!Long Namibia i Gat Ol Sas Ston We Oli Laef!

NAMIBIA i wan kantri long saot wes blong Afrika we longfala blong hem i kasem 1,500 kilometa. Kantri ya i gat ol bigbigfala hil daon klosap long solwota. Sam long ol hil ya oli sanbij, sam oli ston nomo, mo i gat ol bigfala level ples we oli fulap long ol smosmol ston. Long medel blong ol smosmol ston long sanbij blong Namibia, i gat ol sas ston we oli gat defdefren kala. Samtaem oli save faenem ol daemon tu long ples ya. Be long kantri ya, i gat wan samting we i sas moa i bitim ol sas ston ya. Namibia i gat ol narafala sas ston we oli laef​—hemia ol man long ples ya we oli kamaot long ol defren kantri.

Ol faswan man Namibia oli tok long wan lanwis we oli kolem Koisan. Lanwis ya, i gat plante fasin blong toktok long hem. Ol narafala man oli save lanwis blong ol man Namibia from sam spesel saon we oli mekem taem oli toktok. Sam long olgeta we oli tok lanwis Koisan tede, hemia ol blak man blong Damara, ol sotfala man blong Nama we oli gat laet skin, mo ol Manbus we oli man blong ronem wael anamol. Long ol handred yia we oli jes pas, plante laen blong ol blakman oli muf i kam long Namibia. Olgeta ya oli kamaot long trifala laen ya: Ovambo (laen we ol man blong hem oli plante moa bitim ol narafala laen long Namibia), Herero, mo Kavango. Long ol yia 1800, sam waet man tu oli stat blong kam laef long Namibia. Afta we oli faenem ol daemon long sanbij long drae ples, plante moa man blong narafala kantri oli muf i kam long Namibia.

Ol man Namibia oli sas from we oli haf blong ol man long wol we God i givim Pikinini blong hem from olgeta, blong oli save kasem laef we i no save finis. (Jon 3:​16) Plante handred man Namibia we oli kamaot long ol defren laen, oli akseptem finis mesej we God i stap yusum blong sevem ol man. Olgeta ya oli olsem ol sas ston we oli laef, from we oli sam long ‘ol gudgudfala samting blong olgeta kantri’ we naoia oli hivap long haos wosip blong Jeova.​—Hagae 2:7.

Wok Blong Digim Ol Sas Ston Long Saed Blong Spirit i Stat

Long 1928, oli stat blong digim ol sas ston long saed blong spirit long Namibia. Long yia ya, branj blong Watch Tower Sosaeti long Saot Afrika i sanem 50,000 buk long saed blong Baebol, oli go long ol man we oli laef long ol defren ples long kantri ya. Long 1929, wan tabu Kristin sista blong Saot Afrika we nem blong hem Lenie Theron i go long Namibia blong visitim olgeta we oli soem intres. Sista ya i tekem fo manis blong go kros long bigfala kantri ya, mo hem i seremaot bitim 6,000 buk we oli blong givhan blong stadi Baebol. Ol buk ya oli long lanwis blong Saot Afrika, Engglis, mo Jemani. Yes, olgeta wok ya oli no blong nating nomo.

Eksampel, tingbaot Bernhard Baade blong Jemani, we hem i wan man blong digim ol sas ston. Long 1929, hem i pem sam eg long wan man. Mo man ya i kavremap ol wanwan eg wetem ol pej blong wan buk blong Watch Tower Sosaeti. Bernhard i glad tumas blong ridim evri pej, mo hem i wantem save man we i raetem buk ya. Taem hem i kasem laswan pej, hem i faenem adres blong Watch Tower Sosaeti long Jemani. Bernhard i raet long olgeta blong askem moa buk mo hem i kam faswan man long Namibia we i tekem disisen blong stanap long saed blong trutok.

Olgeta We Oli Prij Fultaem Oli Kasem Namibia

Long 1950, fo misinari we oli kasem trening long Wajtaoa Baebol Skul blong Gilead oli kasem Namibia. Long 1953, namba blong misinari long kantri ya i kam antap kasem eit. Long ol misinari ya, i gat Dick Waldron mo waef blong hem, Coralie Waldron. Tufala i kamaot long Ostrelya. Kam kasem naoia, tufala i wok yet wetem strong bilif long Namibia. Plante narafala man we oli wok fultaem blong talemaot Kingdom, we oli blong Saot Afrika mo sam narafala kantri bakegen, oli joen long wok blong digim ol sas ston long saed blong spirit long Namibia. Sam narafala misinari, mo samfala we oli kamaot long Ministeriol Trening Skul, olgeta tu oli kam long Namibia.

