?From Wanem Oli Stap Lego Skul Blong Olgeta?
RAONABAOT long yia 1850, long Prasia (naoia hem i not blong Jemani) yu no save harem wan man i talem se hem i no gat skul blong hem. Long taem ya sipos wan man we i stap long wan mama jyos i lego skul ya blong go long wan skul we i defren olgeta, mama jyos ya i save askem long polis blong wajemgud man ya. !Naoia, samting ya i jenis bigwan!
Tede, plante moa man blong Jemani oli stap lego jyos blong olgeta. Wan ripot i eksplenem se 1 long evri 4 man i talem se hem i no joen long wan skul nating. Fasin ya, i stap tu long Ostria mo Swiselan. Sipos ol memba blong skul oli olsem blad we i mekem olgeta skul ya oli laef, ale tok blong wan man Jemani we i raetem buk, Reimer Gronemeyer, i tru. Hem i talem se, “blad blong olgeta jyos blong Yurop i stap ronaot gogo bambae oli ded.”
From Wanem Oli Stap Lego Skul Blong Olgeta?
?From wanem plante man oli no moa folem ol jyos? Plante taem, risen i long saed blong mane, antap moa long ol kantri we ol memba blong jyos oli mas pem wan takis. Plante man oli askem se: “?From wanem mane we mi traehad blong kasem i mas go long jyos? Samfala oli harem nogud taem oli luk bigfala mane mo paoa we jyos i gat. Ating olgeta ya oli agri wetem Kadinol Joachim Meisner long Kolon, long Jemani, we i talem se maet ol sas samting blong jyos oli pusum hem blong tingbaot tumas olgeta samting ya, mo “blong no tinghevi long bilif long Kraes.”
Sam narafala oli lego jyos blong olgeta from we oli harem se oli les long hem, oli no intres long hem, mo hem i no naf blong givim kakae long saed long speret long olgeta. Oli hanggri olsem profet Emos i talemaot se: “I no moa gat kakae long kantri, oli hanggri, be i no blong kakae bred, mo oli tosta, be i no blong dring wora. I blong harem ol tok blong Jeova.” (Emos 8:11) From we oli no asem kakae long saed long speret long skul blong olgeta, oli lego hem.
Nating se ol trabol ya oli stap kamaot, ?i stret blong lego skul olgeta? Tingbaot wan man we i hanggri mo i luk wan samting we i olsem wan bred. Be taem man ya i traem kakae samting ya, hem i faenemaot se hemia i makas blong wud nomo. ?Olsem wanem, yu ting se man ya bambae i no moa lukaot kakae, nating se hem i hanggri? No gat, bambae hem i traem faenem trufala kakae. Long sem fasin, sipos wan skul i no givim samting we ol memba blong hem oli nidim long saed long speret, ?bambae oli mas lego olgeta skul evriwan? Ating i moa waes we oli traem faenem wan narafala rod blong kasem kakae long saed long speret. Plante man oli mekem samting ya finis, olsem nekis haf blong magasin ya bambae i soem.