Ridim Baebol Evri Dei i Givim Gudfala Frut

‘Man we i laekem tumas loa blong Jeova, mo hem i stap ridim ol tok blong loa ya long voes we i smol, long dei mo long naet, hem i save glad.’​—OL SAM 1:​1, 2.

1. (a) Wanem bigfala saen i stap long wol blong wan haos long hedkwota blong Wajtaoa Sosaeti? (b) ?Bambae yumi kasem wanem frut sipos wanwan long yumi i folem advaes ya?

“RIDIM TOK BLONG GOD, TABU BAEBOL, EVRI DEI.” Long Bruklin, Nyu Yok, oli raetem ol tok ya long bigfala leta, long wol blong wan haos we Watchtower Bible and Tract Society i stap yusum, blong prentem ol Baebol mo ol buk we oli tokbaot Baebol. Advaes ya, oli no raetem blong ol man ya nomo we oli save lukluk saen ya. Ol Wetnes blong Jeova, oli luksave se olgeta tu oli mas folem advaes ya. Olgeta we oltaem oli ridim Baebol mo mekem i wok long prapa laef blong olgeta, oli kasem frut from ol samting we Baebol i givim, olsem tijing, advaes, fasin stretem, mo fasin blong trenem man long stret fasin.​—2 Timote 3:​16, 17.

2. ?Olsem wanem Brata Russell i soem se i impoten blong ridim Baebol?

² Ol Wetnes blong Jeova oli laekem tumas ol buk, olsem Wajtaoa magasin, we oli givhan long olgeta blong stadi Baebol. Mo oltaem, oli yusum ol buk ya. Be oli save se, i no gat wan long olgeta buk ya, we i save tekem ples blong Baebol. Long 1909, Charles Taze Russell, faswan presiden blong Watch Tower Bible and Tract Society, i raet long ol man we oli ridim Wajtaoa magasin, i se: “Yufala i no mas fogetem se Baebol, hem i Mak we yumi yusum blong skelem ol samting. Ol samting we God i givim blong halpem yumi, oli blong ‘halpem’ yumi nomo, be oli no tekem ples blong Baebol.”

3. (a) ?Olsem wanem “Tok blong God” i gat paoa long olgeta we oli ridim? (b) ?Wetaem ol man Berea oli ridim mo stadi Baebol?

³ I no gat wan buk we i gat dip mining mo paoa, olsem ol tok blong Baebol we God i givim. “Tok blong God i wan samting we i laef, mo i stap wok, i olsem we hem i sap tumas, i winim naef blong faet ya we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed long ples we wora blong bun i joen long bun. Tok blong God i save jajem olgeta tingting blong man, mo ol samting we man i wantem long tingting blong hem.” (Hibrus 4:12) Disaepol Luk i talem ol gudfala toktok long saed blong ol man Berea, from ‘oli gat tingting we i moa gud.’ Oli wantem tumas blong harem ol tok blong God, taem aposol Pol mo fren blong hem, Saelas, oli talemaot. Be oli go moa. “Evri dei, oli stap ridimgud ol tok blong Baebol,” blong faenemaot pruf long Baebol, long saed blong ol tijing we oli stap kasem.​—Ol Wok 17:11.

Ridim Baebol Evri Dei

4. ?Baebol i soemaot wanem long saed blong fasin blong ridim Baebol oltaem?

