?Yu Yu Holem Kristin Disisen Blong Yu Blong Givim Laef i Go Long God?

“Long wanem wok we yufala i mekem, be yufala i mas mekem long gladhat blong yufala, olsem we yufala i stap wok blong Masta blong yumi, yufala i no stap wok blong ol man nomo.”​—KOLOSI 3:23.

1. ?Long tingting blong plante man, “givim laef” i minim wanem?

?OLSEM wanem ol man blong spot oli kasem fulmak blong trening blong olgeta? Long tenis, futbol, basketbol, resis, no eni narafala spot, ol beswan man blong spot oli kasem fulmak blong olgeta nomo taem oli holemstrong long disisen ya we oli bin tekem. Fasin blong rerem bodi mo tingting, hemia i mas stap fasples long laef blong olgeta. Samting ya i laenap gud wetem fasin blong “givim laef,” we i minim se “wan man i putum ful laef blong hem long wan tingting no wan samting we hem i wantem folem.”

2. ?Long Baebol, “givim laef” i minim wanem? Eksplenem.

² ?Be, taem Baebol i tokbaot fasin ya blong “givim laef” hem i minim wanem? “Givim laef” i kamaot long wan Hibru veb we i minim “stap longwe; seraot long narafala samting; gowe.”a Long Isrel blong bifo, Hae Pris Eron i werem wan spesel hat we i gat wan “tabu brasplet” long hem we i saen blong soemaot se laef blong pris ya i blong God. Tabu brasplet ya oli wokem long gol we i klin gud, i beswan, mo toktok we oli raetem long saen ya, long Hibru lanwis, hemia se “Man ya, hem i tabu, i blong Hae God.” Saen ya i mekem hae pris i tingbaot oltaem se hem i mas lukaot gud blong no mekem wan samting we i save sakem doti long haos prea. ‘Tabu oel ya blong God i makemaot hem finis, se i hae pris blong God.’​—Eksodas 29:6; 39:30; Levitikas 21:​12, NW.

3. ?Disisen ya we yumi mekem blong givim laef i go long God i mas gat paoa long yumi olsem wanem?

³ Samting ya i soemaot se fasin blong givim laef long God i no wan samting we man i save pleplei wetem. Hem i wan disisen we man hem wan i wantem tekem blong makemaot hem olsem man blong wok blong God. Mo hemia i minim se bambae man ya i mas folem ol fasin we oli klin. Taswe, yumi kasem save from wanem aposol Pita i raetem tok ya we Jeova i talem, se: “Yufala i mas tabu, yufala i mas klin gud, olsem we mi mi tabu, mi klin gud.” (1 Pita 1:​15, 16) Sipos yumi Kristin we i givim laef finis i go long God, yumi gat bigfala wok nao i stap blong mekem. Wok ya hemia blong folem disisen ya we yumi bin tekem. Yumi mas holem bilif go kasem en. ?Be wanem samting i joen wetem Kristin disisen ya blong givim laef i go long God?​—Levitikas 19:2; Matiu 24:13.

4. ?Wanem ol step we yumi mas tekem, bifo we yumi givim laef blong yumi long God, mo yumi save skelem samting ya wetem wanem?

⁴ Taem yumi kasem stret save long saed blong Jeova God wetem ol stamba tingting blong hem, mo taem yumi kasem stret save long saed blong Jisas Kraes wetem ol wok blong hem we oli joen long ol stamba tingting ya, yumi wanwan i tekem disisen blong mekem wok blong God wetem olgeta hat, tingting, laef, mo paoa blong yumi. (Mak 8:34; 12:30; Jon 17:3) Yumi save tingbaot disisen ya olsem wan strong promes we yumi mekem blong givim fulwan laef blong yumi i go long God. Yumi no givim laef blong yumi long God from wan narakaen filing we i kasem yumi wantaem nomo. Hem i wan disisen we yumi tingting gud long hem fastaem, yumi bin prea from, mo yumi yusum paoa blong tingting blong yumi blong skelemgud. Taswe, hem i no wan disisen we i blong smoltaem nomo. Yumi no mekem olsem wan man we i stat blong brebrekem graon be nao i stop haf wei from we wok ya i strong tumas no from we hem i ting se taem blong tekem kakae long garen i stap longwe yet no maet i no stret taem blong hem yet. Tingbaot eksampol blong samfala we oli bin “holem stik blong brebrekem graon,” we i min se oli holemstrong long ol tiokratik wok nating se oli fesem hadtaem no nogat.​—Luk 9:​62, NW; Rom 12:​1, 2.

