Soem Lav Long Olgeta We Oli “Brata Blong Yumi Long Saed Blong Bilif”

OL TRUFALA Kristin oli joen gud tugeta olsem wan famle. Yes, stat long faswan handred yia K.T., oli stap singaot olgeta se “brata” mo “sista.” (Mak 3:​31-​35; Filimon 1, 2) Be hemia i no jes wan tok we oli talem nomo. Tufala wod ya oli soemaot filing we ol man blong wosip long God oli gat long olgeta. (Skelem wetem 1 Jon 4:​7, 8.) Jisas i talem se: “Nao from we yufala i stap lavlavem yufala, bambae olgeta man oli luksave se yufala i man blong mi.”​—Jon 13:35.

Long Julae 1997 ol man we oli wosipim Jeova long Jili, oli gat jans blong soemaot trufala lav ya. Draetaem i bin stap longtaem long kantri ya, be biaen bigfala ren i foldaon wantaem nomo, mo wota i kam antap long plante ples. Plante man oli sot long kakae, klos, mo ol narafala samting. Taem i gat bigfala trabol olsemia, ol Witnes blong Jeova oli traehad blong folem advaes ya we Pol i givim long ol man Galesia se: “From samting ya, oltaem, sipos yumi gat janis, yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.”​—Galesia 6:10.

Ale, kwiktaem nomo ol Witnes blong Jeova oli rerem ol samting blong givhan long ol brata blong olgeta. Oli hivimap kakae, klos, mo ol narafala samting, nao oli seraotem ol samting ya, putum long ol bokis, mo sanem i go long kantri ya we i trabol. !Ol pikinini tu oli givim ol pleplei blong olgeta i go olsem presen! Wan sista i sapraes tumas taem hem i luk se Haos Kingdom i fulap wetem ol presen ya we ol brata oli givim. Hem i talem se: “Mi sapraes tumas, mi no save sipos mi mas laf no mi mas krae. Hemia i stret samting we mifala i nidim.”

Nao, wan narafala samting i hapen we man i no tingbaot nating. Graon i seksek bigwan olbaot long eria ya we bigfala ren i bin foldaon long hem. Plante haos oli lus. Sam moa grup i stanap blong halpem olgeta we oli trabol. Rejional Bilding Komiti, we wok blong hem i blong bildimap ol haos kingdom no ol haos asembli blong ol Witnes blong Jeova, be long taem ya hem i sapotem ol brata blong Jili. ?Wanem risal blong samting ya? Olgeta we oli lusum ol haos blong olgeta, oli kasem sam niufala smol haos, we ol brata nomo oli bildim. Nating se ol haos ya oli no flas, be oli defren olgeta long ol haos ya we ol narafala grup oli wokem blong givhan long ol man olbaot, ol narafala haos ya ol man oli mas pem, oli no gat simen long floa, oli no gat windo, mo oli no pentem olgeta.

Sam brata oli mekem longfala trep blong kam givhan. Jeaman blong wan Rejional Bilding Komiti i tekem tu dei blong visitim ol ples ya we trabol i kamaot long hem​—nating se hem i stap long wan wiljea. Wan brata we i blaen i wokhad blong karem ol bigfala timba i go long wan kapenta, blong hem i katem i go long stret saes we oli wantem. Wan narafala brata, we sora blong hem i fas, i hivimap ol timba ya we oli katem finis, mo i karem i go long ol brata we oli nidim.

Plante man we oli luk wok ya oli sapraes tumas blong luk ol brata we oli givhan long ol narafala. Long wan taon, wan trak blong polis i stop long fored blong haos blong wan sista, we ol brata oli stap fiksimap. Ol polisman oli wantem save moa long saed ya, ale, wan long olgeta i askem long wan brata se: “?Hu ol man ya blong wok we oli luk glad tumas, mo hamas mane oli kasem from wok ya?” Brata i eksplenem se olgeta evriwan oli wok fri nomo. !Wan long ol polisman ya i talem se evri manis, hem i givim ten pesen blong pei blong hem i go long jos blong hem, be pasta blong hem i no kam luk hem afta we graon i seksek! Long nekis dei, wan haeman blong polis i telefon i kam long sista ya we ol brata oli fiksimap haos blong hem. Hem i bin luk wok ya tu. Hem i talem se hem i sapraes tumas blong luk se ol man blong wok oli glad tumas, mekem se klosap hem tu i kam blong givhan!

Tru ya, bigfala wok we i kamaot long Jili i wan gudfala ekspiryens blong ol brata ya we oli bin wok fri, mo tu, hem i givim wan nambawan witnes long ol man we oli stap lukluk.