Wan Kwestin
?Waes man ya blong bifo i minim wanem taem i talem se hem i faenem “wan man nomo long wan taosen man” be i no gat “wan woman”?—Prija 7:28, NW.
Blong kasem save stret mining blong vas ya, fastaem yumi mas savegud tingting blong God long saed blong ol woman. Baebol i tokbaot Rut we i waef blong boe blong wido woman ya Nomi, se hem i “wan gudfala woman.” (Rut 3:11) Ol Proveb 31:10 i talem se praes blong wan gudfala waef “i antap we i antap, i winim praes blong ol flas ston ya perel.” Oraet, be King Solomon blong Isrel bifo i minim wanem taem hem i talem se: “Long wan taosen man, mi faenem wan man nomo we i tru, be i no gat wan woman nating we i tru.”—New International Version.
Ol vas raonabaot oli soemaot se ol woman long taem blong Solomon oli gat ol fasin we i nogud. (Prija 7:26) Maet ol woman blong narafala kantri we oli mekem wosip long Bal, oli gat bigfala paoa long olgeta man long taem ya. King Solomon tu i letem ol waef blong hem we oli blong narafala kantri oli pulum hem. Baebol i talem se: “Hem i tekem seven handred woman we oli dota blong ol king, oli kam mared long hem, mo i gat tri handred narafala woman blong hem bakegen. Ol woman ya blong hem oli stap pulum hem i gowe long Hae God,” blong go mekem wosip long ol narafala god. (1 King 11:1-4) Ol man tu oli gat ol nogud fasin taswe i had blong faenem wan stret man long ol taosen man mo klosap se i nogat wan nating. Solomon i talem se: “Mi faenemaot se taem God i mekem yumi, yumi stret nomo, be yumi nomo, yumi stap mekem laef blong yumi i paspas olbaot.” (Prija 7:29) Vas ya i tokbaot olgeta man long wol, i no blong skelem man wetem woman. Taswe, taem yumi ridim tok blong Solomon long Prija 7:28, yumi mas tingbaot we hem i stap tokbaot fasin blong laef blong olgeta man long taem blong hem.
Be maet vas ya i minim wan narafala samting tu. Maet hem i wan profet tok, from we neva wan woman i obei long Jeova long fasin we i stretgud olgeta. Be, i gat wan man yes, we i bin mekem olsem, hemia Jisas Kraes.—Rom 5:15-17.
[Tok blong pija long pej 18]
“Wan man nomo long wan taosen man”