?Meri i Stap Olsem Wan Vejin Afta We Hem i Mared?

BLONG traem pruvum tok ya se Meri i stap oltaem olsem wan vejin afta we hem i mared long Josef, plante man blong droem mo katem ol pija oli soemaot Josef olsem wan olfala man. Oli gat tingting ya se Josef i jes lukaot long Meri nomo, i no hasban blong hem. Be i no longtaem i pas, Pop John Paul 2 i talemaot wan narafala tingting. Hem i talem se maet Josef “i no wan olfala man long taem ya.” Be, maet “God i mekem se Josef i stretgud olgeta long hat blong hem, taswe taem hem i kam hasban blong Meri, maet hem i frengud nomo wetem Meri, be i no slip wetem hem.”

Sipos Meri i wantem stap olsem wan vejin blong olwe, ?from wanem hem i promes blong mared wetem Josef? Pop i ansa se: “Yumi save bilif se, taem Josef mo Meri i mekem promes blong mared, tufala i agri blong laef long fasin we tufala i no slip tugeta.”

Baebol i talem wan defren tingting. Buk blong Matyu i talem se Josef “i no slip wetem Meri gogo hem i karem wan pikinini boe.” (Matyu 1:​25, Katolik New American Bible, mifala nomo i raetem italiks.) Afta we Jisas i bon, Meri i no stap oltaem olsem wan vejin long mared blong hem. Yumi save samting ya, from we Gospel ya i gohed blong talem se Jisas i gat ol brata mo sista.​—Matyu 13:​55, 56.

Taswe, nating we Baebol i talem se Meri i wan vejin taem hem i bonem Jisas, be i no gat wan pruf blong soem se hem i stap oltaem olsem wan vejin afta we hem i mared wetem Josef.