Wan Kwestin
?Jeova i tokbaot hu, taem hem i talem tok ya “wan long yumi” long Jenesis 3:22?
Jeova i stap tokbaot hem wan mo stret Pikinini ya blong hem, wan nomo we hem i gat, i se: “Naoia, man ya i kam olsem wan long yumi, from we hem i save ol fasin we i nogud mo ol fasin we i gud.” (Jenesis 3:22) Bambae yumi skelem from wanem yumi talem olsem.
Jeova i talem ol tok ya afta we hem i talemaot panis long faswan man mo woman. Sam man oli kasem mining blong ol tok ya “wan long yumi” se hem i wan fasin blong toktok we ol haeman oli stap yusum. Eksampol, maet wan king long wol ya i yusum tok ya se “mifala i no glad,” nating se hem i stap tokbaot hem wan nomo se hem i no glad. Be long saed blong Jenesis 1:26 mo 3:22, Donald E. Gowan we i stadi long saed blong Baebol i talem se: “Plante man oli traem talem mining blong ol tok ya, be O[lfala] T[esteman] i no sapotem bighaf blong ol mining ya olsem olgeta ya se: ‘mifala’ i wan fasin blong toktok blong ol haeman olsem ol king, no ‘mifala’ i wan tok we wan man i yusum taem hem i stap tingting gud long wan samting fastaem blong i mekem wan disisen, no i minim we wan man i tingbaot evri haf blong wan samting, no i minim se plante man insaed long wan God nomo. . . . I no gat wan long ol tok ya we oli laenap gud wetem 3:22, we i talem se ‘wan long yumi.’”
?Yumi save ting se Jeova i stap tokbaot Devel Setan, we i statem fasin ya blong jusum samting we hem nomo i ting se i ‘nogud mo i gud’ mo we i bin pulum faswan man mo woman blong folem fasin ya? Nogat. Long ples ya Jeova i yusum tok ya “wan long yumi.” Setan i no moa stap long medel blong ol gudfala enjel blong Jeova, taswe hem i no save joen wetem ol man we oli blong Jeova.
?Ating God i stap tokbaot ol gudfala enjel blong hem? Yumi no save talem stret se i olsem. Be, ol tok we oli yusum long Jenesis 1:26 mo 3:22 we i sem mak i save givhan long yumi. Long Jenesis 1:26, Jeova i talem se: “I gud yumi mekem man, mo i gud yumi mekem we hem i tekem fasin blong yumi, i olsem yumi.” ?Hem i talem ol toktok ya long hu? Aposol Pol i tokbaot spirit man ya we i kam long wol olsem wan man we i stretgud olgeta hemia Jisas, i se: “Hem i . . . fasbon long ol samting we God i wokem. . . . From we tru long hem, God i wokem olgeta narafala samting long heven mo long wol, olgeta samting we yumi save luk mo olgeta samting we yumi no save luk, olgeta we i gat jea blong king, ol Masta, ol gavman, mo ol paoa. Olgeta narafala samting, God i wokem olgeta tru long hem, mo oli blong hem tu.” (Kolosi 1:15, 16, NW) Yes, i stret nomo blong talem se long Jenesis 1:26, Jeova i stap toktok long Pikinini ya blong hem, wan nomo we hem i gat, we hem i “nambawan man blong wok blong hem” mo we i stap wetem Papa taem hem i wokem heven mo wol ya. (Ol Proveb 8:22-31, NW) Semfala tok ya we yumi ridim long Jenesis 3:22 i soemaot se long ples ya tu, Jeova i stap toktok long hemia we i klosap moa long hem, wan Pikinini ya nomo we hem i gat.
Pikinini ya blong God, wan nomo we hem i gat, i save long “ol fasin we i nogud mo ol fasin we i gud.” From we hem i stap klosap long Jeova blong longtaem, hem i lanem gud ol rul, ol mak, mo ol tingting we Papa blong hem i gat. Jeova i luksave se Pikinini blong hem i save gud long ol samting ya mo i stap tru long olgeta. Maet from samting ya nao, Jeova i givim sam wok long Jisas blong hem wan nomo i save lukaot long ol wok ya we hem i no nid blong askem Jeova blong talem long hem wanem we hem i mas mekem. Taswe Pikinini ya i save, mo i gat raet tu, blong talem wanem samting i nogud mo wanem i gud. Be Jisas i defren olgeta long Setan mo Adam mo Iv, from we hem i neva putumap wan rul we i go agensem ol rul blong Jeova.