“Fasin Blong Yufala i Laenap Gud Wetem Wanem God i Wantem Man i Mekem”
OL KRISTIN man oli wokgud wetem ol gavman “from we oli man blong Masta,” mo from samting ya oli save se ol man bambae “oli presem olgeta we oli folem stret fasin.” (1 Pita 2:13-15) Samting ya i hapen i no longtaem long wan distrik asembli we ol Witnes blong Jeova oli mekem long wan kolej blong Saot Amerika.
Plante taem ol narafala man oli bin mekem asembli blong olgeta long kolej ya tu, mo i bin gat trabol i kamaot from we oli rao mo oli no save wokgud tugeta. Taswe, long faswan dei blong asembli blong ol Witnes, ol polis blong kolej oli reregud from we oli ting se maet trabol i save kamaot tu long taem ya !Neva bifo oli lukaot long ol Witnes blong Jeova, be long taem ya, oli sapraes bigwan!
Long get, ol polis oli jekemap evri trak we oli kam insaed mo we oli kamaot long ples blong kolej. Nating se samting ya i mekem ol deleget oli let, polis i sapraes tumas taem oli luk fasin blong ol brata mo ol sista we oli kaengud, oli gat longfala tingting mo respek. I no gat fasin agens, agyu, mo tok swea olsem asembli blong ol narafala man. Wan ofisa blong sekiuriti i talem se: “Defren long ol narafala man, yufala i soemaot klia long mifala se yufala i gat fasin daon mo kwaet fasin.”
Taem jif blong sekiuriti i luk save se ol Witnes blong Jeova oli gat gudfala fasin, hem i tekem disisen se i no nid blong jekemap ol trak blong olgeta from we hem i se: “Yufala i gat oda mo fasin obei.” Ale, olgeta trak we oli gat saen ya “WJ” (Witnes blong Jeova) long olgeta, i no nid blong jekemap olgeta mo oli save go stret long ples blong asembli.
Long en blong asembli, jif blong sekiuriti i talem we bambae hem hop blong luk ol Witnes bakegen. Hem i talemaot stret se: “Mifala i neva luk man we oli gat gudfala fasin olsemia, fasin blong yufala i laenap gud wetem wanem God i wantem man i mekem.” Ol tok olsem oli leftemap tingting blong ol trufala Kristin blong gohed blong ‘mekem fasin blong olgeta, i stret gud long fes blong ol man’ nao ol man bambae ‘oli save leftemap nem blong God from ol gudfala wok ya blong olgeta.’—1 Pita 2:12.