Stap Laef Mo Prij Kolosap Long Wan Volkeno

RILI wan samting blong fraet. Hem i olsem en blong wol we Baebol i stap tokbaot. Mifala i mas rere oltaem, mo gat gudfala nem wetem Jeova God long evri menet.” Víctor, wan Wetnes blong Jeova, i talem tok ya taem hem i stap tokbaot ples we hem i laef long hem, hemia kolosap nomo long volkeno blong Popokatepet, we plante man oli kolem Popo, long Meksiko.

Stat long 1994, nyus blong volkeno ya, we i stap mekem bigfala noes, i kamaot plante taem long radyo.a Ol man blong stadi long volkeno, oli talem se evri samting we i stap 30 kilomita kolosap long volkeno ya, i stap long bigfala denja. Ol ples long saot, oli denja tumas from we maot blong volkeno ya i lukluk i go long saed ya nao. Mo tu, long sem saed ya, i gat ol bigbigfala krik we lava mo sofmad blong volkeno i save pas long olgeta.

Tru tumas, plante man oli stap wari se wanem bambae i hapen long Meksiko Siti sipos wan dei, volkeno ya i faerap bigwan. ?Taon ya i stap long denja? Mo ?olsem wanem long olgeta man ya we oli stap long Morelos, long saot blong volkeno? ?Olgeta tu, oli stap long denja? ?Wanem filing blong yu, sipos yu stap laef kolosap long wan volkeno, we yu no save se bambae i faerap tede no tumora?

Denja Blong Volkeno

Stampa ples blong bisnes long Meksiko Siti, i stap samwe 70 kilomita long notwes blong Popokatepet. Be sam eria afsaed long taon ya i moa kolosap long volkeno, samting olsem 40 kilomita. Nating se i olsem, fulwan eria blong taon ya, wetem 20 milyan man blong hem, oli stap afsaed long ples we i denja. Be, sipos win i blou i kam stret long ples ya, eria ya i save kasem bigfala trabol from fulap ases we volkeno i sakem i go antap long skae.

Plante taem, ases blong volkeno i stap mekem moa trabol long ol ples long is. Long ples ya, i gat taon blong Puebla mo sam nara smosmol taon bakegen, wetem kolosap 200,000 man we oli stap laef long eria we i denja tumas. Long Sande, Mei 11, 1997, volkeno ya i sakem bigfala hif blong ases i go antap long skae, we i kavremapgud eria ya, i go kasem Verakrus, bitim 300 kilomita long is saed. Long eria blong Morelos, long saot blong volkeno, i gat sam taon wetem kolosap 40,000 man. Olgeta ya tu, oli stap long bigfala denja.

Ol Wetnes blong Jeova oli laef mo oli wok long medel blong olgeta man ya. Long Meksiko Siti, i gat bitim 90,000 Wetnes blong Jeova long 1,700 kongregesen. Branj ofis blong Watch Tower Sosaeti i stap long not is blong Meksiko Siti, samwe 100 kilomita longwe long volkeno. I gat bitim 800 volontia oli stap wok long branj ofis. Mo i gat 500 narafala volontia we oli joen long wok blong bildim ol haos. Olgeta evriwan oli stap afsaed long eria we i denja.

Long eria blong Morelos long saot blong volkeno, i gat kolosap 50 kongregesen blong ol Wetnes blong Jeova, wetem bitim 2,000 man blong talemaot Kingdom. Sam long ol kongregesen ya, oli stap long Tetela del Volkeno mo Weyapan, we i 20 kilomita longwe long volkeno. Mo tu, long eria blong Puebla we i stap long is, i gat sam kongregesen wetem samwe 600 pablisa oli stap laef 20 kasem 30 kilomita longwe long volkeno. I tru, olgeta ya oli stap long bigfala denja.

Ol Wetnes Blong Jeova Oli Wok Strong Oltaem

Nating se volkeno ya i stap gohed blong mekem bigfala denja long laef blong ol man, ol Wetnes blong Jeova oli no stop blong prij long eria ya. Mo tu, oli folem oltaem program blong olgeta blong holem ol Kristin miting, we i mekem se oli joengud mo oli gat strong tingting, nating we laef blong olgeta i stap long denja. (Hibrus 10:24, 25) Wan ripot we i kam long wan kongregesen long ples ya i talem se: “Tingting blong ol man i jenis bigwan long saed blong gud nyus blong Kingdom. Eksampel, i no longtaem i pas, 18 man long wan smol velej, oli wantem se mifala i stadi Baebol wetem olgeta long haos blong olgeta.”