Oli No Lego Disisen Blong Olgeta

5. ?Olsem wanem Jeremaea i soemaot wan nambawan eksampol blong man we i givim laef i go long God?

⁵ Jeremaea i mekem wok blong profet long Jerusalem blong bitim 40 yia (647-607 B.K.T.b), mo wok ya i no isi nating. Hem i savegud se i gat sam samting we hem i no naf blong mekem. (Jeremaea 1:​2-6) Hem i nidim fasin no fraet mo stanap strong blong go aot evri dei mo toktok long ol stronghed man Juda. (Jeremaea 18:18; 38:​4-6) Be, Jeremaea i trastem Jeova God, we i givim paoa long hem. Taswe, hem i naf blong stap olsem wan trufala man we i givim laef blong hem blong mekem wok blong God.​—Jeremaea 1:​18, 19.

6. ?Wanem eksampol we aposol Jon i soem long yumi?

⁶ ?Olsem wanem long aposol Jon we i holem strong long bilif? Hem i wan we, taem hem i olfala, hem i go kalabus long aelan ya Patmos from we hem i stap “talemaot tok ya we God i talem, mo we Jisas i talemaot se i tru.” (Revelesen 1:9) Hem i stanap strong longtaem mo blong 60 yia hem i holemtaet Kristin disisen we hem i bin mekem. Hem i laef yet afta long taem ya we ol ami blong Rom oli spolem Jerusalem. Hem i kasem nambawan janis ya blong raetem wan buk blong Gospel, tri leta we tabu spirit i pusum hem blong raetem, mo buk blong Revelesen, we taem hem i raetem buk ya hem i luk wan vison blong faet blong Amagedon. Hem i kam slak taem hem i kasem save se bambae Amagedon i no kam long taem blong hem? ?Hem i lusum intres long wok blong God? Nogat. Jon i holemstrong long bilif gogo kasem we hem i ded. Hem i save se nating sipos “taem blong ol samting ya i kam klosap finis,” ol vison ya we hem i luk bambae oli kamtru long fiuja nomo.​—Revelesen 1:3; Daniel 12:4.

Sam Man Long Taem Blong Yumi We Oli Givim Ful Laef Long God

7. ?Olsem wanem wan brata i bin soemaot trufala fasin blong Kristin disisen ya blong givim laef i go long God?

⁷ Long taem blong yumi, plante handred Kristin we oli gat bilif, oli fasgud long disisen we oli bin tekem blong givim laef blong olgeta long God. Oli mekem olsem, nating se oli no laef blong luk taem we Amagedon i kam. Wan long olgeta ya hemia Ernest E. Beavor long Inglan. Hem i kam wan Witnes long 1939 long taem we Seken Bigfala Faet Blong Wol i stat. Hem i lego bigfala bisnes blong hem blong tekem ol foto, nao hem i statem wok blong prij fultaem. Hem i go kalabus blong tu yia from we, folem Kristin bilif blong hem, hem i no wantem joen long ami. Famle blong hem i sapotem gud hem, mo long 1950, tri long ol pikinini blong hem oli joen long Wajtaoa Baebol Skul blong Gilead, long New York, blong kasem trening olsem misinari. Brata Beavor i rili gat strong tingting blong mekem wok blong prij, taswe ol fren blong hem oli singaot hem se Ernie blong Amagedon. Hem i fasgud long disisen we hem i mekem blong givim laef blong hem long God. Go kasem taem we hem i ded long 1986, hem i stap talemaot yet se faet blong God, Amagedon, i klosap. !Yes, taem hem i givim laef blong hem long God hem i no mekem olsem we hem i saenem wan kontrak blong sam yia nomo!c​—1 Korin 15:58.

