‘Jeova i Stap Givhan Long Mi’

Taem Waet Hea i Kam Olsem ‘Wan Hat Blong King Blong Flasem Hed Blong Man’

MURIEL we i gat 101 yia i talem se: “Hemia beswan laef ya.” Theodoros, we i gat 70 yia, i talem se: “!Hemia wan nambawan blesing!” Maria we i gat 73 yia i talem se: “Mi rili yusumgud laef blong mi.” Trifala ya oli spenem ful laef blong olgeta long wok blong Jeova.

I gat fulap olfala olsem trifala ya we oli stap wosipim Jeova long fulwol. Nating se oli kam olfala mo helt blong olgeta i kam nogud, mo sam narafala nogud samting i hapen long laef blong olgeta, be oli gohed blong mekem wok blong God wetem ful laef blong olgeta. Insaed long Kristin kongregesen, yumi respektem ol olfala ya from gudfala eksampol blong olgeta blong obei long Jeova oltaem. Nating se ol samting long laef blong olgeta maet i blokem olgeta blong oli no save mekem plante wok, be Jeova i tinghae long wok blong olgeta.a​—2 Korin 8:12.

Buk blong Ol Sam i talem wan impoten poen long saed blong laef we ol olfala oli save kasem sipos oli obei long God. Oli save kam olsem wan bigfala tri we, i olfala finis, be i stap karem frut yet. Man blong raetem Sam i tokbaot ol olfala we oli obei long God i se: “Olgeta oli strong olsem olfala tri we lif blong hem i stap grin oltaem mo i stap karem plante frut yet.”​—Ol Sam 92:14.

Samfala maet oli fraet se ol man bambae oli sakemaot olgeta mo bambae oli ting nating long olgeta taem oli kam olfala from we oli no moa strong. Deved i krae long God i se: “Naoia mi mi kam olfala. Plis yu no tanem baksaed long mi. Naoia mi mi no moa strong. Plis yu no lego mi.” (Ol Sam 71:9) ?Wanem i mekem se wan olfala i no kam slak be i gohed blong karem frut long laef blong hem? Hemia taem olfala ya i wokem stret fasin olsem we God i tijim hem blong wokem. Man blong raetem Sam i singsing se: “Ol man we fasin blong olgeta i stret. . . . Bambae oli gru gud olsem pamtri.”​—Ol Sam 92:​12.

Olgeta we oli stap bisi long wok blong God, bambae oli gohed blong karem gudfala frut long laef blong olgeta taem oli kam olfala. Yes, samting we oli mekem long laef blong olgeta no long laef blong ol narafala, i karem plante gudfala frut olsem ol sid we man i sakem mo oli gru i kam fulap insaed long wan bigfala garen. (Galesia 6:7-10; Kolosi 1:10) Tru ya, ol man we oli westem laef blong olgeta blong ronem ol sas samting mo we oli no wantem luksave rod blong God, taem oli kam olfala, maet oli no gat plante samting we i pulum ol narafala blong respektem olgeta.

Stret fasin i olsem samting we i mekem se ol olfala oli naes mo buk blong Ol Proveb i tokbaot samting ya tu i se: “Waet hea i naes olsem hat blong King blong flasem hed blong man, sipos man ya i stap folem wei blong stret fasin.” (Ol Proveb 16:​31, NW ) Yes, stret fasin i soemaot samting we i stap insaed long hat blong man. Sipos yumi folem stret fasin oltaem long laef blong yumi, samting ya bambae i karem bigfala respek i kam long yumi. (Levitikas 19:32) Wan olfala we i gat waet hea, mo we hem i waes mo i gat ol nambawan fasin, ol man oli ona long hem.​—Job 12:12.

