?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we oli jes pas? Ale, traem luk sipos yu save ansa long ol kwestin ya:

◻ ?From wanem tok ya blong Pol se ‘man blong karem tok blong Kraes’ i stret long ol tabu Kristin? (2 Korin 5:20)

Long ol taem bifo, taem klosap wan kantri i mekem faet, samtaem ol king oli sanem ol ambasada, blong toktok blong traem blokem faet bifo we hem i kamaot. (Luk 14:31, 32) From we olgeta man we oli gat sin oli stap longwe long God, hem i sanem ol ambasada we hem i makemaot, oli kam blong tijim ol man long rod ya blong fren wetem God.​—12/15, pej 18.

◻ ?Wanem fofala samting we oli mekem bilif blong Ebraham i strong?

Faswan samting, hem i soemaot bilif long Jeova taem hem i lesingud taem God i toktok (Hibrus 11:8). Namba tu samting, bilif blong hem i stanap long hop we hem i gat (Rom 4:​18). Namba tri, Ebraham i toktok wetem Jeova oltaem. Mo namba fo, Jeova i halpem Ebraham taem hem i obei long ol rul blong Hem. Ol semfala samting ya oli save mekem bilif blong yumi tede, i strong moa.​—1/1, pej 17, 18.

◻ ?Tok ya “Yu no letem ol samting oli kam traem mifala tumas” i minim wanem? (Matiu 6:​13)

Yumi stap askem long God blong i no letem yumi foldaon taem ol traem oli wantem pulum yumi blong no obei long Hem. Jeova i lidim yumi, nao Setan, ‘man nogud ya’ i no save kasem mo winim yumi. (1 Korin 10:13)​—1/15, pej 14.

◻ ?Wan man i mas mekem wanem blong God i fogivim hem long mastik we hem i mekem?

Yumi mas talemaot sin blong yumi long God. Biaen, yumi mas sore from sin we yumi bin mekem mo ‘soemaot se yumi rili tanem tingting from sin ya.’ (Luk 3:8) Sipos yumi rili tanem tingting blong yumi mo wantem stretem rong blong yumi, bambae samting ya i pusum yumi blong lukaot help long saed blong spirit long ol Kristin elda. (Jemes 5:​13-​15)​—1/15, pej 19.

◻ ?From wanem yumi mas traehad blong gat tingting daon?

Wan man we tingting blong hem i stap daon, hem i gat longfala tingting, hem i no tinghae tumas long hem wan. Tingting daon i mekem se yu gat ol trufala fren we oli lavem yu. Antap long hemia, Jeova i blesem man we i gat tingting daon. (Proveb 22:4)​—2/1, pej 7.

◻ ?Olsem wanem ded blong Jisas i defren olgeta long ded blong Adam?

I stret nomo we Adam i ded, from we hem i jusum blong no obei long Man ya we i Wokem hem. (Jenesis 2:​16, 17) Be, long saed blong Jisas, i no stret nating blong hem i ded, from we “hem i no mekem wan samting nogud.” (1 Pita 2:​22) Taem Jisas i ded, hem i gat wan samting we i sas tumas. Samting ya, Adam i no gat taem hem i ded​—hemia raet blong mekem ol man oli kam stret gud. Taswe, ded blong Jisas i gat praes blong sakrefaes.​—2/15, pej 15, 16.

◻ ?Long vison blong Esikel, taon i minim wanem?

From we taon ya i stanap i stap long graon ya (we i no tabu), hem i mas minim wan samting long wol ya. Olsem nao, taon ya i minim fasin blong lidim ol wok long wol ya blong givim blesing long ol stret man.​—3/1, pej 18.

◻ ?From wanem Jisas i wasem leg blong ol disaepol blong hem long taem blong lafet blong Pasova long 33 K.T.?

Jisas i no stanemap wan kastom blong wasem leg. Be, hem i halpem ol aposol blong hem blong gat wan niufala tingting​—wan tingting we i stap daon mo we i rere oltaem blong mekem ol wok blong narafala, nating sipos ol wok ya oli daon.​—3/1, pej 30.

◻ ?Taem yumi tijim ol narafala, wanem samting i moa impoten i bitim fasin blong gat gudhan blong toktok?

Ol gudfala fasin we yumi gat finis long laef blong yumi mo wanem kaen gudfala fasin we yumi stap wokem long saed blong spirit mo we ol studen oli save folem. (Luk 6:​40; 2 Pita 3:​11)​—3/15, pej 11, 12.

◻ ?Olsem wanem olgeta we oli toktok long fored blong plante man oli save kamgud moa long fasin blong olgeta blong ridim Baebol?

Taem oli rid bakegen mo bakegen. Yes, oli mas rid wetem bigfala voes bakegen mo bakegen, gogo oli kasem gud. Sipos i gat sam kaset blong Baebol long lanwis blong yu, i gud blong lesin long brata we i rid blong makem olsem wanem hem i rid mo olsem wanem hem i talem ol nem mo tok we maet yu no sua long fasin blong talem.​—3/15, pej 19.

◻ ?I minim wanem se ‘spirit i gobak long God’ taem wan man i ded? (Eklesiastis 12:7)

From we spirit hem i paoa blong laef, ale, taem hem i “gobak long trufala God,” hemia i min se taem man i ded, hop blong hem blong laef bakegen long fiuja i dipen fulwan long God. God nomo i naf blong putumbak spirit, no paoa blong laef long wan man, blong mekem hem i laef bakegen. (Ol Sam 104:30)​—4/1, pej 17.