8, 9. (a) ?Long taem we Komanda Franco i rulum Spen, plante yangfala Witnes oli soemaot wan gudfala eksampol? (b) ?I stret blong tingbaot wanem kwestin?

⁸ Wan narafala eksampol blong fasin blong wok strong olwe, i kam long Spen. Long taem blong rul blong Komanda Franco (1939-1975), plante handred yangfala Witnes we oli givim laef blong olgeta finis long God, oli holemstrong long Kristin fasin ya blong no joen long ami. Plante long olgeta oli spenem ten, no bitim ten yia, long ol kalabus blong ami. Wan long ol Witnes ya, we nem blong hem Jesus Martin, i kaontem olgeta taem we hem i spenem long kalabus se i kasem 22 yia evriwan. Taem hem i stap long wan kalabus blong ami long Not Afrika, ol man oli kilim hem nogud. Ol taem ya oli no isi, be hem i no wantem nating blong lego bilif blong hem.

⁹ Plante taem ol yangfala man ya oli no save nating se bambae oli gofri samtaem no nogat, from we kot i jajem olgeta from plante samting. Nating se i olsem, olgeta ya oli holem strong long God mo oli no lusum strong tingting we oli gat blong prij taem oli stap kalabus. Taem ol samting long kantri ya i stat kam gud lelebet long 1973, plante long ol yangfala Witnes ya, we naoia oli bitim 30 yia finis, oli gofri long kalabus. Taem oli aot, oli gohed long wok blong prij, sam long olgeta oli kam ol spesel paenia mo ol elda we oli goraon blong visitim ol kongregesen. Oli holem disisen ya we oli mekem blong givim laef blong olgeta long God taem oli kalabus, mo bighaf blong olgeta oli stap gohed blong folem disisen ya kam kasem naoia.d ?Olsem wanem long yumi tede? ?Yumi stap folem Kristin disisen ya blong givim laef long God, olsem olgeta ya?​—Hibrus 10:​32-34; 13:3.

Stret Tingting Long Fasin Blong Givim Laef Long God

10. (a) ?Yumi mas tingbaot disisen ya blong givim laef i go long God, olsem wanem? (b) ?Jeova i tingbaot wok we yumi mekem long hem, olsem wanem?

¹⁰ ?Yumi tingbaot fasin blong givim laef long God mo mekem wok blong hem olsem wanem? ?Hem i faswan samting long laef blong yumi? Nomata wanem kaen laef we yumi gat, sipos yumi yangfala no olfala, sipos yumi mared no nogat, sipos yumi gat gud helt no yumi sik, yumi evriwan i save traehad, long beswan rod we yumi naf, blong folem Kristin disisen ya we yumi bin mekem blong givim laef blong yumi long God. Maet wan man i save prij fultaem olsem wan paenia, no wok long wan branj ofis blong Watch Tower Sosaeti, no maet hem i save kam wan misinari, no wok olsem elda we i visitim ol kongregesen. Defren olgeta, sam papa mama maet oli bisi tumas long famle blong olgeta, blong givim samting we oli nidim long saed blong laef mo long saed blong spirit. Aoa we oli spenem evri manis long wok blong prij maet i smol nomo taem yumi skelem wetem olgeta aoa we ol paenia oli mekem, be long ae blong Jeova, smol aoa ya i impoten. Tru ya, God i neva askem yumi blong mekem samting we yumi no save mekem. Aposol Pol i talem rul ya se: “Sipos yufala i glad blong givim, bambae God i glad blong tekem presen long ol samting nomo we yufala i gat. Hem i no save askem long yufala, blong yufala i givim ol samting we yufala i no gat.”​—2 Korin 8:12.

