Wan Impoten Visit i Mekem Wan Aelan i Glad

Aelan ya Kuba i wan naes aelan long Karibin Si. Ol man long ples ya oli jes kasem sam niu blesing long saed blong spirit. Long en blong yia 1998, ol Witnes blong Jeova we oli laef long aelan ya long Wes Indis oli kasem wan blesing we oli bin wet longtaem finis long hem. Fastaem long bitim 30 yia, ol memba blong Hed Kampani blong ol Witnes blong Jeova oli kam long aelan ya, wetem 15 narafala deleget. Olgeta oli kam long Ostrelya, Ostria, Beljiom, Briten, Itali, Niusilan, mo Porto Riko.

OL 82,258 pablisa blong Kingdom long ples ya, mo ol 87,890 we oli kam wanples wetem olgeta blong mekem Lodsapa long 1998, olgeta oli ting se oli save makem dei ya long Histri blong olgeta.

Stat long Desemba 1 kasem 7, 1998, Lloyd Barry, John Barr, mo Gerrit Lösch oli visitim Haos blong Betel long Havana mo oli joen long samfala Distrik Asembli “Fasin Blong Laef We God i Glad Long Hem” long Kuba. Oli glad blong mitim ol elda we oli goraon long ol kongregesen,a mo oli mitim sam man blong gavman blong Kuba.

John Barr i talem se: “Hem i wan bigfala poen long Kristin laef blong mi mo waef blong mi. !Ol gudfala brata sista blong yumi oli strong tumas long saed blong trutok! !Taem mi aot long kantri ya, mi harem strong we fasin blong yumi we yumi olsem wan brata long olgeta ples long wol, hem i rili nambawan!” Mo Lloyd Barry i talem se: “Impoten wik ya i halpem mi blong kasem moa save long fasin blong laef blong ol brata blong yumi long ples ya.”

Long ol faef yia we oli pas finis, ol Witnes blong Jeova oli kam moa fri long Kuba. Gavman i talem se oli wantem gohed olsemia, blong mekem ol Witnes blong Jeova oli fri blong wosip long God.

Long Septemba 1994, oli stat wokem ol buk long Haos blong Betel long Havana. Mo bakegen, ol Witnes blong Jeova oli save mekem miting blong olgeta mo go long olgeta haos wanwan. Nao long 1998, gavman i letem grup ya blong 18 Witnes blong Jeova i kam, we tri long olgeta oli memba blong Hed Kampani.

Wan Hapi Miting

Taem olgeta oli kam long Jose Marti Epot, long Havana, oli mitim samfala man blong gavman, mo wan grup blong brata blong Betel. Wan long olgeta i stap tingbaot yet laswan visit blong wan memba blong Hed Kampani long Kuba long 1961, hemia taem Milton Henschel i kam. Long taem ya brata ya blong Kuba i gat 12 yia blong hem nomo, mo naoia hem i wan elda we i goraon long ol kongregesen.

Taem ol deleget oli kasem haos blong Betel, evriwan oli stap holem ol flaoa blong welkamem olgeta, ol flaoa we oli kolem gladiolus, rose, jasmine, ol red daisy mo ol yala daisy, we wan brata i mekem i gru stret from dei ya. Olgeta long famle blong Betel oli kraegud taem oli stap welkam long ol deleget. Afta, oli mekem wan kakae long fasin blong ol man Kuba, wetem pig we oli rosta, raes mo bin, salat, yucca wetem mojo (wan kaen gras wetem wan sos we oli mekem long galic mo olivoel), mo sam frut we oli jes pikimap. Taem oli kakae finis, evri memba blong Hed Kampani i givim wan tok blong soemaot we wok long Betel i gudfala tumas. Brata Lösch i tajem hat blong ol brata from we hem i mekem tok blong hem long lanwis Spen. Long “famle” blong Betel, 48 brata sista oli wok olsem volontia, mo i gat 18 narafala we oli stap kam givhan blong smoltaem.

Oli prentem ol buk mo ol Baebol blong ol brata blong Kuba long Itali. Be ol magasin Wajtaoa mo Wekap!, oli wokem olgeta long blak mo waet nomo long kantri ya, long tufala ololfala mesin blong bifo. Oli hadwok long lante aoa long wan ples blong wok we i smol tumas blong wokem olgeta magasin we oli nidim. Ol volontia oli tinghae long gudfala wok ya we oli stap mekem from Jeova long spesel fasin ya.​—2 Korin 4:7.

Ol Bigfala Poen Blong Asembli

Ol 18 brata sista blong ovasi oli seraot long tri grup, blong go stap long trifala distrik asembli long Kamagwei, Havana, mo Holgwin. Evri dei, wan bigfala grup blong brata sista oli kam, we plante paenia mo elda oli stap long medel blong olgeta. Taem oli kam, ol lokol Witnes oli save se hem i wan spesel miting, be oli no save se sam memba blong Hed Kampani bambae oli stap wetem olgeta. !Traem tingbaot olsem wanem oli sek taem oli luk ol brata ya wetem waef blong olgeta, oli kamaot long bas long Fraede moning!