Wan narafala kongregesen, we i stap 20 kilomita longwe long volkeno, i givim ripot se: “Trutok i gru bigwan. Kongregesen ya i bin stanap long Novemba 1996. Sikis manis biaen, i gat 10 man mo woman oli kam nafgud blong joen long wok blong prij. Sam pablisa, oli stap samwe 20 kilomita nomo longwe long volkeno. Oli holem ol Kristin miting long ples ya, mo i gat kolosap 40 man oli stap kam oltaem long ol miting ya.”

Magdalena, we i laef long San Agusten Ekstawektla, Puebla, 25 kilomita nomo longwe long volkeno, i wok strong oltaem blong mekem ol Baebol stadi. Hem i tokbaot wan taem we volkeno ya i faerap bigwan.

“Mifala i luksave se naoia, mifala i mas aot long haos blong mifala. Ale mifala i aot, nating se i gat fulap ases oli stap folfoldaon olsem ren. Nating se mifala i mas aot kwiktaem, mi tingbaot famle Dorado, we mi stap stadi Baebol wetem olgeta. Mi wetem sam brata, mifala i go long haos blong famle Dorado, mo mifala i givhan long olgeta blong muf i go long wan ples we i moa sef. Long taon blong Puebla, we i stap kolosap, grup blong ol Wetnes blong Jeova we oli kam blong givhan, i stap wok finis. Famle Dorado i sapraes bigwan blong luk olsem wanem ol Kristin brata sista oli kea long mifala long ples ya. Bifo we mifala i kam, ol brata ya, oli rerem haos blong slip blong mifala long ol defren ples. Mifala i no sot long wan samting, nating se mifala i stap longwe long haos blong mifala. Famle ya i kam finis long sam miting long Haos Kingdom, be oli sapraes bigwan blong luk ol brata sista, we oli neva save olgeta bifo, be oli soem lav long olgeta. Sam wik afta we mifala i gobak long haos blong mifala, famle ya i stat blong kam long olgeta miting. Smoltaem biaen, oli kam nafgud blong talemaot gud nyus. Naoia, tu long olgeta i baptaes finis. I gat sam manis we tufala i mekem wok blong haftaem paenia mo tufala i stap plan blong kam fultaem paenia.”

Martha, wan gel we i gat 20 yia, i laef 21 kilomita longwe long volkeno. Hem i handikap, be hem i no letem samting ya i blokem hem blong tekem evri jans blong prij. Hem i kasem trutok tri yia bifo, long wan taem we volkeno i faerap bakegen. Hem i no yusum wiljea, from we i no isi blong yusum wiljea long smol hil we hem i stap long hem. Be hem i sidaon long wan dongki blong go long wok blong prij. Hem i yusum dongki tu blong go long ol miting. Martha i talem bigfala tangkyu long Jeova, we hem i save stap wetem ol brata sista ya we oli gat lav, from we hem i dipen long ol sista long kongregesen, blong givhan long hem blong go antap mo godaon long dongki. Evri manis, hem i spenem bitim 15 haoa long wok blong prij.

Long ol eria ya we oli stap long bus, plante taem ol man raonabaot oli pusum ol Wetnes blong Jeova blong joen wetem olgeta long ol lafet blong jyos. Long Tulsingo, wan velej we i stap samwe 20 kilomita longwe long volkeno, i gat wan man we i go luk ol Wetnes blong Jeova blong askem presen mane blong mekem ol lafet ya. Wetem longfala tingting, ol brata oli eksplenem from wanem oli no save joen long ol lafet blong jyos. Be, man ya i no stop, hem i traehad blong kasem sam mane long ol brata. From samting ya, hem i stap plante taem wetem olgeta, ale hem i stat blong save sam bilif blong olgeta. Sam kwestin we hem i askem, hem i glad blong faenem ansa blong olgeta stret insaed long Katolik Baebol blong hem. Naoia, i mekem wan yia finis we hem wetem waef mo gel blong hem, trifala i stap kam oltaem long ol miting, mo hem i soem se hem i wantem kam wan man blong talemaot gud nyus.

?Olsem Wanem Yu Save Rere?

