?Tok Ya “Kristin” i Stap Lusum Mining Blong Hem?

?I MINIM wanem blong stap olsem wan Kristin? ?Bambae yu yu ansa long kwestin ya olsem wanem? Oli bin askem kwestin ya long sam man we oli kamaot long ol defren kantri, mo hemia ansa we oli givim:

“Blong folem Jisas mo mekem i sem mak long hem.”

“Blong kam wan gudfala man mo serem samting wetem ol narafala.”

“Blong akseptem Kraes olsem Masta mo Sevia.”

“Blong go long Lames, talem prea ya, Rosari, mo tekem Holi Kominion.”

“Mi no bilif se yu mas go long jos blong kam wan Kristin.”

Ol diksonari tu oli givim plante defren mining we i mekem tingting blong man i fasfas. Long wan diksonari, tok ya “Kristin” i gat ten mining blong hem. Faswan long ol ten mining ya, hemia se, “bilif, no stap long skul blong Jisas Kraes,” mo laswan mining se, “wan man we fasin blong hem i gud mo i stret.” Yumi no sapraes we plante man oli faenem i hadwok blong eksplenem olsem wanem blong stap olsem wan Kristin.

Fasin We Man i Fri Blong Folem Prapa Tingting Blong Hem

Tede, ol man we oli talem se oli Kristin, nomata we oli stap sidaon long semfala stul insaed long jos, oli gat plante defren tingting long ol samting olsem Baebol we i kamaot long God, tijing blong evolusen,a fasin we jos i joen long politik, mo fasin blong tokbaot bilif wetem narafala. Plante taem, oli rao from ol kwestin long saed blong ol fasin olsem kilim pikinini long bel, man i slip wetem man mo woman i slip wetem woman, no man mo woman tufala i stap tugeta we tufala i no mared. I klia se samting ya i kamaot from we oli letem man i fri blong folem prapa tingting blong hem long ol bisnes ya.

Eksampel, niuspepa ya Christian Century i talem se, i no longtaem i pas, wan kot blong Protestan jos i sapotem wan jos blong “putumap wan elda we i stap slip wetem man, blong i kam lida blong jos ya.” Sam man blong mekem dip stadi long saed blong jos, olgeta tu oli talem se blong kasem sef, man i no nidim blong bilif long Jisas. Wan ripot insaed long niuspepa ya, The New York Times, i talem se, oli bilif se ol man Jiu, ol Muslim, mo ol narafala skul, “maet olgeta evriwan oli save go long heven [olsem ol Kristin].”

Traem tingbaot. Sipos wan man i talem se hem i wan man blong envaeronmen,b be nao hem i girap, i stap katemdaon plante tri, bambae yu talem se, “Man ya i stap giaman nomo se hem i wan man blong envaeronmen.” Yes, tok blong yu i stret. Taem yu skelem ol defren tingting blong ol man tede we oli talem se oli Kristin, bambae yu faenem se bilif blong olgeta i no sem mak mo i no laenap nating wetem tijing blong Man ya we i bin statem Kristin Skul, hemia Jisas Kraes. ?Samting ya i soem wanem long saed blong Kristin Skul blong olgeta?—1 Korin 1:10.

Fasin ya we ol man oli stap mekem blong jenisim Kristin tijing blong i laenap wetem tingting blong olgeta, i gat longfala histri. Biaen bambae yumi luk samting ya. ?Wanem tingting blong God mo Jisas Kraes long saed blong ol jenis olsem? Sipos wan jos i stap leftemap ol tijing we oli no kamaot long Kraes, ?i stret blong talem se jos ya i Kristin? Bambae yumi luk ansa blong tufala kwestin ya long nekis haf.

[Ol futnot]