⁴ Baebol i no talem hamas taem stret, we yumi mas makemaot blong ridim. Be hem i talem advaes ya we Jeova i givim long Josua, blong ‘ridim buk blong loa long voes we i smol, long dei mo long naet.’ Sipos hem i mekem olsem, hem i save wok long fasin we i waes, mo hem i save karem frut long ol wok we God i givim long hem. (Josua 1:8) Baebol i talem se ol man we oli rul olsem king long Isrel bifo, oli mas ridim Baebol long ‘olgeta dei blong laef blong olgeta.’ (Dutronome 17:19) Hem i talem tu se: ‘Man we i no wantem folem toktok blong ol man nogud, i save glad. Hem i laekem tumas loa blong Jeova, mo hem i stap ridim ol tok blong loa ya long voes we i smol, long dei mo long naet.’ (Ol Sam 1:​1, 2) Mo tu, Gospel blong Matyu i talem se taem Jisas Kraes i agensem ol tok we Setan i yusum blong traem pulum Hem, Hem i yusum tok blong Hibru haf blong Baebol we i kamaot long God. Hem i talem olsem: “Baebol i talem se ‘Kakae nomo i no save mekem man i laef. Evri tok we God i talem, hemia nao samting blong mekem man i laef.’” (Matyu 4:4) ?Long wanem taem yumi nidim kakae long saed blong bodi? !Yumi nidim evri dei! Fasin blong tekem kakae long saed blong speret evri dei i moa impoten, from we samting ya i save givhan long yumi blong kasem laef we i no save finis.​—Dutronome 8:3; Jon 17:3.

5. ?Olsem wanem fasin blong ridim Baebol evri dei i save halpem yumi blong “mekem laef blong yumi i kam olsem we Jeova i wantem,” taem ol samting oli traem bilif blong yumi?

⁵ Evri dei, yumi evriwan i nidim Tok blong God blong givim paoa long yumi. Evri dei​—long haos blong yumi, long wok, long skul, long rod, taem yumi go long stoa blong pem olting, long wok blong prij​—yumi kasem ol traem long saed blong bilif blong yumi. ?Olsem wanem blong winim ol traem ya? ?Bambae yumi kwik blong tingbaot ol loa mo rul blong Baebol? Baebol i no pulum yumi blong dipen long yumi wan, be hem i givim woning se: “Man we i ting se i stap stanap strong, hem i mas lukaotgud blong bambae i no foldaon bakegen.” (1 Korin 10:12) Taem yumi ridim Baebol evri dei, samting ya bambae i halpem yumi blong ‘mekem laef blong yumi i kam olsem we Jeova i wantem. Oltaem bambae yumi mekem ol fasin we hem i glad long hem.’ Ale bambae yumi no letem wol ya i pulum yumi blong folem ol fasin blong hem.​—Kolosi 1:​9, 10; Rom 12:2.

?From Wanem Yumi Mas Ridim Fulwan Baebol Bakegen mo Bakegen?

6. ?From wanem i gud blong ridim Baebol bakegen mo bakegen?

⁶ Fasin blong ridim Baebol i defren olgeta long fasin blong ridim wan buk we i no stanap long ol trufala samting. Bighaf blong ol buk olsem we ol man oli savegud long olgeta, oli blong man i ridim wan taem nomo. Taem hem i save store blong hem mo olsem wanem store i finis, hem i no gat risen blong ridim bakegen. Be i no sem mak long saed blong Baebol. Nating se yumi ridim fulwan Baebol plante taem finis, yumi kasem plante frut taem yumi ridim bakegen. (Proveb 9:9) Long wan man we i gat fasin luksave, Baebol i gat nyufala mining oltaem. Taem hem i luk, i harem, mo i fesem ol samting we oli hapen long ol manis we oli jes pas, ol profet tok long saed blong ol las dei, oli wekemap tingting blong hem moa. (Daniel 12:4) Taem man we i ridim Baebol mo i gat fasin luksave i kasem moa ekspiryens long laef, mo i winim plante problem, hem i tinghevi long advaes we bifo, maet hem i jes ridim kwik nomo. (Proveb 4:18) Sipos hem i kasem wan bigfala sik, ol promes blong Baebol, se bambae God i tekemaot soa long bodi mo givim gudfala helt long man, oli gat moa mining long hem bitim bifo. Taem wan gudfala fren no wan memba blong famle i ded, promes long saed blong laef bakegen i kam wan samting we i gud tumas long tingting blong hem.

7. ?Wanem i save halpem yumi taem yumi kasem ol nyufala responsabiliti long laef, mo from wanem?

