Wan Kwestin

?I stret blong talem se fasin sore blong Jeova i slakem stretfasin blong hem blong jajem man?

Samfala oli yusum tok ya, be i moa gud we yumi no yusum. ?From wanem? From we tok ya i givim tingting se fasin sore blong Jeova i save daonem no blokem stret fasin blong hem blong jajem man, olsem se sore blong hem i impoten moa i bitim fasin ya we i strong moa, hemia stretfasin blong jajem man. Be tingting ya i no stret.

Hibru tok we yumi tanem i kam “stretfasin blong jajem man” i save minim “jajmen” tu. I tru se stretfasin blong Jeova blong jajem man i save minim se hem i panisim man. Be i save minim tu se hem i sevem ol man we i stret blong hem i lukaot long olgeta. (Jenesis 18:​20-32; Aesea 56:1; Malakae 4:2) Taswe, yumi no mas lukluk stretfasin blong Jeova blong jajem man olsem we i strong tumas no we Jeova i nidim blong slakem fasin ya blong hem.

Hibru tok we oli tanem i kam “sore” i save minim holembak jajmen long wan man. Hem i save minim samting we man i mekem blong soemaot sore long narafala, mo blong givhan long man we i trabol.​—Dutronome 10:18; Luk 10:​29-​37.

Jeova God i gat tufala fasin ya evriwan, hemia stretfasin blong jajem man mo sore. (Eksodas 34:​6, 7; Dutronome 32:4; Ol Sam 145:9) Hem i stretgud olgeta long fasin blong jajem man mo long sore, mo tufala fasin ya oli joengud tugeta. (Ol Sam 116:5; Hosea 2:​19) Hem i skelemgud tufala fasin ya mo tufala i stret long tufala. From samting ya nao, sipos yumi talem se fasin sore blong Jeova i slakem stret fasin blong hem blong jajem man, yumi mas talem tu se stretfasin blong hem blong jajem man i save slakem fasin sore blong hem.

Aesea i talem profet tok ya se: “Jeova i stap sore yet long yufala, mo hem i wantem mekem i gud long yufala. Hem i stap rere yet blong i kaen long yufala, from we oltaem nomo, hem i stap jajem man [“jajem man long stret fasin,” The New English Bible].” (Aesea 30:​18, NW ) Long ples ya, Aesea i soemaot se stretfasin blong Jeova blong jajem man, hemia nao samting we i pulum hem blong soem sore. Be i no minim se sore blong hem i slakem no i blokem stretfasin blong hem blong jajem man. From we Jeova i gat stretfasin blong jajem man mo i gat lav, taswe hem i stap soemaot sore.

Jemes i raetem long buk blong hem long Baebol se: “Fasin blong sore long man i moagud bigwan bitim fasin blong jajem man.” (Jemes 2:​13b, NW ) Long ol vas raonabaot, Jemes i no stap tokbaot Jeova be ol Kristin we oli soemaot sore​—maet, long olgeta we oli trabol mo we oli pua. (Jemes 1:27; 2:​1-9) Taem Jeova i jajem ol man ya we oli soem sore, bambae hem i tingbaot fasin we oli soemaot, mo bambae hem i sore long olgeta, i yusum paoa blong sakrefaes blong Pikinini blong hem blong fogivim olgeta. From samting ya, fasin blong olgeta blong soemaot sore i winim jajmen we maet i stret blong oli kasem.​—Ol Proveb 14:21; Matiu 5:7; 6:​12; 7:2.

Taswe, i no stret blong talem se fasin sore blong Jeova i slakem jajmen blong hem, olsem se fasin blong hem blong jajem man i strong tumas we i nidim blong daonem paoa blong hem wetem sore. Tufala fasin ya blong Jeova, tugeta oli stretgud. Hem i skelemgud tufala mo hem i skelem ol narafala fasin blong hem tu, olsem lav mo waes fasin. Olgeta fasin ya evriwan oli wok tugeta, long rod we i stretgud.