11. ?Yumi save kasem sef from wanem samting nomo?

¹¹ Nomata wanem samting we yumi mekem bambae yumi no save sevem yumi wan. Yumi kasem sef from we Jeova i soem gladhat long yumi tru long Kraes Jisas, Masta blong yumi. Pol i talem klia se: “Evriwan oli mekem nogud finis, mo oli stap afsaed olgeta long ol gudgudfala fasin blong God. Be long gladhat blong God, hem i stap givhan long olgeta. Hem i stap mekem olgeta oli stret man long fes blong hem, from we oli joen long Jisas Kraes we i pem rod finis, blong olgeta oli go fri.” Nating se i olsem, ol wok blong yumi oli impoten from we oli pruvum se yumi bilif long ol promes blong God.—Rom 3:23, 24; Jemes 2:​17, 18, 24.

12. ?From wanem i no stret blong skelem wok blong yumi wetem ol narafala?

¹² Yumi no nidim blong skelem wok blong yumi wetem narafala se hamas taem yumi spenem long wok blong prij, hamas buk yumi seremaot, no hamas Baebol stadi we yumi gat. (Galesia 6:​3, 4) Nomata wanem samting yumi mekem long Kristin wok blong yumi, yumi evriwan i mas rimemba ol tok ya blong Jisas se: “Taem yufala i mekem olgeta samting we hem i talem long yufala blong yufala i mekem, yufala i mas talem se, ‘Be yumi ya, yumi man blong wok nomo blong hem. I stret nomo blong yumi mekem olsem.’ ” (Luk 17:10) ?Yumi save talem se long laef blong yumi, yumi bin “mekem olgeta samting” ya finis we God i askem yumi blong mekem? No gat. Taswe kwestin i stap nao se, ?Wanem mak we yumi mas traehad blong kasem taem yumi mekem wok blong God?​—2 Korin 10:​17, 18.

Mekem Evri Dei i Spesel

13. ?Taem yumi stap folem disisen we yumi mekem blong givim laef i go long God, yumi nidim wanem?

¹³ Afta we Pol i givim advaes long ol waef, ol hasban, pikinini, papa mama, mo ol slef, hem i raetem se: “Long wanem wok we yufala i mekem, be yufala i mas mekem long gladhat blong yufala, olsem we yufala i stap wok blong Masta blong yumi, yufala i no stap wok blong ol man nomo. I gud yufala i save we Masta ya blong yumi bambae hem i givim pei long yufala, we hemia ol samting ya we hem i putumrere olgeta finis blong ol man blong hem. Prapa Masta we yufala i wok blong hem, hem i Kraes nomo.” (Kolosi 3:​23, 24) Yumi no mekem wok blong Jeova from we yumi wantem pulum ae blong ol man i kam long yumi. Yumi traem mekem wok blong God folem eksampol blong Jisas Kraes. Long sotfala taem ya we hem i spenem blong prij, hem i wok wetem tingting ya se dei blong Jeova i klosap.​—1 Pita 2:21.

14. ?Wanem woning we Pita i givim long saed blong ol las dei?

¹⁴ Aposol Pita i soemaot tu se hem i wok wetem ful paoa blong hem. Long seken leta blong hem, hem i givim woning se long ol las dei, bambae i gat sam man we oli save laf long ol Kristin​—hemia ol man blong apostasie mo ol man we bilif blong olgeta i no strong. Ol man ya oli folem tingting blong olgeta nomo, nao bambae oli stanemap ol kwestin long saed blong taem ya we Kraes bambae i kambak. Be, Pita i talem se: “Sam man oli ting se Masta blong yumi i stap tektaem tumas, i no mekem promes blong hem i kamtru kwik, be i no olsem. Hem i stap mekem tingting blong hem i longfala blong wet long yufala, from we hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta. Be Dei blong Masta blong yumi bambae i kam olsem we man blong stil i kam.” Yes, dei blong Jeova i sua blong kam. Taswe, impoten samting long laef blong yumi naoia, i blong meksua se bilif blong yumi i rili sua mo i strong yet long ol promes blong God.​—2 Pita 3:​3, 4, 9, 10.

