?Tingting Blong Yu i Stap Kam Bigwan Moa?

WAN strong etkwek i seksekem Kobe, wan taon long wes blong Japan. Kwiktaem nomo, ol volontia oli kam blong givhan long olgeta we oli kasem trabol ya. Wan grup blong dokta we oli kam blong givhan oli askem sam meresin. Be wan man long Ofis blong Helt long taon, hem i no agri nating blong givim ol meresin ya long olgeta. Man ya i daerekta tu blong wan bigfala hospital, nao hem i wantem se ol sikman oli go long hospital blong Kobe bitim ol dokta ya oli stikim ol sikman mo hangem botel long olgeta long ol ples we ol dokta nomo oli stanemap. Biaen, ol dokta ya oli kasem ol meresin we oli askem, be fasin blong man ya we i strong tumas mo i no gat sore i mekem se fulap man oli tok agens long hem.

Maet yu bin fesem ekspiryens olsem from wan man we i gat paoa mo hem i strong blong folem rul. Maet yu tu yu bin soemaot wan fasin olsem. ?Olsem wanem yu save harem gud from fasin blong mekem se tingting blong yu i kam bigwan moa?

Kasem Fulwan Pija

Oltaem ol man oli tingbaot wan saed nomo blong wan samting, mekem se fasin luksave blong yumi long ol kwestin i sot tumas. Plante taem i dipen long edukesen blong yumi, ekspiryens long laef, mo ples we yumi kamaot long hem. Yumi save tekem ol disisen we oli moa waes sipos yumi traehad blong kasem fulwan pija. Eksampel, sipos yu wantem krosem wan rod we fulap trak oli pas long hem ?Yu yu ting se i waes blong lukluk stret long fored nomo? !No gat! Long sem fasin, tingting blong yu i mas kam bigwan moa blong kasem ful save long wan samting. Fasin ya i save givhan long yu blong mekem disisen mo blong yu save bos long ol disisen ya. Mo tu fasin ya i save protektem yu.

Yumi evriwan i save mekem se fasin ya i kam gud moa. Taswe i gud blong askem long yu wan se, ‘?Wanem haf blong laef blong mi bambae i moa gud sipos tingting blong mi i kasem save moa?’

Tingting Blong Yu Long Saed Blong Ol Narafala

?Wanem tingting blong yu long saed blong ol narafala taem yu luk olgeta? ?Yu gat tingting ya se wanem oli talem no oli mekem i save minim wan samting nomo, i gud, no i no gud, be i no save minim defren samting? Olsem wanem long tok we man i talem, ?Yu ting se, i blong spolem nomo no blong leftemap nomo? ?Tingting blong man i stret oltaem no i rong fulwan? Man we i gat ol tingting ya, hem i olsem man blong tekem pija we i no luk ol defdefren kala we oli stap, be i luk blak mo waet kala nomo. No maet yu tingbaot tumas ol slak fasin blong man. Hemia i olsem man we i wokbaot i luk ol smol doti we sam man we oli no kea oli sakem. Ale, man ya i letem doti ya i spolem glad we hem i gat taem hem i lukluk ol naesfala samting we oli stap raonabaot long hem.​—Skelem wetem Prija 7:​16.

Yumi save lanem fulap samting from tingting blong Jeova, long saed blong sin blong man. Nating se hem i save se ol man oli gat plante slak fasin mo oli mestem mak fulap taem, Jeova i no wantem luk no tingbaot oltaem ol fasin ya. Wetem fasin tangkiu, man we i raetem sam ya i talem se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?” (Ol Sam 130:3) Jeova i rere blong karemaot ol mastik blong ol sinman we oli tanem tingting blong olgeta. Yes, hem i waepemaot fulwan olgeta, mekem se ol mastik ya oli no spolem fasin frengud wetem hem. (Ol Sam 51:1; 103:12) Jeova i talem long saed blong Deved, we i sin bigwan wetem Bat-Seba, se hem i “man blong wok blong mi, we oltaem tingting blong hem i stap strong long mi. Hem i stap obei long ol tok blong mi, mo i stap mekem ol samting nomo we i stret long fes blong mi.” (1 King 14:8) ?From wanem God i save tok olsemia long saed blong Deved? From we hem i tingtinggud long ol nambawan fasin blong Deved we i tanem tingting blong hem. Hem i skelemgud ol impoten samting long bisnes ya mo hem i jusum blong soemaot bakegen fasin sore long man blong hem.