⁷ Ating blong sam yia finis, yu bin ridim Baebol yu wan mo mekem ol advaes blong hem oli wok. Be maet naoia, yu gat sam nyufala responsabiliti long laef. ?Yu yu stap mekem plan blong mared? ?Bambae yu kam wan papa no mama? ?Yu bin kasem sam responsabiliti long kongregesen, olsem wan elda no wan man blong givhan? ?Yu wan fultaem Kristin minista, we yu gat moa jans blong prij mo blong tijim ol man? !Bambae yu kasem gudfala frut sipos yu ridim fulwan Baebol bakegen, wetem ol nyufala responsabiliti ya long tingting blong yu!​—Efesas 5:​24, 25; 6:4; 2 Timote 4:​1, 2.

8. ?Olsem wanem ol jenis long laef blong yumi oli soem se yumi nidim blong lanem moa samting we yumi ting se yumi save finis?

⁸ Maet bifo, yu yu stap soemaot ol frut blong tabu speret. (Galesia 5:​22, 23) Be, maet ol jenis we oli kamaot long laef blong yu, oli mekem se yu mas lanem plante moa long saed blong ol gudfala fasin blong God. (Lukluk Hibrus 5:8.) Wan brata we i bin wok olsem wan elda blong visitim ol kongregesen, i faenem se hem i mas lego spesel wok ya, blong lukaot long olfala papa mo mama blong hem. Hem i talem olsem: “Bifo, mi ting se mi stap soemaot ol frut blong tabu speret. Naoia, mi harem olsem se mi jes stat blong lanem olgeta bakegen.” Samting ya i sem mak long ol hasban mo waef, we wan long tufala i sik bigwan long saed blong bodi no tingting. Wari i save mekem se hemia we i sik i talem no i mekem samting, we i mekem tingting blong hasban no waef blong hem we i stap traehad blong lukaot long hem, i foldaon. Taswe, fasin blong ridim Baebol oltaem i save mekem hem i haremgud mo givhan long hem.

?Wetaem Yumi Save Ridim Baebol?

9. (a) ?Wanem i save halpem wan man we i bisi tumas blong faenem taem blong ridim Baebol evri dei? (b) ?From wanem i impoten tumas we ol elda oli ridim Tok blong God?

⁹ I tru se, i no isi nating long ol man we oli bisi tumas, blong faenem sam fri taem blong mekem wan moa samting, we i mas gohed oltaem. Be, eksampel blong Jeova i save halpem yumi. Baebol i soemaot se Hem i stap mekem ol samting long ‘stret taem we Hem i makem.’ (Jenesis 21:2; Eksodas 9:5; Luk 21:24; Galesia 4:4) Taem yumi luksave se i impoten blong ridim Baebol oltaem, samting ya i save halpem yumi blong makemaot wan taem blong ridim Baebol long program blong yumi evri dei. (Efesas 5:​15-17) I impoten we ol elda oli putumap wan taem blong ridim Baebol evri dei. Olsem nao, bambae oli givim ol advaes we oli kamaot stret long ol rul blong Baebol. Mo tu, fasin blong olgeta bambae i soemaot ‘waes we i kamaot long heven.’​—Jemes 3:17; Taetas 1:9.

10. ?Olgeta we oli ridim Baebol evri dei, oli makemaot wanem taem blong ridim?

¹⁰ Plante we oli folem wan program blong ridim Baebol wanwan, oli ridim long eli moning, bifo we oli stat long ol wok blong olgeta. Sam narafala, oli faenem se i moa gud blong ridim long wan narafala taem evri dei. Olgeta we oli mas ron longwe lelebet long trak no bas blong go long wok, oli yusumgud taem ya. Oli lesin long ol kaset blong Baebol (sipos i gat long ples blong olgeta) long trep blong olgeta. Mo sam Wetnes oli lesin long ol kaset ya taem oli stap mekem ol wok long haos blong olgeta. Long pej 20 mo 21, long haf ya, “Taem We Oli Ridim Baebol Long Hem Mo Frut We Oli Kasem,” yumi save luk sam program we ol defren Wetnes long Yurop, Afrika, Not Amerika, Saot Amerika, mo ol kantri long Is, oli faenem se oli wokgud.

