Faenem Trufala Pis Long Wan Kantri We i Trabol

Wan ripot we i kamaot long 1969 i talem se, “Rabis fasin blong ol grup we oli gat raf fasin, oli olsem wan wael anamol i kamaot long klia ples.” Long taem ya nao Trabol we i mekem se i no save gat pis long Not Aerlan i gohed blong stap gru.

OL RAF fasin blong ol grup ya mo fasin blong olgeta blong kilim man i olsem wan fasin blong evri dei. Ol man blong kilim man, oli olsem “ol wael man” long tufala saed blong politik, mo skul blong Protestan mo Katolik. Oli pusum bigwan fasin ya blong faet strong blong bos antap long Aerlan. I stat go kasem taem ya, niuspepa ya The Irish Times i ripotem se, “i gat bitim 3600 man we oli bin ded mo plante taosen oli lusum wan haf blong bodi blong olgeta long 30 yia we faet i bin stap gohed.”

I tru se hemia i no wan niufala faet. Trabol ya i bin stap long Aerlan blong plante handred yia finis. Long ol yia we oli jes pas, denja blong trabol ya i bigwan moa mo i bin kasem long Not blong Aerlan. Be faet ya we i mekem se ol man oli badfren mo oli no save joengud, i spolem fiuja laef blong plante man long evri ples long Aerlan.

Long medel blong semfala trabol ya we i stap gohed, ol Witnes blong Jeova oli bin stap talemaot bitim plante handred yia finis, ansa blong finisim ol problem ya we i bin spolem ples ya. Hemia Kingdom blong God we Jisas Kraes bambae i rul long hem. (Matiu 6:​9, 10) Long stat blong ol trabol ya long 1969, i gat 876 Witnes blong Jeova long Aerlan. Be naoia i gat bitim 4500 Witnes blong Jeova we oli stap long bitim 100 kongregesen. Hemia sam ekspiryens blong samfala we oli bin tanem baksaed blong olgeta long politik mo ol grup we oli mekem wok olsem ami, we i joen long saed blong ami.

“Taem Mi Bigwan Bambae Mi Joenem IRA!”

Michaela i gruap olsem wan Katolik long Ripablik blong Aerlan. Long skul hem i lanem ol samting long saed blong histri blong Aerlan mo ol rao we tufala wetem Engglan tufala i bin gat plante handred yia bifo finis. Taem hem i wan pikinini, hem i no laekem nating ol Engglis man. Hem i luk olgeta olsem “ol man blong bos nogud long ol man Aerlan.” Taem hem i gat ten yia nomo hem i talem long bubu woman blong hem se, “Taem mi bigwan bambae mi joenem IRA!” (The Irish Republican Army) Hem i talem se, “Hem i slavem fes blong mi we mi rimemba kam kasem tede.” Hem i lanem biaen se bubu man blong hem i bin joenem ami blong ol man Engglan long taem blong Faswan Bigfala Faet. I bin gat wan taem we bubu woman blong hem i mas stanap fored long bubu man blong hem blong blokem ol memba blong IRA blong no sutum hem.

Nating se i olsem, taem Michael i kam bigwan hem i wantem mekem wan samting blong halpem ol Katolik fren blong hem long Not blong Aerlan. Hem i talem se, “Long taem ya i luk olsem se, ol man we oli mekem sam samting blong halpem ol man long Not blong Aerlan hemia ol IRA nomo.” Samting we hem i luk i mekem hem i kros. From samting ya hem i kam wan memba blong IRA mo hem i kasem trening blong yusum ol tul blong faet. Ol ami blong Protestan long Not blong Aerlan oli sutum i ded trifala fren blong hem.

