?Yu Yu Gat Wan Spirit We i No Save Ded Samtaem?

?AFTA we man i ded, hem i stap laef samples? Plante taosen yia finis, tingting blong ol man i fasfas long kwestin ya. Long ol yia we i pas, long evri ples long wol, plante man oli tingting long hem. From samting ya, i gat ol defdefren bilif long saed ya.

Long plante ples blong wol, wetem Pasifik, Polinesia mo Maekronesia tu, fulap man oli bilif se taem man i ded, “spirit” blong hem i gohed blong laef samples. ?Olsem wanem? ?I tru se, taem man i ded, wan samting i aot long bodi blong hem, nao i gohed blong laef samples? ?Wanem ya spirit blong ol man? ?Wanem i hapen long spirit, taem man i ded? Tok we i kamaot long God, Baebol, i tok tru long saed ya mo ansa we hem i givim i leftemap tingting blong yumi.

?Wanem Ya Spirit?

Long Baebol, tok we oli tanem i kam “spirit” i minim “win.” Be hemia i no jes minim win we yumi pulum. Jemes, we i raetem wan buk blong Baebol, i talem se: “Bodi we i no gat win [“spirit,” New World Translation] blong hem, hem i ded.” (Jemes 2:26) Taswe, spirit i wan paoa we i mekem bodi i laef.

Paoa ya we i mekem bodi i laef, i no save minim nomo win we yumi stap pulum i go insaed long waet leva. ?From wanem yumi talem olsem? From we, blong smol taem afta we man i no moa pulum win, bodi i save gat laef long hem yet. Wan buk (The World Book Encyclopedia) i talem se bodi i save laef “blong sam menet” afta we win i finis. From samting ya, samtaem, ol dokta oli save pamem win blong hem bakegen. Mo tu, oli save katem man jes afta we hem i ded blong tekemaot sam haf blong bodi blong hem we oli gud yet, nao oli putum olgeta long bodi blong wan narafala man we i laef i stap. Be taem laef i lus long ol sela blong bodi, nating se ol dokta oli mekem olsem wanem, oli no moa save mekem man i pulum win bakegen. Nating se oli pamem no blu olsem wanem long maot blong hem, be oli no save mekem wan sel nating i laef bakegen. Taswe, spirit ya, hem i paoa blong laef we yumi no save luk. Hemia paoa we i mekem ol sel blong bodi oli wok. Paoa blong laef ya i stap from we yumi gohed blong pulum win.—Job 34:14, 15.

?Olsem wanem? ?Ol man nomo oli gat wan spirit? Baebol i givhan long yumi blong kasem stret save long saed ya. King Solomon we i waes gud i raetem se: “?Olsem wanem man i save talem se taem hem i ded, spirit blong hem bambae i go antap long heven, be taem anamol i ded, bambae spirit blong hem i godaon long graon?” (Prija 3:21) Tok ya i soem se ol anamol tu oli gat wan spirit, olsem ol man. ?Olsem wanem samting ya i tru?

Yumi save talem se spirit, no paoa blong laef, i olsem lektrik we i mekem wan mesin i wok. Nating se yumi no save luk lektrik, be hem i save mekem plante wok taem hem i go insaed long ol defdefren mesin. Tingbaot wan oven we i save kam hot taem lektrik i go long hem, no wan kompiuta we i naf blong skelem plante save taem i gat lektrik, no wan televisin we i save singsing mo soem plante pija taem lektrik i givim paoa long hem. Be lektrik ya i neva jenis blong tekem ol fasin mo mekem ol wok blong ol mesin ya, no gat. Hem i stap olwe olsem wan paoa nomo. Sem mak nao long paoa blong laef. Hem i no save tekem fasin blong ol man mo anamol we hem i stap long olgeta. Hem i no gat ol prapa fasin blong hem tu, mo i no save tingting. Ol man mo ol anamol tugeta “oli gat wan spirit we i sem mak nomo.” (Prija 3:19, NW ) Taswe, taem wan man i ded, spirit blong hem i no gohed blong laef samples olsem wan spirit man.

?Oraet, be ol dedman oli stap olsem wanem? ?Mo taem man i ded, spirit blong hem i go wea?

“Bambae Yu Yu Kam Graon Bakegen”

Taem faswan man, Adam, i brekem loa blong God, Jeova i talem long hem se: “Oltaem long laef blong yu, bambae yu stap hadwok tumas, yu stap swet, blong mekem graon ya i karem gudfala kakae, gogo laef blong yu i finis, nao bodi blong yu bambae i gobak bakegen long graon ya we mi mi wokem yu long hem fastaem. Mi mi wokem yu long graon fastaem, mo bambae yu yu kam graon bakegen.” (Jenesis 3:19) ?Bifo we Jeova i wokem Adam long graon, Adam i stap wea? !Hem i no stap samples! Hem i no stap nating. Taswe, taem Jeova God i talem long hem se bambae hem i “gobak bakegen long graon,” hem i minim se Adam bambae i ded. Bambae hem i no go long ples blong ol spirit man. Bambae hem i no moa gat laef, bambae i olsem fastaem we hem i no stap nating. Panis blong hem, ded, hemia se, hem i lus olgeta, i no se hem i go long wan narafala ples.—Rom 6:23.

