‘Talemaot Long Ol Man We Oli Stap Long Kalabus Se Oli Save Kam Fri’
TAEM Jisas i statem wok blong hem long wol ya, hem i talem se wan haf blong wok blong hem hemia blong ‘talemaot long ol man we oli stap long kalabus se oli save kam fri.’ (Luk 4:18) Blong folem eksampol blong Masta blong olgeta, ol trufala Kristin oli talemaot gud nius blong Kingdom long “olgeta man [“olkaen man,” NW] ,” oli mekem olgeta i kam fri long kalabus long saed blong spirit mo halpem olgeta blong gat wan laef we i gud moa.—1 Timoti 2:4.
Tede, ol Kristin ya oli talemaot gud nius long ol man we oli go kalabus from we oli mekem trabol mo oli wantem tumas blong kam fri long saed blong spirit. I gud yu ridim ripot long saed blong wok blong prij we ol Witnes blong Jeova oli mekem long ol kalabus long Yukren mo ol narafala ples long Yurop.
Olgeta We Fastaem Oli Tekem Drag Oli Jenis i Kam Ol Kristin Man
Serhiia i spenem 20 yia long ol 38 yia blong hem long kalabus. Hem i finisim skul blong hem tu long kalabus. Hem i talem se: “Plante yia i pas finis, mi go long kalabus from we mi kilim man i ded be mi gat sam moa yia yet blong spenem long kalabus. Long kalabus mi mekem olsem we mi bos long ol narafala, ale ol narafala presina oli fraet long mi.” ?Olsem wanem? ?Samting ya i mekem se hem i fri? Nogat. Blong plante yia, Serhii i slef blong drag, alkol mo tabak.
Afta, wan presina i serem trutok blong Baebol wetem Serhii. Trutok ya i olsem wan laet long wan ples we i tudak. Sam manis biaen, hem i lego drag, i kam wan man blong talemaot gud nius, mo i baptaes. Naoia Serhii i mekem wok blong Jeova fultaem long kalabus. Hem i halpem seven man blong brekem loa blong oli jenisim fasin blong olgeta mo kam ol brata blong hem long saed blong spirit. Sikis long olgeta ya oli aot long kalabus finis be Serhii i gohed blong stap long kalabus. Nating se i olsem, hem i no kros be hem i glad se hem i save halpem ol narafala blong kam fri long saed blong spirit.—Ol Wok 20:35.
Wan long ol studen blong Serhii, we i stap long kalabus, hemia Victor, wan man we bifo hem i stap tekem drag. Afta we Victor i aot long kalabus, hem i gohed blong gru long saed blong spirit mo biaen hem i go long Ministeriol Trening Skul long Yukren. Naoia hem i wan spesel paenia long Moldova. Victor i talem se: “Mi stat smok taem mi gat 8 yia, mi dring ol strong dring taem mi gat 12 yia mo mi yusum drag taem mi gat 14 yia. Mi wantem jenisim laef blong mi be ol traehad we mi mekem i no wok nating. Ale long 1995, jes afta we mi mo waef blong mi i plan blong ronwe long ol rabis fren blong mi, wan man we i gat sik long tingting blong hem i kilim waef blong mi i ded. Laef blong mi i kam nogud olgeta. Mi gohed blong askem ol kwestin se, ‘?Wehem waef blong mi? ?Wanem i hapen long man we i ded?’, be mi no save faenem ansa long ol kwestin ya. Mi tekem plante moa drag blong mi save fogetem ol wari blong mi. Ol polis oli arestem mi mo oli putum mi long kalabus blong faef yia from mi stap salem ol drag. Long kalabus, Serhii i halpem mi blong faenem ol ansa blong ol kwestin blong mi. Plante taem mi traem blong lego drag be naoia wetem help blong Baebol, mi winim fasin ya. !Tok blong God i rili gat paoa!”—Hibrus 4:12.
