Gud Nyus Long Saed Blong Paradaes Long Tahiti

TAHITI! Nem ya i pulum tingting blong yumi i go long wan samting we i defren olgeta. Plante man oli savegud aelan ya from ol man blong dro ol pija mo raetem ol buk, olsem Paul Gauguin, Robert Louis Stevenson, mo Herman Melville. Ol pija mo buk we olgeta ya oli wokem long saed blong aelan ya blong Saot Si, oli pulum tingting blong man, from we oli soemaot ples ya olsem wan ples we i naes tumas mo i kwaetgud.

Tahiti i bigwan moa long ol 120 aelan blong Franis Polinesia, we oli stap long Saot Pasifik. Plante man oli ting se aelan ya long Saot Si i olsem wan paradaes nomo. Nating se i olsem, i gat wan narafala paradaes we bambae i kamtru i no longtaem, we ol man long Tahiti oli mas save long hem. (Luk 23:43) Ol Wetnes blong Jeova long Tahiti, we naoia namba blong olgeta i kasem 1,918, oli bisi long wok blong talemaot gud nyus long 220,000 man. Oli stap talemaot se, i no longtaem, bambae Kingdom blong God i mekem Tahiti, wetem ol narafala ples blong wol tu, oli kam wan naesfala paradaes.​—Matyu 24:14; Revelesen 21:3, 4.

Blong plante yia, ofis blong Wajtaoa Sosaeti long Fiji i lukaot long wok blong prij long Tahiti. Be hem i stap 3,500 kilomita longwe, taswe i no isi blong mekem wok i gohed kwik. From samting ya, long Epril 1, 1975, wan ofis i open long Tahiti, mo hemia i makem wan taem we bigfala jenis i kamaot long wok blong ol trufala Kristin long aelan ya. ?Wanem i mekem jenis ya i kamaot, mo olsem wanem wok blong prij i bin stat long Tahiti?

Wan Stat We i Smol Nomo

Faswan taem we gud nyus blong Kingdom i kasem Tahiti, hemia afta long yia 1930. Long taem ya, plante man blong aelan ya oli soem bigfala intres, from we oli gat bigfala respek mo bilif long Baebol. Be, gavman i putum tabu long wok blong ol Wetnes, mekem se i no gat wan Wetnes long ples ya go kasem kolosap long yia 1960 nomo. Ale, Agnès Schenck, wan woman Tahiti we i stap long Yunaeted Stet, i mekem disisen blong gobak long Tahiti, wetem hasban blong hem mo pikinini boe blong tufala. Hem i eksplenem olsem wanem samting ya i kamaot.

“Long wan distrik asembli long Los Enjeles long 1957, Brata Knorr [we i presiden blong Wajtaoa Sosaeti long taem ya] i eksplenem se i gat bigfala nid blong sam pablisa blong Kingdom oli go wok long Tahiti. Long taem ya, mi baptaes wan yia finis, mo mi talem se, ‘!Ale, yumi go long Tahiti!’ Tu narafala famle we oli gudfala fren blong mifala, hemia famle Neill mo Carano, oli harem toktok blong mi. Oli talem se oli wantem tumas blong kam wetem mifala. Be mifala i no gat naf mane blong go. Hasban blong mi i bin sik longtaem finis, mo pikinini boe blong mitufala i smol yet. Taswe, i hadwok long mifala blong aot. Sam fren blong mifala long ol narafala kongregesena oli harem nyus blong plan we mifala i gat, mo oli sanem smol mane i kam wetem sam samting blong haos. !Ale, long Mei 1958, mifala i tekem sip i go long Tahiti, wetem olting blong mifala, mo 36 bedsit tu!

“Taem mifala i kasem Tahiti, mi harem olsem se mi wan strenja, from we mi aot long aelan ya 20 yia bifo. Mifala i stat blong prij, be mifala i mas lukaotgud from we gavman i putum tabu finis long Kristin wok blong prij. Mifala i haedem ol magasin mo yusum Baebol nomo. Fastaem, mifala i prij nomo long ol man we oli gat sabskripsen blong Wajtaoa mo Wekap!

“Afta long intenasnal asembli long Nyu Yok long 1958, Clyde Neill mo David Carano wetem famle blong tufala, oli kam joen wetem mifala. Mifala i prij tugeta mo singaot ol man oli kam lesin long ol tok we ol brata oli givim long haos blong ol Wetnes. Sloslou, mifala i stat folem wan gudfala program, ale mifala i stat mekem wan Baebol stadi wetem wan grup blong 15 man. Afta we tri manis i pas, famle Neill mo Carano oli mas aot from we visa blong olgeta olsem ol turis, i finis. Taswe, ol brata oli mekem disisen se bifo we oli gobak, bambae oli baptaesem olgeta man we oli rere mo we oli naf. Mi kasem blesing ya blong tanem tok blong faswan baptaes ya i go long lanwis blong ol manples blong mi. Long taem ya, i gat eit manples we oli givim laef blong olgeta i go long Jeova mo tekem baptaes. Ale, famle Neill mo Carano oli gobak long Yunaeted Stet.

