?Wanem Fyuja Blong Wol Blong Yumi?

I no gat wan narafala taem bifo we i sem mak long ol yia 1900, long saed long raf fasin, namba blong ol faet, fulap refuji,a plante milyan man we oli ded long ol faet, mo fulap mane we oli yusum blong ‘defens,’ ” hemia tok blong buk ya World Military and Social Expenditures 1996. ?Bambae ol fasin ya oli save jenis?

Aposol Pita i talem bakegen long ol Kristin, wan promes we God i mekem plante handred yia bifo, se: “God i promes finis blong putum nyufala skae mo nyufala wol, we stret fasin nomo bambae i stap long hem. Mo yumi stap wet blong ol nyufala samting ya.” (2 Pita 3:​13) Tok ya i wan haf blong profet tok blong Aesea. (Aesea 65:17; 66:22) Profet tok ya i kamtru fastaem long ol man Isrel bifo, taem nesen ya i gobak long graon we God i promes blong givim long olgeta, afta we oli stap 70 yia finis olsem ol man blong wok long Babilon. !Pita i talem bakegen promes ya blong “nyufala heven mo nyufala wol,” from we profet tok ya bambae i mas kamtru bakegen long fasin we i bigwan moa i bitim fastaem, hemia long fulwol!

God i wantem stanemap stret fasin long fulwol, mo bambae i mekem samting ya tru long Kingdom blong hem long heven we Jisas i King blong hem. “Bambae wan nesen i no leftemap naef blong faet agens long narafala nesen, mo bambae oli no moa lanem fasin blong faet.” (Aesea 2:4) Pis mo seftaem we i fulwan olsemia, hemia samting we Jisas i tijim ol disaepol blong hem se oli mas wet mo prea from. Long Prea Blong Masta, hem i talem se: ‘Yu yu kam king blong olgeta man. Bambae olgeta man long wol oli mekem olsem we yu yu wantem, olsem we olgeta long heven oli stap mekem.’​—Matyu 6:​9, 10.

?Yu yu wantem laef long wan wol we i stret olsem heven? Hemia hop we Baebol i tokbaot, we i save kamtru long olgeta man we oli traem save God wetem fulhat blong olgeta mo folem stret fasin blong Hem long laef blong olgeta.

[Futnot]