Nao sloslou, Michael i stat lusum hop long saed blong faet blong ol ami ya. Tingting blong hem i no glad nating from fasin agens we i stap gohed bitwin ol defren grup blong ami. Taem hem i stap long kalabus from ol trabol we hem i joen blong mekem wetem ol IRA, hem i prea long God blong halpem hem blong faenem trufala rod blong pis mo stret fasin. Sam narafala taem biaen ol Witnes blong Jeova oli kam blong storeyan long haos blong hem. Ol Witnes ya oli Engglis man. From fasin blong hem, blong no laekem nating ol man Engglan we i stap finis, i mekem i hadwok blong hem i lesin long olgeta. Hem i talem se, “I no oltaem we mi soem se mi mi glad blong luk olgeta, be oli gohed blong kambak mo storeyan wetem mi. Mi stat blong luk se Kingdom blong God nomo bambae i save finisim olgeta fasin agens bitwin ol politik grup mo ol fasin we i no stret long ol man, ol fasin we mi bin stap traehad blong finisim.”​—Ol Sam 37:​10, 11; 72:​12-14.

Wan taem we i halpem Michael blong mekemap tingting blong hem, hemia wan sapa taem Michael i bin mitim bos blong hem blong IRA. Bos blong hem i talem long hem se, “Mifala i gat wan wok blong yu blong mekem.” Michael i talem se, “Stret long taem ya mi harem se mi mas mekem jus blong mi. Taswe mi pulum win blong mi bigwan mo mi talemaot se, ‘Mi mi wan Witnes blong Jeova nao,’ nating se mi mi no baptaes yet long taem ya.’” Hem i gohed i se, “Nating se mi no baptaes yet, be mi mi save se mi wantem kam olsem wan man blong wok blong Jeova.” Bos blong hem i girap i talem long hem se, “I stret blong oli stanemap yu long fored blong wan wol blong oli sutum yu.” Nating se oli traem mekem hem i fraet, Michael i livim IRA. Hem i no fraet blong mekem samting ya, from we hem i letem ol tok blong Jeova i wok long tingting mo hat blong hem. Biaen hem i talem se, “Sam taem biaen, waef blong mi mo sam long ol pikinini blong mi oli givim laef blong olgeta i go long Jeova. Naoia mifala i gat trufala pis long hat blong mifala. Mo oltaem mifala i tangkiu long Jeova from hem i letem mifala blong i lanem trutok, mo blong joen blong serem mesej blong pis long wan kantri we i fulap long trabol.”​—Ol Sam 34:14; 119:165.

Fasin Blong No Joen Long Faet Hem i Wan Trufala Proteksen

Patrick i storeyan se, “Mi mi gruap afsaed long taon long County Derry, long Not blong Aerlan. Taem mi smol yet mi lukluk ol trabol nomo. Ol samting ya i jenisim bigwan lukluk mo tingting blong mi.” Patrick i stat blong wokem ol strong tingting we i joen wetem fasin blong tinghae long kantri blong hem, mo blong no laekem mo ting nating long ol man Engglan. Hem i luk ol man blong skul long tufala saed blong politik we oli stap faet. Hemia i brekem ol stamba kristin rul mo tu ol rul blong mekem i stret nomo long ol man. Samting ya i mekem se hem i tanem baksaed blong hem long skul. Sloslou hem i kam olsem wan man we i no bilif long God be i bilif strong long ol tijing blong wan man we nem blong hem Karl Max.​—Skelem wetem Matiu 15:​7-9; 23:​27, 28.

Patrick i gohed i tokbaot se, “Ol fasfala memori blong mi, hemia taem ol presina blong ripablik blong Not oli no wantem kakae nating. Samting ya i tajem hat blong mi. Mi rimemba mi bin putumap ol flag blong ol man Aerlan, be long semtaem, mi bin raetem ol tok blong daonem mo spolem ol man Briten olbaot long enikaen ples. Taem mi kasem 15 yia blong mi nomo, mi halpem blong karem wan long ol presina ya we i ded i go blong oli berem hem. Hem i ded from we hem i no wantem kakae long kalabus.” Olsem ol narafala Patrick i joen long ol faet mo ol maj blong traem kasem wanem we hem i ting se i stret rod blong putumbak stret fasin bitwin olgeta man. Hem i kam fren blong olgeta ya we oli bitim mak long fasin blong tinghae long kantri blong olgeta. Gavman blong Engglan i putum plante blong olgeta long kalabus.