Ol Prapa Man Blong Brekem Loa Oli Jenis
Vasyl i neva yusum drag be oltaem hem i go long kalabus. Hem i eksplenem se: “Mi mi joen plante long kik boksing. Mi trenem mi wan blong faetem ol man be mi no putum wan mak long bodi blong olgeta.” Vasyl i yusum raf fasin ya blong stilim samting blong ol man. Hem i talem se: “Mi go long kalabus tri taem mo samting ya i mekem se waef blong mi i divos long mi. Long namba tri taem we mi go long kalabus mi stap faef yia, mo long taem ya nao mi stat ridim sam buk blong ol Witnes blong Jeova. Samting ya i pulum mi blong ridim Baebol. Nating se i olsem, mi joen yet long spot we mi laekem tumas hemia kik boksing.
“Be, afta sikis manis we mi ridim Baebol, wan samting i jenis long laef blong mi. Taem mi winim wan faet long kik boksing mi no moa glad bigwan olsem bifo. Ale mi stat blong mekem laef blong mi i laenap wetem ol tok blong Aesea 2:4 mo mi luksave se sipos mi no jenisim tingting blong mi bambae mi spenem ful laef blong mi long kalabus. Taswe mi sakemaot ol samting we mi stap yusum blong mekem kik boksing mo mi stat blong jenisim ol fasin blong mi. I no isi blong mekem olsem, be fasin blong prea mo tingting dip i halpem mi bigwan blong sakemaot fasin ya we mi bin gat longtaem finis. Samtaem, mi krae mo mi askem long Jeova blong i givim paoa long mi blong mi sakemaot fasin ya we i holemtaet mi. Biaen mi winim ol rabis fasin ya.
“Afta we mi kamaot long kalabus, mi joen wetem famle blong mi bakegen. Naoia mi wok long wan maen blong digim jakol. Wok ya i givim inaf taem long mi blong joen tugeta long wok blong prij wetem waef blong mi mo mekem wok blong mi insaed long kongregesen.”
Mykola mo ol fren blong hem oli stil insaed long plante bang long Yukren. From samting ya hem i go long kalabus blong ten yia. Bifo we hem i go long kalabus, hem i bin go long jos wan taem nomo blong lukluk ol samting insaed long jos we biaen hem i save gobak mo stilim ol samting ya. Plan blong hem i no kamtru be wanem we Mykola i luk long taem ya i mekem hem i ting se Baebol i wan buk we i fulap long ol stori blong mekem man i les nomo, from we oli tokbaot ol pris blong Otodoks jos, ol kandel mo ol holide blong jos. Hem i talem se: “Mi stat blong ridim Baebol be mi no rili save from wanem mi mekem olsem. !Mi sapraes blong luk se samting we i stap long buk ya i defren olgeta long wanem we mi bin tingbaot!” Mykola i askem blong stadi Baebol mo i baptaes long 1999. Naoia hem i wan man blong givhan we tingting blong hem i stap daon. !Taem yu luk hem bambae yu faenem se i had blong bilif se bifo, man ya i stap yusum masket blong stil long ol bang!
Vladimir i kasem jajmen ya blong ded. Taem hem i stap wet blong oli kilim hem, hem i prea long God mo i mekem promes blong mekem wok blong God sipos oli no kilim hem i ded. Smoltaem biaen, loa i jenis mo oli talem se bambae hem i spenem ful laef blong hem long kalabus. Blong holem promes blong hem, Vladimir i stat blong lukaot trufala skul. Hem i joen long wan kos tru long leta nomo mo i kasem wan setifiket blong Adventis jos, be hem i no rili haremgud.