?Olsem wanem long ol narafala man we oli ded? Prija 9:5, 10 i mekem i klia se ol dedman oli stap olsem wanem. Hem i se: “Ol dedman oli no save samting . . . I no gat wok, plan, save no tingting, long beregraon.” (Moffatt) Ale, ded i minim se man i lus olgeta. Man blong raetem Ol Sam i talem se taem man i ded, “spirit blong hem i kamaot long hem, nao man ya i gobak long graon blong hem bakegen. Long sem dei ya ol tingting blong hem oli finis.”—Ol Sam 146:4, NW.

I klia se ol dedman oli stap nating nomo, oli no save wok. Oli no save samting. Oli no save luk yu, harem yu, no toktok long yu. Oli no save givhan long yu no spolem yu. Taswe, yu yu no nid blong fraet long olgeta. ?Be, i minim wanem se taem man i ded spirit blong hem i “kamaot” long hem?

‘Spirit i Gobak Long God’

Baebol i talem se taem yumi ded, “laef ya [“spirit,” NW ] we God i givim long yumi, bambae i gobak long hem bakegen.” (Prija 12:7) ?Olsem wanem? ?Hemia i min se wan spirit samting i aot long bodi, i flae antap long skae go kasem ples we God i stap long hem? !No gat! Taem Baebol i yusum tok ya “gobak,” i no evritaem we i minim se man i wokbaot i go long narafala ples. Tingbaot tok we Jeova i talem long ol man Isrel taem oli no moa obei long hem: “Yufala i mas kambak long mi nao, blong mi tu mi save gobak long yufala.” (Malakae 3:7, NW ) Blong “kambak” long Jeova, ol man Isrel oli mas tanem tingting blong olgeta from ol nogud fasin, mo folem ol stret fasin blong Hem bakegen. Mo Jeova i “gobak” long ol man Isrel, hemia i min se, hem i glad long olgeta bakegen mo i stap klosap long olgeta. Tufala tok ya i minim tingting no fasin, be i no minim se ol man Isrel ya, no Jeova, oli aot i go long wan narafala ples.

Sem mak nao, taem man i ded, spirit blong hem we i “gobak” long God i no aot long wol ya i flae antap long skae kasem wan ples long heven. No gat. Tingbaot se, spirit, hemia paoa blong laef. Taem paoa ya i lus, God nomo i naf blong givimbak long man. Ale, ‘spirit i gobak long God’ i minim se laef blong man ya we i ded i stap long han blong God, hem nao bambae i mekem man ya i laef bakegen no nogat.

Tingbaot tok blong Baebol long saed blong ded blong Jisas. Gospel blong Luk i talem se: “Nao Jisas i singaot bigwan, i talem se, ‘!Papa! !Mi mi putum laef [“spirit,” NW ] blong mi long han blong yu!’ Hem i talem tok ya, nao hem i ded.” (Luk 23:46) Jisas i no go long heven stret long taem ya we spirit blong hem i goaot. Long namba tri dei nomo, hem i laef bakegen. Mo 40 dei biaen, hem i go antap long heven. (Ol Wok 1:3, 9) Taem Jisas i ded, hem i livim spirit blong hem long han blong Papa blong hem, hem i trastem fulwan se Jeova i naf blong mekem hem i laef bakegen.

Yes, God nomo i save mekem dedman i laef bakegen. (Ol Sam 104:30) !Taswe, yumi save gat wan nambawan fiuja!

Wan Promes We i Tru

Baebol i talem se: “I gat taem i stap kam we ol dedman bambae oli harem voes blong mi [Jisas], nao bambae oli aot long beregraon [“ol gref blong rimemba,” NW ].” (Jon 5:28, 29) Yes, Jisas Kraes i promes se olgeta dedman we Jeova i rimemba olgeta, bambae oli girap oli laef bakegen. Bambae i no moa gat ol ded mesej, be bambae i gat ol gudfala mesej we oli givim glad, blong talemaot olgeta we oli laef bakegen. !Bambae yumi glad bitim mak blong welkamem ol fren mo famle blong yumi we oli girap bakegen!

?Yu yu wantem save moa long wanem we yu mas mekem blong kasem blesing from nambawan promes ya blong God? I gud yu raet i kam long adres we i stap daon, blong kasem wan buk we nem blong hem, Speret blong ol Dedman—?Oli Save Halpem Yu No Spolem Yu? ?Oli Rili Stap?

[Futnot]

Mifala i yusum Baebol Long Bislama. Taem mifala i yusum wan narafala Baebol, mifala i raetem nem blong hem tu.