Jeova i glad tumas long wan man we i yusum laef blong hem blong mekem wok blong Jeova. Baebol i talem se: “Mi mi God blong yufala, mo mi bambae mi stap lukaot long yufala yet, gogo hea blong yufala i kam waet. Mi mi mekem yufala, mo mi bambae mi holem yufala i stap gud. Mi bambae mi stap givhan long yufala, mo mi bambae mi stap sevem yufala.” (Aesea 46:4) !I gud tumas blong save se Papa blong yumi long heven we i gat lav bambae i lukaotgud mo i givhan long ol gudfala man blong hem taem we oli olfala!​—Ol Sam 48:14.

Taem wan man i spenem ful laef blong hem blong mekem wok blong Jeova, Jeova i glad tumas long man ya, be yumi tu yumi mas soem respek long man ya. Taem yumi gat tingting olsem Jeova, yumi tinghae long ol olfala brata sista blong yumi. (1 Timoti 5:1, 2) I gud yumi lukaot rod blong soem Kristin lav taem yumi lukaotgud long olgeta.

Wokbaot Long Rod Blong Stret Fasin Taem Yu Olfala

Solomon i soem long yumi se: “Long rod blong stret fasin i gat laef.” (Ol Proveb 12:​28, NW ) Taem man i olfala, hemia i no blokem hem blong folem rod ya blong stret fasin long laef blong hem. Long Moldova, wan olfala man we i gat 99 yia blong hem i bin spenem yangtaem blong hem blong sapotem rul blong Komunis. Hem i tinghae long hem wan from we hem i bin toktok wetem wan lida blong ol Komunis we ol man oli save gud hem, nem blong hem Vladimir Ilyich Lenin. Be, taem ol Komunis oli foldaon, laef blong olfala ya i no moa gat mining mo i olbaot nomo. Wan dei ol Witnes blong Jeova oli soem long hem se Kingdom blong God nomo i naf blong finisim olgeta trabol blong ol man, ale, olfala ya i intres mo i kam wan studen we i laekem tumas ol tok blong Baebol. Sore tumas, hem i ded bifo we hem i gat janis blong tekem baptaes blong kam wan man blong Jeova.

Wan olfala woman long Hungary, i gat 81 yia blong hem taem hem i lanem ol tingting blong God long saed blong gudfala fasin. Nao, hem i luksave se hem i mas mared long man we hem i laef wetem hem blong plante yia finis. Woman ya i mekem tingting blong hem i strong, nao hem i eksplenem tingting blong Baebol we hem i lanem, long man ya we hem i laef wetem. Woman ya i sapraes tumas mo i glad tu, taem man ya i talem se i agri blong mared wetem hem. Afta we tufala i mared, hem i gru kwiktaem long saed blong spirit. Afta eit manis nomo we hem i stap stadi, hem i kam wan pablisa we i no baptaes, mo smoltaem biaen hem i tekem baptaes. !Yes i tru tumas we stret fasin i rili save flasem ol olfala!

Yes, ol Kristin we oli obei long God oli save sua se God i intres long olgeta. Jeova i no save lego olgeta we oli stap tru long hem. Hem i promes se bambae hem i lukaotgud long olgeta, i halpem olgeta mo i gohed blong givhan long olgeta taem oli kam olfala. Mo olgeta oli agri wetem tok ya blong man blong raetem Sam se: ‘[Jeova] i stap givhan long mi.’​—Ol Sam 121:2.

[Futnot]

[Tok blong makem poen pija long pej 9]

“Waet hea i naes olsem hat blong King blong flasem hed blong man, sipos man ya i stap folem wei blong stret fasin.”​—Ol PROVEB 16:​31, NW

[Bokis blong pija long pej 8]

JEOVA I KEA LONG OL OLFALA WE OLI WOK BLONG HEM

“Long fored blong wan man we i gat waet hea yu mas stanap, yu mas soem respek long wan olfala man.”​—Levitikas 19:​32, NW.

“Mi bambae mi stap lukaot long yufala yet, gogo hea blong yufala i kam waet. Mi mi mekem yufala, mo mi bambae mi holem yufala i stap gud.”​—Aesea 46:4.