“Wok blong prij i gohed. Mifala i seraot i go long ol smosmol grup, mo mifala i prij long sapa. Plante taem, mifala i storeyan go kasem medel naet, wetem ol man we oli intres. Samtaem, i gat sam pasta blong Protestan tu we oli joen long storeyan blong mifala. Ale, long 1959, faswan kongregesen i stanap. Mo, long 1960, mifala i sapraes bigwan we gavman i luksave ol Wetnes blong Jeova olsem wan skul we i folem loa. Ol yia we oli kam biaen, oli fulap long glad mo plante blesing long saed blong speret. Jeova i rili blesem disisen blong mifala blong muf i go long ples ya we i gat moa nid.” Naoia, Sista Schenck i gat 87 yia, be hem i gohed strong yet long wok blong Jeova long kongregesen blong hem.

Wok i Gohed Gud

Long 1969, Sosaeti i sanem tu Wetnes blong Franis, Jacques mo Paulette Inaudi, oli go long Tahiti olsem spesel paenia. Jacques i tingtingbak i se: “Taem mitufala i kasem Tahiti, i gat 124 pablisa nomo, wan kongregesen long Papete, mo tu spesel paenia long Vaerao, hemia wan smol aelan we i joen long bigfala aelan ya.” Wan smol pis graon nomo i joenem aelan ya wetem Tahiti. I no longtaem biaen, mifala i mekem Intenasnal Asembli ya, “Pis Long Wol.” Jacques i gohed se: “Hemia faswan taem we mi mekem wok blong lukaot long wan asembli. Mifala i mas mekem plan blong wan program long Engglis blong olgeta we oli kam long ol narafala kantri, mekem wan grup blong plei myusek blong ol singsing blong Kingdom, mo lanem tu drama. Wan handred twante-sikis pablisa nomo oli mas mekem olgeta wok ya. Mi sua se Jeova nao i mekem bighaf blong ol wok ya.” Ol Wetnes long aelan ya, oli glad tumas taem oli luk we 488 man oli stap long asembli ya. Plante blong olgeta oli neva gat jans bifo blong luk ol Wetnes blong narafala kantri.

Smoltaem biaen, Jacques Inaudi i stat mekem wok blong elda we i goraon blong visitim ol kongregesen. Taem hem i visitim ol wanwan aelan, hem i luksave se i gat plante man we oli intres, be i no gat naf pablisa blong Kingdom blong givhan long olgeta ya. Jacques i eksplenem se: “Hemia nao from wanem mi traem pulum plante famle blong muf i go long ol aelan we oli gat bigfala nid. Ale, sloslou, gud nyus i goaot long olgeta aelan ya.” Brata Inaudi i mekem wok blong elda we i goraon, stat long 1969 kasem 1974, mo naoia, hem i elda long wan kongregesen long Tahiti.

Wan long olgeta we i folem advaes blong Brata Inaudi blong go long ol aelan, hemia Auguste Temanaha. Hem i wan long ol eit man ya we oli bin tekem baptaes long 1958. Hem i tingtingbak long samting we i bin hapen, i se: “Long 1972, seket elda, Jacques Inaudi, i askem long mifala blong tingbaot sipos mifala i save muf i go long Uahine, wan long ol Liwod Aelan, we i haf blong ol Sosaeti Aelan. Fastaem, mi no wantem, from we mi ting se mi no naf. Mi stap mekem ol Baebol riding nomo long kongregesen. Be Brata Inaudi i talem bakegen mo bakegen se, ‘Yu no wari. !Yu save mekem ya!’ Afta we smoltaem i pas, mifala i mekem disisen blong go. Ale, long 1973, mifala i salem olting blong mifala, mo muf i go long Uahine, wetem trifala smol pikinini blong mitufala.

“Taem mifala i kasem ples ya, mi faenemaot se i gat plante samting blong statem​—Wajtaoa Stadi, Tiokratik Skul, mo ol narafala miting. I no isi, be mifala i haremsave se Jeova i stap lukaot long mifala mo halpem mifala. Plante taem, hem i halpem mifala blong faenem wan ples blong slip. Mo tu, wan taem, wan grup blong man we oli agensem ol Wetnes oli traem ronemaot mifala long aelan ya, ale wan bigman blong politik i tok blong sapotem mifala. Tru tumas, Jeova i lukaotgud long mifala long taem ya.” Naoia, i gat tu kongregesen long Uahine—wan long Franis we i gat 23 pablisa long hem, mo wan long lanwis blong Tahiti we i gat 55 pablisa long hem.