Ol man blong volkeno oli mekem stadi mo oli givimaot ripot long saed blong Popokatepet, we i stap mekem bigfala noes. Be, i no gat wan man we i rili save wanem bambae i hapen. Nyus long radyo mo ol man we oli laef kolosap long volkeno, oli talem se volkeno ya i save faerap enitaem nomo. Hem i rili wan bigfala denja. I tru, ol man blong stadi blong volkeno, oli wari bigwan long laef blong ol man mo oli wantem mekem bes blong olgeta blong rere sipos volkeno ya i faerap. Be, yumi mas save se oli lukaotgud tu long woning we oli givimaot, from we oli no wantem givimaot wan woning we i mekem se plante man oli aot, be volkeno i no faerap. Taswe, ?wanwan man i mas mekem wanem?

Wan proveb blong Baebol i talem se: “Man we i waes, hem i haed taem i luk trabol, be olgeta we oli no gat hed oli go nomo, mo oli mas kasem trabol.” (Proveb 22:3) Taswe, rod we i waes, hemia blong mekem sam samting blong meksua se yu yu sef. Yu mas mekem samting ya taem i gat jans yet. I nogud yu ‘stap nomo’ olsem we i no gat samting, mo yu stap wet se bambae volkeno i faerap, nao yu jes rere. Ol Wetnes blong Jeova long eria ya oli tingbaot blong rere taem i gat jans yet.

I no longtaem i pas, ol brata long branj ofis blong Watch Tower Sosaeti, oli mitim ol elda long Puebla, we oli stap visitim ol kongregesen kolosap long volkeno. Oli mekem plan se ol elda blong visitim ol kongregesen wetem ol memba blong ol grup we oli givhan long taem blong trabol, oli go visitim evri famle we oli laef 25 kilomita longwe long volkeno. Oli givhan long ol famle ya blong gat tingting blong muvaot long ples we i denja tumas, bifo we volkeno i faerap. Oli faenem transpot blong karem 1,500 man mo oli givim ples blong slip long olgeta long taon blong Puebla. Samfala, oli go stap wetem famle blong olgeta long ol narafala taon.

Woning We i Bigwan Moa

Smok, faea, mo bigfala noes we oli stap kamaot long Popokatepet, i soemaot klia se bambae volkeno ya i faerap i no longtaem nating. Olgeta we oli no wantem ded, oli mas lesin long woning we ol man blong volkeno oli givimaot, mo tekem aksin folem ol woning ya. Ol Wetnes blong Jeova we oli stap kolosap long volkeno, oli stap wajemgud volkeno ya blong meksua se oli stap sef. Mo tu, oli givhan long ol narafala blong luk denja mo blong mekem sam samting bifo we i let tumas.

Long fasin we i bigfala moa, ol Wetnes blong Jeova oli stap wajemgud tu, ol samting we oli stap kamaot long wol ya blong mekem ol profet tok oli kamtru. Ol samting olsem ol faet, graon i seksek, hadtaem blong kasem kakae, ol sik, mo fasin blong brekem loa, oli jes ol saen olsem smok, faea, mo bigfala noes we oli kamaot long wan volkeno. Oli mekemap wan saen we Jisas Kraes i talem se bambae i makem ‘en blong ol fasin blong wol ya.’ I tru, i no gat wan man i save wetaem stret bambae en i kam. Nating se i olsem, yumi sua fulwan se en i stap kam mo se hem i kolosap we i kolosap tumas.​—Matyu 24:​3, 7-​14, 32-​39.

Samting we i impoten tumas tede se, ol man long evri ples oli mas tinghevi long woning ya blong Jisas, se: “Yufala i mas lukaot gud. Sipos yufala i letem tingting blong yufala i kam slak, from we yufala i stap ronem lafet, mo yufala i stap drong mo yufala i stap tingting tumas long laef ya long wol, bambae dei ya blong mi i kam kasem yufala wantaem.” (Luk 21:34) I klia se hemia nao rod we i waes blong folem. I tru tumas, yumi no mas ting nating long woning we wan volkeno i givim, i sem mak, yumi no mas fogetem Pikinini blong Man, Jisas Kraes, we i stap kam. Hem i talem se: “From samting ya, yufala i mas stap rere. From we mi, mi Pikinini blong Man, bambae mi kamtru long taem we yufala i no tingbaot.”​—Matyu 24:44.

[Futnot]

[Tok Blong Pija Long Pej 23]

Martha (i stap sidaon long dongki) wetem ol narafala, oli stap prij kolosap long Popokatepet