Patrick i talem se, “Be from we laef i kam moa had, mi mas go spenem sam taem long Engglan. Taem mi stap longwe ol polis blong Briten i holem wan long ol fren blong mi we i stap plan blong putum wan bom long wan ples.” Nating se Patrick i gohed blong gat sore long olgeta ya we oli fraet from kantri blong hem, tingting blong hem i stat blong jenis. Hem i stat blong luksave se ol fasin blong hem blong ting nating mo agensem ol man Engglan, oli no gat stamba blong hem. Hem i talem se, “Mi stat blong kasem save se ol grup we oli wok olsem ol ami oli no save stretem ol problem mo tekemaot ol nogud fasin ya we oli stap mekem mi mi wari. i gat tumas kruked fasin mo ol narafala fasin we oli no stret, i stap long medel blong ol man ya we oli stap kontrolem ol grup ya blong ol ami blong faet.”​—Prija 4:1; Jeremaea 10:23.

Biaen Patrick i gobak long Not blong Aerlan. Patrick i talem se, “Taem mi gobak wan fren i soem ol Witnes blong Jeova long mi.” Taem hem i stadi wetem ol Witnes blong Jeova hem i stat blong kasem save trufala ansa blong finisim olgeta raorao mo fasin seraot blong ol man. Hem i gruap kwiktaem long saed blong spirit taem hem i letem ol rul blong Baebol oli wok long tingting mo hat blong hem. (Efesas 4:​20-24) Hem i talem se, “Naoia, mi faenem se, mi no plan blong kafsaedem rul ya we i stap. Be mi go blong talemaot mesej blong pis long Baebol. Mi go long ol ples we ol man oli sapotem strong kantri blong olgeta tu, hemia samfala ol ples we bifo mi neva go long hem.” Yes long wan taem we ol grup oli kilkilim plante man long Belfast, be ol man we oli save muf i go olbaot fri nomo, bitwin ol man we oli sapotem strong kantri blong olgeta, mo ol ples blong olgeta, hemia ol Witnes blong Jeova. Olsem ol narafala Witnes long Not blong Aerlan long taem ya, hem i faenem se blong no joen long faet i olsem wan strongfala proteksen blong hem. Samting ya i sem mak long ol Kristin bifo. (Jon 17:16; 18:36) Hem i gohed blong finisim toktok blong hem se, “Yumi fri long ol wari blong tingting, taem yumi kasem save se Jeova tru long Jisas Kraes bambae i putum trufala stret fasin mo mekem olgeta man oli fri long ol strongfala rul we man i putum antap long man.”​—Aesea 32:​1, 16-18.

“Ol Masket Blong Mi Hemia Nomo Oli Proteksen Blong Mi”

William i storeyan se, “Mi gruap long narasaed, we ol grup blong politik mo skul oli defren. Hed blong mi i fulap long ol nogud tingting we ol Protestan oli gat agensem ol Katolik. Mi no laekem nating eni samting we i joen wetem skul ya Katolik. Mi no save go tu insaed long stoa blong wan man Katolik, mo mi go visitim Ripablik blong Aerlan wan taem nomo. Mi joen insaed long ol defren grup blong Protestan, mo wan ogenaesesen we oli kolem se Orange Order​—hemia wan ogenaesesen we i givim fulwan paoa blong hem blong protektem skul ya Protestan mo ol fasin blong laef blong hem.” William i joenem Ulster Defence Regiment taem hem i gat 22 yia blong hem. Hemia wan haf blong ami blong Briten we i kamaot long Aerlan nomo. Plante long ol memba blong hem oli blong skul ya Protestan. Hem i glad nomo blong kilim ol man blong protektem skul blong hem. William i talem se, “Mi bin gat sam masket mo mi no fraet blong yusum olgeta sipos i nidim blong mi mekem olsem. Mi putum wan aninit long pilo evri naet.”

