“Luklukgud Long Wok Blong Masta We Yu Agri Finis Blong Mekem”
‘Luklukgud long wok blong Masta we yu agri finis blong mekem, blong bambae yu save finisimgud wok ya.’—KOL. 4:17, NW.
1, 2. ?Wanem wok we ol Kristin oli mas mekem blong givhan long ol narafala man?
YUMI gat wan wok blong mekem long ol man we oli stap raonabaot long yumi, mo yumi mas tinghevi long wok ya. Ol desisen we oli mekem naoia oli save lidim olgeta blong kasem laef no ded long taem blong “bigfala trabol.” (Rev. 7:14) Tabu spirit i pulum man we i raetem Ol Proveb blong talem se: “Sipos ol man oli wantem kilim wan man i ded, be i no stret nating blong hem i ded, yu yu no mas fraet blong go sevem hem.” !Tok ya i gat bigfala mining! Sipos yumi no mekem wok ya blong givim woning long ol man mo talemaot tufala rod we oli save jusum, nao God i jajem olgeta se oli mas ded, be ded blong olgeta i fol blong yumi nomo. Vas ya i gohed olsem: “Maet yu save talem se, ‘!Hemia i no bisnes blong mi ya!,’ be Hae God i save, mo hem i stap skelem tingting blong yu, blong save from wanem yu stap talem olsem. Hem i stap lukluk yu, mo i savegud yu. Mo bambae hem i givim pei long yu, stret long mak blong fasin we yu yu mekem.” Yes, ol man blong Jeova oli no save talem se denja we ol man oli fesem “i no bisnes” blong olgeta.—Prov. 24:11, 12.
2 Long tingting blong Jeova, laef i wan samting we i sas we i sas. Hem i talem long ol man blong hem se oli mas mekem evri samting we oli naf blong mekem blong sevem laef blong ol man. Evri man blong wok blong God oli mas talemaot tok blong Baebol we i save sevem laef blong man. Wok blong yumi i sem mak long wok blong wan wajman we i givim woning taem hem i luk se trabol i stap kam. Yumi no wantem karem panis from we yumi no givim woning long ol man we laef blong olgeta i stap long denja. (Esik. 33:1-7) !Taswe, i impoten tumas we yumi gohed nomo long wok blong ‘talemaot tok blong God’!—Ridim 2 Timoti 4:1, 2, 5.
3. ?Stadi ya wetem tufala stadi biaen bambae oli tokbaot wanem?
3 Long stadi ya, bambae yu lanem olsem wanem blong winim ol samting we oli save blokem yu long wok ya blong prij we i save sevem laef blong man, mo olsem wanem yu save halpem plante moa man. Long nekis stadi, bambae yu lanem olsem wanem blong gat gudhan blong tijim ol man long ol impoten trutok blong Baebol. Mo long namba tri stadi, bambae yu luk sam stori long saed blong ol gudfala frut we i kamaot long wok blong talemaot Kingdom long olgeta ples blong wol. Be bifo we yumi tokbaot ol samting ya, i gud blong tingting bakegen long ol risen from wanem taem blong yumi i impoten tumas.
?From Wanem Tingting Blong Plante Man i Foldaon?
4, 5. ?Wanem trabol i stap kasem ol man? ?Trabol ya i mekem wanem long filing blong plante man?
4 Ol samting we i stap hapen long wol oli soemaot se yumi stap long taem blong “en blong fasin blong laef blong wol ya,” mo se en ya i klosap tumas. Ol man oli stap kasem ol trabol we Jisas mo ol disaepol blong hem oli talem se bambae i makem “ol las dei.” Long ol trabol ya, i gat wo, kakae i sot, etkwek, mo plante narafala bigfala trabol we ol man oli kasem. Long olgeta ples blong wol, ol man oli no wantem folem loa, oli wantem mekem samting we olgeta nomo oli wantem, mo oli agensem samting we God i wantem. Nating se sam man oli traehad blong folem ol rul blong Baebol, be olgeta tu oli faenem se “laef i strong tumas mo i had blong winim ol trabol.”—Matiu 24:3, 6-8, NW; 2 Timoti 3:1-5, NW.