11. ?Olsem wanem yumi save ridim Baebol evri dei nating se yumi no gat tumas taem?

¹¹ Samting we i moa impoten, i no hamas haoa we yu spenem blong ridim Baebol, long wanwan taem we yu ridim. Be fasin blong ridim Baebol oltaem, i impoten moa. Maet yu faenem se i gud long yu, blong tekem wan no moa haoa blong ridim Baebol evri taem, mo mekem dip stadi mo kasem savegud long hem. ?Be program blong yu i letem yu blong mekem samting ya oltaem? No letem wan dei i pas we yu no ridim Baebol nating. I moa gud we evri dei, yu spenem 15 menet, no 5 menet nomo, blong ridim. Yes, mekem disisen blong ridim Baebol evri dei. Mo, sipos yu gat taem, mekem sam moa dip stadi.

Ol Defren Rod Blong Ridim Baebol

12. Ol memba blong Betel famle mo ol studen blong Gilead oli gat wanem program blong ridim Baebol?

¹² I gat plante rod we yumi save folem blong ridim Baebol. I gud blong ridim, stat long Jenesis go kasem Revelesen. Olgeta memba blong ol Betel famle raonabaot long wol, olgeta we oli stap wok long wol hedkwota mo olgeta we oli stap wok long ol branj ofis blong Sosaeti, oli mas ridim fulwan Baebol long faswan yia we oli stap long Betel. (I minim se evri dei, oli ridim tri no faef japta, no fo no faef pej. I dipen long longfala blong ol japta.) Ol studen blong Wajtaoa Baebol Skul blong Gilead tu, oli mas ridim fulwan Baebol bifo we oli finisim kos ya. Samting ya i save halpem olgeta blong mekem fasin blong ridim Baebol evri dei, i kam haf blong laef blong olgeta.

13. ?I gud blong ol Wetnes we oli jes tekem baptaes oli putum wanem mak?

¹³ Olgeta we oli jes tekem baptaes, i gud oli putum mak ya blong ridim fulwan Baebol. Long 1975, taem wan yangfala man blong Franis i stap mekemrere blong tekem baptaes, wan elda i askem hem sipos hem i gat wan program blong ridim Baebol. Stat long taem ya, evri yia hem i ridim fulwan Baebol. Plante taem, hem i ridim long moning, bifo we hem i go long wok. Hem i tokbaot ol frut we hem i kasem, se: “Naoia mi save Jeova moa. Mi luksave olsem wanem evri wok blong hem oli laenap wetem stampa tingting blong hem. Mo olsem wanem hem i givhan taem i gat hadtaem. Mi luk se, long olgeta wok we Jeova i mekem, hem i gat stret fasin mo gudfala fasin tu.”

14. (a) ?I nidim wanem blong statem wan program blong ridim Baebol we i save gohed oltaem? (b) ?Wanem i save halpem yumi blong tingbaot ol bigfala poen long ol wanwan buk blong Baebol taem yumi ridim?

¹⁴ ?Yu yu ridim fulwan Baebol finis? Sipos yu no mekem yet, i gud blong stat naoia. Mekem wan gudfala program, mo folemgud oltaem. Makemaot hamas pej no hamas japta bambae yu ridim evri dei. Sipos no, makemaot hamas taem bambae yu spenem, mo putum wan stret taem. I no evriwan we bambae oli ridim fulwan Baebol long wan yia. Be impoten samting i blong ridim Tok blong God oltaem. Ridim evri dei, sipos yu naf. Taem yu stap ridim Baebol, maet yu faenem se sam narafala buk oli givhan blong mekem ol bigfala poen long Baebol oli klia long tingting blong yu. Sipos i gat buk ya Insight on the Scriptures long lanwis we yu save, bifo we yu stat blong ridim wan buk blong Baebol, i gud blong lukluk bakegen ol bigfala poen blong hem, olsem i stap long bokis long Insight.a I impoten blong makemgud ol smol stampa tok long ol bokis ya. Mo mekem olsem tu long buk ya “All Scripture Is Inspired of God and Beneficial,”b we i gat moa poen long hem.

