Wosipim God Wetem Trutok

Sipos wan man i wantem se God i agri long wosip blong hem, wosip ya i mas stanap long trutok. (Jon 4:​23) Baebol i makemaot ol man blong trufala wosip se oli blong ‘kongregesen blong God ya we i laef. Kongregesen ya, hem i holem trutok i stap gud, mo i stap blokem ol enemi blong hem.’ (1 Timoti 3:​15) Ol man we oli mekemap kongregesen blong God, oli bilif long trutok we i stap long Tok blong God. Be tu, oli traehad blong mekem laef blong olgeta i laenap wetem ol trutok ya. Oli rere tu blong blokem ol tok we oli daonem trutok mo oli talemaot trutok ya long olgeta ples blong wol.​—Matiu 24:14; Rom 10:​9-​15.

OL MAN oli savegud ol Witnes blong Jeova from wok blong olgeta blong tijim man long Baebol. Naoia oli stap mekem wok ya long bitim 200 kantri. Oli stadi long Baebol mo oli tijim ol tok blong Baebol olsem trutok. Oli no letem ol waes blong man oli daonem paoa blong Baebol. ?Yu yu savegud ol tijing blong Baebol we ol Witnes blong Jeova oli stap tijim? Plante man oli fraet blong lesin long ol Witnes blong Jeova from we oli harem plante giaman toktok agensem ol Witnes. Be, mifala i singaot olgeta ya we hat blong olgeta i stret, blong oli traem skelem sipos tijing blong ol Witnes i tru no i giaman. Impoten disisen we olgeta ya bambae oli mekem, i no mas stanap long samting we oli harem long narafala. Plante man we oli traehad olgeta wanwan, blong faenemaot moa long saed blong ol tijing blong ol Witnes blong Jeova, oli kasem bigfala blesing from.

Save Long Saed Blong Trutok i Mekem Fraet i Lus

Tingbaot wan eksampel. Eugenia i gruap long wan famle we i strong long Katolik Jos. Long 1979, Papa blong hem i wan long ol man ya we oli mekem plan blong pop i visitim Meksiko. Taem Eugenia i visitim ol fren blong hem, hem i mitim sam Witnes blong Jeova. Ol Witnes ya oli halpem hem blong kasem moa save long wanem we Baebol i tokbaot. Hem i talem se: “Fastaem, mi fraet bigwan. !Mi save se mi faenem trutok finis! Be samting ya i minim se bighaf blong ol bilif we mi gat fastaem, oli rong olgeta. Bilif blong famle blong mi, ol fren blong mi, mo olgeta ya we mi laekem tumas​—olgeta evriwan oli rong. Mi mi fraet. Mi stap askem long mi wan bakegen mo bakegen se, bambae famle blong mi i mekem wanem sipos oli save long niufala bilif ya we mi faenem. Sloslou Jeova i givhan long mi, nao mi stat folem ol niufala samting ya we mi kasem. Wan dei mi mekem disisen blong talemaot niufala bilif blong mi long wan fren blong famle blong mi, we hem i wan man blong stadi long ol bilif blong ol jos. Mi talem long hem se mi wantem tumas blong faenem trutok. Ale hem i talem se: ‘Sipos yu wantem save trutok, yu go lukaot ol Witnes blong Jeova.’ ”

Famle blong Eugenia i sakemaot hem long haos blong olgeta. Hemia nao samting we Eugenia i bin fraet long hem. Be, ol Witnes oli gohed blong halpem hem long saed blong spirit. Eugenia i talem se: “Mi kasem paoa blong stanap strong long trutok. Mi luksave se trutok i wan sas samting we mi mas faet strong blong kasem. Fasin welkam we ol Witnes blong Jeova oli mekem long mi i impoten tumas. Mi harem se olgeta insaed long Kristin kongregesen oli rili laekem mi. Taem mi kam klosap moa long ogenaesesen blong God, samting ya i halpem mi blong winim fasin fraet ya se mi wan nomo long famle, we mi stap long trutok.”

Tingbaot wan narafala eksampel. Sabrina i gruap long wan famle we oltaem, oli tokbaot Baebol. Oli stanemap wan ‘skul blong famle blong olgeta nomo.’ Sabrina i gat fasin blong joen wetem ol memba blong ol defdefren jos. Hem i wantem pruvum long olgeta se bilif blong jos blong olgeta i rong. Taem wan Witnes blong Jeova i askem hem blong stadi Baebol, hem i agri wantaem nomo. Tingting blong hem se, bambae hem i pruvum se bilif blong ol Witnes blong Jeova i rong. Hem i talem se: “Afta we mi stadi blong bitim wan yia, mi stat fraet se bambae mi lusum ‘trutok blong mi.’ Mi bin faenem i isi blong pruvum giaman fasin blong ol narafala jos ya we mi bin joen long olgeta. Be, long saed blong ol Witnes blong Jeova, i no isi nating blong soemaot samting ya.”

