?Baebol i Save Halpem Yumi Tede?
WAN yangfala man i talem se: “Long tingting blong mi, i gat 1 pesen nomo blong Baebol we man i save intres blong ridim. Be, 99 pesen blong hem i no moa stret long laef blong yumi tede, mo i fulap long ol tok blong bifo.” Plante man oli agri wetem hem. Nating se Baebol i wan buk we man i pem moa i bitim ol narafala buk long wol, plante milyan man oli no tingting tumas long hem mo oli no savegud ol tijing blong hem.
Long 1996, long taem blong Krismas wan niuspepa blong Jemani, Süddeutsche Zeitung, i talem long saed blong Baebol se, “i no moa gat plante man oli stap ridim hem. Yumi stap long taem we wok blong sayens mo fasin ya we ol man oli no moa tingbaot skul, oli tingbaot ol narafala samting nomo, i kam antap bigwan. Long tingting blong plante man, ol stori blong Baebol oli narakaen mo oli faenem i had blong kasem save long olgeta.” Ol stadi oli pruvum ripot ya. Sam stadi oli soemaot se wan bigfala namba blong ol pikinini oli no save hu ya Jisas. Wan narafala stadi i soemaot se taem oli askem kwestin long sam man, i no stret haf blong olgeta we oli save ol stori blong Baebol olsem parabol blong boe ya we i lusum rod mo man Sameria.
Niuspepa ya Reformiertes Forum, blong Evanjelikol Jos long Swiselan, i talem se naoia i no moa olsem bifo, we plante man oli wantem tumas blong kasem wan Baebol. Plante long olgeta we oli gat wan kopi blong Baebol finis, oli letem buk ya i slip nomo long kabod blong olgeta blong das i fulap long hem. Long Briten i sem mak nomo. Wan ripot i eksplenem se, nating sipos plante man oli gat wan Baebol, bighaf blong olgeta oli neva ridim hem.
Be, i gat plante milyan man long olgeta ples blong wol we tingting blong olgeta long saed blong Baebol i no olsem. Olgeta ya oli tingbaot Baebol olsem Tok blong God we i sas tumas mo we i save givhan bigwan long man. Taswe, oli ridim Baebol oltaem. Wan yangfala woman i raetem se: “Mi traem blong ridim wan no tu japta blong Baebol evridei. Mi rili glad blong mekem olsem.” Ol man olsem oli tinghevi long wanem we Baebol i stap tijim, mo oli traem mekem ol advaes blong hem i wok long laef blong olgeta. Oli bilif se Baebol i save halpem olgeta long wol ya we i trabol.
?Wanem tingting blong yu? ?Ol tok blong Baebol oli no moa stret long taem blong yumi? No ?ol tok blong hem oli sas tumas mo oli save givhan bigwan long yumi? ?Baebol i save halpem yumi tede?