15. (a) ?Long pej 16 mo 17, wanem ol rod we oli save halpem yumi blong kam moa gud long fasin blong ridim Baebol? (b) Bitim we yumi mekem fasin blong ridim Baebol i kam olsem kastom nomo, yumi mas tingting moa long wanem impoten samting?

¹⁵ I gud blong ridim Baebol folem oda blong ol japta. Be yu no mas mekem fasin ya i kam olsem wan kastom nomo. Taem yu ridim sam pej blong Baebol evri dei, samting ya i no jes blong mekem se yu save talem we evri yia yu ridim fulwan Baebol. Olsem i stap long bokis ya, “Ol Rod Blong Kam Moa Gud Long Fasin Blong Ridim Baebol” (pej 16 mo 17), i gat plante rod we yumi save folem blong ridim mo haremgud long Baebol. Nomata wanem rod yu folem, yu mas sua se yu stap fidim maen mo hat, tufala wantaem.

Kasem Mining Blong Samting We Yu Ridim

16. ?From wanem i impoten blong tekem taem blong tingting dip long ol samting we yumi ridim?

¹⁶ Taem Jisas i stap tijim ol disaepol blong hem, hem i makem se i impoten we oli kasem save long ol samting we hem i talem. Samting we i impoten, i no bigfala save, be hemia se oli mas kasem ‘mining blong tok ya wetem hat blong olgeta.’ Olsem nao, oli save mekem i wok long laef blong olgeta. (Matyu 13:​14, 15, 19, 23) God i stap lukluk insaed blong man, we i minim hat. (1 Samuel 16:7; Proveb 4:23) Taswe, i gud blong sua se yumi kasem save long ol samting we yumi ridim long ol vas blong Baebol. Be antap long samting ya, yumi mas tingting dip long olgeta, mo luk olsem wanem yumi save mekem oli wok long prapa laef blong yumi.​—Ol Sam 48:9; 1 Timote 4:15.

17. ?Wanem sam samting we maet yumi save tingting dip long olgeta taem yumi ridim Baebol?

¹⁷ Traehad blong luksave ol rul we ol store blong Baebol oli soemaot. Biaen, yu save folem ol rul ya, taem ol defren samting oli hapen long laef blong yu. (Lukluk Matyu 9:13; 19:​3-6.) Taem yu ridim mo tingting dip long ol nambawan fasin blong Jeova, tekem jans ya blong frengud moa wetem Hem, mo blong kasem strong tingting blong fasgud long Hem. Taem yu ridim ol vas we oli tokbaot stampa tingting blong Jeova, tingbaot samting we yu mas mekem blong wok folem ol stampa tingting ya. Taem yu ridim ol tok we oli olsem advaes stret, yu no mas tingting se, ‘A, mi save samting ya finis,’ be i gud yu askem yu wan se, ‘?Mi mi stap folem advaes ya?’ Sipos yes, askem yu wan se, ‘?Wanem ol rod mi save folem blong “go moa yet long ol fasin ya?”’ (1 Tesalonaeka 4:1) Taem yu stap lanem ol rul blong God, makemgud tu ol ekspiryens blong ol man long Baebol we oli folemgud ol rul ya, mo olgeta we oli no folem. Tingbaot from wanem oli folem rod we oli tekem, mo wanem frut oli kasem. (Rom 15:4; 1 Korin 10:11) Taem yu ridim store blong laef blong Jisas Kraes, rimemba se Jisas i man ya we Jeova i givim raet long hem blong rul olsem king antap long wol. Ale yusum jans ya blong mekem se tingting blong wantem tumas nyufala wol blong God, i kam moa strong. Mo tu, tingting long ol rod we yu save folem blong go moa long fasin blong biaenem Pikinini blong God.​—1 Pita 2:21.