Be afta we Vladimir i ridim Wajtaoa mo Wekap magasin long laebri blong kalabus, hem i raet i go long branj ofis blong ol Witnes blong Jeova long Yukren mo i askem blong wan man i save kam visitim hem. Taem ol brata blong Yukren oli visitim hem, Vladimir i mekem wok finis olsem wan Witnes, hem i stap prij long kalabus. Brata ya i givhan long hem blong kam wan pablisa blong Kingdom. Taem mifala i raetem stori ya, Vladimir mo seven narafala long kalabus ya oli stap wet blong oli save tekem baptaes. Be i gat wan problem i stap. Olgeta we oli spenem ful laef blong olgeta long kalabus oli mas stap wanples mo long semtaem ol gad oli seraotem olgeta folem jos blong olgeta. Taswe Vladimir i stap long wan rum wetem ol narafala presina we olgeta oli stadi Baebol finis. ?Bambae oli prij long hu nao? Ale, oli prij long ol gad blong kalabus mo oli raetem leta blong prij long narafala man.
Nazar i stap long Yukren mo i muv i go long Jek Ripablik. Long ples ya hem i joen long wan grup blong ol stilman. From fasin ya hem i go long kalabus blong tri mo haf yia. Taem hem i stap long kalabus, hem i lesin long wan Witnes blong Jeova we i blong taon ya Karlovy Vary. Biaen hem i lanem trutok mo i jenisim fasin blong hem fulwan. Wan long ol gad blong kalabus i luk we fasin blong Nazar i jenis mo i talem long ol fren blong Nazar se: “Sipos yufala evriwan i olsem man Yukren ya, bambae mi jenisim wok blong mi stret.” Wan narafala gad i talem se: “Ol Witnes blong Jeova ya oli rili gat save. Man blong brekem loa i kam long kalabus be taem hem i kamaot, hem i wan gudfala man.” Naoia Nazar i gobak finis long ples blong hem. Hem i lanem wok blong kapenta mo biaen hem i mared. Hem mo waef blong hem oli mekem wok blong Jeova fultaem. !Nazar i glad tumas we ol Witnes oli save visitim ol man long ol kalabus!
Luksave Wok Blong Olgeta
I no ol presina nomo we oli gat fasin tangkiu from wok we ol Witnes blong Jeova oli mekem. Miroslaw Kowalski, wan man we i toktok long bihaf blong ol man blong wan kalabus long Polan, i talem se: “Mifala i laekem tumas taem [ol Witnes blong Jeova] oli visitim ol man long kalabus. Ol samting we i kamaot long laef blong sam presina oli nogud tumas. Klosap oltaem ol man oli mekem i nogud long ol presina ya. . . . Help we [ol Witnes blong Jeova] oli givim i impoten tumas from we mifala i sot long ol man blong wok mo blong tijim ol man.”
Wan man we i lukaot long wan narafala kalabus long Polan i raet i go long branj ofis blong ol Witnes blong Jeova long kantri ya mo i askem blong ol Witnes oli visitim moa ol presina long kalabus we hem i lukaot long hem. ?From wanem hem i talem olsem? Hem i eksplenem se: “Plante long ol visit ya we ol Witnes oli mekem, oli halpem ol presina blong oli gat ol nambawan fasin mo blong blokem ol faet bitwin olgeta.”
Wan niuspepa long Yukren i tokbaot wan presina we tingting blong hem i bin foldaon bigwan mekem se klosap hem i kilim hem wan i ded, be biaen ol Witnes blong Jeova oli halpem hem. Niuspepa ya i talem se: “Naoia man ya i haremgud bakegen long filing blong hem. Hem i folem ol rul blong kalabus mo hem i wan gudfala eksampol blong ol narafala presina.”
Ol Blesing Afsaed Long Kalabus
Wok blong ol Witnes blong Jeova i no karem blesing nomo insaed long ol kalabus. Nogat. Ol blesing oli gohed yet afta we ol presina oli aot long kalabus. Tingbaot wanem we Brigitte mo Renate tufala i bin mekem. Blong sam yia, tufala i bin halpem sam woman presina. Niuspepa ya Main-Echo Aschaffenburg blong Jemani i tokbaot tufala ya i se: “Blong tri kasem faef manis tufala i lukaot long ol presina ya afta we oli aot long kalabus, tufala i leftemap tingting blong olgeta blong faenem wan mining blong laef. . . . Ol polis oli bin jusumaot tufala olsem ol woman blong givim ripot long olgeta evridei. . . . Tufala i frengud mo storiangud wetem ol man we oli wok long kalabus.” Plante woman oli givim laef blong olgeta i go long Jeova from wok blong ol Witnes ya.