15. ?Olsem wanem yumi save skelem olgeta wanwan dei blong laef blong yumi?

¹⁵ Sipos yumi wantem folemgud Kristin disisen blong givim laef blong yumi long God, yumi mas yusum olgeta dei blong yumi blong presem Jeova. ?Long en blong olgeta wanwan dei ya, yumi save luklukbak mo faenem sam samting we yumi bin mekem blong leftemap nem blong God mo blong talemaot gud nius blong Kingdom? Maet yumi mekem olsem wetem ol fasin blong yumi we oli klin, ol toktok blong yumi we oli leftemap tingting, no lav mo fasin kea we yumi soem long ol famle mo fren blong yumi. ?Long dei ya, yumi bin tekem janis blong serem Kristin hop blong yumi wetem ol narafala man? ?Yumi bin halpem wan man blong tingbaot ol promes blong God? I gud sipos evri dei yumi wokem wan gudfala samting we bambae i givhan long yumi long saed blong spirit. Long rod ya, i olsem we yumi stap hivimap ol gudgudfala samting long heven.​—Matiu 6:20; 1 Pita 2:12; 3:15; Jemes 3:13.

Holem Tingting i Stap Klia

16. ?Wanem ol rod we Setan i yusum blong traem mekem se yumi no moa strong blong holem disisen ya blong givim laef blong yumi long God?

¹⁶ Yumi laef long wan taem we ol samting oli stap kam strong moa long ol Kristin. Setan mo ol man blong hem oli stap mekem tingting blong olgeta man i fasfas blong oli no luksave wanem samting i gud mo wanem samting we i nogud, wanem fasin we i klin mo wanem fasin we i doti, wanem ol stret fasin mo wanem ol rabis fasin. (Rom 1:​24-28; 16:​17-19) Setan i yusum televisin no kompiuta blong mekem se i isi nomo long yumi blong karem doti i kam long hat mo tingting blong yumi. Kwiktaem nomo, tingting we yumi gat long saed blong spirit i no moa klia, no maet yumi no moa luksave ol trik blong Setan. Strong tingting we yumi gat blong folem Kristin disisen blong yumi blong givim laef i go long God, i save kam slak. Ale, sloslou, bambae yumi lego “stik ya blong brebrekem graon,” we i olsem ol nambawan fasin ya we God i laekem.​—Luk 9:​62, NW; Filipae 4:8.

17. ?Olsem wanem advaes blong Pol i save halpem yumi blong frengud oltaem wetem God?

¹⁷ Taswe, ol tok blong Pol, we hem i raetem i go long kongregesen blong Tesalonaeka, oli stret long taem blong yumi: “God i wantem we yufala i tabu, yufala i man blong hem, we yufala i no mekem trabol wetem woman no wetem man. Hem i wantem we yufala evriwan i lanem fasin ya we man i tekem woman blong hem long fasin we i klin gud, i blong ona nomo. Bambae yufala i no folem ol rabis fasin wetem woman we tingting blong yufala nomo i wantem, olsem we olgeta we oli no save God oli stap mekem.” (1 Tesalonaeka 4:​3-5) Kristin kongregesen i mas putumaot plante man mo woman from ol nogud fasin long saed blong seks. Ol man mo woman ya oli fogetem Kristin disisen ya we oli bin mekem blong givim laef i go long God. Oli letem fasin fren we oli gat wetem God, i kam slak gogo hem i no moa impoten tumas long laef blong olgeta. Be, Pol i talem se: ‘God i no singaot yumi blong yumi stap folem ol fasin we i no klin long fes blong hem. Hem i wantem blong yumi tabu, yumi man blong hem. Nao from samting ya, ol man we oli agens long ol tok ya, oli no agens long man nomo, oli agens long God ya, we i givim tabu spirit blong hem long yufala.’​—1 Tesalonaeka 4:​7, 8.