18. ?Olsem wanem yumi save skelem fasin blong ridim Baebol wetem fasin ya we yumi stadi long ol buk we “slef ya we i stret mo waes” i givim?

¹⁸ Fasin blong ridim Baebol i no mas tekem ples blong fasin blong stadi long ol nambawan buk we “slef ya we i stret mo waes” i givim. Olgeta ya tu, oli ol samting we Jeova i givim​—ol samting we oli nambawan tumas. (Matyu 24:​45-47) Mekem sua se fasin blong ridim Tok blong God oltaem i mas gat impoten ples long laef blong yu. Sipos yu naf, “RIDIM TOK BLONG GOD, TABU BAEBOL, EVRI DEI.”

[Ol futnot]

?Bambae Yu Yu Ansa Olsem Wanem?

◻ ?From wanem i gud blong ridim Baebol evri dei?

◻ ?From wanem yumi mas ridim fulwan Baebol bakegen mo bakegen?

◻ ?Long program blong yu, wanem gudfala taem we yu putum blong ridim Baebol evri dei?

◻ ?Taem yu stap ridim Baebol bakegen mo bakegen, wanem ol defren samting yu save ademap long program blong yu?

◻ ?From wanem i impoten tumas blong tingting dip long ol samting we yumi ridim?

[Bokis blong pija long pej 16, 17]

Ol rod blong kam moa gud long fasin blong ridim Baebol

(1) Plante man oli ridim Baebol folem oda blong ol buk long hem, stat long Jenesis go kasem Revelesen. Mo tu, maet yu save ridim folem oda we oli raetem ol buk long hem fastaem. Tingbaot se Baebol i gat 66 buk blong hem, we oli kamaot long God. Oli olsem wan laebri we God i givim. Blong ridim ol defren kaen store, maet yu wantem folem rod ya we i defren long fasin blong ridim folem ol namba blong pej nomo. Fastaem, ridim sam buk long Baebol we oli tokbaot histri. Biaen, yu save ridim samfala we oli fulap long profet tok. Afta, maet yu ridim samfala leta we oli fulap long advaes. Makem ol haf we yu ridim finis, mo mekem sua se yu ridim fulwan Baebol.

(2) Afta we yu ridim wan haf blong Baebol, askem yu wan se, ‘?Wanem samting mi mi lanem long saed blong Jeova, stampa tingting blong hem, mo fasin blong hem blong mekem ol samting? ?Olsem wanem samting ya i mas gat paoa long laef blong mi? Mo, ?olsem wanem mi save yusum haf ya blong halpem narafala?’

(3) Blong givhan long yu, yu save yusum bokis ya, “Main Events of Jesus’ Earthly Life” (“Ol Bigfala Samting We Oli Hapen Long Laef Blong Jisas Long Wol”) we i stap long buk ya Insight on the Scriptures (mo tu long buk ya “All Scripture Is Inspired of God and Beneficial”). Ridim wan haf long wan Gospel, nao ridim sem store long narafala Gospel, mo gohed olsem long ol poen wanwan. Mo tu, jekemap ol haf ya long buk, Man We i Hae Moa Long Olgeta Man.

(4) Taem yu ridim store blong laef mo minista wok blong Pol long buk blong Ol Wok, ridim ol leta we hem i raetem tu, we oli joen wetem ol store ya. Ale, taem yu ridim ol haf blong Ol Wok we oli tokbaot ol taon mo ples we Pol i prij long olgeta, tanem i go long ol leta ya, we biaen hem i raetem i go long ol Kristin long ol ples ya. Taem yu folem ol trep blong hem long wan map, olsem hemia we i stap long laswan pej blong New World Translation, samting ya i save givhan tu.

(5) Taem yu ridim Eksodas kasem Dutronome, i gud blong ridim buk blong Hibrus tu, from we hem i eksplenem plante samting blong bifo we oli olsem saen blong ol samting tede. Aninit long tok ya “Law” (“Loa”) long Insight on the Scriptures, jekem haf ya, “Some Features of the Law Covenant” (“Sam Haf Blong Kontrak Blong Loa”).

