baptaes we i toktok lanwis Navajo nomo.

Ol man blong lukaot long sipsip wetem ol sipsip blong olgeta, oli mekem ples ya blong ol Navajo i kam olsem wan naesfala garen we i gat pis long hem, long medel blong ol bigbigfala ston. Profet Aesea bifo i talemaot long saed blong Jeova, i se: “Olsem wan man blong lukaot long sipsip, God i stap lukaot long ol man blong hem. Wetem han blong hem, hem i hivimap ol smol sipsip blong hem mo hem i holem olgeta kolosap long hem. Bambae hem i lukaotgud long olgeta we oli stap givim titi long pikinini blong olgeta.” (Aesea 40:11) Jeova i stap yusum Gudfala Man blong lukaot long ol sipsip, Jisas Kraes, blong hivimap mo givim kakae long saed blong speret, long ol man Navajo we oli wantem harem gud nyus blong Kingdom mo tekem jans blong kasem blesing blong Hem blong olwe.

[Ol futnot]

[Tok blong pija long pej 24]

Wan woman Navajo we i lukaot long ol sipsip i lesin long gud nyus