Ol polis tu oli haremgud from ol Baebol stadi we ol Witnes blong Jeova oli mekem long ol kalabus. Eksampol, Roman i wan haeman blong ami long wan kalabus long Yukren mo hem i stadi long tingting mo fasin blong man. Taem ol Witnes oli prij long hem, hem i agri blong stadi Baebol. Afta hem i lanem se ol Witnes oli no gat raet blong luk ol presina long kalabus we hem i wok long hem. Ale hem i askem man we i lukaot long ol presina sipos hem i save yusum Baebol taem hem i stap wok wetem ol presina. Man ya i agri mo raonabaot ten presina oli soem intres long trutok. Roman i gohed oltaem blong serem save we hem i gat long Baebol wetem ol presina ya mo traehad blong hem i karem gudfala frut. Taem ol presina ya oli kamaot long kalabus, sam long olgeta oli gohed gud long saed blong spirit mo oli baptaes. Taem Roman i luk we Tok blong God i gat paoa olsem, hem i gohed gud moa long stadi blong hem. Roman i lego wok blong hem mo i gohed blong mekem wok blong serem trutok blong Baebol. Naoia hem i joen long wok blong prij wetem wan man we i bin wan presina bifo.
Wan prisina i raetem se: “Long ples ya mifala i haremgud from Baebol, ol buk we oli tokbaot Baebol mo Baebol stadi tu.” Ol tok ya oli soemaot we sam kalabus oli nidim ol buk we oli tokbaot Baebol. Wan kongregesen long Yukren i givim ripot long saed blong wok blong tijim man long Baebol we ol Witnes oli mekem long wan kalabus i se: “Ol haeman blong kalabus ya oli glad we mifala i stap givim ol buk long olgeta. Mifala i givim ol buk wetem 60 kopi blong evri Wajtaoa mo Wekap.” Wan narafala kongregesen i raetem se: “Mifala i lukaot long wan kalabus we i gat 20 smol laebri long hem. Long wanwan laebri, mifala i putum ol buk blong mifala. I nidim blong mifala i karem 20 katen blong buk evriwan blong mekem olsem.” Long wan kalabus, ol gad oli putumgud evri magasin blong yumi i stapgud wanples long laebri. Long rod ya, ol presina oli kasem evri kopi blong ol magasin.
Long 2002, branj ofis blong Yukren i putumap wan dipatmen we wok blong hem i blong kasem ol leta we oli kam long ol presina mo blong sanem ol buk i go long olgeta. Kasem naoia, dipatmen ya i lukaot long klosap 120 kalabus mo i askem sam kongregesen blong lukaot long ol kalabus ya. Evri manis, oli kasem klosap 50 leta blong ol presina mo plante long olgeta oli askem ol buk mo Baebol stadi. Branj ofis i sanem ol buk, ol magasin mo ol buklet long ol presina ya go kasem we oli faenem wan brata we i naf blong go visitim olgeta.
Aposol Pol i raet i go long ol Kristin se: “Yufala i mas tingbaot ol man we oli stap long kalabus.” (Hibrus 13:3) Long ples ya Pol i tokbaot olgeta we oli go kalabus from bilif blong olgeta. Tede, ol Witnes blong Jeova oli tingbaot ol presina taswe oli visitim ol kalabus mo oli “talemaot long ol man we oli stap long kalabus se, ‘Yufala i save go fri.’”—Luk 4:18.
[Futnot]
a Mifala i jenisim sam nem long haf ya.
[Tok blong pija long pej 9]
Kalabus ya L’viv long Yukren
[Tok blong pija long pej 10]
Mykola
[Tok blong pija long pej 10]
Vasyl wetem waef blong hem Iryna
[Tok blong pija long pej 10]
Victor