5 Be bighaf blong ol man oli no save se ol samting ya we oli stap kamaot long wol oli olsem saen we i soemaot wan bigfala samting. Taswe, plante man oli wari tumas long ol trabol we i save kasem olgeta mo famle blong olgeta. Plante man we oli lusum wan famle no fren long ded no oli kasem wan narafala bigfala trabol long laef blong olgeta, oli harem nogud tumas. Ol man ya oli no save from wanem ol samting ya i hapen mo wanem rod blong winim ol trabol ya, ale, tingting blong olgeta i foldaon.—Efes. 2:12.
6. ?From wanem ‘Bigfala Babilon’ i no save givhan long ol man blong hem?
6 ‘Bigfala Babilon’ we i minim olgeta giaman skul blong wol, i no leftemap tingting blong ol man nating. Defren olgeta, “ol man long wol oli go mekem nogud wetem hem, olsem we oli fuldrong long waen blong hem,” nao oli konfius gud long saed blong God mo Baebol. Mo tu, Bigfala Babilon i mekem fasin blong woman blong rod blong switim mo kontrolem “ol king blong wol” (NW), mo i yusum ol giaman tijing mo wok blong rabis spirit blong holem ol man oli stap aninit long paoa blong ol gavman blong wol. Long rod ya, ol giaman skul oli kasem paoa mo oli kontrolem ol man. Be, sore tumas, oli tanem baksaed fulwan long ol trutok blong Baebol.—Rev. 17:1, 2, 5; 18:23.
7. ?Wanem bambae i hapen long bighaf blong ol man? ?Be olsem wanem yumi save halpem sam long olgeta?
7 Jisas i talem se bighaf blong ol man oli stap wokbaot long wan bigfala rod we i go kasem ded blong olwe. (Mat. 7:13, 14) Samfala oli stap folem bigfala rod ya from we oli no wantem bilif long ol tijing blong Baebol. Be plante man oli folem rod ya from we oli bin kasem tijing we i giaman, nao oli stap long tudak long saed blong samting we Jeova i wantem olgeta blong mekem. Ating sam long olgeta bambae oli jenisim fasin blong laef blong olgeta sipos oli kasem klia tijing blong Baebol we i soem long olgeta from wanem oli mas jenis. Be olgeta we oli stap long Bigfala Babilon mo we oli gohed nomo blong no wantem folem ol rul blong Baebol, bambae God i no save sevem olgeta long taem blong “bigfala trabol” long wol ya.—Rev. 7:14.
Gohed Nomo Blong Prij
8, 9. ?Ol faswan Kristin oli mekem wanem taem samfala oli agensem olgeta? ?From wanem oli mekem olsemia?
8 Jisas i talem se ol disaepol blong hem bambae oli talemaot gud nius blong Kingdom mo pulum ol man oli kam man blong hem. (Mat. 28:19, 20) From samting ya, stat long taem bifo kam kasem tede, ol trufala Kristin oli save se blong stap tru long God mo blong soemaot bilif, oli mas joen long wok blong prij. Taswe, ol faswan disaepol blong Jisas oli gohed nomo blong prij, nating se sam man oli agensem olgeta. Oli trastem Jeova se bambae hem i givim paoa long olgeta, mo oli prea blong hem i mekem olgeta oli gohed strong blong ‘talemaot ol tok blong hem, we tingting blong olgeta i strong.’ Jeova i ansa long prea blong olgeta, i givim fulap tabu spirit long olgeta, nao oli talemaot tok blong hem wetem strong tingting.—Wok 4:18, 29, 31.