Jisas Kraes i soemaotgud we hem i gat tingting ya blong kasem save moa long ol mastik blong narafala. (Jon 5:​19) Taem ol aposol blong hem oli slak, Jisas i soem sore mo i kasem save long olgeta. Long saed blong sin blong man, hem i luksave se “tingting blong yufala i strong, be bodi blong yufala i slak.” (Matiu 26:41) Tingting ya i givhan long Jisas blong luk ol slak fasin mo ol mastik blong ol disaepol blong hem wetem longfala tingting mo hem i kasem save long olgeta ya. Hem i no tingbaot oltaem sin blong olgeta, be hem i luklukgud ol nambawan fasin blong olgeta.

Wan taem ol aposol oli rao blong save hu nao i hae moa long olgeta, Jisas i stretem tingting ya be biaen hem i talem se: “Yufala ya nao, oltaem yufala i stap wetem mi long olgeta hadtaem we mi mi gotru long hem. Nao olsem we Papa blong mi i putumap mi blong bambae mi mi king, mi tu mi putumap yufala, blong bambae yufala i save sidaon wetem mi blong kakae wetem mi long taem ya we mi bambae mi king.” (Luk 22:24-​30) Yes, nating se ol aposol oli mekem plante mastik, Jisas i no fogetem fasin stap tru blong olgeta mo lav we oli gat long hem. (Ol Proveb 17:17) Jisas i sua long wanem oli naf blong mekem mo we bambae oli mekem, taswe i mekem wan kontrak blong wan Kingdom wetem olgeta. Yes, ‘Jisas i lavem olgeta olwe, gogo hem i givim laef blong hem from olgeta.’​—Jon 13:1.

Sipos ol fasin mo ol mastik blong narafala i mekem se yu kam kros, i gud yu mekem olsem Jeova mo Jisas. Tingting blong yu i mas kasem save moa, mo traem tingbaot evri samting long bisnes ya. Sipos tingting blong yu i stret nomo, bambae yu faenem se i isi moa blong lavem mo tinghae long ol brata blong yu.

Long Taem Blong Givim Long Saed Blong Bodi

Fasin blong givim i wan jans we ol Kristin oli save glad long hem. ?Be i long wok blong prij nomo we yumi save givim? (Matiu 24:14; 28:19, 20) No gat. Maet tingting blong yu i save kam bigwan moa, blong yu tingbaot ol samting long saed blong bodi we ol narafala oli nidim. Tru ya, ol Kristin oli luksave se fasin blong givim long saed blong spirit i impoten moa. (Jon 6:​26, 27; Ol Wok 1:8) Be, nating we i impoten moa blong givim long saed blong spirit, yumi no mas fogetem fasin blong givim long saed blong bodi.​—Jemes 2:15, 16.

Taem yumi tingbaot ol impoten samting we ol brata blong yumi long saed blong spirit oli nidim, long prapa kongregesen blong yumi mo long wol, yumi luksave fulwan wanem yumi save mekem blong halpem olgeta. Taem olgeta we oli rij lelebet oli givhan long ol narafala long gladhat blong olgeta, ol narafala ya oli no moa pua bitim mak. Long rod ya yumi lukaot long nid blong olgeta brata blong yumi. Wan Kristin elda i givim toktok ya long saed blong fasin ya se: “Sipos i gat nid long wan ples blong wol, bambae ol brata long wan narafala ples blong wol oli kam blong givhan long olgeta ya. Sipos ol brata ya oli no save givhan, bambae ol brata blong sam narafala ples oli mekem. Yes, rod ya i halpem ol brata long wol, stret olsem we oli nidim. !Ol brata we yumi gat long ful wol oli nambawan!”​—2 Korin 8:13-15; 1 Pita 2:​17.