?Tingting Blong Yu i Stap Strong Blong Mekem Wanem?

18. ?Tingting blong yumi i mas strong blong mekem wanem?

¹⁸ ?Sipos yumi tinghevi long disisen we yumi mekem blong givim laef blong yumi i go long Jeova God, tingting blong yumi i mas strong long wanem? Yumi mas wantem blong gat wan tingting we i klin gud long saed blong ol fasin blong yumi mo Kristin minista wok blong yumi. Pita i talem se: “Tingting blong yufala i mas klin gud we i no stikim yufala. Nao taem sam man oli tok nogud blong agensem yufala, be oli save sem nomo from we oli stap tokbaot ol gudfala fasin blong yufala, we yufala i stap mekem from we yufala i folem Kraes.” (1 Pita 3:16, NW ) From Kristin fasin blong yumi, maet bambae yumi safa mo fesem hadtaem. Be, Kraes tu i safa mo fesem hadtaem from we hem i holem bilif mo i stap tru long God. Pita i talem se: “Taem Kraes i stap long wol ya, hem i harem nogud long bodi blong hem. Nao from samting ya, yufala tu i mas tekem sem tingting we hem i gat, blong mekem yufala i strong, from we ol man we oli stap harem nogud long bodi blong olgeta, oli no moa stap mekem sin.”​—1 Pita 4:1.

19. ?Yumi wantem ol man oli tokbaot yumi olsem wanem?

¹⁹ Yes, strong tingting we yumi gat blong folem Kristin disisen we yumi mekem blong givim laef i go long God, bambae i protektem yumi long ol trap blong wol ya blong Setan we i sik long saed blong spirit, tingting mo bodi. Be tu, strong tingting ya bambae i mekem se God i glad long yumi. Hemia wan samting we i moagud i winim olgeta samting we Setan mo ol man blong hem oli save givim. Taswe, i nogud sipos ol man oli talem se yumi lego lav ya we yumi gat fastaem, taem yumi jes harem trutok. I moagud sipos ol man oli tokbaot yumi olsem kongregesen blong Tuatira long faswan yia, se: “Mi mi save finis fasin blong yufala long Tuatira. Mi save we yufala i lavlavem yufala, mo yufala i bilif long mi. Mi save we yufala i stap givhan gud long ol man, mo mi save we tingting blong yufala i longfala, i no save foldaon. Mo mi save tu we wok blong yufala naoia i moa gud long wok ya we yufala i mekem fastaem.” (Revelesen 2:​4, 18, 19) Yes, i nogud yumi hafhaf nomo long saed blong disisen we yumi mekem blong givim laef blong yumi long God. Yumi mas ‘mekem wok blong Masta blong yumi, we tingting blong yumi i glad long hem oltaem,’ mo yumi mas wok strong go kasem en​—we i klosap nomo nao.​—Rom 12:11; Revelesen 3:​15, 16.

[Ol Futnot]

?Yu Yu Tingbaot?

• ?Disisen ya blong givim laef long God i joen wetem wanem?

• ?Wanem sam eksampol blong bifo mo long taem blong yumi, we ol man blong wok blong God oli bin soemaot long yumi?

• ?Wanem tingting we yumi mas gat long saed blong wok we yumi mekem long God?

• ?From disisen we yumi tekem blong givim laef long God yumi mas gat strong tingting blong mekem wanem?

[Tok blong pija long pej 15]

Jeremaea i holem bilif nating sipos ol man oli mekem i nogud tumas long hem

[Tok blong pija long pej 16]

Ernest Beavor i soem wan nambawan eksampol long ol pikinini blong hem long saed blong Kristin fasin blong wok strong

[Tok blong pija long pej 17]

Plante handred yangfala Witnes long ol kalabus blong Spen oli fasgud long God

[Tok blong pija long pej 18]

I gud sipos evri dei yumi wokem wan gudfala samting we i sas tumas long saed blong spirit