?I Gat Rod Yet Blong Tijim Ol Pikinini Long Ol Gudfala Fasin?

ROBERT GLOSSOP we i wok long Vanya Institut blong Famle long Otowa, Kanada, i talem se: “Naoia, fasin blong laef blong ol man i kam fasfas tumas, oli gat ol defren kastom mo fasin, mo ol defren tingting long saed blong fasin we i gud mo i nogud.” ?Wanem i stap kamaot from? Wan ripot long nyuspepa ya The Toronto Star, i talem se: “Namba blong ol yangfala gel we oli gat bel, raf fasin bitwin ol yangfala, mo ol yangfala we oli stap kilim olgeta wan i ded, i stap go antap.”

Trabol ya i no stap long Not Amerika nomo. Bill Damon, we hem i daerekta blong Senta blong Divelopmen blong Ol Man, long Braon Yunivesiti long Rod Aelan, Yunaeted Stet, i stadi long ol problem ya long Briten, sam narafala kantri blong Yurop, Ostrelya, Isrel, mo Japan. Hem i talem se ol jyos, skul, mo ol narafala grup olsemia, oli no moa lidimgud ol yangfala. Hem i ting se fasin blong laef blong yumi naoia i mekem se “yumi no moa save wanem we ol pikinini oli nidim blong lanem ol gudfala fasin mo blong kam nafgud.” Damon i talem se sam man we oli gat bigfala save long ol rod we ol papa mama oli mas yusum blong tijim pikinini, oli bilif se “fasin blong stretem pikinini i nogud long helt blong hem mo i save mekem hem i harem nogud.” Damon i talem se, tok olsemia i “soemaot rod blong mekem pikinini i kam stronghed mo i no moa obei.”

?Ol yangfala tede oli nidim wanem? Oltaem oli nidim we papa mama i tijim olgeta wetem lav, blong stretem tingting mo hat blong olgeta. Ol yangfala wanwan oli nidim ol defdefren kaen fasin blong stretem olgeta. Sipos lav i pusum papa mama blong stretem pikinini, oli save gat gudfala risal taem oli toktokgud long pikinini nomo blong mekem hem i tingtinggud. Hemia nao from wanem Proveb 8:​33 i talem se, “lesin long fasin stretem.” Be long samfala pikinini, i no naf “blong stretem olgeta wetem ol toktok nomo.” Maet oli nidim we oli kasem panis taem oli no obei, hemia panis we i no strong tumas be i stret long rong we oli mekem. (Proveb 17:10; 23:13, 14; 29:19) Taem Baebol i givim advaes ya, hem i no stap agri wetem ol papa mama we oli kam kros tumas, nao oli wipim no kilim nogud pikinini, we i save mekem skin i blu no givim kil long hem. No gat. (Proveb 16:32) Wan pikinini i mas kasem save from wanem papa mama i stap stretem hem, mo i mas haremsave se tufala i stretem hem from we tufala i rili wari mo intres long hem.​—Skelem wetem Hibrus 12:​6, 11.

Ol gudfala advaes ya blong Baebol we i wokgud i stap insaed long buk ya The Secret of Family Happiness.