Wan Nambawan Taem We Oli No Save Fogetem Long Franis

“!WAN TAON BLONG JEOVA​—NO GAT!” Tok ya i stap long ol posta we ol man oli putumap long taon. “Olgeta Man, Yumi Joen Blong Agensem Plan Blong Jeova.” Wan grup blong man we i agensem plan ya oli toktok olsemia. Plante handred store long nyuspepa oli tokbaot samting ya mekem se ol man oli save. Sam man oli saenem sam pepa blong agensem plan ya, mo oli putum bitim 500,000 smol pepa we oli tokbaot plan ya, long bokis blong ol leta long ol wanwan haos. ?Wanem ya plan ya we i spolem kwaet laef blong ol man long taon blong Louviers, long notwes blong Franis? Hemia plan blong bildim wan nyufala hed ofis blong ol Wetnes blong Jeova mo wan ples we oli save slip.

Jeova i Mekem Se i Gru

Wok blong ol Wetnes blong Jeova long Franis i stat long en blong ol yia 1800. Long 1905 long Boven, long saot blong Franis, i gat faswan ples blong sanemaot ol buk we oli tokbaot Baebol. Long 1919, oli openem wan smol ofis long Paris. Hem i long 1930 we oli rili openem wan hed ofis. Wan yia biaen, ol man blong wok long ofis ya oli stat slip long haos blong Betel we i stap long not blong Paris, long Enghien-les-Bains. Afta Namba Tu Bigfala Faet Blong Wol, famle blong Betel i gobak long Paris. Long 1959, oli seftem hed ofis i go long wan stori haos we i gat faef stori blong hem, long Boulogne-​Billancourt, wan taon we i kolosap long Paris long saed i go long wes.

Wok blong talemaot Kingdom i gru, taswe long 1973, oli seftem ol mesin blong prentem ol buk mo ol samting blong sanemaot ol buk, oli go long Louviers, we i stap 100 kilomita long wes blong Paris. Ol man we oli wok long ofis oli stap nomo long Boulogne-​Billancourt. Be namba blong ol pablisa long Franis i go antap, mekem se woksap long Louviers i smol tumas, nating se oli seftem i kam bigwan moa long 1978 mo 1985. From samting ya, oli tekem disisen blong wokem sam moa haos mo hivimap ful famle blong Betel oli kam wan ples nomo. Be, samfala long Louviers oli no agri long plan ya, olsem ol tok antap oli soem. Nating se i gat fasin agens olsemia, ol Wetnes oli faenem wan graon we i stap wan kilomita haf longwe long woksap blong prentem ol buk. Ale, sikis yia blong had wok i stat. Afta 23 yia we famle blong Betel i seraot i stap long tu defren ples, long Ogis 1996, ful famle blong Betel i stap tugeta long Louviers.

Hemia from wanem i gat bigfala glad taem 1,187 man oli hivap tugeta long Sarede, Novemba 15, 1997. I gat 300 memba blong famle blong Betel long Franis, mo 329 man blong 42 hed ofis blong ol narafala kantri. Oli kam blong lesin long tok we Brata Lloyd Barry, wan memba blong Hed Kampani, i mekem, blong givim bilding ya i go long Jeova. Be, miting ya i stap long taem we i gat fasin agens, mo tu, longtaem finis ol man blong nyuspepa mo televisen oli stap mekem plante gyaman toktok agensem ol Wetnes blong Jeova long Franis. From samting ya, tingting i stap se olgeta Wetnes blong Franis oli mas gat jans blong joen long dedikesen ya blong haremgud long taem ya we oli win. Taswe long Sande, Novemba 16, long Eksibisen Senta blong Villepinte long Not blong Paris, oli mekem wan spesel miting we stampa tok blong hem se, “Stap Long Laef We Kraes i Laekem Yu.” Oli singaot ol Wetnes blong Jeova long Franis wetem ol Wetnes we oli toktok Franis long Beljiom mo Swiselan oli kam, mo tu, sam kongregesen long Briten, Jemani, Laksembog, mo Netalan.

Wan Nambawan Miting

Sikis manis bifo long miting ya, oli stat mekemrere ol samting. Be, tu wik bifo long miting ya, ol draeva blong ol kameong long Franis oli mekem wan straek, oli blokem ol bigfala rod mo ol ples blong bensin. ?Bambae ol jea mo ol narafala samting oli save kasem ples blong miting long stret taem? From we ol man oli blokem ol rod, ?bambae ol brata oli save kasem ples blong miting ya, no nogat? Wan wik i no pas yet be straek ya i finis, mekem se evriwan i glad from we ol trak oli save ron bakegen long ol rod. Long Fraede naet blong wiken blong dedikesen, i gat 38 kameong we oli karem 84,000 jea oli kam long tu bigfala haos we oli rentem blong miting ya. Bitim 800 brata mo sista oli wok strong blong ful naet go kasem haf pas naen long Sarede moning, blong putumgud ol jea, mekemrere platfom, mesin blong myusek, mo naen bigfala skrin blong video.