Be i kam kasem wan taem we evri samting i jenis. William i talem se, “Mi luk se ol Witnes blong Jeova oli gat wan spesel samting taem mi wok klosap wan long olgeta we i stap fiksim wan olfala haos. Man ya we mi wok klosap long hem i rili mekem tingting blong mi i wok. Taem mitufala i stap bildim haos tugeta, mi gat jans blong askem plante kwestin long hem. Hemia we oli mekem tingting blong mi i wari olsem ol Trabol ya, skul, mo God. Ol Ansa we hem i givim long mi oli isi mo kliagud. Samting ya i halpem mi blong luksave ol Witnes blong Jeova. Mi luksave se oli joengud, oli no gat raf fasin, oli no joen long eni kaen politik grup, mo oli laekem God mo ol man raonabaot long olgeta.​—Jon 13:​34, 35.

Afta we William i stadi fo manis nomo long Baebol hem i lego olgeta grup blong skul mo politik we hem i bin stap joen long hem. Hem i rimemba samting ya mo i talem se, “Hemia i wan bigfala step blong mi from we mi mas sakemaot plante olfala kastom we mi bin laekem tumas.” Be wan traem we i bigfala moa i bitim ol narafala traem i mas kamaot long laef blong hem yet. William i gohed i talem se, “From ol trabol we oli stap gohed yet long Aerlan, mi harem se ol masket blong mi nomo oli proteksen blong mi. Ol man blong IRA oli luk mi olsem wan man we i stret nomo blong oli mas holem. Taswe i hadwok blong sakemaot ol tul blong faet ya.” Be sloslou, ol advaes blong Baebol olsem long Aesea 2:​2-4 i jenisim tingting we hem i bin gat bifo. Hem i luksave se Jeova nao hem i trufala proteksen blong hem sem mak olsem we hem i bin mekem long ol Kristin blong faswan handred yia. Taswe William i givim olgeta masket blong hem long polis.

Biaen Willliam i talem se, “Wan samting we i rili mekem mi mi glad hemia se mi gat wan fasin fren we i dip mo blong olwe wetem olgeta ya we bifo mi luk olgeta olsem ol enemi blong mi blong kilim narafala i ded nomo. Mo tu mi kasem bigfala glad, taem mi save tekem mesej blong hop we i stap long Baebol i go long ol ples we bifo i tabu blong mi mi go long ol ples ya. Taem mi lukluk bak long ol samting we trutok i bin mekem long mi mo famle blong mi, samting ya i mekem se mi gat fasin tangkiu long Jeova mo ogenaesesen blong hem blong olwe.”

“Ol Samting Oli Krangke Nomo”

Robert mo Teresa oli gruap defren olgeta. Robert i talem se, “Mi mi kamaot long wan famle we i stanap strong long ol rul blong Protestan. Sam long ol famle blong mi oli bin joen long ol grup we oli wok olsem ami. Mi bin joenem grup blong ami blong Briten we oli kolem Ulster Defence Regiment taem mi gat 19 yia nomo. Mifala i spenem plante taem blong wokbaot olsem gad long ples we Teresa i stap. Wan naet oli tekemaot mi long wokbaot ya we mifala i stap mekem mo oli putum mi i go long sam narafala wok. Long semfala naet ya bom i faerap long trak ya we mifala i bin stap yusum blong wokbaot long hem. Tu soldia oli ded mo tufala narafala oli kasem sam kil.

Samting ya i mekem se Robert i stat blong tingbaot mining blong laef. Robert i talem se, “Mi mi bilif long God oltaem, be taem mi lukluk raonabaot long Not Aerlan, i luk olsem se ol samting ya oli krangke nomo. Long taem ya mi stat blong prea long God. Mi askem long God sipos hem i rili stap, mo sipos hem i stap, mi wantem blong hem i soem long mi stret rod blong folem long laef. Mi rimemba we mi talem long God se i mas gat wan trufala skul i stap samples.” Sam dei nomo biaen, wan Witnes blong Jeova i kam storeyan wetem Robert mo i livim sam buk wetem hem. Taem hem i kambak let long naet ya afta we hem i wokbaot olsem gad Robert i stat blong ridim ol buk ya mo i finis long faef klok moning. Robert i talem se, “Kwiktaem nomo mi stat blong luksave stamba blong trutok. Mi luk se evri samting i kamaot long Baebol.” (2 Timoti 3:16) Hem i stat blong stadi Baebol mo smoltaem afta, hem i givim laef blong hem i go long God.