9 ?Olsem wanem taem ol man blong agens oli stat blong kilim ol disaepol blong Jisas? ?Tingting blong ol disaepol i no moa strong blong talemaot gud nius? Si, i strong yet. Ol lida blong skul blong ol man Jiu oli kros long ol aposol from we oli stap prij. Ale oli holem ol aposol, oli tok strong long olgeta, mo oli wipim olgeta. Be ol aposol oli gohed nomo. ‘Evri dei, oli stap tijim ol man, mo oli stap talemaot gud nius ya blong Jisas, se hem i Mesaea.’ Tingting blong olgeta i klia se oli mas ‘obei long God, oli no save obei long man.’—Wok 5:28, 29, 40-42.
10. ?Wanem sam traem we ol Kristin tede oli fesem? ?Be wanem samting i save kamaot from gudfala fasin blong olgeta?
10 Bighaf blong ol man blong God tede oli no bin kasem strong fasin agens, we ol man oli kilim olgeta no sakem olgeta long kalabus from we oli stap prij. Nating se i olsem, olgeta trufala Kristin evriwan oli fesem sam trabol mo traem. Tingbaot: From we yumi trenem tingting blong yumi blong folem ol rul blong Baebol, maet yumi tekem wan desisen we ol narafala man oli no laekem, no yumi folem wan fasin we i defren long ol narafala man. Ating ol man long ples blong wok blong yu, no ol fren blong yu long skul, no ol man we oli stap raonabaot long yu, oli ting se yu yu narakaen from we yu mekem ol desisen blong yu folem ol rul blong Baebol. Be yu no mas letem tingting blong olgeta i blokem yu. Wol ya i stap long tudak long saed blong God mo Baebol, be ol Kristin oli mas “saenaot olsem laet long wol.” (Fil. 2:15, NW) Maet samfala we oli luk ol gudfala fasin blong yu bambae oli tinghae long yumi mo givim ona long Jeova from.—Ridim Matiu 5:16.
11. (a) ?Maet samfala oli mekem wanem taem yu prij long olgeta? (b) ?Aposol Pol i fesem wanem kaen fasin agens? ?Mo hem i mekem wanem taem oli agensem hem?
11 Blong gohed nomo blong talemaot Kingdom, yumi nidim fasin no fraet. Samfala, wetem sam famle blong yu tu, oli save jikim yu no mekem wan narafala samting blong traem blokem yu. (Mat. 10:36) Ol man oli kilim aposol Pol, i no wan taem nomo be plante taem, from we hem i gohed blong prij. Be makemgud wanem we hem i raetem long saed blong fasin agens ya, hem i se: “Ol man oli mekem i nogud long mifala, mo oli tok nogud tumas long mifala tu. Be God blong yumi i mekem tingting blong mifala i strong blong kam talemaot gud nius blong hem long yufala, long fes blong plante man we oli agens long tok ya.” (1 Tes. 2:2) Yumi save se, afta we oli bin holem Pol, tekemaot klos blong hem, wipim hem, mo sakem hem long kalabus, bambae i no isi blong hem i gohed blong talemaot gud nius. (Wok 16:19-24) ?Wanem samting i mekem tingting blong hem i strong blong gohed? Tingting blong hem i strong from we hem i wantem tumas blong finisimgud wok blong prij we God i putum long han blong hem.—1 Kor. 9:16.
12, 13. ?Wanem ol trabol we samfala oli fesem? ?Mo oli mekem wanem blong traem winim ol trabol ya?
12 Wan narafala samting we i mekem i had blong holemtaet strong tingting, hemia taem yumi prij long ol ples we plante man oli no stap long haos, no plante man oli no wantem lesin long gud nius blong Kingdom. ?Yumi save mekem wanem? Maet yumi mas mekem tingting blong yumi i strong moa blong tekem janis blong prij long eniples we yumi mitim man. Mo tu, maet yumi mas jenisim program blong yumi blong prij long taem we yumi save faenem moa man long haos, no prij long ol ples we i gat plante man long hem.—Skelem Jon 4:7-15; Wok 16:13; 17:17.