(6) Taem yu ridim ol buk blong ol profet tok, tekem taem blong lukluk bakegen stampa histri blong ol profet tok ya long Baebol. Eksampel, taem yu ridim buk blong Aesea, lukluk long ol narafala buk blong faenem ol poen we oli tokbaot ol king olsem Usaea, Jotam, Ehas, mo Hesekaea, we Aesea 1:1 i tokbaot. (2 King, japta 15-20; 2 Kronikel, japta 26-32) Mo, taem yu ridim buk blong Hagae mo Sekaraea, lukluk bakegen ol poen we oli stap long buk blong Esra.

(7) Jusum wan buk blong Baebol, ridim wan haf blong hem (maet wan japta), nao mekem dip stadi long hem. Yusum Watch Tower Publications Index no Watchtower Library long kompyuta, sipos i gat long lanwis blong yu. Mekem ol samting we yu lanem oli wok long laef blong yu. Yusum long ol tok blong yu long Haos Kingdom, mo long wok blong prij. Afta, gohed long narafala haf.

(8) Sipos i gat wan buk blong Watch Tower Sosaeti, we i eksplenem wan buk blong Baebol, no wan haf blong hem, oltaem jekemap buk ya, taem yu stap ridim haf ya blong Baebol. (Eksampel: Wajtaoa blong Desemba 1, 1957, pej 720-734 (Engglis mo Franis), i tokbaot Singsing blong Solomon, “The Nations Shall Know That I Am Jehovah”​—How? i tokbaot buk blong Esikel, “Your Will Be Done on Earth” no Our Incoming World Government​—God’s Kingdom, i tokbaot buk blong Daniel, Paradise Restored to Mankind​—By Theocracy! i tokbaot buk blong Hagae mo Sekaraea, mo Revelation​—Its Grand Climax At Hand! i tokbaot buk blong Revelesen).

(9) Taem yu ridim Baebol, jekem sam narafala vas we ol refrens oli talem. Makemgud ol 320 vas long Hibru haf blong Baebol, we oli kamaot bakegen long Kristin Grik haf blong Baebol. Mo makem plante handred narafala tingting long Kristin Grik haf blong Baebol we oli laenap wetem ol vas blong Hibru haf blong Baebol, mo makem olsem wanem oli eksplenem olgeta. Ol refrens, oli talem ol vas blong Baebol, we oli tokbaot ol profet tok we oli kamtru finis. Mo tu, oli givim moa save long saed blong store we yu stap ridim, olsem laef blong ol man mo ol ples. Mo oli poen i go long ol tingting we oli sem mak long hemia we yu stap ridim, we maet oli givhan blong eksplenem ol tok we yu faenem se i had blong kasem save long olgeta.

(10) Taem yu yusum Refrens Baebol blong New World Translation, sipos i gat long lanwis we yu save, jekem ol futnot mo ol haf blong apendiks we oli joen wetem samting we yu stap ridim. Tufala samting ya i soem risen from wanem oli yusum tok ya, mo ol defren rod blong transletem ol impoten tok. Maet yu wantem yusum narafala Baebol tu blong luk olsem wanem oli tanem sam vas.

(11) Afta we yu ridim ol wanwan japta, raetemdaon ol bigfala poen we yu faenem long japta ya. Be yu no mas raetem tumas. Samtaem biaen, yu save yusum samting ya blong tingting bak mo tingting dip long ol poen ya.

(12) Taem yu ridim Baebol, makem sam vas we yu rili wantem holem long tingting blong yu. Mo tu, yu save raetem olgeta long pepa, mo putum long ples we yu save lukluk olgeta evri dei. Lanem ol tok long ol vas ya. Tingting dip long olgeta. Yusum olgeta. Yu no mas traem blong lanem plante vas wantaem, be wan no tu vas nomo evri wik. Biaen, yu save jusum sam moa, long nekis taem we yu ridim fulwan Baebol.

[Tok blong pija long pej 15]

?Yu yu stap ridim Baebol no yu stap lesin long kaset blong Baebol evri dei?