Ripot Long Wok Blong Kingdom

Yu No Mas Mestem Blong Talemaot Gud Nius

TAEM ol man Yurop we oli go blong faenem ol niufala ples, oli kamtru fastaem long Gulf blong Veneswela mo Lek Marakaibo, oli luk plante smol stori haos we man i wokem long natanggura, antap long solwota. Ples ya i mekem olgeta oli tingbaot ol man blong Venis, Itali, we oli bildim ol haos blong olgeta long saed blong solwota tu. Ol man ya blong faenem ol niufala ples oli toktok lanwis Spen, taswe oli kolem ples ya se Veneswela, we i minim “Smol Venis.”

Tede, naesfala kantri ya i stap folem wan narafala kaen program blong bildim haos, hemia wan program long saed blong spirit. Ol Witnes blong Jeova long ples ya oli wokhad blong sakem sid blong Kingdom, long evri jans we oli gat. Risal we i kamaot from wok blong hivimap ol kakae blong garen long saed blong spirit, i stap presem bigwan “Masta blong garen,” Jeova God.​—Matiu 9:​37, 38.

Taem wan elda we i goraon blong visitim ol kongregesen, i visitim eria blong Sulia, long notwes Veneswela, ol Witnes blong ples ya oli mekem plan blong hem mo waef blong hem tufala i go visitim wan smol aelan klosap, nem blong hem Toas. Long nekis dei, oli stap wet blong tekem wan sip long eli moning blong go long aelan ya. Ale Mery, waef blong seket elda ya i talem long fultaem paenia sista we i prij wetem hem se i gud blong traem toktok long sam long ol man we oli wok long sip ya. Paenia sista ya i agri.

Mery i toktok long wan man blong mekem mekanik long sip ya, mo hem i soemaot buk ya Save Blong Lidim Yu Long Laef We i No Save Finis. Hem i soem japta ya “Wokem Wan Famle We i Givim Ona Long God”, we i pulum intres blong man ya. Ale Mery i eksplenem se wetem buk ya, man ya i save stadi Baebol long prapa haos blong hem. Man ya i akseptem buk ya, mo oli mekem plan blong wan brata i kam luk hem long haos blong hem.

Smoltaem biaen, i gat wan spesel dei asembli long eria ya. !Mery i sapraes tumas blong luk man blong wok ya, Senor Nava, wetem waef blong hem mo tu yang gel blong hem! Mery i askem long waef blong man ya, wanem tingting blong hem long famle Baebol stadi blong olgeta. Ansa blong woman ya i mekem Mery i sapraes moa.

Woman ya i talem se: “Mi tangkiu long Jeova from we mifala i kasem save long trutok.” Nao hem i eksplenem se: “Jes afta we hasban blong mi i lego mi blong go wetem wan narafala woman, yu toktok wetem hem. Samtaem hem i dring bitim mak, ale hem i raf tumas mo hem i stap tok strong, hemia sam fasin we smol namba blong ol man long aelan ya oli no laekem. Hem i joen tu long wok blong ol rabis spirit. Be, save blong Baebol we hem i kasem long stadi, i givhan long hem blong mekem bigfala jenis long laef blong hem. Hem i lego olgeta doti fasin blong hem. Papa mama blong hem, we oli Katolik, oli sapraes bigwan blong luk se hem i jenis olsemia. Oli glad blong luk se naoia hem i wan gudfala hasban mo papa we famle blong hem i save trastem.”

Senor Nava i tekem baptaes long 1996 mo naoia hem i mekem wok blong fultaem paenia. Waef blong hem, Jenny, i tekem baptaes long 1997. Mea blong taon ya i sapraes tumas blong luk olsem wanem fasin blong man ya we i wok olsem mekanik long sip i jenis bigwan, ale, hem i wantem stadi Baebol tu. !Tufala sista ya oli glad tumas se oli no mestem jans blong talemaot gud nius taem oli stap wet long sip long moning ya!

[Tok Blong Pija Long Pej 7]

Fasin blong seremaot gud nius wetem wan man blong wok long sip ya i karem nambawan frut