13 Plante long yumi oli fesem sam narafala trabol, from we yumi stap kam olfala no yumi sik. Ol trabol ya oli save mekem se yumi no moa mekem plante long wok blong prij. Sipos yu yu wan long olgeta ya, yu no mas letem tingting blong yu i kam slak. Jeova i savegud wanem we yu yu naf blong mekem, mo hem i glad tumas long ol traehad blong yu. (Ridim 2 Korin 8:12.) Nating se yu fesem wanem kaen trabol—fasin agens, ol man oli no wantem lesin long gud nius, no sik—yu mas mekem wanem we yu yu naf blong mekem blong talemaot gud nius long ol narafala man.—Prov. 3:27; skelem Mak 12:41-44.
‘Luklukgud Long Wok Blong Yu’
14. ?Aposol Pol i givim wanem eksampol long ol narafala Kristin? ?Mo hem i givim wanem advaes?
14 Aposol Pol i tinghevi long wok blong prij, mo hem i leftemap tingting blong ol narafala Kristin blong oli mekem olsem tu. (Wok 20:20, 21; 1 Kor. 11:1) Wan Kristin long faswan handred yia we Pol i givim spesel toktok long hem blong leftemap tingting blong hem, hemia Akipas. Long leta we Pol i raetem long ol Kristin long Kolosi, hem i talem se: “Yufala i mas talem long Akipas blong hem i luklukgud long wok blong Masta we hem i agri finis blong mekem, blong bambae hem i save finisimgud wok ya.” (Kol. 4:17, NW) Yumi no save plante samting long saed blong Akipas mo laef blong hem, be i klia se hem i bin agri blong mekem wok blong talemaot gud nius. Sipos yu yu wan Kristin we yu givim laef blong yu finis long Jeova, yu tu yu bin agri blong mekem wok blong prij. ?Olsem wanem? ?Yu yu stap gohed blong luklukgud long wok blong yu, blong yu save finisimgud?
15. ?Taem wan Kristin i givim laef blong hem i go long Jeova, hem i soemaot se hem i wantem mekem wanem? ?Wanem ol kwestin we oli stanap long saed ya?
15 Bifo we yumi tekem baptaes, yumi bin prea long Jeova wetem fulhat blong yumi blong givim laef blong yumi i go long hem. Hemia i soemaot se yumi bin gat strong tingting blong mekem samting we hem i wantem. Taswe, i gud we yumi tingbaot naoia se: ‘?Mi mi rili soemaot long laef blong mi se samting we God i wantem i moa impoten i bitim ol narafala samting?’ I tru, ating yumi gat plante narafala wok we Jeova i putum long han blong yumi, olsem wok blong givim ol samting we famle blong yumi i nidim. (1 Tim. 5:8) ?Be yumi yusum ol narafala taem mo paoa blong yumi olsem wanem? ?Wanem samting we i moa impoten long laef blong yumi?—Ridim 2 Korin 5:14, 15.
16, 17. ?Wanem rod we ol yangfala Kristin mo olgeta we oli no gat plante hevi wok oli save tingbaot?
16 ?Olsem wanem? ?Yu yu wan yangfala Kristin we yu givim laef blong yu long Jeova finis, mo yu jes finisim ol yia blong skul, no klosap bambae yu finisim? Ating yu yu no gat ol hevi wok yet long saed blong famle. Taswe, ?yu yu plan blong yusum laef blong yu olsem wanem? ?Wanem ol desisen we bambae oli givhan long yu moa blong holem promes blong yu blong mekem samting we Jeova i wantem? Plante oli jenisim sam samting long laef blong olgeta blong oli save mekem wok blong paenia, mo oli bin kasem bigfala glad mo haremgud from.—Sam 110:3; Pri. 12:1.
17 Ating yu yu wan yangfala man no woman. Maet yu wok fultaem be yu no gat plante narafala wok blong mekem, yu stap lukaot long yu wan nomo. Ating yu yu laekem blong joen long ol wok blong kongregesen go kasem mak we program blong yu i letem. ?Be, yu ting se yu save kasem moa glad yet? ?Yu yu bin tingbaot blong joen moa long wok blong prij? (Sam 34:8; Prov. 10:22) Long sam ples, i gat plante wok i stap yet blong faenem ol man mo talemaot trutok we i save sevem laef blong olgeta. ?Olsem wanem? ?Yu yu save jenisim sam samting long laef blong yu blong yu go long wan ples we i nidim moa man blong talemaot Kingdom?—Ridim 1 Timoti 6:6-8.