“Oltaem Ol Witnes Oli Lidim Mifala i Go Long Baebol”

Teresa i defren bakegen, from we hem i gruap wan Katolik we ol kastom blong hem i tinghae bigwan long kantri blong hem. Teresa i talemaot se, “Taem mi mi wan yangfala gel mi joenem grup ya Sinn Fèin.b Samting ya i mekem se mi joenem ol grup we oli wok olsem ami. Mi wok blong winim mane blong halpem olgeta faet blong olgeta. Mi letem ol IRA oli save wanem i stap hapen long ples blong mi. Mi joenem ol faet long pablik ples mo blong stonem ol polis mo ol ami we oli wokbaot.”

Taem sam long ol famle blong Teresa oli stat blong stadi Baebol wetem ol Witnes blong Jeova, samting ya i mekem se hem i intres tu. Paoa blong tok blong God i rili tajem hem. Hem i talem se, “Oltaem Witnes oli lidim mifala i go long Baebol blong faenem ansa long ol kwestin. Promes we i stap long Daniel 2:44 i rili openem ae blong mi. Mi luk we Kingdom blong God hemia nao trufala rod blong karemaot ol fasin we i no stret we mi mi stap traem blong faet agensem.” Hem i harem wan strong filing i stat blong gru agensem sam long ol rabis fasin blong spolem man we ol ami oli stap mekem. Wan eksampel, Teresa i no kasem save from wanem olgeta we oli gat ol filing blong sore mo gud fasin oli save glad taem oli harem nius se ol teroris oli mekem se ol soldia no ol narafala man oli karem kil no oli lusum wan haf blong bodi blong olgeta. Mekem se ol famle oli sore bigwan mo oli harem i soa tumas. Hem tu i akseptem trutok mo i letem ol rul blong God i jenisim ol tingting blong hem. Hem i givim laef blong hem i go long God mo i no long taem hem i tekem baptaes.​—Ol Proveb 2:​1-5, 10-14.

Teresa i mitim Robert taem tufala i go long miting long wan kongregesen blong ol Witnes blong Jeova long Not Aerlan. Teresa i talemaot tingting blong hem se, “Fastaem, taem mi mitim Robert, mi faenem se i hadwok blong bilivim se mi stap toktok kwaet mo long pis wetem wan we fastaem mi luk hem olsem wan mesin blong Briten blong kilim man. Tok blong God i givhan bigwan long mi blong karemaot ol dip filing blong no laekem mo agensem narafala.” Hem mo Robert i no moa seraot from fasin blong no laekem narafala, mo blong tingting nogud long narafala we stamba blong hem i kamaot from ol defren fasin mo kastom blong tufala. Tufala i faenemaot se, naoia tufala i serem plante samting we i sem mak. Samting we i gat moa paoa long tufala hemia fasin blong tufala blong lavem Jeova. Tufala i mared. Naoia tufala i wok tugeta blong karem mesej blong trufala pis i go long ol man we oli gat ol defren kastom mo bilif long kantri ya we i trabol.

Olgeta narawan long Aerlan oli gat ol semfala ekspiryens. Taem oli lesin mo akseptem olgeta tijing long tok blong God, oli ronwe finis long ol ‘rabis tok ya we i folem waes blong man. Ol tok ya i blong giaman nomo’. (Kolosi 2:8) Naoia oli putum fulwan tras blong olgeta long ol promes blong God we oli stap long Baebol. Olgeta oli hapi blong serem hop ya wetem eni man we i wantem lesin, hop ya long saed blong wan fiuja we i gat pis​—wan pis we bambae i fri olgeta long ol smolsmol grup we oli agens mo ol narafala kaen raf fasin.​—Aesea 11:​6-9.

[Ol futnot]

[Tok Blong Pija Long Pej 10]

Oli leftemap faet blong ol grup we oli wok olsem ami long ol pija we oli pentem. Hemia olbaot long Not Aerlan