Ripot Long Wok Blong Kingdom

Laef Blong Famle We i Hapi i Pulum Ol Narafala i Kam Long God

JEOVA i blesem Josef wetem bigfala waes mo fasin luksave. (Ol Wok 7:​10) From samting ya, “Fero wetem olgeta man blong hem oli glad tumas” long save blong Josef.​—Jenesis 41:​37, NW.

I sem mak tede, Jeova i givim waes mo fasin luksave long ol man blong hem tru long stadi we oli mekem long Baebol. (2 Timoti 3:​16, 17) Waes mo fasin luksave ya we oli kasem i givim gudfala frut taem oli mekem ol advaes blong Baebol i wok long laef blong olgeta. Plante taem, ‘ol man oli glad tumas taem oli luk ol gudfala fasin blong olgeta.’ Ol stori ya we i kamaot long Simbabwe oli soemaot samting ya.

• I gat wan woman we i stap laef klosap long sam Witnes blong Jeova. Woman ya i no laekem nating ol Witnes. Nating se i olsem, hem i laekem fasin blong olgeta, antap moa long saed blong laef we oli gat long haos. Hem i luk se hasban mo waef, tufala i gat gudfala fasin fren, mo ol pikinini blong tufala oli gat fasin obei. Hem i makem gud se hasban i lavem waef blong hem tumas.

Long sam ples long Afrika, oli bilif se sipos wan hasban i lavem waef blong hem, hemia i minim se waef ya i bin yusum majik blong mekem hasban ya i “kwaet” olsem. Taswe, woman ya i go luk waef ya we i wan Witnes mo i askem long hem se: “Plis yu givim majik ya we yu bin givim long hasban blong yu, blong bambae hasban blong mi i lavem mi olsem we hasban blong yu i stap lavem yu.” Witnes ya i ansa se: “I oraet, bambae mi karem i kam long yu tumora aftenun.”

Long nekis dei, sista ya i tekem “majik” blong hem mo i go visitim woman ya. ?Wanem majik ya? Hemia Baebol wetem buk ya Save Blong Lidim Yu Long Laef We i No Save Finis. Afta we tufala i lukluk haf ya “Wokem Wan Famle We i Givim Ona Long God” long Save buk, sista i talem long woman ya se: “Hemia nao ‘majik’ we mi mo hasban blong mi, mitufala i bin yusum blong mekem wanwan long mitufala i kam ‘kwaet,’ mo hemia nao from wanem mitufala i lavlavem mitufala.” Sista ya i statem wan Baebol stadi, mo woman ya i gohed gud go kasem mak ya we hem i baptaes long wota blong soem se hem givim laef blong hem i go finis long Jeova.

• I gat tu spesel paenia we tufala i stap wok long wan smol kongregesen klosap long mak we i seraotem Simbabwe mo Mosambik long not-is Afrika. Tu wik finis tufala i no bin goaot long wok blong prij long ol haos wanwan. ?From wanem? From we ol man oli stap kam blong lesin long wanem we tufala i gat blong tokbaot. Wan long tufala paenia ya i tokbaot from wanem samting ya i hapen, se: “Wan dei, mitufala i wokbaot 15 kilometa blong mekem Baebol stadi wetem wan man we i intres. I no isi long mitufala blong kasem ples blong man ya. Mitufala i mas wokbaot long sofmad, mo krosem ol bigfala reva we oli kam antap kasem nek blong mitufala, mo oli ron strong. Mitufala i mas putum ol klos mo sus blong mitufala antap long hed blong mitufala, taem mitufala i stap swim i gokros long ol reva ya. Mo taem mitufala i go narasaed long ol reva ya, mitufala i mas jenisim klos blong mitufala bakegen.

“Ol man we oli stap raonabaot long man ya we i gat intres, oli sapraes tumas long strong tingting we mitufala i gat. Wan long olgeta we oli makem samting ya, hem i wan lida blong wan jos long ples ya. Hem i talem long ol man blong hem se: ‘?Yufala i no wantem gat strong tingting olsem tufala yangfala man ya we tufala i Witnes blong Jeova? I nogat wan samting we i blokem tufala blong mekem wok blong tufala.’ Long nekis dei, plante long ol man blong hem oli kam long haos blong mitufala blong faenemaot from wanem mitufala i gohed strong olsem. !Mo long ol nekis tu wik, i gat plante man oli kam visitim mitufala, mekem se mitufala i no gat taem blong kukum kakae blong mitufala!”

Wan long olgeta we oli kam long haos blong tufala paenia long tufala wik ya, hem i lida ya blong skul. !Tingbaot bigfala glad blong tufala paenia ya taem lida ya i akseptem wan Baebol stadi!