Oli mekem ol asembli ya long open ples nomo, i no long ol haos. Gavman i letem olgeta, nao ol brata nomo oli mekemrere evri samting from ol asembli ya. Long Havana, klosap long doa blong haos we oli stap long hem, i gat wan ston we oli katem wan tok blong Baebol antap long hem, se: “Ol Sam 133:⁠1.” Hemia i mekem ol brata oli tingbaot ol tok ya blong Baebol, se; “!Olgeta! I gud tumas taem ol man blong God oli stap wanples, we oli gat wan tingting nomo. Fasin ya i gud tumas.” Tru ya, long taem blong asembli, oli glad mo oli haremgud wanples wetem ol Kristin brata blong olgeta.

Ol brata blong ovasi oli haremsave se ol tok mo ol pleplei we oli mekem long platfom, oli nambawan. Mo oli sek long fasin we oli soemaot drama, we i stanap long wan stori blong Baebol long Daniel japta 3, long Babilon blong bifo. Wan sista i talem se: “Oli plei gud mo ol voes tu oli joengud wetem fasin blong olgeta we oli plei, mekem se ol man oli no haremsave se ol voes oli kamaot long tep. . . . Oli mekem we fasin rabis blong ol man Babilon i rili rabis, mo trifala man Hibru oli stanap strong wetem strong tingting.”

Ol man blong gavman we oli lukaot long ofis blong ol jos, mo sam narafala, oli kam long ol asembli. Nao oli leftemap ol gudfala fasin blong ol brata mo olgeta wok blong mekemrere ol miting ya. Brata Barry i talem tangkiu long gavman, from we oli mekem gud welkam long ol deleget blong ovasi we oli kam. Ol brata oli stanap mo oli klaphan long plante menet blong soemaot we oli glad long ol tok, mo blong tangkiu long gavman we i letem ol asembli ya. Wan Kristin famle oli talem se: “Taem mifala i kam, mifala i no rere long samting ya. !Wan smol Intenasnal asembli ya! Hem i nambawan from we hem i soemaot bigfala paoa blong Jeova blong mekem ol promes blong hem oli kamtru.”

Mo tu ol asembli ya oli givim jans blong jenisim tingting blong ol man long saed blong ol Witnes. Wan bas draeva i kam long asembli long Satede, mo long Sande tu. Hem i talem se hem i bin harem plante toktok long saed blong ol Witnes, be naoia hem i save se oli gudfala man we oli laekem pis.

“Ol Samting We Neva Bambae Yumi Save Fogetem”

Ol man blong ovasi oli sek long fasin glad mo fren blong ol man Kuba. Ol man Kuba oli wokhad, oli laekem stret fasin mo oli kaen. Wan man ovasi i talem se: “Plante taem, ol man we mifala i no save olgeta nating, oli kam mitim mifala long rod blong halpem mifala nomo.”

Ol brata blong ovasi oli laekem bilif mo lav blong ol Witnes blong Kuba. Olgeta oli kasem bigfala traem, be oli trastem Jeova olsem strongfala haos blong blokemgud olgeta. (Ol Sam 91:2) John Barr i talem se: “Mi mi kam fastaem blong mi long ples ya Kuba, mo mi mi sek long plante samting we oli mekem mi mi harem gud. Kantri ya i naes, ol man oli kaen, mo bitim evri samting, mi laekem ol brata sista we oli smat lelebet. Neva bifo mi harem sam man oli singsing long ol singsing blong Kingdom long fulhat blong olgeta olsemia, mo tu olgeta oli klaphan longtaem taem wan tok i tajem hat blong olgeta. Bambae mifala i neva save fogetem ol fasin ya. Oltaem nomo bambae mifala i laekem olgeta.”

Long Ol Sam 97:​1, Baebol i talem se: “!Ol aelan, i gud yufala i glad we i glad!” Tru ya, ol Witnes blong Jeova blong aelan ya Kuba oli glad from fasin fri we oli gat naoia blong wosip long God. Mo tu oli glad from we ol brata blong narafala kantri oli kam visitim olgeta, we i fastaem long histri blong olgeta.

[Futnot]

[Tok Blong Pija Long Pej 8]

Ol brata blong Hed Kampani oli saenem sam Baebol blong ol man blong gavman

[Tok Blong Pija Long Pej 8]

Fulap famle oli stap long ol spesel Distrik Asembli “Fasin Blong Laef We God i Glad Long Hem” long Kuba

[Tok Blong Pija Long Pej 8]

Haos blong Betel long Havana, oli openem bakegen long 1994