Sande, long 6 klok long moning, oli openem ol doa, mo bigfala hif blong man i kam insaed long ples ya. I gat 17 spesel tren we oli karem bitim 13,000 Wetnes oli kam long bigfala taon ya. Bitim tu handred brata mo sista blong bigfala taon ya oli wet long ples we tren i stop, blong welkamem olgeta Wetnes we oli kam mo blong karem ol wanwan grup blong olgeta oli go long asembli. Wan sista i talem se plan ya we i soemaot lav, i givim “filing blong stap sef mo haremgud.”

Sam narafala oli kam long Paris long plen no trak. Be bighaf blong olgeta, oli kam long 953 bas, mo ol Wetnes blong Paris oli yusum sevis bas, tren mo taksi blong go long Eksibisen Senta. Nating se plante man oli wokbaot ful naet no oli aot long haos blong olgeta long eli moning blong kam, oli soem se oli haremgud tumas blong joen long miting ya. Oli talem halo wetem bigfala glad tumas, mo kiskisim ol fren blong olgeta we oli no bin luk olgeta blong plante yia. Ol kala blong ol kastom klos blong ol defren kantri oli soemaot klia se ol man ya we oli glad tumas, oli kam long ol defren kantri. I klia se wan nambawan samting bambae i kamaot.

Program i stat long 10 klok long moning. Haos i fulap finis, be plante handred man oli stap kam yet evri menet. Long olgeta ples we man i luk, i gat ol man we oli stap smael. Plante taosen oli stanap nomo no oli sidaon long floa we i simen. Plante yangfala oli lego jea blong olgeta i go long ol olfala mo oli stanap nomo, hemia fasin lav we i laenap wetem stampa tok blong asembli ya. Wan man mo woman blong hem oli raetem se: “!Mitufala i glad tumas blong lego jea blong mitufala long ol brata mo sista we mitufala i laekem olgeta tumas nating se mitufala i no save olgeta!” Plante man oli soem gudfala fasin ya blong lego sam samting we oli laekem tumas: “Mifala i stanap long ful dei blong asembli, kolosap long ol jea we mifala i bin putum olgeta long oda long Fraede naet. Jes blong stap long ples ya nomo, i mekem se mifala i fulap long tangkyu long Jeova.”

Nating se plante man oli taed no oli no save sidaon long wan gudfala jea, oli lesingud long ol ripot we oli kam long ol narafala kantri mo ol tok blong Lloyd Barry mo Daniel Sydlik, we tufala i memba blong Hed Kampani. Brata Barry i givim tok ya “Jeova i Givim Bigfala Paoa.” Hem i soemaot klia olsem wanem Jeova i bin blesem ol man blong hem, nao namba blong olgeta i gru nating se oli kasem plante traem. Nem blong tok blong brata Sydlik, hemia ‘!Olgeta We Jeova i God Blong Olgeta, Oli Harem Gud!’ Tufala tok ya oli kam long stret taem, from we ol Wetnes blong Jeova long Franis oli stap kasem plante fasin agens naoia. Brata Sydlik i soem se trufala glad i no dipen long ol samting we oli stap raonabaot long yumi, be hem i dipen long fasin blong yumi blong frengud wetem God, mo tingting we yumi gat long saed long laef. Hem i askem kwestin ya long ol man we oli stap lesin, i se, “?Yufala i glad?” Blong ansa, ol man oli klapem han gogo noes blong olgeta i olsem tanda.

Biaen, wan sista we i bin harem se i “lusum glad blong hem,” i talem se: “Wantaem nomo mi luksave se mi naf blong kasem glad. Mi mi bin tekem rod we i no stret long traehad blong mi, be tru long tok ya, Jeova i soem long mi wanem samting we mi mas jenisim.” Wan narafala brata i talem se: “Naoia, mi mi wantem traehad fulwan blong mekem hat blong Jeova i glad. Mi mi no wantem letem wan samting nating i karemaot glad ya we mi mi stat blong harem insaed long mi.”

Taem miting ya kolosap i finis, jeaman i glad tumas blong talemaot hamas man oli stap, hemia: 95,888. !Miting ya i bigwan moa i bitim ol narafala miting we ol Wetnes blong Jeova oli bin mekem bifo long Franis!