18. ?Olsem wanem wan yangfala man mo woman i jenisim sam samting long laef blong tufala? ?Mo wanem i kamaot from?
18 Tingbaot tu Kristin long Yunaeted Stet we nem blong tufala Kevin mo Elena.a Taem tufala i mared, tufala i mekem olsem ol narafala yangfala long ples blong tufala, tufala i harem se tufala i mas pem wan haos. Ale tufala tugeta i wok fultaem blong tufala i save gat ol samting blong mekem laef blong tufala i isi. Be wok blong tufala mo ol wok long haos i mekem se tufala i gat smol taem nomo i stap blong prij. Nao tufala i luksave se tufala i stap givim klosap olgeta taem mo paoa blong tufala blong lukaot long olting blong tufala nomo. Tufala i stap wajem gud wan brata mo sista we tufala i paenia mo tufala i no gat plante samting, be tufala i hapi. Nao Kevin mo Elena i tekem desisen blong jenisim sam samting long laef blong tufala blong putum ol samting we oli moa impoten oli stap long fasples. Tufala i prea long Jeova blong i lidim tufala, nao tufala i salem haos blong tufala mo tufala i muv i go long wan smol haos nomo. Elena i katem ol aoa blong wok blong hem, mo hem i stat long wok blong paenia. Ol gudfala stori blong prij we Elena i talem long Kevin i leftemap tingting blong Kevin tu blong lego fultaem wok mo stat long wok blong paenia. Afta we sam taem i pas, tufala i muv i go long wan kantri long Saot Amerika blong wok long ples we i nidim plante moa man blong talemaot Kingdom. Kevin i talem se: “Mitufala i gat wan hapi mared finis. Be taem mitufala i traehad tugeta blong mekem moa long wok blong God, mitufala i hapi moa.”—Ridim Matiu 6:19-22.
19, 20. ?From wanem wok blong prij i moa impoten i bitim ol narafala wok tede?
19 Wok blong talemaot gud nius i moa impoten i bitim olgeta narafala wok long wol tede. (Rev. 14:6, 7) Wok ya i leftemap nem blong Jeova mo i givhan blong mekem nem ya i stap tabu. (Mat. 6:9) Tok blong Baebol i givhan long plante taosen man mo woman evri yia we oli bilif long tok ya, blong oli mekem laef blong olgeta i kam moagud, mo samting ya i save lidim olgeta oli go kasem laef. Olsem aposol Pol i talem: “?Sipos man i no go talemaot nius blong God, bambae ol man oli save harem nius ya olsem wanem?” (Rom 10:14, 15) Tru ya, bambae oli no save harem. I gud yu gat strong tingting blong mekem evri samting we yu yu naf blong mekem blong finisimgud wok we God i givim long yu.
20 I gat wan narafala samting bakegen we yu save mekem blong givhan long ol man blong kasem save se hadtaem ya we yumi laef long hem i impoten tumas, mo blong kasem save long frut blong ol desisen we oli tekem. Yu mas kamgud moa long fasin blong yu blong tijim ol man. Nekis stadi bambae i tokbaot olsem wanem yu save mekem olsem.
[Futnot]
a Mifala i jenisim nem blong tufala.
?Bambae Yu Yu Ansa Olsem Wanem?
• ?Wanem wok we ol Kristin oli mas mekem long ol man?
• ?Yumi mas mekem wanem taem sam samting oli blokem yumi long wok blong prij?
• ?Olsem wanem yumi save finisimgud wok blong prij we yumi agri blong mekem?
[Tok blong pija long pej 9]
Yu nidim fasin no fraet blong gohed blong prij taem ol man oli agensem yu