I gat wan narafala samting we i givhan long plante man Namibia blong gru long saed blong spirit. Hemia wok blong tanem mo prentem ol buk long saed blong Baebol long ol stamba lanwis blong ol man long ples ya. Ol lanwis olsem Herero, Kwangali, Kwanyama, Nama/Damara, mo Ndonga. Stat long 1990, i gat wan translesen ofis mo haos blong ol fultaem volontia long bigfala taon ya Winhuk. Karen Deppisch we i joen wetem hasban blong hem long fultaem wok blong prij long ol defren haf long Namibia, i talem se: “Plante man oli sapraes tumas taem mifala i soem ol buk long prapa lanwis blong olgeta, from we i no gat plante buk we oli wokem long lanwis ya.”

Saenemgud Ol Sas Ston

Sam blong ol sas ston blong Namibia oli saengud from we plante taosen yia finis, ol wef blong solwota oli stap muvum olgeta long sanbij. Be, samting ya i no save mekem ol ston ya oli kam ol sas ston we oli laef. Yes, ol sinman oli nidim fasin traehad blong ‘finis long olfala laef ya blong olgeta blong bifo’ mo putum niufala fasin blong Kraes olsem prapa klos blong olgeta. (Efesas 4:​20-​24) Eksampel, ol man Namibia oli strong long kastom ya blong wosip long ol ded bubu blong olgeta. Ol man we oli no wosip long ol bubu blong bifo, plante taem ol famle mo ol man raonabaot long olgeta oli ronem olgeta. Taem wanwan long ol man ya oli lanem long Baebol se ol dedman oli “no moa save wan samting,” oli fesem wan traem. (Prija 9:5) ?Wanem traem ya?

Wan Witnes long laen blong Herero i talem se: “Blong obei long trutok i wan bigfala traem. Mi glad blong stadi Baebol wetem ol Witnes blong Jeova, be i tekem taem blong mi mekem samting we mi stap lanem i wok long laef blong mi. Fastaem, mi mas faenemaot sipos i sef blong no folem ol kastom mo bilif we mi bin holem longtaem finis. Eksampel, taem mi draevem trak long sam ples long Namibia, mi no stop blong putum wan ston long beregraon no blong leftemap hat blong mi blong talem halo long ol dedman. Sloslou, mi bilif fulwan se mi no save kasem trabol sipos mi no wosip long ol ded bubu. !Mi glad tumas se Jeova i blesem hadwok blong mi, from we mi givhan long famle blong mi mo ol narafala we oli intres blong lanem trutok!”

I Nidim Moa Man Blong Digim Ol Sas Ston Long Saed Blong Spirit

Bifo we ol misinari oli kasem Namibia long 1950, i gat wan man nomo blong talemaot gud nius long Namibia. Sloslou, namba ya i go antap kasem 995. Be, i gat plante wok yet blong mekem. Yes, i gat sam ples we oli stap prij long hem wanwan taem nomo. ?Yu yu naf blong go wok long ol ples we i nidim moa man blong talemaot Kingdom? Sipos yes, plis yu kam long Namibia mo givhan long mifala blong faenem mo saenemgud sam moa sas ston long saed blong spirit.—Skelem wetem Ol Wok 16:9.

[Map/Foto Blong Pija Long Pej 26]

(Lukluk niuspepa)

AFRIKA

NAMIBIA

[Ol Foto]

Namibia i wan kantri we i fulap long ol naesfala sas ston

[Credit Lines]

Caps: Mountain High Maps® Copyright © 1997 Digital Wisdom, Inc.; Diamonds: Courtesy Namdek Diamond Corporation

[Tok Blong Pija Long Pej 26]

Gud nius i go kasem olgeta laen blong Namibia

[Tok Blong Pija Long Pej 28]

?Yu yu naf blong go wok long ol ples we i nidim moa man blong talemaot Kingdom?