Wan Kristin sista i wantem tumas blong joen long wan intenasnal asembli blong Is Yurop, be hem i no naf blong go. Sista ya i harem se ol brata blong kantri ya, oli nidim fulap Baebol, taswe hem i givim presen mane long wan man we hem i joen long asembli ya blong pem ol Baebol ya. Long rod ya, hem i glad blong givim, hem i serem samting wetem ol brata blong hem blong narafala kantri.​—Ol Wok 20:35.

Sipos yu mekem se tingting blong yu i kam bigwan moa, maet yu save sapotem moa wok ya we i stap gru yet, hemia blong tijim ol man long saed blong Baebol. Samting ya i givim glad long yu mo long ol narafala tu.​—Dutronome 15:7; Ol Proveb 11:24; Filipae 4:​14-​19.

Taem Yu Givim Advaes

Taem yumi mas givim advaes long ol man no stretem olgeta, sipos yumi gat tingting we i stret mo i no strong tumas, bambae ol brata blong yumi oli save ona long yumi, mo long rod ya yumi rili halpem olgeta. I isi nomo blong lukluk sam samting no wan saed nomo long wan bisnes, mo kwiktaem nomo mekemap tingting blong yumi. Ating fasin ya i soemaot se yumi jajem ol narafala finis, nating se yumi no save ful stori. Be antap moa, fasin ya i soemaot se yumi no rere blong akseptem tingting blong ol narafala. Olsem ol lida blong skul long taem blong Jisas, we oli mekem i hevi long ol man wetem fulap narafala rul blong olgeta. (Matiu 23:​2-4) Yumi mas no bitim mak long tingting blong yumi mo givim ol gudfala advaes we oli kamaot stret long Baebol, mo tu folem stret fasin blong Jeova wetem tingting we i skelgud mo sore. Ale, sipos yumi mekem olsem, sua se bambae i isi moa long ol narafala blong lesin mo folem ol advaes blong yumi.

Sam yia bifo, sam yangfala brata blong ol defdefren kongregesen oli joen tugeta blong mekem spot. Sore tumas, be oli stat blong traehad blong winim narafala, mekem se oli tok strong agensem narawan. ?Olsem wanem ol elda oli stretem bisnes ya? Oli luksave se ol yangfala ya oli nidim blong pleplei, taswe oli no blokem olgeta ya blong oli save joen tugeta, no gat. (Efesas 5:​17; 1 Timoti 4:8) Oli givim stret woning we i no strong tumas, blong soemaot wanem frut bambae fasin blong winim narafala i karem. Mo tu oli givim sam advaes blong givhan long olgeta, olsem se, i gud sipos sam bigman oli stap. Ol yangfala ya oli laekem ol advaes ya we oli waes mo skelgud, ale oli folem ol advaes ya. Antap long samting ya, respek mo fasin lav blong olgeta long ol elda i gru moa.

Traehad Blong Mekem Se Tingting Blong Yu i Kam Bigwan Moa

Nating se yu no wantem jajem kwiktaem, bambae yu mas traehad blong mekem se tingting blong yu i kasem save moa. Taem yu stadi long Tok blong God, traem tingting dip long hem blong kasem save mo laekem ol tingting blong Jeova. (Ol Sam 139:17) Traem luksave ol risen blong ol loa mo ol rul we oli stap long Baebol, mo skelem olgeta poen olsem Jeova i mekem. Bambae fasin ya i laenap gud wetem prea blong Deved se: “Hae God. Plis yu tijim mi long ol fasin blong yu, yu mekem mi mi savegud ol rod blong yu. Yu tijim mi, blong mi save folem trutok blong yu long olgeta laef blong mi.”​—Ol Sam 25:4, 5.

Taem tingting blong yu i kam bigwan moa, bambae yu kasem sam blesing. Bambae yu gat wan gudnem long fored blong ol narafala from we yu no strong mo yu gat fasin luksave. Bambae yu naf blong ansa wetem fasin skelem mo fasin luksave, taem yu halpem ol narafala long plante kwestin. Bambae samting ya i sapotem nambawan fasin joengud mo pis blong ol Kristin brata sista blong yumi.

[Tok Blong Pija Long Pej 12]

Fasin blong givim i halpem ol narafala, i mekem man we i givim i glad, mo Papa blong yumi long heven i glad tu