From we Sabrina i fraet tumas, hem i no moa gohed blong stadi wetem ol Witnes blong Jeova. Be, biaen hem i harem se hem i emti long saed blong spirit. Hem i mekem disisen blong statem stadi blong hem bakegen, nao sloslou hem i agri long trutok ya we hem i jes faenem. Sabrina i gohedgud go kasem we hem i wantem serem ol samting we hem i lanem, wetem ol narafala. Hem i askem blong joen wetem ol Witnes long wok blong prij long ol haos wanwan. Sabrina i eksplenem se: “Bifo we ol Witnes blong Jeova oli agri blong mi prij wetem olgeta, oli askem kwestin long mi se: ‘?Yu yu rili wantem kam wan Witnes blong Jeova?’ Wantaem nomo mi ansa se: ‘!No!’ Mi harem mi fraet bakegen, olsem fastaem.” Be, afta we Sabrina i gohed blong go long olgeta miting, mo lukluk gud ol fasin blong ol man blong God mo olsem wanem oli folem ol rul blong Baebol, hem i luksave se hemia trutok ya. Hem i tekem baptaes mo naoia hem i wan fultaem paenia.

?From Wanem Ol Tijing Blong Olgeta Oli Defren?

Maet sam man oli askem se, ‘?From wanem ol tijing blong ol Witnes blong Jeova oli defren tumas long ol narafala skul?’ Sipos yu tekem smoltaem blong traem save moa long bilif blong ol Witnes blong Jeova, bambae yu luksave se oli ol trufala Kristin mo oli stadigud long Baebol. Mifala i leftemap tingting blong yu blong yusum prapa Baebol blong yu mo jekemap ol vas we oli stap long lis antap. Ol vas ya oli soemaot ol stamba bilif blong ol Witnes blong Jeova.

Sipos yu jekemap gud ol bilif blong ol Witnes blong Jeova mo olsem wanem oli strong blong folem ol tijing blong Baebol, bambae yu kasem fasin fri ya we trutok i givim. (Jon 17:17) I no nid blong fraet long trutok. Tingbaot promes blong Jisas se: “Bambae yufala i save trutok, mo trutok ya bambae i mekem yufala i fri man.”​—Jon 8:​32.

[Bokis blong pija long pej 6]

SAM STAMBA BILIF BLONG OL WITNES BLONG JEOVA

◯ Jeova i God ya we i gat olgeta paoa. Nem blong hem i stap bitim 7,000 taem long ol faswan hanraet blong Baebol.​—Ol Sam 83:18.

◯ Jisas Kraes i Pikinini blong God, we i kamdaon long wol blong givim laef blong hem blong sevem olgeta man. (Jon 3:​16, 17) Ol Witnes blong Jeova oli folem ol tijing blong Jisas Kraes long ol Gospel.

◯ Nem ya Witnes blong Jeova i kamaot long Aesea 43:​10, we i talem se: ‘Hemia nao tok blong Jeova: “Yufala i witnes blong mi.” ’

◯ Kingdom we olgeta man oli prea from long “Lodsprea,” hem i wan gavman long heven we bambae i no longtaem, hem i tekemaot olgeta trabol soa long wol ya mo mekem Paradaes i kamtru olsem promes we i stap long Baebol.​—Aesea 9:​6, 7; Daniel 2:​44; Matiu 6:​9, 10; Revelesen 21:​3, 4.

◯ Olgeta evriwan we oli stap mekem samting we God i wantem, oli gat janis blong kasem ol nambawan blesing blong Kingdom gogo i no save finis.​—Jon 17:3; 1 Jon 2:​17.

◯ Ol Kristin oli mas mekem fasin blong olgeta i laenapgud wetem wanem we Baebol i talem. Oli mas traehad blong mekem i stret oltaem, gat wan laef we i klin, mo soem lav long ol man raonabaot long olgeta.​—Matiu 22:39; Jon 13:35; 1 Korin 6:​9, 10.

[Tok Blong Pija Long Pej 5]

Ol Witnes blong Jeova oli talemaot trutok blong Baebol long ol man long bitim 200 kantri