Long laswan sing, plante oli singsing wetem wora long ae blong olgeta from glad. Biaen i gat laswan prea, nao ol brata oli stat gobak long ples blong olgeta we oli sore lelebet se dei ya i pas finis. Plante narafala man tu oli luk nambawan fasin fren mo lav we ol Wetnes oli gat. Ol man we oli draevem bas oli talem plante gudfala tok long saed long gudfala fasin blong ol Wetnes. !Oli sapraes tu long gudfala plan we i mekem se ol 953 bas oli aot long Eksibisen Senta long tu haoa, be ol trak oli no fasfas long rod! Ol man we oli wok long ol tren mo taksi tu oli glad long gudfala fasin blong ol man we oli go long asembli ya. Biaen, ol Wetnes oli gat jans blong storeyan gud wetem plante man mo oli givim wan gudfala wetnes.

“Wan Ples Blong Wora Long Drae Ples”

Aposol Pol i pusum ol Kristin wetem ol tok ya se: “I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. . . . Oltaem yumi mas stap toktok long yumi blong mekem tingting blong yumi i kam strong moa, from we yufala i luk we Dei ya we Masta blong yumi bambae i jajem olgeta man, hem i kam kolosap finis.” (Hibrus 10:24, 25) Tru, spesel miting ya i nambawan blong leftemap tingting blong olgeta we oli stap. Wan sista i talem se miting ya i olsem “wan ples blong wora long drae ples.” Ol brata blong ofis blong Sosaeti long Togo, oli talem se: “Mifala i kambak long ples blong mifala wetem paoa. Asembli ya i leftemap tingting blong mifala mo i mekem mifala i strong, nao mifala i gat tingting we i strong moa bitim bifo, blong stap glad long wok blong Jeova.” Wan seket elda i talem se: “Olgeta we oli harem nogud fastaem oli gobak long ples blong olgeta wetem glad.” Wan narafala brata i talem se: “Ol brata oli kasem paoa we i pusum olgeta blong gohed, mo oli kam strong moa long saed long speret.” Asembli ya i pusum wan man mo woman blong hem blong raetem tok ya se: “Naoia, mitufala i harem se mitufala i stap kolosap moa long ogenaesesen blong Jeova, i bitim olgeta taem bifo.”

Wan man blong raetem Ol Sam i talem se: “Hae God, yu yu stap mekem we mi mi stap sef long olgeta trabol, nao mi mi stap presem yu long fes blong olgeta man blong yu.” (Ol Sam 26:12) Ol miting olsemia oli mekem se ol Kristin oli stanap strong bakegen long saed long speret taem oli fesem sam traem. Wan sista i makem se: “Nating se ol trabol we oli kasem mifala oli olsem wanem, nambawan taem we mifala i pasem long asembli ya i stap long hat blong mifala mo bambae i stap oltaem blong sapotem mifala.” Long sem fasin, wan elda we i wokbaot blong visitim ol kongregesen, i raetem se: “Sipos hadtaem i kam, mifala i save rimemba taem ya we i soemaot smol, wanem bambae i kamaot long paradaes. Bambae samting ya i givhan long mifala blong winim ol trabol ya.”

Ol Sam 96:7 i leftemap tingting blong yumi se: “!Olgeta man long wol, yumi presem Hae God! Yumi presem hem from ol gudgudfala samting blong hem mo from paoa blong hem.” I sua se dedikesen blong nyufala ofis blong Sosaeti long Franis i makemgud se Jeova i win. Hem wan nomo i naf blong mekem se plan blong bildim haos ya i kamtru, nating se i gat strong fasin agens long plante ples long Franis. Ol Wetnes blong Jeova long Franis oli gat tingting we i strong moa bitim bifo, blong ‘stap long laef we Kraes i laekem olgeta’ mo ‘letem laet blong olgeta i saenaot.’ (Jon 15:9; Matyu 5:​16) Olgeta we oli joen long dedikesen ya oli agri fulwan wetem filing blong wan man we i raetem Ol Sam, se: “Samting ya i kamaot long Jeova hem wan, mo yumi luk se i gud tumas.”​—Ol Sam 118:23, NW.

[Tok Blong Pija Long Pej 26]

Daniel Sydlik

[Tok Blong Pija Long Pej 26]

Lloyd Barry

[Tok Blong Pija Long Pej 26]

95,888 man oli joen long spesel miting long Eksibisen Senta long Villepinte

[Tok Blong Pija Long Pej 28]

Plante taosen man oli stap stanap nomo no oli sidaon long floa blong lesin