Long 1969, Hélène Mapu i kam wan spesel paenia mo i go wok long smol aelan we i joen long Tahiti. Hélène i talem se: “I gat plante man long smol aelan ya we oli intres, mo i no longtaem, mi gat plante Baebol stadi.” Afta we smoltaem i pas, wan kongregesen i stanap long Vaerao, be i nidim elda. Nao, Colson Deane, we i stap long Papara, 35 kilomita longwe, hem i givhan. Brata Deane i storeyan se: “Mifala i mas folem wan gudfala plan blong givhan long Vaerao. Mi mi stap wok long Fa, hemia 70 kilomita longwe long Vaerao, long narasaed blong aelan ya. Afta long wok, mi mas spid i gobak long haos, karem famle blong mi, mo go long Vaerao. Biaen, mifala i muf i go long Fa from wok blong mi. ?Mifala i gohed blong givhan long kongregesen blong Vaerao? Mifala i rili wantem halpem ol brata longwe, taswe mifala i mekem disisen blong gohed. Plante taem, long naet we i gat miting, mifala i kambak long haos long medel naet nomo, from we mifala i mas karem olgeta we oli no gat trak oli gobak long haos blong olgeta. Mifala i mekem olsem blong faef yia. Mifala i glad tumas we naoia i gat fo kongregesen long haf ya blong aelan, mo mifala i laekem tumas blong tingtingbak long taem ya bifo.”

Tahiti i Gat Wan Ofis Blong Sosaeti

Long 1974, namba blong ol pablisa blong Kingdom long Tahiti i kasem 199. Long yia we i kam biaen N. H. Knorr mo F. W. Franz, we long taem ya tufala i presiden mo vaes presiden blong Wajtaoa Sosaeti, tufala i visitim olgeta aelan long Franis Polinesia. Tufala i luksave se i moagud sipos Tahiti nao i lukaot long wok blong prij long olgeta aelan blong Franis Polinesia, i bitim Fiji we i stap 3,500 kilomita longwe. Taswe, long Epril 1, 1975, wan ofis i stanap long Tahiti, mo seket elda, Alain Jamet, i lukaot long ofis ya.

Bifo las yia, Brata Jamet i tokbaot ol nambawan blesing we Jeova i bin givim long taem ya. “Stat long 1975, ol brata oli traehad bigwan blong karem gud nyus i go long olgeta aelan long teritori blong mifala, we kolosap i bigwan olsem ol kantri blong Wes Yurop. Ol frut we oli kamaot, oli mekem mifala i glad tumas. Namba blong ol pablisa i kam antap bigwan, mekem se long 1983 i gat 538 pablisa. Long sem yia ya, mifala i bildim wan ofis mo Betel long Paea. Naoia, i gat raonabaot 1,900 pablisa long 30 kongregesen long ol Sosaeti Aelan. Mo tu, i gat wan kongregesen mo wan smol grup long Ostral Aelan, wan kongregesen mo tu smol grup long Makesas Aelan, mo sam smosmol grup long ol aelan blong Tuamotu mo Gambia. Mifala i stap wokem plante nyufala Haos Kingdom​—tri long Makesas mo seven long Tahiti​—from we plante nyuwan oli stap joen long ol miting. Long ol 20 yia we oli pas, Jeova i rili blesem hadwok blong mifala long teritori blong Tahiti.”

Plante Wok i Stap Yet

I sua se wok i save kam bigwan moa yet long Franis Polinesia. Long Maj 23, 1997, samwe 5,376 man oli joen wetem ol Wetnes blong Jeova long Franis Polinesia, blong mekem Memoriol blong ded blong Jisas Kraes. Blong givhan long ol man ya we oli intres, ol Wetnes oli wokem ol buk we oli tokbaot Baebol, long plante lanwis blong ol manples. Ol buk ya oli kamaot long lanwis blong Tahiti mo long lanwis Paumotu, hemia lanwis blong ol man long ol aelan blong Tuamotu, mo Not mo Saot Makesas.

From we wok i gru bigwan mo i gat plante gudfala samting i kamaot, ol pablisa blong Kingdom long Tahiti oli gat tangkyu we i bigfala moa, from lav mo longfala tingting we Jeova i soemaot. Yes, hem i “wantem sevem olgeta man, mo i wantem olgeta man bambae oli faenem trutok,” long ol smosmol aelan blong Saot Si tu. (1 Timote 2:4) Ol Wetnes blong Jeova long Tahiti mo long ol narafala aelan blong Franis Polinesia, oli bilif fulwan long promes blong Jeova se: “Ol aelan bambae oli putum tingting blong olgeta i stap strong long mi, mo bambae oli wet long han blong mi.”​—Aesea 51:5.

[Futnot]

[Map Blong Pija Long Pej 26]

(Lukluk niuspepa)

Ofis blong Sosaeti long Tahiti i lukaot long olgeta aelan blong Franis Polinesia

OSTRELYA

[Tok Blong Pija Long Pej 25]

Stat long lefsaed i go long raetsaed: Alain Jamet, Mary-Ann Jamet, Agnès Schenck, Paulette Inaudi, mo Jacques Inaudi

[Tok Blong Pija Long Pej 27]

Ofis blong Sosaeti long Tahiti